45
Mbouŋ to kinik vaiŋ tooni
Mbouŋ to yes Kora
Ŋeer tau imuŋmuuŋ pa mbouŋ na aat isaav pa tamtamon to timbouia itaghon aliiŋa ‘manman ruuŋgu pisosooŋa.’
Ene mbouŋ to tamoot ve livaa tau lolozi pa tauzi
1 Lolog ipazaagh ghau pa saveeŋ popoia, tauta natoor mbouŋ tane iŋarui kinik.
Avog raurau pa toraaŋ mbouŋ, imin ŋeer tau niima poia pa bodeeŋ.
2 O kinik, yo paghunam kat uliiv tamtamon tisov.
Ve saveeŋ popoia tau ivotvot ila avom, ene igham poghania tamtamon.
Tauvene poia to Maaron aat igheen tomani ghom irau saawe. *Lu 4:22
3 Yo ariaŋam ve urau kat pa ghamuuŋ malmal.
Ezam tiina, ve upabood taum le paghunam kat.
Ugham mbuzaagh tsio, ve ugharaat ghom pa malmal. *Mbo 149:6; Syg 1:16
4 Yo ezam tiina kat.
Uzaa hos tsio, ve ula uparav tomania koiamŋa le uliiv zi.
Uparav ariaaŋ pa saveeŋ onoon, ŋgar to tatatan tauun, ve ŋgar duduuŋa.
Nimam tapir pale igham uraat tintiina. Leso koiamŋa tighita ve tiroi. *Syg 6:2, 19:11+
5 Kinik tsiei, paneegh tsio natŋa matazi kat.
Tauta tiŋgal koiamŋa le tiyamaan katini.
Tauvene yes nugh nugh pale tilam ve titaptap izi aghem saamba.
6 Maaron, pooz tsio irau isov ne mako. Pale uleep ila niam to ghamuuŋ pooz irau saawe.
Ŋgar duduuŋa tau ughamgham pa tamtamon na, ene imin ilaal pa pooz tsio. *Yo 1:1, 14; Hib 1:8
7 Pasaa, yo lolom pa ŋgar duduuŋa, ve ughurghur koi pa ŋgar saghati.
Tauvene Maaron tsio ipakur ghom le uliiv zetamŋa siriv, ve iliŋ ŋgoreeŋ izala pavom to ighur ghom umin kinik.
Tauta igham ghom lolom poia le poia kat. *Mbo 11:5, 33:5
8 Nonoghiiŋa tsio mamalaua, ene tighur naunauŋ vaazi popoia maata maata ila.
Ruum tsio, tipaboode pa gabua popoia tau tigharaat zi pa gabua zoŋazi.
Yes to ravuuŋ gita ve gabua siriv tau lutuzi popoia na, tileep tomani ghom ila ruum tsio loolo, ve mbouŋ toozi igham ghom lolom poia kat.
9 Zilivaa tau lezi ezazi na tilam tileep tomani ghom ila ruum tsio paam. Ve toozi siriv, ene kinik natuzlivaŋa.
Livaa paaghu tau iyooz ila pa nimam tapir ve ughe uvaii, i garwaat.
I itiik tauu pa gabua popoia le paghuuna kat. Gabua tawe, tigharaat zi pa gol poia kat tau ilam pa taan sirivu to Opir na.
10 Natugliva, yo ughe uvai kinik. Tauvene ughur taliŋam poi ve ulooŋ aliŋag tane.
Ugham ŋgar pa tamtamon tsio ve ziiri waaro tsio muul sov.
11 Yo paghunam kat. Pale usan kinik aate.
I ta imin tiina tsio. Tauvene yo aat ulooŋ aliiŋa ve uleep ila i saamba.
12 Tamtamon to nugh Tiro pale tigham lem gabua popoia katini.
Yes tau kuaz tauŋa kat na, pale tigham lem gabua popoia maata maata. Leso matam iŋgal zi ve lolom poia pazi.
13 Livaa garwaat tau ighe ivai kinik na, ileep ila ruum tooni loolo. I paghuuna le paghuuna kat.
Nonoghiiŋa tooni, ene tisaii pa teret tau tigharaata pa gol.
14 I inonogh ghi pa nonoghiiŋa tau ŋgeretazi popoia na, ve tighamu ila to kinik.
Yesŋa zeetŋa zilivaa paghpaaghu tilaagh tila. *Syg 19:7+
15 Tamtamon tintinizi, ve tigherev zi toman lolozi poia, gha tiloŋ tila ruum to kinik.
16 O kinik, yo pale upoop natumŋa zitamoot katini, leso tiyol timbuzŋa.
Ve yo pale ughur zi to tigham pooz pa nughmariŋ.
17 Mbouŋ tsiau tane, tamtamon pale timbouia, ve matazi iŋgal ezam taghon taghon gha ila.
Tauvene nughmariŋ pale tipait ezam irau saawe.