1 Gè woo wolai ta mɛnini, é zeɠe GALA sei ʋɛlɛi wu, é ɠɛ geezuɠeela lɔfelaiti ma: «À li, wo GALA ná-ziiɠula aniɲaka lɔfelaiti suwo, wo pu ya eteai zu.»

2 Geezuɠeela mɔungi liini, é ná-aniɲakai zuwo, é pu ya eteai zu. Divologi ná-taɓai ɠaawanaai gola, naa loni nuiti ba, niiti filɛ zuai ná-poogi ɠɛni ti ʋa, ta ti ɠɛni nɔkɔsu baaɠulabai wu.

3 Geezuɠeelai velesiɛi ná-aniɲakai zuwoni, é pu ya kpoloɗɛi ɠa. Ziɛi ɠɛni eɠɛ nu ʋoomai ma ɲamai, fuluanii kpein ge zaani, niiti ti ɠɛni kpoloɗɛi wu.

4 Geezuɠeelai zaʋasiɛi ná-aniɲakai zuwoni, é pu ya ziɛ wolaiti ga ta ziɛungiti su. Ti pɛ ti valiboni, ti ɠɛ ga ɲamai. 5 Gè geezuɠeelai woomɛnini, nii é zeini ziɛ vaiti unda, é ɠɛ ma:

7 Gè zalaɠa ɠulazuʋɛ woomɛnini, é ɗa ɠɛ ma:

8 Geezuɠeelai naanisiɛi ná-aniɲakai zuwoni, é pu ya foloi ma. Ma zobogi veeni foloi ya ga é ɗa nuiti gala ga ná-abui. 9 Nuiti ti ɠɛni ɠalazu ga die golai. GALA nii zobogi bɛ naama nimiza vaiti unda, ti ɠɛni woo ɲɔiti bosu naa laalɔɠɔma, ti la ti-ziɛ ʋelei maavaliboni, ti ʋa lɛbiyai ve GALA bɛ.

10 Geezuɠeelai lɔɔlusiɛi ná-aniɲakai zuwoni, é pu ya filɛ zuai ná-masa kpɔkpɔgi ma. Kpidii ʋɛɛni ná-masada yooi pɛ su. Nuiti ti ɠɛni ti-nɛgiti miizu, taɓai maaʋele ma. 11 Ti ɠɛni woo ɲɔiti bosu geeɠɔlɔgi ma ƓALAGI laalɔɠɔma, tɔɔzei taɓai ʋa ta divologi ʋa é ɠɛni ti ʋa. Kɛlɛ ti la ɠɛni ti-ziɛ ʋelei maavaliboni, ti ʋa zeɠe ta-ɠɛɛwoti ɲɔiti polu.

12 Geezuɠeelai lɔzitasiɛi ná-aniɲakai zuwoni, é pu ya ziɛ wolai Efelate ɠa. Ma ɗɛi vɔɔni, ga é pelei ɓɛtɛ masagiti bɛ, ti ʋaazu, ti zeɠe folo ɠulazu ʋelei. 13 Gè kɔzɔba yɛnvu saʋagɔiti kaani, ti ɠɛai eɠɛ zɔlɔgiti, ta ɠɛni ɠulazu vamɔɠɔgi laaʋɛ, ta ɗa ɠula filɛ zuai laaʋɛ, ta ɗa ɠula zɛɛ ɠala goo wo nui laaʋɛ. 14 Tiya ɠa ti ga inɛ zɛnvuiti, ti laavɔɔ vaiti kɛɛzu. Zɛnvu saʋagɔi niiti ka ti liizu etea masagiti pɛ pɔ bɛti, ga ti ti ɠaalɛ ba kɔɔɠɔ vai ma, GALA Zɛbɛi-Pɛ-Maliɠii ná-folo wolai zu.

15 Maliɠii ɠɛ ma: «Wɛlɛ, nà ʋaazu eɠɛ unma nu! Undaanɛ nu ɠa ga naama nui, nii é wɛlɛzu ɓɔɠɔ ma, é ɗa ná-seɠeiti makɛ, ga é mina ziɛ ga maaɲakai, nu mina unfesu ɠa!»

16 Zɛnvu ɲɔiti ti masagiti gaalɛɛni ba naama adaʋɛ, ʋɛ ná laasei ge Eɓulu wooi zu ga Ɠaalemagedɔn.*16:16 Ɠaalemagedɔn ɠa ga Megido taa wolai ma ɠizei, taai nii é ʋuuni nɛmɛi zu Kaalamɛle gizei ɠɔɠɔaʋɛ, ʋɛ mɔungi zu, kɔɔɠɔ ɓaagiti ti ɠɔɔni ná. Wɛlɛ ʋɛti: TɠN 5:19; 2Ma 23:29.

17 Geezuɠeelai lɔfelasiɛi ná-aniɲakai zuwoni, é pu ya fiilɛi zu. Wooi woni woo wola zu, é ɠula GALA sei ʋɛlɛi wu, é zeɠe masa kpɔkpɔgi ʋɔ bɛ, é ɠɛ ma: «É ɓega ga ɠɛ!» 18 Mainmainti ti ɗa saɠa, wooiti ti ɗa ɠula, tonai ɗa kpunɛ, zou ɓali wolai ɠɛɛni, nii kɛɠala you ɓali wola la dɛ ɠɛɛni kaipa nuɓusɛi ɠulani etea. 19 Taa wolai ʋalini su saʋa, zooiti pɛ ta-laa wolaiti ti woloni. GALA ge la ɠɛni yeemani Ɓaɓilɔne taa wolai ma, é ná-ziawɔi loni da, é ɓɔɔle la, ná-ziiɠula golai ma lɔɔi. 20 Ziɛ zaama yooiti pɛ ti ɲɛɛlɛni, nu la mɔ gize nɔpɛ kaani ʋolu ɲɛgɛlɛin. 21 Sakɔtu wolaiti, nii buɲɛgi a ɠɛ ga kilo ʋuunaanigɔ (40) ɠɛɠala, naati ti ɠɛni zeɠezu geezuʋɛ, ti ɗa loo nuɓusɛiti ma. Nuɓusɛiti ti ɠɛni woo ɲɔiti bosu GALA daalɔɠɔma, tɔɔzei sakɔtui ná-nimiza vai ʋa, mazɔlɔɔ naama nimizai ɲɔuni gola da ge leʋe.