16
Yesu iburig pa mateegh
(Mt 28:1-8; Lu 24:1-12; Yo 20:1-10)
1 Umbom patabuyaaŋ isov, ra Maria to Magdala yesuru Maria ite tau Yakobus tiina, ve Salome, yes tol tila tighol naunauŋ tomania ŋgoreeŋ tau vaazi popoia na, tighe tighamu tila, ve tiliŋi izala Yesu paata. 2 Tauvene saawe imin maata to wik tana, mboŋoozo tau aaz ighe izaa, ve yes tol tiburig gha tila pa naal to Yesu. 3 Tilaghlaagh tila, ve tivasavo zi tighe: “Sei pale iuul ghiit, ve ipatambulia maet tiina ighau pa naal aavo?” 4 Tila tivot, ve matazi ila le tighita maet tiina tau ipoon naal aavo na igheen ila niia muul mako. Tipatambulia ighau ila ziige wa. 5 Tauvene zilivaa tawe tiloŋ tila naal loolo, le tighita ŋeer paaghu ee mboole izi ziige ila pa tapir. I inonogh ghi pa nonoghiiŋa pisosooŋa. Yes tighita, le tirur ve ŋgar toozi imbool.
6 Ŋeer tawe isaav pazi ighe: “Yam agham ŋgar naol sov. Yau nawatagh: Yam alam aghe aghita Yesu to Nasaret tau tiravu izala ai pambarooŋ na paata. Eemon i ileep ta sene muul mako. Maaron ipaburigini pa mateegh wa! Aghita niia tau tighur paata igheen ila ne. 7 Alooŋ. Yam ala ve apaesia gabua tane vaaru pa mbiwa tooni. Ve matamim iŋgal Petrus, ve apaes pani paam. Asaav pazi aghe: Yesu pale imuuŋ ila Galilaia. Ataghoni ala, o aghita izi ta sewe itaghon saveeŋ tau muuŋ i isavia payam.”
8 I isavsaav pazi le isov, ra zilivaa tana tipul naal, ve tivot tila muuri, ve tighau tila toman roiŋ tiina. Pasaa, gabua tau ivot pazi na, igham zi tirur le ŋgar toozi imbool. Tauvene tisavia gabua tana vaaru pa tamtamon eta mako. *Zeran ŋgara katini tighe saveeŋ tau Markus tauu iboode na, ilam imuul ves 8 mon. Eemon murei, tiseeŋ vaaru poia to Markus pa saveeŋ siriv itaghon saveeŋ tau Matayu ve Lukas tiboode na. Saveeŋ tawe ta aazne igheen ila ziiri 9 ila imuul ziiri 20. Ve buk muŋganazi siriv, saveeŋ ziiri ite ipasov vaaru poia to Markus. Saveeŋ tauvene: “Zilivaa tana timuul tila, ve tipaesia saveeŋ isov tau aŋela isavia pazi na pa Petrus tomania yes tau tileep tomania na. Murei ra, Yesu imbaaŋ mbiwa tooni tila to tivotia saveeŋ patabuyaaŋ to Maaron pa nughmariŋ. Yes tau tileep ila pa aaz izaa, ve yes tau tileep ila pa aaz izila na paam. Leso tiwatagh eez to Maaron igham mulin zi, ve tileep matazi yaryaare le alok. Saveeŋ tooni tana irau isov ne mako. Igheen le alok.”
Maria to Magdala ighita Yesu
(Mt 28:9-10; Yo 20:11-18)
9 Saawe imin maata to wik tana (Sande), mboŋoozo geeg, ve Yesu iburig pa mateegh. Ra ila ivot to Maria to Magdala imin maata. I livaa tau muuŋ Yesu iziir avuvu sasaghati liim ve ru tighau pani. *Lu 8:2
10 Maria ighita le isov, ra ila ipaes pa yes tau muuŋ tilaghlaagh tomania Yesu na. Pasaa, yes tileep toman lolozi ipataŋan ve titaŋtaŋ pani. 11 I isaav pazi ighe: “Yesu, i iburig pa mateegh, ve ileep maata yaryaare. Yau naghita pa taug matag.” Eemon yes tighur ila saveeŋ tooni mako.
Mbiwa ru tighita Yesu izi eeze
(Lu 24:13-35)
12 Murei ra, mbiwa ru to Yesu tipul nugh tiina Yerusalem, ve tilaghlaagh taghon eez tila, ve Yesu ivot toozi. Eemon tighilaalo rekia mako. Pasaa, naagho ite rig. 13 Saawe tau tighilaalo, timuul tila ve tipaesia gabua tana vaaru pa mbiwa tooni siriv. Eemon saveeŋ toozi paam, zetazŋa tighur ila mako.
Yesu ivot to mbiwa tooni
(Yo 20:26-31)
14 Murei ra, mbiwa tooni saŋavul ve ee tilup zi pa ghanghaniiŋ ve tilepleep. Malau mako ve Yesu tauu ivot toozi, ve iyaon zi. Pasaa, i iburig pa mateegh, ve tamtamon siriv tighita, ve tisavia vaaru pazi wa. Eemon ŋgar toozi iyaryaaŋ, ve tighur ila mako. *1Kor 15:5+
Yesu ighur uraat pa mbiwa tooni
(Mt 28:18-20; Lu 24:44-49; Mbaŋ 1:6-8)
15 Ve Yesu isaav pazi ighe: “Ala arau nughmariŋ, ve avotia vaaru poia pa tamtamon tisov to taan. *Mt 28:19; Mbaŋ 1:8; Kol 1:23
16 Isaav ighe tamtamon eta ighur ilam tsiau, ve igham yaa, ene aat Maaron igham mulini ve ileep poi. Eemon yes tau tighur ila mako, Maaron pale ighur atuya pazi ve tilalez. *Yo 3:18, 36; Mbaŋ 2:38; Ro 10:9
17 Yes tau tighur ilam tsiau, ene pale nagham lezi tapiri to tigham gabua ŋgeretazi tivot. Gabua tauvene: Pale tiziir avuvu sasaghati tighau ila yau ezag, ve tisavsaav ila nugh nugh aliŋazi tau tiwataghi mako. *Mbaŋ 2:6, 5:16, 8:7, 10:46; 1Kor 12:9, 28
18 Ve isaav ighe tikis moot saghati eta, ma tighun kaut lilia eta, ene aat irau ivaghamun zi mako. Ve isaav ighe tighur nimazi izala moroghooŋa pavozi, ve tighason Maaron to iuul zi, i aat igham zi tinizi poia muul.” *Lu 10:19; Mbaŋ 3:7, 28:3+; Yems 5:14+
Yesu imuul izala pa sambam
(Lu 24:50-53; Mbaŋ 1:9-11)
19 Tiina toit Yesu isavsaav pa mbiwa tooni le isov, ra Taama Maaron ighamu imuul izala pa sambam, ve mboole izi ila i niima tapir. *Mbo 110:1; Mbaŋ 2:33, 7:55; Ro 8:34; Hib 1:3
20 Ra mbiwa tooni tila tivotia vaaru poia irau nugh naol isov. Ve Tiina toit ileep tomani zi pa uraat toozi, ve igham gabua ŋgeretazi ivot ila nimazi. Tauta ipariaaŋ saveeŋ tau tivotia na, ve tamtamon tighur ila tighe saveeŋ tana, ene saveeŋ onoon. *Mbaŋ 4:29, 14:3; Hib 2:3
*16:8: Zeran ŋgara katini tighe saveeŋ tau Markus tauu iboode na, ilam imuul ves 8 mon. Eemon murei, tiseeŋ vaaru poia to Markus pa saveeŋ siriv itaghon saveeŋ tau Matayu ve Lukas tiboode na. Saveeŋ tawe ta aazne igheen ila ziiri 9 ila imuul ziiri 20. Ve buk muŋganazi siriv, saveeŋ ziiri ite ipasov vaaru poia to Markus. Saveeŋ tauvene: “Zilivaa tana timuul tila, ve tipaesia saveeŋ isov tau aŋela isavia pazi na pa Petrus tomania yes tau tileep tomania na. Murei ra, Yesu imbaaŋ mbiwa tooni tila to tivotia saveeŋ patabuyaaŋ to Maaron pa nughmariŋ. Yes tau tileep ila pa aaz izaa, ve yes tau tileep ila pa aaz izila na paam. Leso tiwatagh eez to Maaron igham mulin zi, ve tileep matazi yaryaare le alok. Saveeŋ tooni tana irau isov ne mako. Igheen le alok.”
*16:15: Mt 28:19; Mbaŋ 1:8; Kol 1:23
*16:16: Yo 3:18, 36; Mbaŋ 2:38; Ro 10:9
*16:17: Mbaŋ 2:6, 5:16, 8:7, 10:46; 1Kor 12:9, 28
*16:18: Lu 10:19; Mbaŋ 3:7, 28:3+; Yems 5:14+
*16:19: Mbo 110:1; Mbaŋ 2:33, 7:55; Ro 8:34; Hib 1:3
*16:20: Mbaŋ 4:29, 14:3; Hib 2:3