Aatagada a Nahum
Nahum
Ucuɗuwu wa aatagada a nda
Aatagada a Nahum Ishipa i ɗa na o rocosu ma̱za̱nga̱ mo uriyu wa Niniva, lyuci gbain va Asuriya, za na a yuwusan tsushu'un na̱ Isra'ila. U ta gura wo o'wo a ɗana ta̱ aatagada'a o una̱ wa a'wan Ukpakuta̱li na̱ kupa ne ejere 612 babu na a matsain Yesu. A̱risa̱ a Niniva a̱ ta̱ rocosu uge'etosu wa̱ A̱sula̱ adama aciyogbamu a̱ yi oɓolo na̱ a̱bunda̱ e iwuya i na u ri na̱ yi. Uge'etosu u nda u fara ta̱ o ukosu u mantsa ma̱ cindere babu na a matsain Yesu.
Ili i na i ri pe:
1. Uge'etosu wa Niniva 1:1-15
2. Uriyu wa Niniva 2:1-3:19
1
1 Adanshi e ikaka ya̱ A̱sula̱ a̱ tyo Niniva. Aatagada a alavu alavu a na Nahum vuma va Elikoshi enei.1:1 Isha 10:5-34; 14:24-27; Zaf 2:13-15.
Upan wa̱ A̱sulazuva aci a Niniva
2 A̱sulazuva A̱sula̱ a̱ tsushu'un a ɗa,
waru za va atsupu a ɗa.
A̱sulazuva za va atsupu a ɗa,
waru za vu upan wu usuɗuwu.
U tsu tsupa ta̱
e ekere a n'yuwatan ma̱ yi.
A̱ ta̱wusa̱a̱ n'yuwatan ma̱ yi nu upan.
3 A̱sulazuva a tsu yuwan upan go'o shi,
waru za vu ucira u ɗa lon,
u tsu lyawa za vu unusu ka̱ra̱ fa̱a̱n shi.
Ure wa̱ yi u ta̱ pe a̱tsuma̱ a̱ lipa̱ na̱ wunla̱,
eleshe waru ma̱buta̱ ma apata ana a̱ yi.
4 U tsu ɓara ta̱ mala hali u 'yewe,
waru u tsu 'yeweto ta̱ ɗolu suru.
Bashan na̱ Kame a̱ tsu 'yewe ta̱,
yipa̱lu ya Lebanon fo a tsu kpanla ta̱.
5 Nsasan n tsu jinga̱ɗa̱ ta̱ elime a̱ yi,
agaɗi waru e jeruwe.
Uvaɗi u jinga̱ɗa̱ ta̱ elime a̱ yi
na aza a na a̱ ri pe a̱tsuma̱ a̱ yi.
6 Zane ɗa aa gura isawan a̱ ma̱ka̱ka̱n ma̱ yi
nu u yuwan upan?
Zane ɗa aa gura isawaan
usuɗuwu wu upan wa̱ yi?
Upan wa̱ yi u to ocusho tsa a akina,
atali a̱ ta̱ ɓosuso a̱ ma̱ka̱ka̱n ma̱ yi.
7 A̱sulazuva za vi isa'ani i ɗa,
uba̱ta̱ wu upa'atan wu ucira
a mantsa ma addama.
Waru u ta aɗa aza a na a zuwai ucira u le ya̱'a̱ yi.
8 Agba na̱ mini ma gbain ma ɗa
A̱sulazuva o kototo Niniva,
u ta̱ lo n'yuwatan ma̱ yi a̱ tyo e irumbu.
9 Ili i na o foɓoi aci A̱sulazuva biti
u ta rawa utyo.
Addama a̱ da̱shi ta̱wa̱ wa̱ ire shi.
10 O to o'wo tsi ili i na awanda a̱ guza̱i
reve o'wo gashi aza a na ma̱ra̱ ma̱ tsura̱to yi,
a̱ ta̱ kuloto le tsa anlya o u'yewu.
11 A̱tsuma̱ Niniva a ɗa vuma ro uta̱i,
za na foɓoyi A̱sulazuva iwuya,
reve u ca a̱sa̱la̱ e pere.
12 Apa ili i na A̱sulazuva a dammai,
<<Ko na wo o'woi a̱ ta̱ na aza a na o ɓoloi aci na̱ a̱bunda̱,
o to koɗo ɗu reve a̱ tsun ɗu a̱ nge'en.
A̱ɗu aza a Yahuda ko na wo o'woi
n ca ɗu ta̱ a̱tsuma̱lima̱,
ma̱a̱ da̱shi yuwan ne shi.
13 Gogo n ta kuɗa a̱a̱gba̱la̱ e inan yi iluma i na u zuwaa nɗu a̱ yinlu,
reve n kakasa akani a na a̱ nla̱ ɗu na̱ yi.>>
14 A̱sulazuva a yuwan ta̱ adanshi
a aci a̱ wu Nineva a na,
<<Vu buwa a̱ tsura̱ muwun mu ugundo
n na e ɗe na aala a̱ wu shi.
Waru n ta̱ kototo musula̱ n na i she'ein
na̱ a̱ma̱li a na a̱ zuɗa̱i,
aza musa'a n ɗu.
N ta̱ foɓoo ɗu aason,
adama a na i ri nu urana shi.>>
15 Ka̱lyuwa̱! Zuva vu nsasan m gbagbain
ana aza a na a̱ ta̱wusa̱a̱ na alabari asa'ani,
za na a cuɗuwusa asuvu nden!
A̱vu Yahuda vu yuwan a̱buki a̱ wu,
vu shiton akucunu a̱ wu.
Adama a na n'yuwatan n buwa
a̱ ka̱nda̱ruwa̱ wu shi
o to kototo le suru suru.