១ «ប៉ាគ់ ដារ់ ណោះ សារ រ៉ាំងហៃ រ៉ាំងខ្យា ម៉ះ ប‌៉្រ័ះ ពៀប ឡាក់ កា សារ អង់កាន់ រ៉ូះ ១០ ដូវ អ្យក់ តាគៀង ឡាំ ក្យាគ់ កាម៉ាក័ បក់ ពូ ចឹង ប៉ាញ់សង់ ណោះ។ ២ កាណុង កាំឡាំង អន់ឌែ ១០ ដូវ ណោះ ទី អង់កាន់ ប៉ាតាម័ ដូវ អូ ហ្លង់ សារ ប៉ាតាម័ ដូវ ណាវ្គ ហ្យាំង សាឡាច់។ ៣ មួត អង់កាន់ ប៉ាតាម័ ដូវ អូ ហ្លង់ សារ ណោះ អន់ឌែ អ្យក់ ឡាំ តាគៀង ហះកា អូ ទី ទ្រុង ប៉ុង ប៉ាំងការ់ អុះ។ ៤ កាប៉ាច់ មួត អង់កាន់ ប៉ាតាម័ ដូវ ណាវ្គ ឡាក់ ហ្យាំង សាឡាច់ ណោះ អន់ឌែ អ្យក់ ឡាំ តាគៀង លូ ទ្រុង ឡាំ ទឹប ប៉ុង ប៉ាំងការ់ ដេល។ ៥ ញន កា កាម៉ាក័ ពូ ប៉ាញ់សង់ ណោះ ក្រូ ទឹល តាឡាម័ មួត អង់កាន់ រ៉ូះ ១០ ដូវ ណោះ កាកី ប៉ិច តៃប ខាក់ កា តៃប ហ្លាក់ ទិ អន់ឌែ។ ៦ ប៉ាគ់ ទឹល ទងតិគ័ ម៉ាំង ទី ពូ ឡាំ រ៉ះ ផា "កាម៉ាក័ ណោះ ទឹល កេះ អ្យូវ ឡាំ ហាប់ អ៊ែ ពិ"។ ៧ មួត អង់កាន់ រ៉ូះ ១០ ដូវ ណោះ កា អ្យូវ អ្យក់ ប៉ាយ៉ាម័ តាគៀង។ ៨ មួត អង់កាន់ ប៉ាតាម័ ដូវ អូ ហ្លង់ សារ ណោះ កាកាប លូ មួត អង់កាន់ ប៉ាតាម័ ដូវ ឡាក់ ហ្យាំង សាឡាច់ ផា "ប៉ុង អន់ដីស ណោះ ជែក អន់ កា ញឹន ណើ តាគៀង ញឹន ទិ ប៉ុង កេះ ចឹង ប៉ាត់ ហង"។ ៩ មួត អង់កាន់ ប៉ាតាម័ ដូវ ឡាក់ ហ្យាំង សាឡាច់ តើល ផា "អូ អន់ អុះ។ ផា ជែក កា អន់ដីស អ្យូគ អូ កុំ កា ញឹន ដេល។ អន់ដីស ឡាំ តាច់ ប៉ាគ់ ហី ពូ ប្រូ ប៉ុង តោ ពិ"។ ១០ ផះ មួត អង់កាន់ ប៉ាតាម័ ដូវ អូ ហ្លង់ សារ ណោះ ចាក ឡាំ ណាំង តាច់ ប៉ុង កាម៉ាក័ ណោះ កា ទឹល ហង។ មួត អង់កាន់ ប៉ាតាម័ ដូវ ឡាក់ ទី ទ្រៀម ឡាកោ កេះ អន់ឌែ ទី ម៉ុត កាណុង ចារ ប៉ាញ់សង់ អន់ឌូ លូ កាម៉ាក័ ណោះ កេះណោះ ពូ កាត្រើគ អំប៉ារ ហង។ ១១ កេះណោះ មួត អង់កាន់ ប៉ាតាម័ ដូវ អូ ហ្លង់ សារ ណោះ កា ពឹះ ទឹល ដេល។ អន់ឌែ អើ ផា "អឺ ពឹ តាំងឡា បើក អំប៉ារ អន់ ញឹន ម៉ុត ណើ"។ ១២ ហះកា កាម៉ាក័ ណោះ តើល ផា "អាញ់ ប៉រ់ រ៉ះ កា អន់ដីស តាទឹច ផា អាញ់ អូ អន់ហ្នាល់ អន់ដីស អុះ"។ ១៣ ទឹល នីណោ័ះ អន់ដីស ត្រគ់ ឡាវ៉ាត់ ឡាវ៉ាំង ឡាកោ កាខាក់ ខង អន់ដីស អូ អ្លុ អន់តគ់ កា ប៉ាណូស អាញ់ ចឹង ពឹះ ទឹល ណោះ ដារ់ ចំ មង ចំ។

១៤ «សារ រ៉ាំងហៃ រ៉ាំងខ្យា ម៉ះ ប‌៉្រ័ះ អា ពៀប ឡាក់ កា សារ ប៉ាណូស កាម៉ាក័ ម៉ោញ ដូវ ទ្រៀម ចឹង ឡាំ ប៉ាគ់ ស្រុក ចាំងហាយ្គ អ៊ែ អើ មួត ទុច ពឹះ ប៉ាគ់ អ៊ែ ភឿ មប រ៉ាស អំប៉ាស អន់ កា អន់ឌែ រ៉ាំងហៃ។ ១៥ អ៊ែ អន់ លៀន កា មួត ទុច តាម បក់ អ្លុ ឃឹត ម៉ោញ ដូវ ៥០០០ លៀន កាក់ ម៉ោញ ដូវ ២០០០ ម៉ោញ ដូវ ណាវ្គ ១០០០ *២៥:១៥ ម៉ោញ ដូវ ៥០០០ លៀន កាក់ ម៉ោញ ដូវ ២០០០ ម៉ោញ ដូវ ណាវ្គ ១០០០ ពៀគ គុល «ម៉ោញ ដូវ ប៉ាតាម័ តាឡង់ ម៉ោញ ដូវ ពៀរ តាឡង់ ម៉ោញ ដូវ ណាវ្គ ម៉ោញ តាឡង់»។ ម៉ោញ តាឡង់ សាម៉ើ លូ ម៉ាស លើ ប៉្រាក់ ៣៤ កាឡូ។  កេះណោះ អ៊ែ ចាក ហង។ ១៦ បក់ ទី លៀន ៥០០០ អ៊ែ អ្យក់ លៀន ណោះ ចាក ឡាំ ណាំង សា ឡូត ទី កាំឡៃ កា អ៊ែ ៥០០០ ណាវ្គ។ ១៧ បក់ ទី លៀន ២០០០ កា និះទៅ ដេល អ៊ែ អ្យក់ លៀន ណោះ ចាក ឡាំ ណាំង សា ឡូត អ៊ែ ទី កាំឡៃ ២០០០ ណាវ្គ។ ១៨ កាប៉ាច់ ប៉ាណូស បក់ ទី លៀន ដឹង ១០០០ អ៊ែ អ្យក់ លៀន ណោះ ចាក ឡាំ សីរ ឡូះ តប់ កាណុង តេះ គម កា តាំងឡា អ៊ែ ទៅ។

១៩ «ប៉ាគ់ ទុញ ដារ់ ឡឹង ណោះ ពឹ តាំងឡា អន់ឌែ ណោះ សឹត ហង កេះណោះ អ៊ែ ឃឹត លៀន លូ មួត ទុច ប៉ៃង ដូវ ណោះ។ ២០ បក់ ទី លៀន ៥០០០ អ៊ែ អ្យក់ លៀន ទឹប កាំឡៃ ៥០០០ ណោះ ជឹន កា ពឹ តាំងឡា អ៊ែ លូ រ៉ះ ផា "ពឹ តាំងឡា អីស អន់ លៀន កា អាញ់ ៥០០០ កិញអៀ អា អាញ់ ទី កាំឡៃ ៥០០០ ណាវ្គ"។ ២១ ពឹ តាំងឡា អ៊ែ តើល ផា "អឺះ ដាគ់ កេះ ទុច ដាគ់ ត្រង់។ ញន អីស ទី ពុត ដាគ់ ត្រង់ ឡឹង ង៉ារ ថិ អា អាញ់ ចឹង ប៉្រើ អីស រ៉ាំងហៃ ង៉ារ តីស ឡគ។ ហគ់ ហោក រ៉គ់ អន់ឌូ លូ អាញ់"។ ២២ បក់ ទី លៀន ២០០០ អ៊ែ អ្យក់ លៀន ទឹប កាំឡៃ ២០០០ ណោះ ជឹន កា ពឹ តាំងឡា ដេល លូ រ៉ះ ផា "ពឹ តាំងឡា អីស អន់ លៀន កា អាញ់ ២០០០ កិញអៀ អា អាញ់ ទី កាំឡៃ ២០០០ ណាវ្គ"។ ២៣ ពឹ តាំងឡា អ៊ែ តើល ផា "អឺះ ដាគ់ កេះ ទុច ដាគ់ ត្រង់។ ញន អីស ទី ពុត ដាគ់ ត្រង់ ឡឹង ង៉ារ ថិ អា អាញ់ ចឹង ប៉្រើ អីស រ៉ាំងហៃ ង៉ារ តីស ឡគ។ ហគ់ ហោក រ៉គ់ អន់ឌូ លូ អាញ់"។ ២៤ កេះណោះ បក់ ទី លៀន ដឹង ១០០០ កា ម៉ុត ដេល លូ កាប ផា "ពឹ តាំងឡា អាញ់ អ្លុ ដេល កា អីស ឡាក់ ប៉ាណូស កាចាប័ ខាក់ ខង អីស ទី ប៉ាតុំ អ្យក់ ពៀ ឡឹង ណា ឡាក់ អីស អូ ទី តាកា ព្រឹះ លូ អីស ទី ប៉ាតុំ អ្យក់ សាណា ឡឹង ម៉ីរ ឡាក់ អីស អូ ទី តប់។ ២៥ លៀន អីស អន់ កា អាញ់ ពែ អាញ់ ឡាំ តប់ កាណុង តេះ អាញ់ អូ ខឹន យរ អុះ។ ហគ់ អ្យក់ សឹត កា អីស ទៅ ឡគ លៀន អីស អា"។ ២៦ ពឹ តាំងឡា តើល ផា "អឺ ទុច អូ ដាគ់ កាជីល ង៉ល់ ! អីស អ្លុ កេះ កា អាញ់ ទី ប៉ាតុំ អ្យក់ ពៀ ឡឹង ណា ឡាក់ អាញ់ អូ ទី តាកា ព្រឹះ លូ អាញ់ ទី ប៉ាតុំ អ្យក់ សាណា ឡឹង ម៉ីរ ឡាក់ អាញ់ អូ ទី តប់។ ២៧ ទឹល នីណោ័ះ អីស ត្រគ់ អ្យក់ លៀន ណោះ អន់ កា ពូ បុល ម៉ាគ់ ទី ក្យង់។ ទឹល ប៉ាគ់ អាញ់ សឹត កេះ ណោះ អាញ់ ចឹង ទី លៀន ណោះ ទឹប គុល ទឹប ក្យង់។ ២៨ ទឹល នីណោ័ះ ហគ់ អន់ដីស អ្យក់ លៀន ១០០០ ឡឹង អ៊ែ អា ឡាំ អន់ កា បក់ ទី លៀន ១០.០០០ តោ ឡគ ២៩ ខង ពឿ ទី អៀង កេះ អ៊ែ ចឹង ត្រគ់ ទី អៀង ធែម ណាវ្គ ហះកា ពឿ អូ ទី ពូ ចឹង អ្យក់ ឡាច់ កាណាគ័ ញ៉ា ឡាក់ អ៊ែ ទី ប៊ត ប៊ែត ណោះ ដេល។ ៣០ កាប៉ាច់ ទុច អូ ទី ខា អា ហគ់ អន់ដីស អ្យក់ ឡាំ អ្លាត ប៉ាគ់ ចារ ម៉ាម៉ាំង គែង ឡីង តោ រិញ កាណុង ចារ ណោះ កាតាំង ដឹង ពូ ញ៉ាំ តាំងអឹះ លូ រ៉ាំងគែត សាណាញ់"។

៣១ «ប៉ាគ់ ដារ់ ប៉ាណូស អាញ់ ជឹរ អន់ឌូ លូ មួត ប៊យ ប‌៉្រ័ះ ទឹប ទី តាតារ ក្លាគ់ ណោះ អាញ់ ចឹង អង់អ្វៃ ពឹង គ្រេ សាដាច់ ដាគ់ ឡាយ៉ាម័។ ៣២ ផះ ណោះ ប៉ាណូស គ្រឹប សុនសាត ចឹង ពឹះ ប៉ាតុំ គួប ហះ ង៉ីរ អាញ់ ណោះ អាញ់ ចឹង ប៉ាក្លះ ពូ ឡឹង គួប សោប ឡាក់ កា ប៉ាណូស រង ចៀម ប៉ាក្លះ ឡាច់ ចៀម ឡឹង ប៉ារ់ពេ។ ៣៣ កេះណោះ អាញ់ ចឹង អន់ ចៀម អ្វៃ គែង សាម៉ា ប៉ារ់ពេ អ្វៃ គែង សាំងអ្យោ។ ៣៤ កេះណោះ អាញ់ ឡាក់ សាដាច់ ចឹង កាប លូ មួត បក់ អ្វៃ គែង សាម៉ា ផា "អឺ មួត ឡាក់ ពឹ អាញ់ អន់ សារ ដាគ់ អ្យគ័ ប៉ាណាំ គួប ម៉ុត អន់ ប‌៉្រ័ះ រ៉ាំងហៃ រ៉ាំងខ្យា ពិ ខង អ៊ែ ទី ទ្រៀម សាំរ៉ាប់ កា អន់ដីស ឡឹង កើត តេះ ប៉្លៃង ពែ កេះ ៣៥ ខង ផះ អាញ់ ឡាយ៉ិត អន់ដីស អន់ សាណា កា អាញ់ សា ផះ អាញ់ ហ៊្រែង ទៀក អន់ដីស អន់ ទៀក កា អាញ់ អៃត ផះ អាញ់ ឡាក់ អំហ៊្មយ ឡឹង ប៉ាថេត អន់ទៀគ អន់ដីស អន់ អាញ់ រ៉ាឡូវ ដំ ពឹង ហី អន់ដីស ៣៦ ខង ផះ អាញ់ អូ ទី ខោ អាវ អន់ដីស អន់ ខោ អាវ កា អាញ់ កាស៊ប ពៀត ផះ អាញ់ អីគ ព្លុ អន់ដីស កា ឡាំ តង័ អាញ់ ផះ អាញ់ ត្រគ់ ខុក អន់ដីស កា ឡាំ ច្វាគ់ អាញ់ ដេល"។ ៣៧ ណោះ មួត ដាគ់ ត្រង់ ចឹង តើល ផា "អឺ ពឹ តាំងឡា ដារ់ ចំ ញឹន ប៉ប័ អីស ឡាយ៉ិត ញឹន ទី អន់ សាណា កា អីស សា លូ ដារ់ ចំ ញឹន ប៉ប័ អីស ហ៊្រែង ទៀក ញឹន អ្យក់ អន់ ទៀក កា អីស អៃត ? ៣៨ ដារ់ ចំ ញឹន ប៉ប័ អីស ឡាក់ កា អំហ៊្មយ ឡឹង ប៉ាថេត អន់ទៀគ ញឹន អន់ អីស រ៉ាឡូវ ដំ ពឹង ហី ញឹន លូ ប៉ប័ អីស អូ ទី ខោ អាវ ញឹន អន់ ខោ អាវ កា អីស ? ៣៩ ដារ់ ចំ ញឹន ទី ប៉ប័ អីស អីគ ព្លុ លូ អីស ត្រគ់ ខុក ញឹន ឡាំ ហៃ អីស ?" ៤០ អាញ់ ឡាក់ សាដាច់ ចឹង តើល ពូ ផា "អាញ់ ប៉រ់ រ៉ះ កា អន់ដីស តាទឹច ផា គ្រឹប ង៉ារ អន់ទៀគៗ ឡាក់ អន់ដីស តង័ ប៉ាណូស ដោច ដាច កាណុង មួត អុះ ម៉ី អាញ់ អា ហង ឡាក់ កា អន់ដីស តង័ អាញ់ ដេល"។ ៤១ កេះណោះ អាញ់ ចឹង កាប កា មួត បក់ អ្វៃ គែង សាំងអ្យោ ផា "អឺ មួត ត្រគ់ សារ ប៉ាស្យាប ហគ់ អន់ដីស ឡាច់ ឡឹង អាញ់ អន់ ចាំងហាយ្គ ឡាំ ប៉ាគ់ ចារ អុញ កីត លើយ អូ អ្លុ ប៉ាត់ តោ ពិ ឡាក់ ចារ ទី ទ្រៀម សាំរ៉ាប់ ចៃគ ថូត ម៉ៃគ ប‌៉្រ័ះ បឺគ លូ ប៊យ អ៊ែ ៤២ ខង ផះ អាញ់ ឡាយ៉ិត អន់ដីស អូ ទី អន់ សាណា កា អាញ់ សា អុះ ផះ អាញ់ ហ៊្រែង ទៀក អន់ដីស អូ ទី អន់ ទៀក កា អាញ់ អៃត ដេល ៤៣ ខង ផះ អាញ់ ឡាក់ អំហ៊្មយ ឡឹង ប៉ាថេត អន់ទៀគ អន់ដីស អូ ជៀក អាញ់ រ៉ាឡូវ ដំ ពឹង ហី អន់ដីស ផះ អាញ់ អូ ទី ខោ អាវ អន់ដីស អូ អន់ ខោ អាវ កា អាញ់ កាស៊ប ពៀត ផះ អាញ់ អីគ ព្លុ លូ ផះ អាញ់ ត្រគ់ ខុក អន់ដីស អូ ទី ឡាំ ហៃ ឡាំ ច្វាគ់ អាញ់ អុះ"។ ៤៤ មួត ណោះ ចឹង តើល អាញ់ ផា "អឺ ពឹ តាំងឡា ដារ់ ចំ ញឹន ប៉ប័ អីស ឡាយ៉ិត ប៉ប័ អីស ហ៊្រែង ទៀក ប៉ប័ អីស អំហ៊្មយ ឡឹង ប៉ាថេត អន់ទៀគ លូ ប៉ប័ អីស អូ ទី ខោ អាវ លូ ប៉ប័ អីស អីគ ព្លុ លូ ត្រគ់ ខុក ហះកា ញឹន អូ ទី តង័ អីស ?" ៤៥ អាញ់ ចឹង តើល ពូ ផា "អាញ់ ប៉រ់ រ៉ះ កា អន់ដីស តាទឹច ផា គ្រឹប ង៉ារ ឡាក់ អន់ដីស អូ ទី តង័ ប៉ាណូស ដោច ដាច កាណុង មួត អុះ ម៉ី អាញ់ អា ហង ឡាក់ កា អន់ដីស អូ ទី តង័ អាញ់ ដេល"។ ៤៦ មួត អូ ដាគ់ ណោះ ចឹង ឡាច់ ឡាំ ត្រគ់ ថូត លើយ ហះកា ប៉ាណូស បក់ ដាគ់ ត្រង់ ចឹង ទី អាញុ រ៉ីស លើយ»។