118
Yes Israela tipait Maaron pa uleeŋ tau i igham pazi
1 Lolomim poia pa Yoova ve apaiti! Pasaa, i poia kat.
I loolo isaghav tamtamon tooni ve iuluul zi.
2 Yam eval tiina to Israel, alup avomim ve asaav aghe:
“I loolo isaghav tamtamon tooni, ve iuluul zi.”
3 Ve yam to watooŋrau tau avot ila to Aron na paam, asaav aghe:
“I loolo isaghav tamtamon tooni, ve iuluul zi.”
4 Tauvene yam tau aroi pa Yoova ve ataghon ŋgar tooni na, asov asaav aghe: “I loolo isaghav tamtamon tooni, ve iuluul zi.”
5 Muuŋ, yau naleep ila pataŋani tiina loolo ve leg eez mako. Tauvene nataŋ rarai Yoova pa uleeŋ.
Ve i ilooŋ aliŋag, ve ipas ghau navot pa pataŋani tsiau. Tauta aazne naleep ila nugh ghazooŋa.
6 Isaav ighe Yoova ileep zigeg, yau irau naroi mako.
Pasaa, tamtamon pale tigham saa payau? *Mbo 56:4, 121:7; 2Tim 4:18; Hib 13:6
7 Yoova ivool tsiau, ve iuluul ghau.
I aat itatan koiagŋa ila matag, ve naliiv zi. *1Kor 15:57; 1Yo 5:4
8 Iit tanumeer tamtamon to taan sov.
Tanumeer Yoova ve tayooŋ ila tooni, o poia.
9 Yes daaba tau tighamgham pooz na paam, tanumeer zi sov.
Tanumeer Yoova ve tayooŋ ila tooni, o poia.
10 Muuŋ, nugh nugh tilam tilivutin ghau tighe tigham malmal payau.
Eemon Yoova, tauta napasov zi.
11 Tiŋarui ghau tilam, ve tilivutin ghau, le leg sooso eta to naghau mako.
Eemon Yoova, tauta napasov zi.
12 Yes timorau ghau imin ŋgururuuv.
Eemon Yoova, tauta napasov zi, le tapirizi isov.
Yes timin yav tau ighan regh gha iyaryaar, ve rekia mon imaat.
13 Yes tipaburigin malmal payau, ve rigmon kanaŋ titatan ghau.
Eemon Yoova iuul ghau, tauta tivaghamun ghau mako.
14 Pasaa, i Uleeŋa tsiau ariaaŋa.
Yau naghamgham tapirig ila tooni, ve i imin sigheu payau.
Tauta nambou mbouŋ to napait eeza.
15 Alooŋ. Zeran duduŋazi tilepleep ila balbaal toz toz, ve tiyoryoor Yoova eeza toman lolozi poia. Pasaa, i iliiv koiazŋa wa.
Tisavsaav tighe: “Yoova niima tapir, ene pataŋani.
16 Niima iparav ariaaŋ kat.
I igharaat ghi pa malmal, ve iparav le iliiv koiŋa!”
17 Yau irau namaat soone. Pale naleep matag yaryaare.
Leso navotia uraat tintiina tau Yoova ighamgham zi.
18 Onoon, i ilos katin ghau.
Eemon ipul ghau namaat mako. *1Kor 11:32; Hib 12:5
19 Tauvene akaak ataman to zeran duduŋazi payau.
Leso nataghoni naloŋ nala, ve napait Yoova pa ŋgar tau i igham payau na.
20 Ene ataman to Yoova.
Yes tau tiduduuŋ ila i maata, o titaghoni tiloŋ tila. *Mbo 15:1, 24:3+; Syg 22:14
21 Yoova, yo ulooŋ suŋuuŋ tsiau, ve ugham mulin ghau pa pataŋani tsiau.
Tauvene lolog poia payo ve napait ghom.
22 Maet tau yes to raoŋ ruum matazi veleghini ve tisiki ilale,
tauta imin puughu pa ruum, leso ipaloti ve ruum iyooz ariaaŋ izala paavo. *Mt 21:42; Mk 12:10+; Mbaŋ 4:11; 1Pe 2:7
23 Maaron tauu igham gabua tane ivot.
Ve yei nighita imin gabua ŋgereeta ee ila matamai.
24 Saawe ta aazne, Yoova ighuru.
Tauvene tintiniin ve loloon poia pani. *Pil 4:4
25 O Yoova, lolom isaghatin ghei ve ugham mulin ghei!
Uul ghei, leso gabua naol isov ivot poi payei.
26 Ŋeer tane ilam pa Yoova eeza. Tauvene poia to Yoova aat izaa tooni.
Yei tau nileep ila Yoova rumei tooni loolo na, nighasoni nighe ighur poia tooni izaa tsiam. *Lu 13:35, 19:38; Yo 12:13
27 Yoova, i Maaron tauu!
I igham poghani ghiit, ve ghazooŋa tooni isul ghiit.
Akis tuum raua ve ala alivutin artaal ve apakuru.
28 Yo Maaron tsiau. Yau lolog poia payo ve napait ghom pa poia tsio.
Onoon kat, yo ta Maaron tsiau. Tauvene yau aat nayoor ezam.
29 Apait Yoova pa poia tooni toman lolomim poia. Pasaa, i poia kat.
I loolo isaghav tamtamon tooni, ve iuluul zi irau saawe.
*118:6: Mbo 56:4, 121:7; 2Tim 4:18; Hib 13:6
*118:20: Mbo 15:1, 24:3+; Syg 22:14
*118:22: Mt 21:42; Mk 12:10+; Mbaŋ 4:11; 1Pe 2:7
*118:26: Lu 13:35, 19:38; Yo 12:13