LA EPÍSTOLA A LOS HEBREOS
1
Dios ha hablado por medio de su Hijo
1 Asi̱j ná ni̱ gaꞌi̱ ni̱nꞌ ruhua gaꞌmi Yanꞌanj rian ni tsínj nataꞌ si-nu̱guanꞌ Yanꞌanj rian ni ngüi̱. Ngaa ni̱ nataꞌ ni síꞌ rian ni xi néꞌ. Ni̱ gaꞌi̱ ducuánj gaꞌmi Yanꞌanj rian ni xi néꞌ xiꞌí ni síꞌ. 2 Sani̱ yya̱j ruhua ga̱nahuij xungüi̱ nan, ni̱ guiꞌyaj Yanꞌanj sisi̱ ga̱ꞌmi daꞌni nga̱ néꞌ. Ni̱ guiꞌyaj Yanꞌanj si ga̱huin achij sij na̱huin raꞌa sij daranꞌ si guiꞌyaj Yanꞌanj. Ni̱ xiꞌí daꞌníj Yanꞌanj, ni̱ guiꞌyaj Yanꞌanj xungüi̱ nga̱ daranꞌ si mán xataꞌ nej. 3 Ni̱ da̱j rúnꞌ ra̱n ꞌngo̱ nnee guꞌndiꞌ ꞌyaj güi, ni̱ hué daj digyán daꞌníj Yanꞌanj da̱j hua ꞌueé manꞌan Yanꞌanj. Ni̱ da̱j rúnꞌ hua gue̱ manꞌan Yanꞌanj, ni̱ hué daj hua manꞌan daꞌni huin síꞌ Jesucristo. Ni̱ hué si-nu̱guanꞌ Jesucristo ꞌyaj sisi̱ ma̱n sa̱ꞌ daranꞌanj. Ni̱ nucuaj ni̱nꞌ ruhua si-nu̱guanꞌ sij. Ni̱ ngaa guisíj naꞌninꞌ Jesucristo xiꞌí si-ga̱quinꞌ néꞌ, ni̱ ganꞌanj ga̱ne sij ne̱ꞌ chrej raꞌa sa̱ꞌ Yanꞌanj xataꞌ. 4 Ni̱ ni̱nꞌ ruhua gahuin achij daꞌníj Yanꞌanj rian ni ángel. Daj si sa̱ꞌ ni̱nꞌ ruhua hua si-xugüi sij daj nga̱ si-xugüi ni ángel, guiꞌyaj Yanꞌanj.
El Hijo es superior a los ángeles
5 Daj si hua niꞌi ni é re̱ꞌ nuguanꞌ nan huin nuguanꞌ gaꞌmi Yanꞌanj rian daꞌni:
Hué re̱ꞌ huin daꞌnī.
Yya̱j ni̱ gahuīnj chréj re̱ꞌ.
Daj gataj Yanꞌanj xiꞌí daꞌni.
Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan rian ꞌngo̱ ángel mánj.
Ni̱ nan huin ango nuguanꞌ gaꞌmi Yanꞌanj xiꞌí daꞌni:
Huēj ga̱huin chrej sij.
Ni̱ hué sij ga̱huin daꞌnī.
Daj gaꞌmi Yanꞌanj xiꞌí daꞌni.
Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan gunun ꞌngo̱ ángel mánj.
6 Ni̱ ngaa nicaj Yanꞌanj daꞌni huin síꞌ si xa̱huaꞌ gaꞌna̱ꞌ síꞌ chruhua xungüi̱ nan, ni̱ gataj snanꞌanj Yanꞌanj rian ni ángel:
Ga̱ꞌmi sa̱ꞌ daranꞌ ni ángel rian xiꞌí síꞌ.
Daj gataj Yanꞌanj.
7 Ni̱ gataj Yanꞌanj xiꞌí ni ángel nej:
Rúnꞌ huin nane̱ huin ni ángel.
Ni̱ da̱j rúnꞌ huin yanꞌa̱n ngaa naxu̱manj aca huin ni ángel nej, guiꞌyaj Yanꞌanj.
Hué daj gataj Yanꞌanj xiꞌí ni ángel.
8 Sani̱ hué nuguanꞌ nan gataj Yanꞌanj rian daꞌni:
Hué re̱ꞌ huin Yanꞌanj.
Ni̱ ni̱ganj nicáj re̱ꞌ sun nné re̱ꞌ chrun xila sa̱ꞌ.
Ni̱ ꞌyaj ni̱ca re̱ꞌ nne sún re̱ꞌ rian chrun xila daj.
9 Ni̱ aranꞌ ruhuá re̱ꞌ niꞌyáj re̱ꞌ chrej ni̱ca.
Sani̱ nitaj si huin xa̱nꞌ ruhuá re̱ꞌ niꞌyáj re̱ꞌ chrej quij mánj.
Xiꞌí daj, ni̱ nacui Danꞌánj re̱ꞌ manꞌán re̱ꞌ sisi̱ huaj ga̱huin nia̱ꞌ ruhuá re̱ꞌ si ga̱huin nia̱ꞌ ruhua ni dugüíꞌ re̱ꞌ.
Daj gataj Yanꞌanj gunun daꞌni.
10 Ni̱ gataj ru̱huaꞌ yún Yanꞌanj gunun daꞌni:
Hué re̱ꞌ huin Señor.
Ni̱ asi̱j gaxi̱ꞌi daranꞌanj, ni̱ hué re̱ꞌ guiꞌyaj xungüi̱ nan.
Ni̱ hué raꞌá re̱ꞌ guiꞌyaj daranꞌ si ma̱n ne̱ꞌ xataꞌ nej.
11 Ni̱ ga̱nahuij daranꞌ nan.
Sani̱ ni̱ganj ga̱ne manꞌán re̱ꞌ.
Ni̱ da̱j rúnꞌ ga̱huin re̱ꞌe ꞌngo̱ atsij, ni̱ hué daj ga̱huin re̱ꞌe daranꞌ nan.
12 Ni̱ da̱j rúnꞌ jnachrúnꞌ ꞌngo̱ atsij, ni̱ hué daj jna̱chranꞌ re̱ꞌ xataꞌ nga̱ yoꞌój.
Ni̱ da̱j rúnꞌ naduna néꞌ si-ganꞌ néꞌ, ni̱ hué daj na̱duna re̱ꞌ xataꞌ nga̱ yoꞌój.
Sani̱ manꞌán re̱ꞌ nitaj si na̱duna mánj.
Ni̱ yoꞌ ga̱ne re̱ꞌ nitaj a̱man ga̱nahuij mánj.
Hué daj gataj Yanꞌanj nej.
13 Ni̱ gataj ru̱huaꞌ yún Yanꞌanj rian daꞌni:
Ga̱né re̱ꞌ ne̱ꞌ chrej raꞌa sa̱ꞌāj da gu̱rūnj ni tsínj ununꞌ nga̱ re̱ꞌ da ga̱huin ni sij ꞌngo̱ riguiyaꞌ gu̱taꞌ re̱ꞌ xiꞌí re̱ꞌ.
Daj gataj Yanꞌanj gunun daꞌni.
Sani̱ ni̱ a̱ ꞌngo̱ yu̱n nun gataj Yanꞌanj nuguanꞌ nan gunun ꞌngo̱ ángel mánj. 14 Daj si daranꞌ ni ángel huin si unánj guitsi rian Yanꞌanj. Ni̱ aꞌníj Yanꞌanj ni ángel daj rian néꞌ sisi̱ chra̱cuij ni ángel néꞌ huin néꞌ ni ngüi̱ ga̱ne ni̱ganj nga̱ Yanꞌanj xiꞌí si ganacaj Yanꞌanj néꞌ.