2
La venida del Espíritu Santo
1 Ni̱ ngaa guisíj güi gahuin guiꞌyanj gu̱ꞌnaj Pentecostés, ni̱ nahuin chreꞌ daranꞌ ni sij ꞌngo̱ yuꞌuj. 2 Ni̱ nasi̱nunj gunun ni sij gaꞌna̱ꞌ xataꞌ huin gari̱n. Da̱j rúnꞌ ꞌyaj ꞌngo̱ nane̱ nucuaj daꞌngaꞌ daj gahuin aj. Ni̱ gahuin gari̱n ni̱nꞌ ga̱chraꞌ chruhua hueꞌ rian ma̱n ni sij. 3 Ni̱ gurugüiꞌ yanꞌa̱n. Ni̱ da̱j rúnꞌ hua yyóꞌ huaj aj. Ni̱ guraꞌ daꞌaj yanꞌa̱n chra̱ go̱ꞌngo ni sij. 4 Ni̱ gara chruhua cúj niman daranꞌ ni sij, guiꞌyaj Espíritu Santo. Ni̱ gaxi̱ꞌi ni sij gaꞌmi ni sij ango ni snanꞌanj da̱j digyán Espíritu Santo si gaꞌmi ni sij.
5 Ni̱ ni güi daj, ni̱ ma̱n ni tsínj israelita xumanꞌ Jerusalén. Ni̱ huin ni sij tsínj huin ruhua gui̱nicoꞌ Yanꞌanj. Ni̱ ꞌna̱ꞌ ni sij chruhua daranꞌ ni xumanꞌ ma̱n chruhua xungüi̱. 6 Ni̱ ngaa gunun ni ngüi̱ si gari̱n daj, ni̱ nahuin chreꞌ ni sij. Ni̱ nun niꞌi ni sij níꞌ u̱n xi̱ꞌi gahuin gari̱n ga̱ mánj. Daj si gunun go̱ꞌngo ni sij si-nu̱guanꞌ ni sij si gaꞌmi ni síꞌ. 7 Ni̱ nun riꞌ ruhua ni sij si ga̱ꞌmi ni sij. Ngaa ni̱ gaꞌmi ni manꞌan ni sij:
―Sé ni tsínj ꞌna̱ꞌ estado Galilea huin daranꞌ ni tsínj aꞌmi nan míꞌ. 8 Ni̱ u̱n sin huin ni̱ unun ni manꞌan néꞌ aꞌmi ni sij si-nu̱guanꞌ ni manꞌan néꞌ únj. 9 Daj si hué néꞌ huin ni tsínj ꞌna̱ꞌ Partia nga̱ Media nej, Elam nej, Mesopotamia nej, nga̱ Judea nej, Capadocia nej, Ponto nej, Asia nej, 10 Frigia nej, Panfilia nej, Egipto nej, ni xumanꞌ ngaj chruhua Libia ni̱chrunꞌ Cirene nej. Ni̱ ꞌna̱ꞌ go̱ꞌngo néꞌ xumanꞌ Roma nej. Ni̱ daꞌaj néꞌ huin xa̱ngaꞌ tsínj israelita. Ni̱ ango daꞌaj néꞌ huin ni tsínj xacaj si-du̱cuanj ni tsínj israelita. 11 Ni̱ hua tsínj ꞌna̱ꞌ Creta nej, nga̱ Arabia nej. Ni̱ unun daranꞌ néꞌ aꞌmi ni sij si-nu̱guanꞌ da go̱ꞌngo néꞌ. Ni̱ ataj ni sij sisi̱ sa̱ꞌ ni̱nꞌ ruhua ꞌyaj manꞌan Yanꞌanj. ―Daj gataj ni tsínj daj.
12 Ni̱ gara yanꞌanj ruhua daranꞌ ni sij. Ni̱ nun riꞌ ruhua ni sij si ga̱ꞌmi ni sij. Ni̱ nachínj snanꞌanj ni manꞌan ni sij dugüiꞌ sij. Ni̱ gataj ni sij:
―Ni̱ u̱n sin huin ruhuaj gata daranꞌ nan únj. ―Daj gataj ni sij.
13 Sani̱ gaꞌmi ducu ango ni sij niꞌyaj sij ni síꞌ. Ni̱ gataj ni sij:
―Hua xi̱ni ni síꞌ da̱j daꞌ ꞌyaj ni síꞌ daj, ataj ni sij aj.
Primer discurso de Pedro
14 Ngaa ni̱ naxu̱man Pedro nga̱ xa̱n tsínj nicaj dugüiꞌ nga̱ sij. Ni̱ nucuaj gaꞌmi sij. Ni̱ gataj sij:
―Tsínj israelita nga̱ tsínj nne xumanꞌ Jerusalén huin ín re̱ꞌ aj. Sa̱ꞌ ruhua gu̱nun a ni é re̱ꞌ nga̱ nuguanꞌ ga̱ꞌmī aj. Ni̱ xa̱caj á re̱ꞌ cuenta xiꞌí si gahuin da aj. 15 Sé si hua xi̱ni ni tsínj mán nan sisi̱ gani ruhuá re̱ꞌ da mánj. Daj si ga u̱n ni̱ganꞌ nánj. 16 Sani̱ yuꞌuj nan niꞌyaj ni únj da̱j rúnꞌ gataj tsínj gu̱ꞌnaj Joel huin síꞌ ꞌngo̱ tsínj gaꞌmi si-nu̱guanꞌ Yanꞌanj asi̱j ná:
17 Güi huaj ga̱nahuij xungüi̱, ni̱ ga̱ꞌnī Espíritu Santo ga̱ꞌnaꞌ rian daranꞌ ni ngüi̱ ma̱n chruhua xungüi̱.
Ni̱ daꞌni̱ snoꞌo a ni é re̱ꞌ nga̱ ni daꞌni̱ xa̱na á re̱ꞌ ga̱ꞌmi ni sij nuguanꞌ sa̱ꞌ si-nu̱guanꞌ manꞌānj gu̱nun ni ngüi̱.
Ni̱ gui̱niꞌi ni tsínj hua lij ꞌngo̱ daꞌngaꞌ di̱gyán manꞌānj rian ni sij.
Ni̱ ni tsínj achij, ni̱ ga̱ꞌninꞌ nnej ni sij.
18 Ni̱ ni güi daj ga̱ꞌninꞌ xa̱ngāj Espíritu Santo ga̱ꞌnaj rian ni tsínj nga̱ ni yunꞌunj xa̱na ꞌyaj sun riānj.
Ni̱ ga̱ꞌmi ni sij si-nu̱guanꞌānj rian ni ngüi̱.
19 Ni̱ ga̱huin yanꞌanj ruhua ni ngüi̱ xiꞌí nuguanꞌ digyānj ne̱ꞌ xataꞌ rian ni sij.
Ni̱ ne̱ꞌ ni̱caꞌ chruhua xungüi̱, ni̱ digyānj si hua tun nej, si hua yanꞌa̱n nej, si hua gatseꞌ gui̱niꞌi ni ngüi̱.
20 Ni̱ ga̱huin ru̱miꞌ rian güi.
Ni̱ yahui̱ ga̱huin si hua tun.
Ni̱ hué daj ga̱huin asi̱j achin gui̱sij güi ga̱ꞌnāj huīnj Señor.
Ni̱ ga̱ nico ga̱huin güi daj.
Ni̱ ꞌueé ga̱huin güi daj nej.
21 Sani̱ daranꞌ ni ngüi̱ achínj jniꞌyaj riānj, ni̱ ga̱nacā ni sij.
Hué nan huin si-nu̱guanꞌ Yanꞌanj huin nuguanꞌ gaꞌmi tsínj gu̱ꞌnaj Joel asi̱j ná.
22 ’Ngaa ni̱ gu̱nun sa̱ꞌ á re̱ꞌ nuguanꞌ ga̱ꞌmī huin ín re̱ꞌ ni tsínj israelita: Hua niꞌi sa̱ꞌ á re̱ꞌ xiꞌí Jesús tsínj ꞌna̱ꞌ xumanꞌ Nazaret. Ni̱ garanꞌ ruhua Yanꞌanj guiniꞌi sij Jesús. Ni̱ guiꞌyaj Jesús nico sun sa̱ꞌ guiniꞌi ni é re̱ꞌ, guiꞌyaj Yanꞌanj. Ni̱ guiꞌyaj Yanꞌanj sisi̱ di̱gyán síꞌ ango rasu̱n sa̱ꞌ scanij a ni é re̱ꞌ nej. 23 Sani̱ digyán ꞌngo̱ tsínj daj chrej sisi̱ ga̱ꞌnaꞌ gui̱daꞌa ni sij Jesús. Ni̱ garij ni tsínj daꞌui gaquinꞌ gaquíj Jesús rian rugutsi̱. Ni̱ dagahuiꞌ ni sij síꞌ, guiꞌyaj a ni é re̱ꞌ. Sani̱ asi̱j riqui doj, ni̱ gani ruhua Yanꞌanj sisi̱ hué daj gui̱ranꞌ yya síꞌ. Ni̱ guiniꞌi sini Yanꞌanj sisi̱ hué daj gui̱ranꞌ sij. 24 Sani̱ ganáꞌnij Jesús, guiꞌyaj Yanꞌanj. Ni̱ si̱ gaꞌue ꞌngo̱ ga̱huiꞌ sij ga̱ mánj. Daj si nun ga̱ꞌue guna sij scanij ni níman ga̱ mánj.
25 ’Ni̱ asi̱j ná doj gaꞌmi xíꞌ David xiꞌí Jesús. Ni̱ gataj sij:
Guiniꞌīnj sisi̱ ni̱ganj gui̱niquinꞌ Señor riānj anj.
Ni̱ xiꞌí si niquinꞌ sij xiꞌnī, ni̱ nitaj si ꞌya guxuꞌuī ga̱ mánj.
26 Xiꞌí daj ni gahuin nia̱ꞌ nimānj.
Ni̱ gaꞌmī nimānj ꞌngo̱ nuguanꞌ nia̱ꞌ ruhua nej.
Daj si gahuin yya ruhuāj sisi̱ gui̱ꞌyaj sa̱ꞌ Yanꞌanj ngāj.
27 Ni̱ nun du̱na manꞌán re̱ꞌ nimānj rian achinꞌ níman.
Ni̱ nun du̱na manꞌán re̱ꞌ sisi̱ gu̱chru nnee̱ cū mánj.
Daj si huēj huin tsínj sa̱ꞌ niman rian Yanꞌanj.
28 Ni̱ digyán re̱ꞌ ꞌngo̱ chrej rian ga̱chē ga̱ne ni̱gān.
Ni̱ hua nia̱ꞌ ruhuāj xiꞌí si nné re̱ꞌ ngāj.
Daj gataj xíꞌ David asi̱j ná.
29 ’Ni̱ ga̱ꞌue ga̱taj yyāj gu̱nun a ni é re̱ꞌ huin ín re̱ꞌ jnánj néꞌ sisi̱ gahuiꞌ yya xíꞌ David. Ni̱ gachinꞌ yya sij, ruhuāj. Ni̱ hua gue̱ si-cúj sij mán chruhua yuꞌuj da güi acuanꞌ nga̱ néꞌ. 30 Ni̱ gahuin xíꞌ David tsínj gaꞌmi si-nu̱guanꞌ Yanꞌanj. Ni̱ guiniꞌi David sisi̱ hua gataj yya Yanꞌanj sisi̱ ga̱huin achij ꞌngo̱ daꞌníj daꞌni̱ siꞌni̱ sij. Ni̱ hué síꞌ ga̱huin ꞌngo̱ rey nej. 31 Hué dan ni̱ hua guiniꞌi xíꞌ David si ga̱huin nga̱ Cristo. Daj si gaꞌmi sij sisi̱ ga̱naꞌnij Cristo. Ni̱ gataj sij sisi̱ nun du̱na Yanꞌanj níman Cristo chruhua yuꞌuj mánj. Ni̱ nun gu̱chru nnee̱ cúj síꞌ guingaj síꞌ chruhua yuꞌuj mánj, gataj xíꞌ David.
32 ’Ni̱ hua yya ganáꞌnij Jesús, guiꞌyaj Yanꞌanj. Ni̱ daranꞌ únj huin tsínj guiniꞌi sisi̱ xa̱ngaꞌ yya ganáꞌnij sij. 33 Ni̱ nachi nicaj Yanꞌanj Jesús na̱nꞌ sij xataꞌ ga̱ne ꞌueé sij raꞌa sa̱ꞌ manꞌan Yanꞌanj xa̱ngaꞌ. Ni̱ hua gataj yya Yanꞌanj sisi̱ ga̱ꞌuiꞌ sij Espíritu Santo rian Jesús. Hué dan ni̱ gaꞌníj Jesús Espíritu Santo gaꞌnaj rian aninꞌ únj da̱j rúnꞌ guiniꞌi a ni é re̱ꞌ, ni̱ da̱ꞌ rúnꞌ gunun a ni é re̱ꞌ nej.
34 ’Ni̱ sé xíꞌ David huin si gahui na̱nꞌ xataꞌ mánj. Sani̱ gataj síꞌ:
Ni gataj Yanꞌanj gunun Cristo huin tsínj nicaj sun riānj sisi̱ ga̱ne ꞌueé Cristo ne̱ꞌ chrej raꞌa sa̱ꞌ Yanꞌanj
35 da ga̱huin ni tsínj ununꞌ nga̱ Cristo daj ꞌngo̱ riguiyaꞌ gu̱taꞌ Cristo dacój síꞌ.
Daj gataj David asi̱j ná.
36 Hué dan ni̱ tsínj israelita huin a ni é re̱ꞌ. Ngaa ni̱ gui̱niꞌi a ni é re̱ꞌ sisi̱ Jesús gahuin Señor, guiꞌyaj Yanꞌanj. Ni̱ gahuin sij Cristo, guiꞌyaj Yanꞌanj nej. Ni̱ hué sij huin tsínj godócoꞌ a ni é re̱ꞌ rian rugutsi̱ aj. ―Hué daj gataj Pedro gunun ni sij.
37 Hué dan ni̱ ngaa gunun ni sij nuguanꞌ daj, ngaa ni̱ ganani nico ruhua niman ni sij. Ni̱ nachínj snanꞌanj ni sij Pedro nga̱ ango ni tsínj huin apóstol huin ni tsínj nicaj dugüiꞌ nga̱ Pedro. Ni̱ gataj ni sij:
―Jnánj néꞌ, u̱n sin gui̱ꞌyaj únj, ruhua á re̱ꞌ únj. ―Daj gataj ni sij gunun ni síꞌ.
38 Ngaa ni̱ nanica̱j Pedro gataj síꞌ:
―Ga̱nani ruhua a ni é re̱ꞌ xiꞌí si-ga̱quinꞌ a ni é re̱ꞌ. Ni̱ ga̱taꞌ nnee daranꞌ a ni é re̱ꞌ nga̱ si-xugüi manꞌan Jesucristo. Ngaa ni̱ gui̱nicaj Yanꞌanj ꞌngo̱ niman nico xiꞌí si-ga̱quinꞌ a ni é re̱ꞌ. Hué dan ni̱ ri̱qui Yanꞌanj Espíritu Santo ga̱ꞌnaj rian án re̱ꞌ aj. 39 Daj si hué daj gataj yya Yanꞌanj sisi̱ ri̱qui sij Espíritu Santo rian án re̱ꞌ, ni̱ rian daꞌníj a ni é re̱ꞌ nej, ni̱ nga̱ rian daranꞌ ni ngüi̱ nne ga̱nꞌ nej, huin ni sij daranꞌ ni tsínj ga̱quinj Yanꞌanj ga̱ꞌnaꞌ ni sij. ―Daj gataj Pedro gunun ni ngüi̱ daj.
40 Ni̱ guiꞌyaj fuerza Pedro nga̱ gaꞌi̱ ango ni nuguanꞌ nej. Ni̱ gaꞌninꞌ sij ꞌngo̱ ducuánj rian ni síꞌ, ni̱ gataj sij:
―Na̱caj á re̱ꞌ ni manꞌan án re̱ꞌ scanij ni tsínj ma̱n yya̱j. Daj si ꞌyaj quij ni sij. ―Gataj Pedro.
41 Hué dan ni̱ gataꞌ nnee ni tsínj nahuin raꞌa si-nu̱guanꞌ Pedro. Ni̱ güi daj nahuin chreꞌ ꞌngo̱ si hua̱ꞌnij mí ni ngüi̱ guxuman ruhua niꞌi si-nu̱guanꞌ Pedro. Ni̱ guinicaj dugüiꞌ ni sij nga̱ ni tsínj hua guxuman ruhua niꞌi manꞌan Jesucristo.
42 Ni̱ daranꞌ ni sij hua ni̱ca ruhua nga̱ nuguanꞌ digyán ni tsínj huin apóstol rian ni sij. Ni̱ nahuin dugüiꞌ daranꞌ ni sij nej. Ni̱ guraꞌ daꞌaj ni sij chrachrúnj xa nu̱guanꞌan ni sij nej. Ni̱ gachínj jniꞌyaj ni sij rian Yanꞌanj nej.
La vida de los primeros cristianos
43 Ni̱ guxuꞌuiꞌ daranꞌ ni ngüi̱ niꞌyaj ni sij ni rasu̱n sa̱ꞌ nico guiꞌyaj ni tsínj huin apóstol.
44 Ni̱ mán nu̱guanꞌan daranꞌ ni ngüi̱ guxuman ruhua niꞌyaj Jesucristo. Ni̱ siꞌyaj go̱ꞌngo ni sij gahuin siꞌyaj daranꞌ ni sij. 45 Ni̱ guduꞌue ni sij doꞌój ni sij nga̱ siꞌyaj ni sij. Ngaa ni̱ guraꞌ daꞌaj ni sij sanꞌanj da̱j rúnꞌ achin rian go̱ꞌngo ni sij. 46 Ni̱ uyan hua ruhua ni sij nahuin yuꞌ ni sij daranꞌ güi chruhua nuhui nico. Ni̱ hua nia̱ꞌ ruhua ni sij xa nu̱guanꞌan ni sij chrachrúnj ducuá go̱ꞌngo dugüiꞌ sij. Ni̱ hua sa̱ꞌ niman ni sij. 47 Ni̱ gaꞌmi sa̱ꞌ ꞌueé ni sij rian Yanꞌanj. Ni̱ gaꞌmi sa̱ꞌ ni ango ni ngüi̱ xiꞌí ni sij nej. Ni̱ go̱ꞌngo güi, ni̱ gahuin nico doj ni tsínj guinicaj dugüiꞌ nga̱ ni sij, guiꞌyaj manꞌan Señor. Daj si nacaj yya Yanꞌanj ango ni sij rúnꞌ huaj.