14
Timbou mbouŋ paaghu izi loloz Zion
1 Ra matag ila le naghita Sipsip to Maaron tomania tamtamon tooni ndiŋndiŋ ndiŋndiŋ (144,000) tiyozyooz izi loloz Zion. Tamtamon tawe, tibood i yesuru Taama Maaron ezazi ila ndamozi. *Syg 7:3+
2 Malau mako ve nalooŋ eval tiina aliŋazi sambam ve izilam. Luutu tiina kat imin yaa katini tiyatyaat tizizi, ma lalaav lutluutu. Ve nalooŋ gabua luutu poia kat imin tamtamon tirav gita ma vene. 3 Eval tiina tawe timbou mbouŋ paaghu igharau Maaron niia to ghamuuŋ pooz ila yes ŋginiiŋa tamoot ee ve paaŋ (24) tomania gabua matazi yaryaare paaŋ naghozi. Ene yes tamtamon ndiŋndiŋ ndiŋndiŋ (144,000) to taan tau Sipsip to Maaron ighol zi timin le, ve ipas zi tivot pa saghati tapiri. Ve yes mon ta irau tiwatagh mbouŋ tawe, ve timbouia. *Mbo 149:1; Syg 5:9
4 Ene yes tau tighurghur boog mako. Tiŋgin tauzi poi. Tauvene tiŋgalaaŋ ila Maaron maata. *Saveeŋ tau Yoan iboode na, isaav tauvene: Tamtamon 144,000 tau ziiri tane isavi zi na, tila to yes zilivaa gha yesŋa tigheen mako. Zeran ŋgara katini tighe saveeŋ tane, ene saveeŋ palelaaŋ tau iŋarui yes tau tileep soghan pa maaron karomŋa ve ŋgar sasaghati to taan, ve titaghon ŋgar ŋgalaaŋa mon ila Maaron maata.
Ve nugh sindei tau Sipsip to Maaron ighe ila pani, ene yes titaghoni mon. I ipas zi ila eval tiina to taan sosozi, ve ighol zi timin i le wa. Tauta yes timin aniiŋ maata tau tighuru ila pa Maaron yesuru Sipsip tooni imin paitooŋ zi. *2Kor 11:2; Ep 5:27; Yems 1:18
5 Ve saveeŋ karom eta ivot ila avozi mako. Tauta lezi sosor eta ila Maaron maata mako. *Kol 3:9
Aŋela tol
6 Ra matag ila le naghita aŋela ee iroov ila sambam saamba. Vaaru poia tau igheen irau saawe, ene igheen tooni. I le uraat to ivotia saveeŋ tawe pa tamtamon tisov tau tileep izi taan. Yes tinizi tomania aliŋazi, gabuazi, ve nugh toozi, ene ite ite. *Mk 13:10
7 Aŋela tawe isaav toman aliiŋa tiina ighe: “Saawe to gabizooŋ tamtamon ve ghuruuŋ atuya pazi, tauta ivot wa. Tauvene aroi pa Maaron, ve apait eeza pa tapiri ve poia tooni. I ta ighur sambam, taan, te, ve yaa naol isov tau tivotvot ila taan loolo. Tauvene aput aghemim pani ve apakuru.” *Syg 15:4
8 Malau mako ve aŋela ite, aana itaghoni ilam, ve isaav ighe: “Nugh tiina Babilon itap gha isaghat wa! Onoon kat, itap le isaghat kat! Nugh tau ighegherev tamtamon pa ŋgar tooni sasaghati, ve ikaukau ŋgar toozi imin ipaghun zi pa yaa ariaaŋa, tauta aazne izi imin kaut sorok.” *Is 21:9; Yer 51:8; Syg 17:1+
9 Aŋela tawe ilam ila, ra ite imin tol, aana itaghon yesuru ilam, ve isaav aliiŋa tiina ighe: “Isaav ighe tamtamon eta iput aaghe pa gabua saghati, ma gabua tawe anunu, ve ipaiti, ve igham ilaal tooni ila ndaamo ma niima, 10 i aat ighun ila rubruub tau ivon kat pa aatyavyav to Maaron. Aatyavyav tawe, ene imin vaen tau ariaaŋa kat. Irau Maaron izoola pa yaa ite paam to irav matin tapiri ne mako. Tauvene tamtamon tana, aat tighur yavyavuuŋ tiina pani, ve yav tomania maet salfa tuntunu tau vaazi saghati na ighani ila Sipsip to Maaron tomania aŋela patabuyaaŋa naghozi. *Mbo 11:6, 75:8; Is 51:17; Syg 13:16+
11 Zeran tauvene, yav tau ighan zi na, mbuasa pale imbuŋ tauvene taghon taghon gha ila. Irau isov mako. Tauvene yes tau tiput aghezi pa gabua saghati, ma gabua tawe anunu, tomania yes tau tigham ilaal tooni na, yav pale ighan zi tauvene irau mboŋ ve mataaz taghon taghon gha ila. Irau timariau pa yavyavuuŋ mako. *Jud 1:7
12 Tauvene Maaron tamtamon tooni patabuyaaŋa aat tiyooz ariaaŋ pa badooŋ pataŋani. Ene yes tau titaghon tutuuŋ to Maaron, ve tighur ila to Yesu ariaaŋ.”
13 Aŋela tawe isavsaav le isov, ra nalooŋ saveeŋ sambam ve izilam ighe: “Ubood saveeŋ tauvene: Aazne ve ila, yes tau tileep tuŋia ila to Tiina toit Yesu le irau mateegh toozi, ene pale poia to Maaron izaa toozi, ve tintinizi.”
Maaron Avuvu paam isavia saveeŋ eemon ighe: “Onoon kat, yes pale timariau pa uraat ve pataŋani toozi. Ve ŋgar popoia tau tighamgham zi na, pale igheen tomani zi ve tila.” *2Tes 1:7; Hib 4:10
Saawe to lupuuŋ aniiŋ matuugha to Maaron
14 Ra matag ila le naghita taitai pisosooŋa, ve ŋeer ee mboole izala paavo. Ŋeer tawe, naagho imin Tamtamon Naatu, ve moghar ndamoonda to kinik igheen ila daaba. Moghar tawe, tigharaata pa gol. Ve i ikis mbuzaagh kooka ee tau maata kat. *Ezek 1:26; Dan 7:13; Mk 13:26+
15 Ra aŋela ite ivot pa Rumei Tiina ta sambam we, ve iboob pa ŋeer tau ileep izala taitai paavo na ighe: “Saawe to lupuuŋ aniiŋ, ighe ivot tane. Pasaa, aniiŋ wit tsio tau titum izi taan na, timatuugh wa. Tauvene ugham mbuzaagh tsio kooka tana, ve urav zi tizi.” *Mk 4:29
16 Tauvene ŋeer tau mboole izala taitai na, isik mbuzaagh tooni, ve irav wit tisov tau titum izi taan na, leso tiyau zi ve tilup zi ila ruum to aniiŋ. †Saveeŋ ziiri tane aat isavia saawe tau Krisi imuul ilam ve iyau tamtamon tooni.
Aatyavyav to Maaron izaa to tamtamon
17 Malau mako ve aŋela ite, aana ivot pa Rumei Tiina ta sambam we. I paam, ikis mbuzaagh kooka tau maata kat. 18 Ra aŋela ite paam tau iŋgin yav to artaal na, ipul artaal ve ivot, ve iboob pa iitete tau ikis mbuzaagh kooka na ighe: “Vaen to taan tisov tibulbuul wa. Ugham mbuzaagh tsio tana ula urav motin zi, ve ulup zi.” 19-20 Tauvene aŋela tawe isik mbuzaagh tooni, ve irav motin vaen tau tigheen izi taan ne anoŋazi tisov tizi. Ra iyauur zi gha ilup zi, ve igham zi ila gha isuruuv zi ila Maaron nugh tooni to pisooŋ vaen tau igheen nugh tiina ziige na. Pasaa, saawe to aatyavyav to Maaron izaa toozi, tauta ivot wa. Tauvene tivaghaaz vaen anooŋa tawe izi nugh to pisooŋ vaen le suuru tiina kat ivot. Ve ipot izaa le raraate pa hos aaze. Ve ireer ila nugh malau irau 300 kilomita ma vene. Vaen suuru tawe, ene siŋ to tamtamon tau imaliŋ. *Syg 19:15
*14:4: Saveeŋ tau Yoan iboode na, isaav tauvene: Tamtamon 144,000 tau ziiri tane isavi zi na, tila to yes zilivaa gha yesŋa tigheen mako. Zeran ŋgara katini tighe saveeŋ tane, ene saveeŋ palelaaŋ tau iŋarui yes tau tileep soghan pa maaron karomŋa ve ŋgar sasaghati to taan, ve titaghon ŋgar ŋgalaaŋa mon ila Maaron maata.
*14:4: 2Kor 11:2; Ep 5:27; Yems 1:18
*14:8: Is 21:9; Yer 51:8; Syg 17:1+
*14:10: Mbo 11:6, 75:8; Is 51:17; Syg 13:16+
*14:14: Ezek 1:26; Dan 7:13; Mk 13:26+
†14:16: Saveeŋ ziiri tane aat isavia saawe tau Krisi imuul ilam ve iyau tamtamon tooni.