2
Ukosu wa̱ a̱za̱ o ule'e
1 A̱tsuma̱lima̱ a ta cina
aza a na o foɓuso iwuya,
e le na o foɓuso iwuya na ayin!
Nu usana u tawa,
a̱ tsu uta̱ ta̱ a yuwan iwuya'a,
adama a na ucira u mayan me iwuya'a
u ta̱ e ekere e le.
2 A tsu yuwan ta̱ tsushu'un
vu ɗuma̱ reve a usa le,
na̱ tsushu'un vu 'wa
reve fo a usa le.
A tsu tsugba ta̱ vuma,
reve a usa u'wa wa̱ yi
ni ili ya agadu a̱ yi.
3 Adama o ndolo ɗa A̱sulazuva a dammai,
<<Gogo n to foɓuso addama a aci a̱ cu'un va ama a nda,
za na aa gura uta̱a̱ aciyele a̱tsuma̱ a̱ yi shi.
Waru aa gura yuwan mmalu na afalu shi,
adama a na mantsa mo uyo'o u ɗa shi.
4 O urana u ndolo a ta cana ishipa
ya avandaru a aci a̱ ɗu,
reve a yuwan mesun ma̱ a̱tsumola̱ngu lon adansa,
<Za tsu koto ta̱!
U kita'wa ta̱ akunda a ama a̱ va̱,
u tawa le ta̱ e ekere a̱ va̱.
A̱sulazuva e ne'eshen ta̱ ɗuma̱ tsu,
e ekere a ama a na a lyuwa n tsu nu uvon.> >>
5 Adama o ndolo ya̱ tsura̱ za,
diga a̱tsuma̱ oɓolo a ama A̱sulazuva
na eneshe iɗa'a
o ure u mazuwa ma agita shi.
6 Reve ama̱sula̱ e le a damma,
<<She vu yuwan adanshi e ikaka i nda wan.>>
<<She vu yuwan adanshi e ikaka i nda wan,
Ili i wono yi lo
na ya cina tsu shi!>>
7 <<U ta̱ ulobono
ama a Yakubu a damma,
<Ruhu va̱ A̱sulazuva
lamba ta̱ ankuri?
Linga va̱ yi ɗa nda'a?> >>
<<Ashe adanshi a̱ va̱ a tsu yuwan
urana e ekere aza na o toni niyi mejege shi?>>
8 Reve A̱sulazuva a̱ usu le u damma,
<<Babu usa̱n ama a̱ va̱ a̱ tsu 'yon ta̱ tsa n'yuwatan,
tsa aza a na a̱ ri a̱ ma̱ka̱mba̱a̱ diga uba̱ta̱ wu uvon,
o foɗoso a̱tugu aza na ili i burai shi.
9 I loso ta̱ a̱ma̱ci a ama a̱ va̱
diga a 'wa sa'ani le.
Reve i tara tsugbain tsa̱ va̱,
diga a̱ muwun n le suru hali hali.
10 Gogo a̱ɗu a̱za̱ a̱ɓula̱,
'yoyin, i ka̱ra̱,
adama a na uba̱ta̱ u nda
uba̱ta̱ u wivuwun u ɗa shi.
Adama a na iɗa'a
wo o'wo ta̱ idaba.
11 Na̱ vuma 'yon reve u reme epen a dansa,
<N ta yuwan ɗu alajiya
adama a masayan ma̱ ina̱bi
ni ili i na i tsu tsura̱to.>
To, a̱ yi ɗa wo o'wo
za va alajiya a ama a nda'a.>>
12 <<Adanshi o ro o lo shi, n to ɓoloto ɗu
a̱za̱ o ugundo wa Yakubu,
waru n to ɓoloto akapi ama a Isra'ila a na a buwai.
N to ɓolo ɗu tso oɓolo e ikyon uba̱ta̱ wa aguta,
tso oɓolo e ikyon uba̱ta̱ wa alyuna.
I to o'wo a̱ba̱jini oɓolo a ama a na a uwwa elemu e le.>>
13 A̱yi za na a̱ ba̱ma̱ ukari,
u to rono le a aaɗanga
reve a̱ uta̱la̱i nu uba̱ta̱'a̱.
U to o'wo le una̱ntsu u mo uta̱.
Mogono me le ma̱ ta̱ ka̱ra̱ elime e le.
A̱sulazuva na aciya̱yi a ɗa wo rono le a aaɗanga.