2
Taghur muriin pa Uleeŋa toit Krisi sov
1 Tauvene Maaron aliiŋa tau talooŋa na, iit aat mataan kisini ve tataghoni kat. Mako pale tapul Maaron imin waaŋ gogoon tau waŋaar igherevu gha imoghan ilale. 2 Aghita. Maaron aliiŋa tau muuŋ yes Israela tilooŋa ila yes aŋela avozi na, ene onoon ve igheen ariaaŋ. Tamtamon tisov tau titaghoni mako, ve timalaaŋ pani, ene Maaron ighurghur zi mako. Yes tisov tigham atuya iduduuŋ pa sosor toozi. 3 Ve uraat tau Yesu ighamu to igham mulin ghiit na, ene tiina le tiina kat. Tauvene isaav ighe loloon iveghaini ve tapul ŋgar pani, pale tapaghau tauun pa Maaron aatyavyav tooni mindai? Mako. *Hib 10:28, 12:25
Uleeŋ tana, Tiina toit Yesu ivotia imin maata. Ra yes tau tilooŋ saveeŋ ila tooni na, anazi tipalot saveeŋa pait. *Mk 1:14+; Mbaŋ 1:8; 1Yo 1:1+
4 Ve Maaron ipariaaŋ saveeŋ tana paam. Pasaa, irei uraat ve tapiri maata maata to Avuvu Patabuyaaŋ pa tamtamon tooni itaghon i tauu loolo. Ve ipalot zi gha tigham uraat tintiina ve gabua ŋgeretazi maata maata tau itotoi ighe i ileep tomani zi pa uraat toozi. *Mk 16:20+; Mbaŋ 14:3; 1Kor 12:4-11
Maaron itatan Yesu eeza, ve murei ra igham eeza ivot imin tiina muul
5 Sambam paaghu ve taan paaghu tau nisavia ne, Maaron ighur yes aŋela pa ŋginiiŋ zi mako. 6 Pasaa, Maaron aliiŋa ziiri ee tau ŋeer ee ivotia na, isaav ighe: *Saveeŋ tau igheen ila rau to mbouŋ na, isavia iit tamtamon to taan. Eemon ŋeer tau ibood saveeŋ to Buk Hibru na, igham ŋgar ighe saveeŋ tane iduduuŋ kat pa Yesu. Pasaa, i eeza tiina kat. Iliiv yes aŋela. Eemon saawe tau izilam taan, i itatan tauu eeza. Ve saawe tau imuul izala pa sambam, i igham eeza tiina kat, ve Maaron ighur gabua naol isov ila i niima, to iŋgin zi.
“Maaron, yei tamtamon to taan nimin saa kaut poia, ta yo matam iŋgalŋgal ghei?
Ve yei tamtamon natuzŋa, mindai ta yo matam payei? *Mbo 8:4, 144:3
7 Yo ughur ghei, ve ugham ghei nizi rig pa yes aŋela.
Ve upakur ghei, ve ugham ezamai ivot imin tiina.
8 Ve ughur gabua naol isov ila yei sambamai, leso niŋgin zi.”
Saawe tau Maaron ighur gabua naol isov ila iit tamtamon sambaan, i iŋguruut gabua eta mako. Ighur gabua isov tighenaar ila iit sambaan. Onoon aazne, taghita anooŋa soone. Pasaa, gabua isov tigheen ila iit tamtamon sambaan soone. *Mt 28:18; 1Kor 15:25+; Ep 1:22
9 Eemon Yesu, o iit taghita. I iparav ariaaŋ le iliiv. Tauta aazne, Maaron ipakuru, ve igham eeza ivot imin tiina kat. Saawe tuuku tau Yesu ileep izi taan, Maaron itatan eeza ve ighuru izi rig pa yes aŋela. Pasaa, i ighe igham poghani ghiit ve igham mulin ghiit pa mateegh. Tauta Yesu igham iit tasov niaan, ve igham yavyavuuŋ tiina, ve imaat. *Pil 2:7+; 1Yo 2:2; Syg 5:9
Yesu irau iuul ghiit pasaa, i tamtamon imin iit
10 Maaron imin puughu pa gabua isov, ve ighur gabua isov tivot pa i tauu. I ighe igham tamtamon katini timin i natŋa, ve igham zi tila tileep tomania ila mbonari loolo izi sambam. Tauta igham Naatu Yesu iyamaan yavyavuuŋ tiina. Ŋgar tooni tane iduduuŋ. Pasaa, yavyavuuŋ tau Yesu ibaado, tauta ighamu imin uleeŋa poia ee. I irau imuuŋ pa Maaron natŋa, ve iparav pazi, leso igham mulin zi. *Ro 11:36; Hib 5:8+
11 Yesu tomania yes tau i igham zi timin tamtamon patabuyaaŋa to Maaron na, lupuuŋ toozi eemon. Tauta maaya pa iwaat zi toŋvetaz tooni mako. *Mk 3:35; Hib 10:10
12 Aghita. I isaav pa Maaron ighe:
“Yau aat navotia ezam ve ŋgar tsio pa toŋvetaz tsiau.
Ve isaav ighe tamtamon tsio tilup zi pa suŋuuŋ, ene yau aat nala tomani zi, ve nambou to napait ezam.” *Mbo 22:22
13 Ve i isaav muul ighe:
“Yau aat nanumeer Maaron.” *Mbo 18:2
Ve isavia saveeŋ ite ighe:
“Ughita. Yau taug tane. Yeŋa geegeu tau Maaron igham zi payau ne, tauta nilepleep.” *Is 8:18; Yo 17:6, 9+
14 Geegeu tau i isavi zi na, ene iit tamtamon to taan tau taghur ila tooni. Tauta Yesu paam imin tamtamon to taan raraate imin iit, ve iyamaan pataŋani naol to taan, ve imaat to ipasov Ŋeer Saghati tapiri. Pasaa, i ta imin puughu pa mateegh ve ivavaghamunia tamtamon. *Gnp 3:1+; Yo 1:14, 12:31; 2Tim 1:10
15 Saawe isov tau iit taleep izi taan, iit tamin besooŋa pa mateegh. Pasaa, taroiroi pani, ve roiŋ tane ikis ghiit ariaaŋ. Eemon mateegh to Yesu ipas ghiit pa pataŋani tane wa. 16 Iit tawatagh: Yesu ilam pa uleeŋ yes aŋela mako. I ilam to iuul iit tau Abaram paaghu tooni ne. *Ga 3:7, 29
17 Puughu tane ta i ighita ighe i aat izilam taan, ve imin tamtamon raraate imin iit toŋvetaz tooni, o poia. Leso imin daaba to watooŋrau tau loolo isaghatin ghiit, ve igham poghania uraat tau Maaron ighuru ila niima na, ve ireu sosor toit, ve itatan aatyavyav to Maaron. *Pil 2:7; Hib 2:11, 3:1
18 I iyamaan tovaaŋ ve pataŋani naol to taan wa. Tauta i irau kat pa uleeŋ yes tau tovaaŋ igham zi. *Mt 4:1+; Hib 4:15
*2:3: Hib 10:28, 12:25
*2:3: Mk 1:14+; Mbaŋ 1:8; 1Yo 1:1+
*2:4: Mk 16:20+; Mbaŋ 14:3; 1Kor 12:4-11
*2:6: Saveeŋ tau igheen ila rau to mbouŋ na, isavia iit tamtamon to taan. Eemon ŋeer tau ibood saveeŋ to Buk Hibru na, igham ŋgar ighe saveeŋ tane iduduuŋ kat pa Yesu. Pasaa, i eeza tiina kat. Iliiv yes aŋela. Eemon saawe tau izilam taan, i itatan tauu eeza. Ve saawe tau imuul izala pa sambam, i igham eeza tiina kat, ve Maaron ighur gabua naol isov ila i niima, to iŋgin zi.
*2:6: Mbo 8:4, 144:3
*2:8: Mt 28:18; 1Kor 15:25+; Ep 1:22
*2:9: Pil 2:7+; 1Yo 2:2; Syg 5:9
*2:13: Is 8:18; Yo 17:6, 9+
*2:14: Gnp 3:1+; Yo 1:14, 12:31; 2Tim 1:10
*2:17: Pil 2:7; Hib 2:11, 3:1