18
An Babilonia ta'a'talhcha
1 Akxni chunchacha ikla'ts'in'olh ixli'astan an lakt'iyan ta'alhtajupalh pumatam angelh, ay lhich'alhkati ixlit'ajun, chi wanaj mapulhku'olhi an lakaat'un la ixmakalip'at. 2 Chi p'ascha tukani chiwinilh, najun:
“¡Ta'a'talhcha, ta'a'talhcha an ay Babilonia!
Wa ixcha'achak'an lakmakxkay'uni chaway,
chi wa taputats'e'acha chux tanlhun lakmakxkay'un
chi wa ixpamaj'anchak'an chux tanlhun lakmakxkay ts'o'on chi yu jantu jalhila'ts'imputu.
3 Mu ta kilhmakchux ta'alin an lapanakni ta'otlhi an jamaskajanti xaxkan uva yu wa aya pulay,
chi an rejnin yu ani lakaat'un tat'ajun wa ayacha tat'aalalh,
chi an tajast'anan ani lakaat'un tapulhitsukulhcha ixtumink'an tacha an wa lhimo'slaycha lakmasuy yu lajk'usi ixtanlhun an ay la'acha'an.”
4 Ik'asmatpalh chiwimpalakalh an lakt'iyan, najun:
Uxitnan yu kilapanakni, k'at'axt'ut'iti anchunu la'acha'an,
para li jant'u k'ajat'a'ilht'ut'iti ixtala'alhink'an chi jantu katala'cha'ani an ixma'alh'ajnatk'an,
5 mu an ixtala'alhink'an sta an lakt'iyancha cha'alh chi an Dios japastaknilhcha tacha an wa tani talaycha.
6 Wanajcha chuni k'a'ilht'ut tacha ja'ilhtulh an ali'in,
chi pu'a't'uyi k'amap'usp'itnit tacha an lak'ilhtulh an tanlhun.
K'ala'oxinit jamaskajanti xaxkan uva yu a't'uy chuncha ixli'alhp'as tacha an jala'oxinilh an ali'in.
7 K'a'ilht'ut'iti li kaxkanilh chi li kama'alh'ajnalh,
tacha yucha stakcha lalhi li ay chi li sawalhcha lajk'usi tanlhuni lhit'ajun.
Mu an la ixjalhunut najun:
“Ani tacha reynaja ikwilh kit'in.
Jantu wa ikjanimakawpulanticha t'aku',
jantu aktima'alh'ajnalh.”
8 Xliyu wanaj wa tam wilhchan kala'china tanlhun ixma'alh'ajnat:
lhinin, alhut chi chawan, chi kala'xawakanacha laka jikmi,
mu an Jamach'alhkat Dios yucha alhp'as chi yucha kama'niya'.
9 An xarejnin ani lakaat'un yu wa aya tat'alalh an ay la'acha'an chi yu tat'alhitsukulhi tanlhun yu sawalhcha lajk'usi, katalhita'oxila'alhiyacha chi katalhilaj'alhunacha akxni katala'ts'inacha xajin li la'xawakancha. 10 Wa ma'atcha katatayayanta ixlakata li katatalhanajlaka'anacha tacha an kamama'alh'ajnikana', chi katanawna:
“Payniycha, payniycha an ay la'acha'an Babilonia,
yu k'ut'ilh la'acha'an, mu wanaj wa puwalasi chilh mima'alh'ajnat!”
11 An yu tajast'anan ani lakaat'un wachu katalhila'ta'oxila'alhiya chi katalhilaj'alhuna anchunu la'acha'an, mu jantucha xamati katijatamawnilh ixlist'atk'an: 12 lhist'at tacha oro chi plata chi yu la'lhuw xtapalh chiwx chi perlas chi la'ch'it yu laj'oxi yu de lino chi de seda, yu xmumuw chi slapulh, chi ta tipachux yu lhaklhij akamin jalakch'uk'unti k'iw chi tanlhuncha yu de marfil la'oxikanta chi tanlhuncha yu de laj'oxi k'iw ilhtukanta chi yu de bronce chi yu de tsasnat chi yu de mármol, 13 wachu an canela chi tanlhuncha lhala'oxin yu lak'akamin, chi p'um chi perjume chi tanlhuncha alhch'ajat chi jamaskajanti xaxkan uva chi asayte chi yu sawalhcha oxi harina chi trigo, chi jatapakxatcha yu tamak'uk'anan chi borregojcha chi kawayo chi carreta sta lapanakni yu wa japutapatsakancha. 14 Chi an la'acha'an katajuna:
“¡Jant'uch'a t'u'u lhit'a'un an yu sawalhch'a ixlaj'ach'aniy lajkan jatawk'at,
ixpujun'alhinch'a ma'ats'an'at'i chux,
an lajk'usi mintanlhun chi amintumin!”
15 An yu yucha ixtalakst'ay ani tanlhun chi an yu tapulhitsukulhcha ixtumink'an an ay la'acha'an, wa ma'atcha katatayayanta, mu katatalhamniyacha an ixma'alh'ajnat an ay la'acha'an, katala'ta'oxila'alhiyacha chi katalaj'alhunacha, 16 chi katanawna:
“¡Payniycha, payniycha an ay la'acha'an!, oxi linojo ixmala'ch'ininta,
an ixla'ch'it xmumuw chi slapulhi ixjunita,
ixlakamalht'ak'akantacha laka oro chi perla
chi yu la'lhuw tapalay chiwx.
17 ¡Walh chi wanaj wa puwalasi la'mix'olh ani lajk'usi lhuw tanlhun!”
Ixchuxk'an an xacapitanin an barco chi ixchuxk'an yu tama'pu'an an barco, yu inta tita'an chi an marinerojnin chi ixchuxk'an yu ancha tamakutuy an alamalh yu taput'ajuncha, wa ma'atcha tatayachalh, 18 chi akxni tala'ts'incha an xajin tacha an la'xajuy an ay la'acha'an, talakt'asalhcha tanajun:
“Jantu a'tam alinta la'acha'an yu sawalh alhp'asni tacha an Babilonia.”
19 Chi talak'uktawk'alhcha po'xmi mu ixtala'ta'oxila'alhiycha chi ixtalaj'alhuncha chi talakt'asalhcha, ixtalaknajun:
“¡Payniycha, payniycha an ay la'acha'an!
Ixchuxk'an an yu ixtalaklhit'ajun ixbarcojk'an an alamalh
ixtapulhit'ajuncha ixtumink'an an laka laktanlhun yu laj'oxi ixlit'ajun an la'acha'an.
¡Walh chi wanaj wa tam pants'ik'isi lakt'ilhikalh!
20 Uxint'i lakt'iyan k'a'ach'acha ixlakata anchunu la'acha'an,
chi uxitnan yu k'iklak'a'iyat an Dios chi uxitnan yu an Dios tamala'achan
li k'alhich'iwinint'it an ixchiwinti,
k'alaj'ach'ant'itcha, mu an Dios li xta'nilhcha lhima'alh'ajna an la'acha'an
wa xliyu ta'asmatnincha uxitnan li wa ixtalhitama'chapuyan.”
21 Wa chuncha pumatam angelh yu k'ut'ilh ch'ixsaklhi la'atam aya chiwx, wa tacha wa la'atamcha ay xachiwx palakskitin chi warrarracha maka'alh an alamalh, najun:
“Wanajcha chuni jant'u k'at'ilhima'la'ach'ip'ink'a k'alakt'ilhik'ana'a ay la'acha'an Babilonia,
ch'i jant'uch'a a't'am k'at'ila'ts'inch'o'ok'a.
22 Jantucha a'tam kati'asmatcho'okalhi la mincalle jasanti laka arpa
chi laka sp'ililh s'olh chi laka kikst'ililh s'olh
chi jantucha tu'u katitawalh tapatsanin yu tu'u tapatsat tala'taxtuniy
chi jantucha kati'asmatkalhi katimakat'awlh an chiwx yu palakskitininkan.
23 Jantucha a'tam katitapulhkulhi la'atam maklhku ani la'acha'an
chi jantucha kati'asmatkalhi katilakchiwinkalh tan la'tama'xto'kan.
Mu an milapanakni yu ixtajast'anan yu'unchacha
yu laj'alhp'asni ixtajunita an lakaat'un
ch'i ja'o'xch'o'o ta kilhmakchux ta'alin an lapanakni la mijachawanti.”
24 Ani la'acha'ani la'cha'ankalh ixjak'alhnik'an an yu ixtalhichiwiniy ixchiwinti Dios chi an yu ixlapanakni Dios chi ixchuxk'ancha an yu jama'nikanta ani lakaat'un.