8
Krisi ileep ila Maaron naagho izi sambam ve ighamgham uraat tooni
1 Saveeŋ tau nisavsavia ne, puughu tauvene: Aazne, iit leen daaba poia ee to watooŋrau. I ileep ila Maaron saksaki niima tapir igharau niia to ghamuuŋ pooz ta sambam we. *Mk 16:19; Ep 1:20; Hib 1:3
2 I ileep iloŋ ila balbaal patabuyaaŋ tau igheen sambam we, ve ighamgham uraat tooni to watooŋrau ila loolo tau patabuyaaŋ le patabuyaaŋ kat. Balbaal tawe, ene balbaal tauu. Tamtamon to taan tipayooze mako. Maaron tauu ipayooze. *Saawe tau yes Israela tileep izi loloz Sinai puughu, tigharaat balbaal ee imin niazi to suŋuuŋ. Saveeŋa igheen ila Maaron Igham Mulin, Yes Israela ŋgat 25 ila 31 ve ŋgat 36 ila 40. Ziiri tane, isavia balbaal tauu tau igheen izi sambam. *Igham 25:1–30:38, 36:1–40:38; Hib 9:11, 24
3 Daaba tisov to watooŋrau, tighur zi leso tigham paitooŋ to tamtamon ila pa Maaron, ve tigham uratoi watooŋrau toozi. Daaba to watooŋrau toit tauvene paam. Irau niima ŋginaaŋa ve ila to Maaron ne mako. I aat ikis gabua eta, ve ila tomania, leso igham pani imin watooŋrau. *Hib 5:1, 9:12
4 Isaav ighe Yesu ilepleep izi taan, ene i irau imin ŋeer to watooŋrau mako. Pasaa, watooŋrau maata maata tau tutuuŋ to Mose isavi zi na, tamtamona tileep pataghaaŋ wa to tigham uratoi zi. 5 Eemon yes tibesbees pa Maaron iloŋ ila balbaal to taan mon. Balbaal tawe, gabua tauu mako. Ene balbaal tau igheen izi sambam we anunu mon. Pasaa, saawe tau Mose ighe ipayooz balbaal patabuyaaŋ to Maaron izi nugh ŋginaaŋa, Maaron isaav ariaaŋ pani ighe: “Balbaal anunu tau natotoia payo izi loloz na, matam kisini ve ugharaat gabua naol isov itaghoni.” *Igham 40:1+; Mbaŋ 7:44; Kol 2:17; Hib 10:1
6 Ve aazne, uraat to watooŋrau tau Maaron ighuru ila Yesu niima, ene poia kat iliiv uraat to watooŋrau ta muuŋ. Ve eez paaghu to itiŋa Maaron tavalupu ghiit tamin eemon, tauvene paam. Poia kat iliiv eez muŋgaana, ve le saveeŋ mbuaaŋ popoiazi kat. Eez paaghu tana, ene ivot ila uraat to Krisi. Pa i ta iyooz bodbodaaŋ pa Maaron ve iit tamtamon. *2Kor 3:6+; Hib 7:22
7 Imin ta eez muŋgaana tawe poia kat, ve le pataŋani eta mako, kanaŋ irau Maaron iyoli pa eez paaghu tane mako. *Hib 7:11, 18, 10:1
8 Eemon Maaron ighita monmon tamtamon tooni tisosor pa eez tooni. Tauta isaav ighe:
“Alooŋ. Saawe eta pale ivot, mako yau naghur eez paaghu pa yes Israela ve yes Yuda, †Saawe tau Kinik Solomon naatu Reoboam iŋgin yes Israela, yes tivalagh zi timin ru. Yes tau tileep ila pa kaagu na, tiwaat zi Israela. Ve yes ta tileep ila pa daudau na, tiwaat zi Yuda. Eemon murei tilup zi muul. Tauta saawe to Yesu, tiwaat zi tighe ‘Israel’ ve ‘Yuda’.
leso yeŋa nivalupu ghei nimin eemon. *Yer 31:31+
9 Eez paaghu tane, pale ite pa eez tau naghuru pa timbuzŋa na. Muuŋ, saawe tau nakis Israel nimazi ve nagherev zi gha tipul Isip, yau navotia eez muŋgaana tawe pazi. Eemon titaghon duduŋaini mako. Tauta naghur murig pazi.
10 Eez paaghu tau pale naghuru pazi, ene vene: Murei, yau taug pale naghur tutuuŋ tsiau igheen ariaaŋ ila ŋgar toozi, ve naboode ila lolozi paam. Ve yau pale namin Maaron toozi, ve yes timin tamtamon tsiau. *Ezek 36:25+; 2Kor 3:3; Hib 10:16
11 Saawe tana ighe ivot, tamtamon eta irau ipaduduuŋ zeetŋa pa saveeŋ tsiau muul mako.
Ve tamtamon eta irau isaav pa toŋvetaz tooni ighe: ‘Oyai, yam awatagh Maaron, o poi!’ vene mako. Pasaa, yes tisov pale tiwatagh katin ghau. Yes tau lezi ezazi mako, ve yes tau ezazi tintiina na paam. *Is 54:13; Yo 6:45
12 Ve yau pale lolog isaghatin zi, ve nareu sosor toozi isov ilale, ve matag iŋgali muul mako.” *Ro 11:27; Hib 10:17
13 Aghita. Isaav ighe Maaron isavia eez paaghu eta, ene itotoi ighe eez tau ivot imin maata na, ene muŋginaaŋ ve igharau ighe isov. Eez tauvene, malau mako pale ilale kat. *Ro 10:4; Hib 7:18
*8:1: Mk 16:19; Ep 1:20; Hib 1:3
*8:2: Saawe tau yes Israela tileep izi loloz Sinai puughu, tigharaat balbaal ee imin niazi to suŋuuŋ. Saveeŋa igheen ila Maaron Igham Mulin, Yes Israela ŋgat 25 ila 31 ve ŋgat 36 ila 40. Ziiri tane, isavia balbaal tauu tau igheen izi sambam.
*8:2: Igham 25:1–30:38, 36:1–40:38; Hib 9:11, 24
*8:3: Hib 5:1, 9:12
*8:5: Igham 40:1+; Mbaŋ 7:44; Kol 2:17; Hib 10:1
†8:8: Saawe tau Kinik Solomon naatu Reoboam iŋgin yes Israela, yes tivalagh zi timin ru. Yes tau tileep ila pa kaagu na, tiwaat zi Israela. Ve yes ta tileep ila pa daudau na, tiwaat zi Yuda. Eemon murei tilup zi muul. Tauta saawe to Yesu, tiwaat zi tighe ‘Israel’ ve ‘Yuda’.
*8:8: Yer 31:31+
*8:10: Ezek 36:25+; 2Kor 3:3; Hib 10:16