32
Tavotia sosor toit
Mbouŋ to David
1 Tamtamon tau ighe izoor Maaron aliiŋa ve isosor pa eez tooni, ighe Maaron ireu sosor tooni ilale,
i aat tintini pa poia to Maaron tau izaa tooni. *Mbo 103:3; Ro 4:6+
2 Onoon kat, tamtamon tau ighe ŋgar to karom eta igheen ila loolo mako,
ve Yoova ighita ighe i le sosor eta mako,
i aat tintini pa poia to Maaron tau izaa tooni. *Syg 14:5
3 Saawe tau naŋgooz sosor tsiau, tuag tisov tiparyavyav le tapirig isov.
Ve nayakyak irau mboŋ ve mataaz.
4 O Yoova, onoon kat, saawe tana, nayamaan katin nimam irau mboŋ ve mataaz.
Tauta igham ghau tapirig isov kat imin yaa tau aaz ighaaz le imaak.
5 Naleep le mako, ra navotia sosor tsiau payo.
Ŋgar tsiau saghati, naŋgooza muul mako.
Saawe tana, yau naghe: “Ŋgar tsiau to zoraaŋ Yoova aliiŋa, yau aat navotia ila tooni.”
Tauvene navotia sosor tsiau payo, ve ureua ilale. *Mbo 51:1, 103:9+; 1Yo 1:9
6 Tauvene tamtamon tisov tau lolozi isaghav ghom ariaaŋ ve titaghon eez tsio na, isaav ighe pataŋani eta igham zi, ene yes aat tisuŋ payo.
Isaav ighe pataŋani tiina kat ivot pazi imin yaa tau ivot toman tapiri, yo pale uul zi, leso pataŋani itatan zi sov.
7 Maaron, yo umin niag to yoŋgaaŋ.
Yo uponpoon ghau pa pataŋani naol isov, ve ugham mulin ghau.
Tauta eval tiina tau tilivut ghau ne, timbou ve tipait ezam toman aliŋazi tiina.
8 Ve Yoova isaav payau ighe: “Yau aat napaghazoŋai ŋgar tsio, ve natotoi ghom pa eez to utaghoni.
Yau aat matag payo, ve napaduduuŋ ghom pa ŋgar poia.
9 Tauvene ugham ŋgar poi. Dabam iyaryaaŋ imin hos ma doŋki sov.
Yes lezi ŋgar mako. Tauta tamtamon tighurghur ain sirivu tomania waar ila avozi, leso tipaduduuŋ zi pa laghooŋ, ve titaghon ŋgar toozi.”
10 Zeran sasaghati, pataŋani naol pale igham zi.
Ve yes tau tinumeer Yoova na, i pale loolo isaghav zi ariaaŋ, ve tileep ila poia tooni loolo. *Ro 2:9+
11 Yam zeran tau ataghon ŋgar duduuŋa, lolomim poia ve tintinmim pa poia to Yoova.
Yam tau ŋgar poia igheen ariaaŋ ila lolomim na, asov lolomim poia pa Yoova ve ayoor eeza toman aliŋamim tiina!