1 Ele lo reve aza a Filistiya a yuwisan uvon na aza a Isra'ila, hali she na aza a Isra'ila a sumai. Amma o una ta̱ ali o uvon a Isra'ila na̱ a̱bunda̱ a Masasan ma Gilbowa. 2 A̱vu aza a Filistiya a saɓusa Shawulu na̱ olobo yi, reve o una olobo a ta'atsu yi Jonata na̱ Abinada na̱ Malkishuwa. 3 Uvo'on u suɗuwa ta̱ Shawulu. Ali o uvon a na a̱ da̱na̱i na̱ tan na aya a̱ tsura̱ ta̱ a tawan yi waru a amaton yi ta̱ lon.

4 A̱vu Shawulu damma vuma na a̱a̱ guzusa̱a̱ yi itana yu uvon, <<Vu tala matsun me pe'eni ma̱ wu reve vu una mu, ta̱wa̱ a̱za̱ o ulambu wu upaɗu wu uryumbu a nda a yuwan mu ulamu o una mu wan.>>

Vuma na gba guzusa̱a̱ niyi itana yu uvoꞌon u 'yuwan ta̱ adama a na wu uwwa ta̱ wovon lon. Ɗaɗa gba Shawulu tala yi matsun me pe'eni ma̱ yi, reve u riya̱a̱ yi wu una aciya ya̱ yi. 5 Ana za na a̱ guzusa̱a̱ yi itana yu uvon enei Shawulu kuwa̱ ta̱, a̱vu a̱yi fo u riya̱a̱ matsun me pe'eni ma̱ yi a̱vu u kuwa̱ oɓolo na̱ a̱yi. 6 Ne ɗa Shawulu kuwa̱i, no olobo a ta'atsu a̱ yi, na̱ za na tsu guzusa̱a̱ yi itana yu uvon, na̱ ali o uvon a̱ yi suru a̱ kuwa̱ ta̱ urana u ta̱ oɓolo.

7 Mantsa ma na aza a Isra'ila aza a na a̱ ri mavada mo o upasu wu Uka̱ri wa Yezireyel na̱ mavada mo Uɗolu wa̱ Urudu a uwwai, na a ɗa a na Shawulu no olobo a ta'atsu a̱ yi a̱ kuwa̱ ta̱, waru a uwwai a na a̱soja a Isra'ila a sumai, reve e le fo a suma a lyawa ilyuci i le. A̱vu aza Filistiya a̱ ta̱wa̱ a̱ da̱nu pe.

8 Ana usana u tawai, a na aza a Filistiya a̱ ta̱wa̱i a̱ pura̱ itana ya̱ a̱kwa̱kwa̱'a̱, a̱vu a cina Shawulu no olobo a ta'atsu a̱ yi nven ukwa̱ zuva Masasan ma Gilbowa. 9 Ɗaɗa o koɗoi aci a Shawulu a̱vu a̱ pura̱ itana yu uvon ya̱ yi, reve a̱ lyungu nlingata e iɗa ya Filistiya ma̱ɓula̱ a damma alabari a̱tsuma̱ o u'wa wa̱ a̱ma̱li e le nu uba̱ta̱ wa ama e le suru. 10 A̱vu a zuwa itana yu uvon ya̱ yi a̱tsuma̱ o u'wa wa̱ a̱ma̱li a Ashitore, reve a̱ sa̱ga̱do lipu va̱ yi o uɓaɓu u lyuci wa Bet Shan.

11 Ana aza a na a̱ ri na̱ nden Jabe Giliyadu a uwwai ili i na aza a Filistiya a yuwain na̱ Shawulu, 12 suru ali o uvon o ukadu le a̱ 'yon ta̱ a̱vu a̱ 'ya̱wa̱ na ayin a tara lipu va Shawulu na̱ lipu vo olobo a̱ yi diga o uɓaɓu wa Bet Shan, a̱vu a̱ tyowetyo le Jabe a̱vu a̱ kula̱to le ɗe. 13 Reve a̱ pura̱ etele e le reve a̱ ciɗo le e ikyun yu uɗanga u na a̱ tsu ɗe tamari ɗe Jabe, avu a yuwan akuli rana cindere adama o a̱tsuma̱la̱ngu.