102
Suŋuuŋ to tamtoghon to imbaad pataŋani
Nene suŋuuŋ to ŋgeu eez to imbaad pataŋani tiina le tapiri isob kat. Tovenen isavia lolo ve itaŋ roran Maaron pa iuuli
1 O Yoova, taŋiiz tiou ilat tiom.
Ulooŋ suŋuuŋ tiou tonene, ve uul ghou.
2 Uŋgooz matam payou malep. Pasa, you naneep ila pataŋani tiina lolo.
Ighaze poiŋ tiou ilat, ghoro ughur taliŋam payou.
Ulooŋ suŋuuŋ tiou, ve rikia moghon uul ghou.
3 Paam namaat tonene.
Nepooŋ tiou, nene inimale yab mbuasa to imbuŋ iza, ve imbiriis ilale.
Tinig ituntun kat, ve tuag tisob tiyabyab.
4 You nanimale kikiliiŋ to tamtoghon tivazagi le igorgor.
Tovenen lolog pa naghan aniiŋ muul maau.
5 You nayamaan yabyabuuŋ, ve nayak tiina.
Ve nakoŋkoŋ le nakoŋkoŋ kat.
6 You naghita naghaze eŋgengou kat.
You nanimale man to mboŋ to eŋgeni ineep izi ndug balim, ma ineep izi paanu muŋgina to tamtoghon tipuli ve isami.
7 You irau nagheen maau. Napamaat le ndugizau.
You ghora eŋgengou moghon. Nanimale man to eŋgeni ineep izala ruum pogho.
8 Sawa isob, mboŋmaagh ila le rabrab izi, koiag tipipiyaav saveeŋ velegiiŋ payou ve tiŋiŋiŋ payou.
Ve ighaze tighur samia pa tamtoghon eta, nene tiwatwaat sorokin you izag tighaze: Pataŋani to igham ghou, nene pale igham tamtoghon tonenen paam.
9-10 Yom atem yabyab payou kat.
Tauto upiyaav ghou nala dige nanimale buzbuz.
Ve avab inim ag aniiŋ, ve matag suru inim ag ya pa naghun.
11 Nepooŋ tiou to taan, nene inimale ndag izila ve yavyaava inim.
Tapirig isob wa. Nanimale kikiliiŋ to raua imalai ve igorgor.
12 Eemoghon Yoova, yom kinik to unepneep ila inam to ghamuuŋ pooz. Muuŋ, aazne, ve itaghoni taghoni gha ila.
Tovenen tamtoghon papaghu to muri pale tivot, yes pale tiwatag tighaze izam tiina inepneep tovene, itaghoni taghoni gha ila.
13 Yom lolom isamin ndug tiom Zion. Tovenen yom pale umundig ve uuli.
Pasa, sawa to ughur poia tiom iza toni, tauto ivot wa.
14 Onoon, tireu mbirisan ndug Zion, ve mbeb tisob timbiriis tilaledi wa.
Yaam popoiadi to tirei ruum pani, tipiyaav di tila saguan saguan tinimale mbeb sorok.
Eemoghon mbesooŋa tiom lolodi pa ndug tonowen kat. Tauto tighita mbeb tonenen le lolodi isami kat.
15-16 Eemoghon muri, Yoova pale igharaat mulin ndug Zion,
ve ipatooŋ tau toman tapiri ve poia toni ivot ighazooŋ.
Ghoro yes to ndug ndug toman kinik todi todi pale tighilaala tighaze ye iza tiina pa tapiri ve poia toni, ve timatughez pani, ve tineep ila samba.
17 Tamtoghon toni to tineep sorok kat, ye irau iyasiil pa taŋiiz todi maau. Pale ilooŋ suŋuuŋ todi, ve iuul di.
18 Mbeb to Yoova ighami, umbooda ila rau.
Leso tamtoghon toni to muri pale tivot, tiwatagi, ve tipait iza. Umbood saveeŋ tovene:
19 Yoova inepneep izi ndug toni patabuaŋ, ve mata ilala inimnim.
Ye ineep izi sambam, ve mata izizi pa taan.
20 Tovenen yes to tineep ila koiadi nimadi ve tiyakyak,
ye iloŋlooŋ taŋiiz todi, ve iuluul di.
Ve yes to tisaŋan sawa to koiadi tirab di timaat, ye ipaghau di pa mateeŋ.
21-22 Leso muri, yes ndug ndug toman kinik todi todi tinim tilup di pa suŋuuŋ izi Yerusalem, ve tivotia Yoova varu.
Yes pale tipait iza izi lolooz toni Zion.
23 You nanim olman kat sone. Eemoghon aazne, Yoova igham ghou tapirig isob, ve iŋgoor sawa tiou inim tuku.
24 Tovenen nasaav pani naghaze:
“Maaron tiou, ugham ghou rikia malep. Pasa, nanim olman waat sone!
Ve yom, ghoro nepooŋ tiom inepneep tovene itaghoni taghoni gha ila.
25 Yoova, muuŋ kat, yom ugharaat taan pughu le tuŋia.
26-27 Eemoghon muri, sambam paroŋania ve taan pale tisami ve tilaledi, tinimale uli muŋgina to imarepreep.
Tovenen yom pale upiyaav di tilaledi, ve urabolin di pa sambam paroŋania paghu ve taan paghu.
Eemoghon yom unepneep tovene.
Utortoor gabuam ve ŋgar tiom maau, ve sawa tiom irau isob maau. Mt 24:35; Hib 13:8; Yems 1:17; Syg 20:11
28 Yei to nimbesmbees payom ne, yom pale uŋgin ndinatumai, ve tineep pooi.
Ve papaghu todi to muri pale tivot ne paam, yom pale ugham di tiyoon ariaŋa, ve tineep pooi ila naghom irau sawa isob.”