Rau Ite Imin Ru Tau Paulus Iboode Pa Yes Tesalonika
2 Tesalonaika—2 Thessalonians
1
Yau Paulus. Yeiru Silas ve Timoti nibood rau tane ilat pa lupuuŋ to Krisi tau aleep izi nugh Tesalonika na. Yam ta apaak Tamaan Maaron ve Tiina toit Yesu Krisi, ve aleep ila toozi na. * Mbaŋ 17:1
Poia tomania luuma to Tamaan Maaron ve Tiina toit Yesu Krisi izaa tsiam, ve tiŋgin gham aleep poia. Onoon.
Yes Tesalonika tiyooz ariaaŋ pa badooŋ pataŋani
Yam toŋvetaz, saawe isov, yei irau lolomai poia pa Maaron ve nipaiti payam. Ve isaav ighe nigham tauvene, ene iduduuŋ. Pasaa, ghuruuŋ ila tsiam ivot le ighe iyaryaaŋ tane. Ve ŋgar to lolomim pa taumim ve avaghamu poghani gham, tauvene paam. Ene ivotvot imin tiina ila sosomim, le yam asov ataghon katini. * 2Tes 2:13
Puughu tane ta nipapait varumim ila lupuuŋ to Maaron irau nugh nugh. Yei nipaesia varumim pazi nighe: Onoon, yam abaad pataŋani naol, ve tamtamon tighamgham saghatin gham pasaa, yam ataghon Krisi. Eemon ayooz ariaaŋ, ve akis ghuruuŋ ila tsiam tuŋia. * Mbaŋ 14:22; 1Tes 2:14
Maaron pale ighur atuya pa yes tau tizorzoor vaaru poia
5-6 Onoon, aazne yam abadbaad pataŋani pasaa, ataghon pooz to Maaron. Ŋgar tsiam tana itotoi ighe: Murei, saawe tau Maaron itotoi pooz tooni ivot ighazooŋ, ve igabiiz tamtamon ve ighur atuya pazi, i pale ipait gham ighe yam popoiamim irau to aloŋ ala nugh tooni. Pasaa, Maaron gabizooŋ tooni, ene iduduuŋ mon. Tauvene yes tau tighurghur pataŋani payam na, i pale ighur pataŋani pazi, leso iyat ŋgar toozi tawe. Ve yam tau abadbaad pataŋani na, i pale ipas gham avot pa pataŋani tsiam, ve igham gham amariau. Ve yam mon mako. Yei paam. Saawe tau Tiina toit Yesu imuul ilam ve Maaron itotoia ivot ighazooŋ, ene pale gabua tane ivot. Yesu yesŋa aŋela tooni ariaŋazi, pale tipul sambam, ve tizilam toman aatyavyav to Maaron tau ighanghan imin yav na. * Mt 25:31; 1Tes 3:13, 4:16; Syg 14:13
8-9 Mako iyat ŋgar sasaghati to tamtamon, ve ighur atuya pazi tauvene: Yes irau tila tileep tomania Tiina toit, ve tighita mbonari ve tapiri ne mako. I pale iziir zi tila soghan, ve saghatiiŋ tiina igham zi taghon taghon gha ila. Irau isov mako. Atuya tane pale iŋarui tamtamon tisov tau tiwatagh Maaron mako, ve tizorzoor vaaru poia to Tiina toit Yesu. * Mt 25:41; Ro 2:8; 2Pe 3:7; Syg 20:15
10 Mboŋ Murei, gabua tawe pale ivot. Saawe tana, Tiina toit Yesu pale imuul ilam. Leso tamtamon tooni patabuyaaŋa tau tighur ila tooni na, tipakuru ve tipait eeza pa tapiri ve poia tooni. Pale tighe le tighitghita mon. Ve yam paam pale aleep tomani zi. Pasaa, saawe tau nipariaaŋ saveeŋ to Krisi ila sosomim, yam alooŋ saveeŋ tsiei, ve aghur ila. * Mbaŋ 1:11; Kol 3:4
Suŋuuŋ to Paulus iŋaŋarui Maaron pa yes Tesalonika
11 Yei nigham ŋgar pa gabua naol tana. Tauta saawe isov, suŋuuŋ tsiei iŋaŋarui Maaron toit nighe ighit gham popoiamim ila i maata, ve irau agham lepoogh poia tau i ipoi gham pani na. Ve nighe Maaron ipalot gham pa tauu tapiri. Leso yam irau agham ŋgar popoia naol isov tau aghe agham zi na, ve atotoi ghuruuŋ ila tsiam ila uraat popoia naol. * Ep 4:1; 2Pe 1:10
12 Isaav ighe agham tauvene, ene aat agham tamtamon tighilaal tighe Tiina toit Yesu, i eeza tiina pa tapiri ve poia tooni. Ve i aat ipakur gham paam, ve igham gham aleep ila mbonari loolo. Ŋgar tauvene pale ivot payam itaghon poia to Tamaan Maaron yesuru Tiina toit Yesu Krisi. Onoon. * Yo 17:10; Pil 1:27, 2:13; Kol 1:9; 1Tes 1:2+

*1:1: Mbaŋ 17:1

*1:3: 2Tes 2:13

*1:4: Mbaŋ 14:22; 1Tes 2:14

*1:7: Mt 25:31; 1Tes 3:13, 4:16; Syg 14:13

*1:8-9: Mt 25:41; Ro 2:8; 2Pe 3:7; Syg 20:15

*1:10: Mbaŋ 1:11; Kol 3:4

*1:11: Ep 4:1; 2Pe 1:10

*1:12: Yo 17:10; Pil 1:27, 2:13; Kol 1:9; 1Tes 1:2+