1 Ni̱ ngaa guisíj gaꞌmi Jesús ni nuguanꞌ nan, ni̱ gahui sij estado Galilea. Ni̱ guisíj sij anéj chrej duꞌua xinéj nnee gu̱ꞌnaj Jordán rian ngaj estado Judea. 2 Ni̱ nicoꞌ nico ni ngüi̱ sij. Ni̱ ganahuin ni ngüi̱ aꞌnanꞌ yuꞌuj daj, guiꞌyaj sij.

3 Ni̱ gaꞌna̱ꞌ ni tsínj fariseo. Ni̱ huin ruhua ni síꞌ ga̱ꞌuiꞌ ni síꞌ gaquinꞌ xiráj Jesús xiꞌí nuguanꞌ ga̱ꞌmi sij. Xiꞌí daj nachínj snanꞌanj ni síꞌ Jesús. Ni̱ gataj ni síꞌ:

―Ga̱ꞌuej si-ley Yanꞌanj sisi̱ du̱nóꞌ nico̱ꞌ xiꞌí daranꞌ ni nuguanꞌ níꞌ. ―Daj gataj ni tsínj fariseo rian Jesús.

4 Ngaa ni̱ gataj Jesús:

―Ani ruhuāj sisi̱ hua gaya ni é re̱ꞌ sisi̱ ngaa gaxi̱ꞌi daranꞌanj, ni̱ guiꞌyaj Yanꞌanj tsínj snoꞌo nga̱ yunꞌunj xa̱na. 5 Ni̱ gataj Yanꞌanj: “Xiꞌí daj du̱naj ꞌngo̱ tsínj daj chrej sij nga̱ nni sij. Ni̱ ga̱ne nu̱guanꞌan sij nga̱ nica̱ sij aj. Ni̱ nu̱ngüej nica̱ tsínj daj ga̱huin urin ngüi̱ aj.” Daj gataj Yanꞌanj. 6 Ngaa ni̱ sé hui̱j nnee̱ cúj huin nu̱ngüej sij ga̱ mánj. Sani̱ urin nnee̱ cúj huin nu̱ngüej sij nánj. Ni̱ ngaa xa̱caj dugüiꞌ ꞌngo̱ tsínj daj nga̱ ꞌngo̱ yunꞌunj daj, gui̱ꞌyaj Yanꞌanj, ngaa ni̱ si̱ gaꞌue ga̱huin ni̱ni nu̱ngüej sij, gui̱ꞌyaj ni ngüi̱ mánj. ―Daj gataj Jesús gunun ni sij.

7 Ngaa ni̱ gataj ni tsínj fariseo:

―Ni̱ u̱n sin huin ni̱ gaꞌninꞌ Moisés sun sisi̱ gui̱ꞌyaj néꞌ yanj ata ga̱ꞌuiꞌ néꞌ raꞌa nica̱ néꞌ. Ngaa ni̱ du̱naj néꞌ nica̱ néꞌ, guiꞌyaj síꞌ únj. ―Daj gataj ni sij.

8 Ngaa ni̱ gataj Jesús:

―Xiꞌí si tsi̱ niman ni é re̱ꞌ, ni̱ riqui Moisés permiso sisi̱ du̱naj ni é re̱ꞌ nica̱ ni é re̱ꞌ. Sani̱ sé daj gahuin asi̱j sini ngaa guiꞌyaj Yanꞌanj ni ngüi̱ mánj. 9 Hué dan ni̱ atā gu̱nun ni é re̱ꞌ sisi̱ tsínj gue̱reꞌej nica̱ daj, ni̱ ga̱nacaj sij ango ngüi̱, ni̱ da̱ꞌui sij gaquinꞌ anj. Sani̱ sé daj huin sisi̱ guiꞌyaj squi̱raꞌ nica̱ sij ango tsínj mánj. Ni̱ tsínj na̱caj yunꞌunj xa̱na guereꞌ daj, ni̱ da̱ꞌui sij gaquinꞌ nej aj. ―Daj gataj Jesús gunun ni tsínj fariseo.

10 Ngaa ni̱ gataj ni tsínj nicoꞌ Jesús:

―Sisi̱ daꞌngaꞌ daj huin nga̱ tsínj hua nica̱, ngaa ni̱ sa̱ꞌ huin sisi̱ si̱ xacaj néꞌ yunꞌunj xa̱na mánj. ―Daj gataj ni sij.

11 Ngaa ni̱ gataj Jesús:

―Sé daranꞌ ni tsínj ga̱ꞌue ga̱ra daꞌngaꞌ ruhua nga̱ nuguanꞌ nan. Sani̱ sisi̱ ri̱qui Yanꞌanj, ni̱ ga̱ꞌue ga̱ra daꞌngaꞌ ruhua ni sij. 12 Hua ꞌngo̱ tsínj naꞌue ga̱ꞌmi nga̱ yunꞌunj xa̱na. Ni̱ daꞌngaꞌ daj hua ni sij asi̱j gaꞌnga ni sij. Ni̱ hua ango tsínj naꞌue ga̱ꞌmi nga̱ yunꞌunj xa̱na. Daj si daꞌngaꞌ daj hua nnee̱ cúj sij, guiꞌyaj ango ni tsínj. Ni̱ hua ángo tsínj naꞌuej ruhua ga̱ꞌmi nga̱ yunꞌunj xa̱na. Daj si huin ruhua sij gui̱ꞌyaj sun sij rian nicaj sun Yanꞌanj anj. Ngaa ni sisi̱ ga̱ꞌue ga̱ra xina ni é re̱ꞌ nga̱ nuguanꞌ nan, ni̱ daꞌngaꞌ daj gui̱ꞌyaj ni é re̱ꞌ. ―Daj gataj Jesús.

13 Ngaa ni̱ nicaj ni yunꞌunj xa̱na ni tsinꞌ le gaꞌna̱ꞌ ne rian Jesús sisi̱ gu̱taꞌ síꞌ raꞌa síꞌ. Ni̱ ga̱chinj jniꞌyaj síꞌ xiꞌí ni tsinꞌ-ínꞌ, ruhua ne. Sani̱ chranꞌ ni tsínj nicoꞌ Jesús ni yunꞌunj xa̱na nicaj gaꞌna̱ꞌ daj aj. 14 Sani̱ gataj Jesús:

―Raꞌa ni é re̱ꞌ si ga̱ꞌnaꞌ ni tsinꞌ riānj. Ni̱ si̱ chranꞌ ni é re̱ꞌ si ga̱ꞌnaꞌ riānj nej mánj. Daj si rúnꞌ huin ni tsinꞌ le nan, ni̱ daꞌngaꞌ daj huin ni ngüi̱ ma̱n rian nicaj sun Yanꞌanj nne xataꞌ. ―Daj gataj Jesús.

15 Ngaa ni̱ gutaꞌ Jesús raꞌa sij rian ni tsinꞌ. Ni̱ gahui sij ganꞌanj sij.

16 Hué dan ni̱ gaꞌna̱ꞌ ꞌngo̱ tsínj daj. Ni̱ gataj sij gunun Jesús:

―Maestro sa̱ꞌ, u̱n sun sa̱ꞌ gui̱ꞌyaj sūnj, ni̱ ga̱ꞌue ga̱ne nigān, ruhuá re̱ꞌ únj. ―Daj gataj sij aj.

17 Ngaa ni̱ gataj Jesús:

―Ni̱ u̱n sin huin ni̱ atáj re̱ꞌ sisi̱ sa̱ꞌ manꞌānj únj. Urin Yanꞌanj huin si sa̱ꞌ nánj. Sani̱ sisi̱ huin ruhuá re̱ꞌ ga̱ne ni̱ganj re̱ꞌ nga̱ Yanꞌanj, ngaa ni̱ da̱gahuín re̱ꞌ nuguanꞌ gaꞌninꞌ Yanꞌanj sun rian néꞌ. ―Daj gataj Jesús gunun sij.

18 Ngaa ni̱:

―Ni̱ u̱n nuguanꞌ da̱gahuin únj, ruhuá re̱ꞌ únj. ―Gataj tsínj daj gunun Jesús.

Ngaa ni̱ gataj Jesús:

―Si̱ dagahuíꞌ re̱ꞌ níman mánj. Ni̱ si̱ guiꞌyaj tu̱ re̱ꞌ mánj. Ni̱ si̱ gaꞌmi re̱ꞌ nuguanꞌ nne̱ xiꞌí dugüíꞌ re̱ꞌ mánj. 19 Ni̱ gui̱nun yanꞌánj re̱ꞌ chréj re̱ꞌ nga̱ nní re̱ꞌ nej. Ni̱ ga̱huin ꞌi̱ ruhuá re̱ꞌ ni̱ꞌyaj re̱ꞌ dugüíꞌ re̱ꞌ da̱j rúnꞌ ꞌi̱ ruhuá re̱ꞌ niꞌyáj re̱ꞌ manꞌán re̱ꞌ aj. ―Daj gataj Jesús.

20 Ngaa ni̱ gataj tsínj daj gunun Jesús:

―Daranꞌ ni nuguanꞌ daj ráj xināj asi̱j hua lē aj. Ngaa ni̱ u̱n sin achin gui̱ꞌyā, ruhuá re̱ꞌ únj. ―Daj gataj sij gunun Jesús.

21 Ngaa ni̱ gataj Jesús gunun sij:

―Sisi̱ huin ruhuá re̱ꞌ ga̱huin sa̱ꞌ ni̱nꞌ re̱ꞌ, ngaa ni̱ güi̱j na̱nꞌ re̱ꞌ gu̱duꞌue re̱ꞌ daranꞌ siꞌyáj re̱ꞌ. Ni̱ sanꞌanj gui̱riꞌ re̱ꞌ daj ga̱ꞌuiꞌ re̱ꞌ rian ni ngüi̱ niqui. Hué dan ni̱ gui̱man nico siꞌyáj re̱ꞌ xataꞌ, gui̱ꞌyaj Yanꞌanj anj. Ngaa ni̱ ga̱ꞌnaꞌ re̱ꞌ gui̱nicoꞌ re̱ꞌ yūnj anj. ―Daj gataj Jesús.

22 Ni̱ ngaa gunun tsínj daj si gataj Jesús, ni̱ ganꞌanj sij nani ruhua sij. Daj si hua nico siꞌyaj sij.

23 Ngaa ni̱ gataj Jesús gunun ni tsínj nicoꞌ sij:

―Xa̱ngaꞌ atā gu̱nun a ni é re̱ꞌ sisi̱ ꞌi̱ huaj ga̱tu ꞌngo̱ tsínj xuruꞌue rian nicaj sun Yanꞌanj xataꞌ aj. 24 Ni̱ ga̱taj ru̱huaꞌ yūnj sisi̱ ꞌi̱ huaj ga̱tu ꞌngo̱ tsínj xuruꞌue rian nicaj sun Yanꞌanj daj nga̱ si ga̱chin ꞌngo̱ xucu camello yuꞌuj ta̱j cúj nuhua aj. Ni̱ xxi hua xúꞌ aj. ―Daj gataj Jesús gunun ni sij.

25 Ngaa ni̱ ngaa gunun ni tsínj nicoꞌ Jesús nuguanꞌ daj, ni̱ ni̱nꞌ ruhua ganꞌanj ruhua ni sij. Ni̱ gataj ni sij:

―Sisi̱ hué daj huin, ni u̱n tsínj ga̱ꞌue na̱caj Yanꞌanj únj. ―Daj gataj ni sij.

26 Ngaa ni̱ niꞌyaj Jesús rian ni sij. Ni̱ gataj síꞌ:

―Si̱ gaꞌue na̱caj ni ngüi̱ manꞌan ni sij mánj. Sani̱ Yanꞌanj ga̱ꞌue gui̱ꞌyaj daranꞌ nuguanꞌ. ―Daj gataj Jesús.

27 Ngaa ni̱ gataj Pedro:

―Hua duna únj daranꞌ siꞌyaj únj anj. Ni̱ nicoꞌ únj manꞌán re̱ꞌ aj. Ngaa ni̱ u̱n sin huin na̱riqui Yanꞌanj rian únj, ruhuá re̱ꞌ únj. ―Daj gataj Pedro.

28 Ni̱ gataj Jesús gunun ni sij:

―Xa̱ngaꞌ atā gu̱nun ni é re̱ꞌ sisi̱ ngaa gui̱sij güi ga̱ne ꞌuēj rian chrun xila sa̱ꞌ ango xungüi̱ na̱ca, ni̱ ga̱ne xa̱ngaꞌ ni é re̱ꞌ rian ni xu̱huij chrun xila sa̱ꞌ gui̱nicaj ni é re̱ꞌ sun rian ni xu̱huij xiꞌninꞌ ni tsínj israelita. Ni̱ hué daj ga̱huin xiꞌí si guinicoꞌ ni é re̱ꞌ manꞌānj huīnj daꞌníj ni ngüi̱. 29 Ni̱ danej gahuin a ni é re̱ꞌ dunáj á re̱ꞌ ducuá á re̱ꞌ nga̱ jnánj án re̱ꞌ nej, xocoꞌ a ni é re̱ꞌ nej, nga̱ chrej a ni é re̱ꞌ nej, nni a ni é re̱ꞌ nej, nga̱ daꞌníj ni é re̱ꞌ nej, doꞌój re̱ꞌ nej, ni̱ sisi̱ du̱naj á re̱ꞌ daranꞌ nan rian xiꞌīj, ngaa ni̱ na̱huin raꞌa ni é re̱ꞌ ꞌngo̱ ciento ni rasu̱n sa̱ꞌ nan. Ni̱ ga̱ne ni̱ganj án re̱ꞌ nga̱ Yanꞌanj, gui̱ꞌyaj Yanꞌanj nej aj. 30 Sani̱ nico ni ngüi̱ huin achij chruhua xungüi̱ nan na̱nicoꞌ ni sij ne̱ꞌ ru̱cu ango xungüi̱ ga̱ꞌnaꞌ aj. Ni̱ nico ni ngüi̱ nicoꞌ ne̱ꞌ ru̱cu chruhua xungüi̱ nan ga̱huin achij ni sij ango xungüi̱ ga̱ꞌnaꞌ aj.