7
Ula̱ngu wa Isra'ila
1 U yo'ono mu shi!
Adama a na mo o'wo ta̱
tsa za vu u'yanlu,
a mantsa ma na o kotoi ugasa,
u muwun ma̱ ina̱bi.
Maani ma̱ ina̱bi ma lo na a ta'an a lyuwa shi.
Waru umatsun wu ufaru wu biri lo na okolo a̱ va̱ a cigai shi.
2 Ama a̱ a̱ɓula̱ o koto ta̱ a̱tsuma̱ o uvaɗi,
za lo na buwai na ri no okolo asa'ani shi,
za suru ta zama ure u na wo una za ro,
za suru ta azusu moron ma̱ nden ma̱ yi ni igolo.
3 E veɗece ta̱ a yuwan iwuya ne ekere e le.
Ngono n ta zama ne'en,
a̱za̱ o uge'etosu a̱ ta̱ ushishi utowusu wu una̱,
azagbain a tsu zuwa ta̱ a yuwan ili i na a cigai.
Ne ɗa o ɓoloi una̱ suru.
4 Vuma va̱ a̱ɓula̱ le tsa awanda ɗa u ri,
za va amayun a̱tsuma̱ e le
u ta̱ tsu ubara u na a yuwain na awanda.
Urana u na A̱sula̱ e ge'eto le yuwan ta̱,
u rana u na a damma n le
o una̱ wa ama̱sula̱
aza a na a yuwusan ipiri i le,
gogo za suru wo o'wo ta̱ utogbolyuwu.
5 She vu zuwaa moron me nden ma̱ wu okolo wan
waru vu soɗuwo i'utsa̱ ya̱ wu ma̱tsa̱n wan,
vu goloɓo una̱ wa̱ wu
a̱ tyo a ka va̱ wu na vu ri e icigi
za na ri nven na̱ a̱vu.
6 Ama o u'wa u vuma, ele ɗa n'yuwatan ma̱ yi,
adama a na ulobo u ta yuwaan dada va̱ yi ulamu,
mawun mo usheli waru u ta̱ 'ya̱sa̱a̱n mma va̱ yi aci,
jene ta yuwan tsushu'un na̱ a̱na̱wa̱ le fo.7:6 Mat 10:35-36; Luk 12:53.
A̱sulazuva a̱ ta̱ ta̱wa̱ ni ica ni iwawi
7 A̱mu gba n ta zuwaa A̱sulazuva esu,
n puro A̱sula̱ e iwawi i va̱,
A̱sula̱ a̱ va̱ u ta uwwa mu.
8 A̱vu ma'yuwatan ma̱ va̱,
she vu yuwan ma̱za̱nga̱ a aci a̱ va̱ wan,
ko na wo o'woi n riya̱i
n ta̱ 'yowisa̱n.
A mantsa ma na n da̱nuyi
a̱tsuma̱ e irumbu,
A̱sulazuva oto o'wo ekan a̱ va̱.
9 N yuwaan ta̱ A̱sulazuva unusu,
n ta kaɓa asuvu
a̱tsuma̱ o upan wa̱ yi.
Hali she nu u ge'eto
iwuya i na a yuwaan numu
a̱vu u zuwa mu mo o'wo fa̱a̱n.
U ta̱ ta̱wa̱to mu uba̱ta̱ e ekan,
waru n ta̱ ene a̱ɓula̱ a̱ yi.
10 A mantsa'a n'yuwatan n va̱ n te ene,
waru wono u ta̱ kpoto le
ele na a damma numu,
<<A̱ te ɗa A̱sulazuva A̱sula̱ a̱ wu?>>
Esu a̱ va̱ e te ene uriyu u le,
gogo a ta dadasa le
tso yilyo'o a̱ re.
11 Urana u na a suwisa kari ɗu ta̱ lo a̱ ta̱wa̱,
o urana u ndolo a̱ ta̱ da̱shi
washin wu utyo wi iɗa i ɗu.
12 O urana u ndolo ama a̱ ɗu
a̱ ta̱ ka̱mba̱ uba̱ta̱ u ɗu,
diga Asuriya oɓolo ni ilyuci ya Masar,
hali diga Masar a̱ tyo Yufiriti,
na̱ diga a mala a̱ tyo a mala,
na̱ diga a masasan a̱ tyo a masasan.
13 Uvaɗi gba u to o'wo okongo,
adama a ama a na a̱ ri pe nden,
adama e iwuya ya ama a na a̱ ri pe.
Iliyali ya̱ A̱sula̱ e ekere a Isra'ila
14 Vu guɓa ama a̱ wu
na aaɗanga aguɓa a̱ wu,
oɓolo e ikyon ya̱ wu ya agadu,
za na a yuwusan nden ma aciyele a̱tsumona,
a̱tsuma̱ o uba̱ta̱ wa alyuna u sa'ani.
Lyawa a yuwan aguɓa a̱tsuma̱ Bashan na̱ Giliyadu,
cine a yuwain ɗe nu ujimu.
15 Reve A̱sulazuva a damma,
<<Tsu rana na yu uta̱i a̱tsuma̱ e iɗa ya Masar,
n ta̱ roco le ili ya asalama a̱ va̱.>>
16 Nɗa n ta̱ e ene reve o sowo wono
o una̱ wu ucira u le suru.
A̱ ta̱ ɓa̱ru na̱ le ne ekere
waru atsuvu e le a ta ula.
17 E te peɗe ma̱buta̱ tsi iyo,
tsi inama i na yo ronoso a̱a̱tsuma̱ e iɗa.
A̱ ta̱ o uta̱ na̱ meje'en diga a pa'atan n le,
a ta vadala na̱ wovon
uba̱ta̱ wa̱ A̱sulazuva A̱sula̱ a̱ tsu.
waru a uwwa wovon wa̱ wu.>>
18 Zane ɗa A̱sula̱ tsa̱ wu,
na tsu yuwan gafura vu unusu
na̱ matawa mo unusu
va akapi a ama agadu a̱ yi?
Vu tsu guza̱ upan wa̱ wu hali hali shi,
adama a na vu ta uwwusa uyo'o
vu roco icigi i na i tsu vadala shi.
19 Vu ta da̱shi ene iliyali i tsu,
vu ta dadasa nusu tsu
za̱la̱ va apata ana a̱ wu.
Vu ta vari nusu tsu suru
a̱tsuma̱ a mala ma̱ a̱ru'un.
20 Vu to roco Yakubu amayun a̱ wu,
Ibrahim waru icigi i na i tsu vadala shi.
Cine vu kucinayi nkaya ntsu ɗe nu ujimu.