22
1 Geezuɠeelai zɛnvu ɗɛ wolai lɛɛni ga ze, é ɗa ʋili, é ɗa ɠula GALA ta Baala Ziʋoi ta-masa kpɔkpɔgi wu, é ɗa volo eɠɛ kɔtui daa ga kilisetalegi, 2 é ɠɛni yeizu taai zaamaʋɛ. Zɛnvu wului ɠɛni loni ziɛ wolai ɠakama felegɔiti, é ɗa waa ga seizu puugɔ maazu felegɔ (12) konagi laawu, alu-o-alu é ɠɛni waazu ná ɠɛ ɠila. Gaalaagiti ka ti ga ziiti kɛdɛ gani. 3 Ani nɔpɛ ge la mɔ ɠɛa ná, nii GALA ná-foovooi ɠa yei ma.
GALA ta Baala Ziʋoi ta-masa kpɔkpɔgi ɠa ɠɛ taazuʋɛ, ná-botiɠɛ nuiti ta dɛbi. 4 Ta gaazuʋɛ ɠa, daaseigi ɠa zɛʋɛ ti-loʋalaʋɛti. 5 Kpidi la ʋɛa ná eyɛsu pɛ. Nu ɓɛdɛ la mɔ ɠɛa lanbo zeze nɔpɛ ba, anɛɛ foloi ná-wozakalagi ɓalaa, tɔɔzei Maliɠii GALA ná-wozakalagi ɠa yei ti ma. Ta masadai ɠɛ eyɛsu ɠɔ.
Yesu ʋaa laa velesiɛi
6 Naa ʋoluma geezuɠeelai ɠɛni mà: «Niima wooiti ta ga gaamai, maanɛɛʋɛ nu la ti la. Maliɠii GALA, nii é wooi ʋuuzu GALA goo wo nuiti da, naa ɠa é ná-geezuɠeelai leʋeni, ga é naa lɛ ga ná-botiɠɛ nuiti, nii maanɛai é ɠɛ fala.»
7 Yesu ɠa ɠɛɛzu ma: «Wɛlɛ, nà ʋaazu fala!»
Undaanɛ nu ɠa ga naama nui, nii é ziɛzu ga niima zɛʋɛi zu ɠulakɛlɛma ɓɔɛiti.
8 Nà Zan ʋe, nà ɠa gè niima vaiti mɛnini, gè ti ɠa. Siɛgi zu gè ti mɛnini da, gè ti ɠa, gè laani geezuɠeelai ɠɔɠɔwu, nii é ti lɛɛni ga ze, ga gè nɔkɔ bu. 9 Kɛlɛ é ɠɛni mà: «Mina naa ɠɛ! Nà ga botiɠɛ nui ga ɗɔun è ɠɛʋele, wa è-ɠɛɛleaiti GALA goo wo nuiti, ta niiti ti ɠolozu, ti ɗa ziɛ ga sɛʋɛi nii zu wooi. Nɔkɔ GALA bu!»
10 Naa ʋoluma é ɠɛni mà: «Mina sɛʋɛi nii zu ɠulakɛlɛma ɓɔɛiti kɛ ga dɔɔɠuzu vaa, mazɔlɔɔ niima vaiti kɛ yeei maaɓuɠaa. 11 Zɔi é ga telebotala nui, naa yɛ telebotala vai laawu nɔ. Zɔi é ga kɔzɔba nui, naa yɛ kɔzɔba vai laawu mɔnɔ. Kɛlɛ telebo nui yɛ telebo fai ɠɛɛzu nɔ mɔnɔ. Zɔi ɲadegai, naa yɛ ɓɔɠɔ ɲadesu mɔnɔ.»
12 Yesu ɠa ɠɛɛzu ma: «Wɛlɛ, nà ʋaazu fala! Nà ʋaazu ga kulanumaiti, gè fe ɛsɛ zea, é zoloo kɛɛwotii ma. 13 Nà ɠa gè ga Alefa ta Womega, ma mɔungi ta ma ɠaaɓelagi, tɔɔzeizuʋɛ ta gaaɓelazuʋɛ.»
14 Undaanɛ nu ɠa ga naati, niiti ti ɓɔɠɔ maazeɠeiti gbazu. Naa maaʋele ma, ma zobogi ɠa ve ti ya ga ti zɛnvu wulu waai mi, ti lɛ taazuʋɛ ga siɠida ʋelei. 15 Kɛlɛ kɔzɔba nuiti ta yɛ taa ʋoluʋɛ, ta zoɠo vaa ɠɛ nuiti, ta koloɠolo nuiti, ta nu ʋaa nuiti, ta kɔɔɠɔ gani kɔɔ nuiti, ta nu nɔpɛ zɛɛi nɛai bɛ, é ɗa bo, é ɗa ziɛ la.
16 «Nà Yesu, nà ɠa gè nà-geezuɠeelai leʋegai ga é niima vaiti pɛ daazeeli Egilisiiti su. Nà ga Davide ma zapei ma ʋɔnɔbai, mavofodai, nà ɠa gè ga geelaalaosuʋɛ ma zomideɠai, é volozu.»
17 GALA Zɛnvui ta Anza Ɓeai ti ɠɛni ma: «Ʋa!»
Zɔi é niima wooiti mɛnisu, naa ɠɛ ma: «Ʋa!»
Ɗɛigi kpɔɔle wɔin é ma, ʋa,
zɔi nɔpɛ zɛnvu ɗɛi wɔin ma, naa seɠe nɔ, geya vaa la ba.
Woo ɠaaɓelagi
18 Nà Zan, nà maaɓakpasu, ga nu-o-nu é sɛʋɛi nii zu ɠulakɛlɛma ɓɔɛi mɛnisu, ni nu a ta laana ma, nimiza vaiti ti zɛʋɛai niima zɛʋɛi zu, GALA ka naati da tɔun unma. 19 Ni nu ma ga ta ɠulana sɛʋɛi nii zu ɠulakɛlɛma ɓɔɛiti da, GALA ka ma nui nɔnɔ ɠula zɛnvu wului ná-fai zu, ta taa ɲadegai, niiti ta-vai zɛʋɛai niima zɛʋɛi zu.
20 Zɔi é gaama vai niiti daazeeliai, é ɠɛ ma: «Ungo, nà ʋaazu fala!»
Amina! Ʋa Maliɠii Yesu!
21 Maliɠii Yesu ná-zaalai yɛ ɛsɛ pɛ ba.