22
Maaron itoov Abaram
1 Murei ra, Maaron itoov Abaram. Saawe ee, i ipoii ighe: “Abaram!”
Abaram iyok pa aliiŋa ighe: “Taug ene.”
2 Maaron isaav pani ighe: “Natum eemon Isak tau lolom igheen tooni kat na, yau naghe ughamu, ve yamru ala pa taan sirivu to Moria. Ala avot ta sewe, o azala pa loloz ee tau yau pale natotoia payo. Mako uravu imaat, ve ughuru izala yav gha ighan dodolini imin watooŋrau payau.”
3 Tauvene mboŋ le nughizau, ndoromroome soone, ve Abaram iburig, ve igharaat doŋki tooni pa laghooŋ ve ipaal ai to indavu pa watooŋrau. Ra iturwaaka, ve ighuru izala doŋki paavo. Ra igham naatu Isak tomania besooŋa tooni ru, ve yesŋa tiburig gha tila pa nugh tau Maaron isavia pani na. 4 Tilaagh irau mataaz ru, ve ite imin tol, ra Abaram maata ila, ve ighita nugh tau tighe tila pani na, igharau rig. 5 Tauvene isaav pa besooŋa tooni ru tawe ighe: “Yamru aleep ta sene tomania doŋki. Yeiru natug pale nizala nugh tawe ve nisuŋ le isov, o nimuul nizilam.”
6 Ra Abaram igham ai to ndavuuŋ yav pa watooŋrau, ve iiti ila naatu Isak avaara gha ibaado. Ve i igham yav tomania mbuzaagh ve yesuru tinau tizala. 7 Tilaghlaagh tila, ve Isak isaav pa taama Abaram ighe: “Wai tamaŋ!”
Abaram iyol aliiŋa ighe: “Natug, mindai?”
Ra Isak ighasoni ighe: “Iit tagham yav ve ai. Eemon sipsip sindei ta pale tagham watooŋrau pani?”
8 Abaram iyol aliiŋa ighe: “Natug, Maaron tauu pale iuul ghiit ve igham leen sipsip eta pa watooŋrau.” Abaram isaav tauvene, ve yesuru tila. *Ŋgar tau Abaram ighe igham pa naatu Isak itotoi ghiit pa ŋgar tau murei ivot pa Yesu Krisi. Pasaa, Yesu paam, i Maaron naatu eemon tau Taama Maaron loolo pani kat. Ve imaat imin watooŋrau leso ireu sosor toit. *Yo 1:29
9 Yesuru tilaagh tila tivot nugh tau Maaron isavia pa Abaram na, ve Abaram indou maet imin artaal, ve ighur ai izala paavo. Ra ikau naatu Isak pa waar, ve ighuru izala ai paavo. 10 Ra igham mbuzaagh ve iit niima izaa pa ŋgaliiŋ naatu. 11 Eemon Mbaŋooŋa to Yoova †Matam iŋgal. Mbaŋooŋa to Yoova igham Yoova naagho ve ivotvot to tamtamon. Baibol siriv tiwaato tighe ‘ensel bilong Bikpela’, ‘angel of Yahweh,’ ma ‘Angel of the LORD.’ Eemon saveeŋ to mbaŋooŋa tawe, ene imin Yoova tauu isavsaav. Tauvene ŋgara siriv matazi iŋgal tighe mbaŋooŋa tawe, ene Krisi.
ileep sambam ve iboob izila pani ighe: “Abaram, Abaram!”
Abaram iyok pa aliiŋa ighe: “Taug ene.”
12 Mbaŋooŋa tawe isaav pani ighe: “Nimam itut natum sov. Ugham gabua eta pani sov! Aazne, yau nawatagh ghom kat: Yo uroi pa Maaron, ve utaghon katin ŋgar tooni. Pasaa, natum eemon tau lolom igheen tooni kat na, yo uŋguruuta pani mako.” *Hib 11:17; Yems 2:21
13 Ra Abaram maata izaa le ighita sipsip tamoot ee tau zooŋa ilot ila ai marani ee booga. Tauvene ila ighamu gha iyol naatu pani, ve indav yav gha ighan dodolini imin watooŋrau pa Maaron.
14 Abaram iwaat nugh tawe eeza ighe ‘Yoova pale iuul ghiit ve igham leen gabua.’ Tauta aazne paam, tamtamon tisavsaav tighe: “Yoova pale iuul ghiit ve igham leen gabua popoia izi loloz tooni.”
15 Mbaŋooŋa to Yoova ileep sambam, ve iboob izila pa Abaram muul ighe: 16 “Ene Yoova tauu aliiŋa ta ilat na. Yo ulooŋ i aliiŋa, ve uŋguruut natum eemon tana pani mako. Tauvene i imbu saveeŋ ariaaŋa tomani ghom ila i tauu eeza tauvene: *Hib 6:13-14
17 Ighe: ‘Yau aat naghur poia tsiau tiina kat izaa tsio, ve nagham paaghu tsio timasa timin naol timin pitum to sambam saamba, ve sausau to nari. Ve paaghu tsio pale tiyooz ariaaŋ pa malmal le tiliiv koiazŋa, ve tigham nugh toozi imin lezi. *Gnp 12:2; Hib 11:12
18 Pasaa, yo ulooŋ yau aliŋag. Tauvene paaghu tsio pale timin eez to poia tsiau izaa to nughmariŋ to taan.’ ” *Mbaŋ 3:25; Ga 3:8
19 Mbaŋooŋa to Yoova isavsaav le isov, ra Abaram yesuru naatu Isak timuul tizila to besooŋa tooni ru, ve yesŋa tiburig gha timuul tila pa nugh Ber-Seba, ve Abaram ighur niia to lepoogh ta sewe.
Pitiiŋ to Naor natŋa
20 Murei ra, Abaram ilooŋ paesiiŋ tighe taazi Naor azaawa Milka ipoop natŋa siriv wa. 21-23 Ezazi tauvene: Uz (i aidaaba), tazŋa Bus, ve Kemuel tau Aram taama, ve Kesed, Aso, Pildas, Yidlap, ve muria kat, ene Betuel tau Rebeka taama. Yes liim ve tol tane, ta Abaram taazi Naor yesuru azaawa Milka natuzŋa. 24 Naor ivai livaa ite imin azaawa zazagheeŋ, eeza Reuma. Reuma ipoop natŋa paaŋ: Teba, Gaam, Taas, ve Maaka.
*22:8: Ŋgar tau Abaram ighe igham pa naatu Isak itotoi ghiit pa ŋgar tau murei ivot pa Yesu Krisi. Pasaa, Yesu paam, i Maaron naatu eemon tau Taama Maaron loolo pani kat. Ve imaat imin watooŋrau leso ireu sosor toit.
†22:11: Matam iŋgal. Mbaŋooŋa to Yoova igham Yoova naagho ve ivotvot to tamtamon. Baibol siriv tiwaato tighe ‘ensel bilong Bikpela’, ‘angel of Yahweh,’ ma ‘Angel of the LORD.’ Eemon saveeŋ to mbaŋooŋa tawe, ene imin Yoova tauu isavsaav. Tauvene ŋgara siriv matazi iŋgal tighe mbaŋooŋa tawe, ene Krisi.