1 Naa ʋoluma geezuɠeela lɔfelai, niiti aniɲaka lɔfelai ɠɛni ti ya, naa gila ge ʋaani, é ɠɛ mà: «Ʋaa lɛɛ, koloɠolo anzanu wolai nii é zeini ziɛ wolaiti ga, gè ná-peelalai ma ɓakɔi lɛ ga ɗe, é zeelizu ma. 2 Etea masagiti ti lɔɔni koloɠologi zu ta tiye, eteai zu nuɓusɛiti ti ɓɔɔleni ga ná-koloɠolo dɔɔi, é ti zo.»

3 GALA Zɛnvui yeini mà, geezuɠeelai li ga ze teʋebai zu. Gè anzanui ɠaani miná, é zeini filɛ zua ɓɔigi ɠɔma, nii woo ɲɔu wo fai GALA daalɔɠɔma, naa ma laaseigiti ti maaʋɛ pɛ, nɔungi ɠɛni ba lɔfela, minɛi ɠɛ ba puu. 4 Anzanui naa maaɠilini ga seɠe ɓɔigi ta seɠe ɓɔi sɔsɔgi, maaɠili ga zanugi é ɗa volo, ta kɔtu zɔngɔ ɓaagiti. Zanu ziawɔi ɠɛni zoni zea, daavegai ga kɔzɔba vaiti kpein é sɔlɔɔgai ná-koloɠologi zu. 5 Dɔɔɠuzu vai ma laaseigi zɛʋɛni toʋalaʋɛ ga: «Ɓaɓilɔne wolai, koloɠolo anzanuiti ti-lee ʋe, ta etea ɠɔzɔba vaiti». 6 Gè anzanui naa ɠaani, GALA ná-nuiti ma ɲamai, ta Yesu ná-zeeleiti ma ɲamai sogai eɠɛ dɔɔi. Kaai ma bɛ̀, dàavɔɔni gola.

7 Geezuɠeelai ɠɛni mà: «Leeni vaa zu è laavɔɔzu? Nà anzanui naa ná-fai ma lɔɔɠuzu vai ʋoluʋɛ wosu è ma, ta filɛ zuai é seɠezu, nii nɔungi ba lɔfela, minɛi ba puu. 8 Filɛ zuai è kaai, é ɠɛni vulua mɔungi, kɛlɛ é la mɔ ná, maanɛɛʋɛ é lɛ, é ɠula zeɠezaɠa ɓokulagi zu, é li ná-undaaʋiligi zu. Eteai zu nuɓusɛiti, niiti ti-laaseigi la zɛʋɛni zɛnvu zɛʋɛi zu kaipa eteai ɓɛtɛ yee ma, naati daa ɠa vɔ, ta filɛ zuai ɠaana, tɔɔzei é ɠɛni vulua mɔungi, kɛlɛ é la mɔ ná, tama toɠa ɠulazu kɛlɛma mɔnɔ.

9 «Kɛni ɠimalai ɠɛ nu ya ʋɛ. Nɔun dɔfelaiti ta ga gize lɔfelaiti, niiti anzanui zeini ti unda. 10 Kɛlɛ ta ɓalaa ga masa dɔfelaiti. Dɔɔlugɔiti ti loa bu, gilagi ɠa ná, zɔi la dɛ ʋaani. Siɛgi zu é ʋaazu la, maanɛɛʋɛ é yɛ ná nɔ yeeɠɛɠala go laawu. 11 Filɛ zuai é ɠɛni vulua mɔungi, kɛlɛ é la mɔ ná, naa ɓɔɠɔi ɠa é ga masagi lɔsaʋasiɛi, toɠa ɓalaa ga dɔfelaiti ti ta, toɠa liizu undaaʋiligi zu.

12 «Ma minɛ puugɔiti è ti ɠaai, naati ta ga masa puugɔiti, ti la dɛ masadai zɔlɔɔni, kɛlɛ ta masadai ma zobogi zɔlɔɔ yeeɠɛɠala ɠila daawu ʋɔɔma ta filɛ zuai. 13 Ti ɠoozu ɠisiɛi ɠa ga ani ɠila nɔ, ga ti ti-zɛbɛi ta ta-zobogi ve filɛ zuai ya. 14 Ta kɔɔi ʋɛɛ Baala Ziʋoi ʋa, kɛlɛ Baala Ziʋoi ɠa pilɛ sɔlɔɔ ti ma, mazɔlɔɔ tɔ ɠa é ga maliɠiiti ti-Maliɠii, ta masagiti ta-Masagi. Ná-nuiti é ti loligai, é yiimazeɠe ga tiye, ti ga wooɠɛɠila nuiti, ta naati ta vɔni ti ma ɓalaa.»

15 Geezuɠeelai ɠɛni mà mɔnɔ: «Ziɛiti è ti ɠaai, niiti koloɠolo anzanui zeini ti ɠa, naati ta ga nuɓusɛiti, ta bɛbɛiti, ta ziiti, ta zii wooiti. 16 Minɛ puugɔiti è ti ɠaai, ta filɛ zuai, ta koloɠolo anzanui wɔinzeɠe, ti maavo, ti maaɲakai ɠula, ti ma zuai mi, ti mɔtai ɠala. 17 Mazɔlɔɔ GALA ge puuni ti-yiimaʋɛti ga ti kisu vaiti daazeeli, ti zoloo faa ɠila ma, ti ta-masadai ma zobogi ve filɛ zuai ya, eyɛsu GALA daawooiti ti ʋilɛ su. 18 Anzanui nii è kaai, naa ɠa é ga taa wolai, é masadai ɠɛɛzu eteai zu masagiti pɛ unda.»