19
An lakt'iyan lakchiwinkan
1 Ixli'astan ik'asmatlhicha lhilhuw tukani ixlakchiwinkan an lakt'iyan chi p'as, ixlaknawkan:
¡Aleluya! An ta'alhtaxtut chi an ta'ayat chi an lhich'alhkat ixnawin an kiDiosk'an,
2 mu yucha ts'ajwi xta'niy lhima'alh'ajna yu t'acha'an.
Chi xta'nilhcha ixma'alh'ajnat an ay t'aku yu wa aya lay,
an lakamunulhpa lakt'ilhilhi an t'aku wa xliyu wa aya lay.
An Dios lhich'ilhcha an t'aku li ixjama'ninita an yu tat'atapatsay.
3 Chi a'tam laknawpalakalh:
―¡Aleluya! An xajin an t'aku ixpujun'alhincha katach'ixtayaya'.
4 Wa chuncha an ixpumap'uxamt'at'ik'an tatanin chi an ixt'at'ink'an tuchichun yu tala'ajunta tatatso'ottanilhcha chi tatamuntitanichalhcha lakaat'uni an Dios yu sa' ixwilh la ixputawlan tan ch'alhkatnan. Chi ixtanajun:
―¡Amén! ¡Aleluya!
5 Chi sta an tan wilh putawlan yu puch'alhkatnankan chiwinkalh nawkan:
¡Chux uxitnan lakt'ikt'in chi laj'ajin ch'i yu t'ap'ats'aniyat an Dios
ch'i yu k'iklak'a'iyat, yucha an kiDiosk'ani ay k'ala'ts'int'it!
6 Ik'asmatpalh wachu wa tacha wa tan wanajcha lhilhuw lakchiwinkan, tacha makat'ajun tan lhuw tukan samama xt'ajyalh xkan chi tacha p'as t'asay xalapanak xkan, ixnawkan:
¡Aleluya! Mu an Jamach'alhkat yu kiDiosk'an yu lay ilhtu'ojoy chux,
yucha ch'alhkatnan.
7 Kalaj'achawcha, oxicha kalajk'atsaw chi ayi kala'ts'iw,
mu chilhcha panch'e'ex li katama'xt'o'acha an Jas'at'a Borrego.
8 An ixli'it la'asijtacha.
Makawnikalhcha li kala'ch'ilhcha ixla'ch'it yu k'usi tukan
yu sut'ut'u chi xlimjnik'a,
mu anchunu k'usi la'ch'it yucha jumputun an tacha ts'awj ixtat'ajun an ixlapanakni Dios.
9 An angelh kijunilh:
―K'ats'o'muk'a: “Sawalhcha oxi para yu'uncha an yu jajunkan li kata'alh ma'waynin tan tama'xt'o'a an Jas'at'a Borrego.”
Chi nawpalay:
―Ani chiwinti sawalh, yucha ixchiwinti an Dios.
10 Iktatso'ottanilhi la ixjach'aja an angelh para li ayi akla'ts'ilh. Yucha kijuniy:
―Jant'u ch'uni k'alat'i, kit'in wa ikt'atapatsaycha an Dios, tacha uxint'i chi tacha an mijat'ala'awnin yu ixlisawalh tataylhi'an an tacha najun an Jesús. Yucha an Diosi yu ay k'ala'ts'i. Mu tacha an najun an Jesús yu sawalh yucha yu jamachiwiniy an lapanakni yu tanajun an ixchiwinti Dios.
Lapanak yu ixpu'uk'alh sut'ut'u kawayo
11 An lakt'iyan ikla'ts'in lhti'ay chi ancha talakasulh la'atam sut'ut'u kawayo, an yu ixpu'uk'alh ixjunkan: Yu Sawalh chi yu Muktaxtuy yu najun, mu yucha ts'ajwi ixch'alhkatnan chi ilhtuycha lasat. 12 An ixla'chulh wa tacha akxni an lam lamcha an jikmi ixtasuy, chi an la ix'a'tsulh lhuw coronaja ix'ukwilh chi ixmuntits'o'ulakantacha la'atam ta'a'ut yu wa yucha mispay. 13 An ixla'ch'it wa stakcha ixlipaxta jak'alhni chi an ixta'a'ut ixjunkan: Ixchiwinti Dios. 14 An lhuw xasoldadojnin lakt'iyan ixtach'a'o'aycha laka la'sut'ut'u ixkawayojk'an chi ixtala'mala'ch'inintacha laka yu k'usi tukan la'ch'it, la'sut'ut'u chi jantu la'smala'a. 15 An la ixkilhni ixkilhtaxtuy makat'ikt'i yu kikxtuy espada, yu kajapumak'atsaniyacha ta kilhmakchux ta'alin an lapanakni, chi yuchacha kajach'alhkatnaniya laka ma'atam tsasnat. Chi yucha kapach'it'a la ixch'aja an uva para li kataxtunilhcha xaxkan yu nawputun ixtalh'amti Dios, Dios yu lay ilhtu'ojoy chux. 16 An la ixla'ch'it chi an la ix'atu chunchuniycha ists'o'ta: “IxRejk'an rejnin chi ixJamach'alhkatk'an jamach'alhkatni.”
17 Chi ikla'ts'ilhcha pumatam angelh yu sa' ixyalh an laka wilhchan, p'ascha jaxa'alalh chux an ts'o'on yu talakjalht'ilitnin an lakt'iyan, jajuniy:
―K'at'at'itcha chi k'at'a'ayxt'o't'itcha an laka ay ixwayt an Dios, 18 para li k'a'ut'itcha ixjakanitk'an rejnin chi xalaj'ajin soldadojnin chi xakanitk'an yu laj'alhp'asnin lapanakni chi xakanitk'an kawayojnin chi yu taputawk'ay, chi xakanitk'an ta kilhmakchux lapanakni, yu jantu xamati ixputapatsay, chi yu wa ixputapatsakancha, chi yu ixtalhitapalay lapanakni chi yu jantu.
19 Wa chuncha ikla'ts'in an ma'tili chi an xarejnincha an lakaat'un chi an issoldadojninchak'an ixta'ayxto'nuncha para li katat'alasayacha an yu ixpu'uk'alh kawayo chi an issoldadojnin. 20 Walh an ma'tili ch'apayawkalhcha chi wachu an yu jantu sawalh ixchiwinti Dios ixlichiwiniy. Yucha ix'ilhtuta la ix'ukxlakapu an ma'tili tanlhun yu jantu wa xamaticha lapanak lay ilhtuy, yu japulaj'o'xcho'olhcha an yu tala'a'ilh an iseyo an ma'tili chi yu ay talhiwilalh an chiwx yu tacha an ma'tilicha ix'ilhtukanta. Ani ixt'uyunk'an warrj warrjcha jat'alhtamaj'okalh ixtak'atsank'an tan wa mililicha lay jikmi laka azufre. 21 Chi an ali'in jala'ma'nikalhcha an laka espada an yu ixkilhtaxtuy yu ixpu'uk'alh kawayo, chi chux an ts'o'on talhi'o'atsalhcha an ixjakanitk'an an yu jala'ma'nikalh.