119
Suŋuuŋ to ŋeer tau ighur loolo kat pa Maaron aliiŋa
Tataghon Maaron saveeŋ tooni, o poia tooni izaa toit
1 Yes tau tighamgham sosor mako, ve laghooŋ toozi iduduuŋ mon itaghon saveeŋ to Yoova,
ene aat poia tooni izazaa toozi ve tintinizi.
2-3 Yes tau matazi kisin eez tau Maaron ighuru pa tamtamon tooni na, ve titaghoni irau saawe,
ve tighur lolozi isov iŋarui Maaron, ve tizuari zi to tiwataghi kat,
ve yes tau tighamgham sosor mako,
ve laghooŋ toozi, titaghon Maaron eez tooni,
ene pale tintinizi pa poia to Maaron tau izaa toozi. *Yo 14:21+; Mbaŋ 24:16; 1Tim 1:5
4 Yoova, yo ughe nitaghon tutuuŋ tsio eŋaeŋa ŋgara le nitaghoni kat.
5 Tutuuŋ tsio tau tigheen pataghaaŋ na, yau naghe le nayaryaaŋ pa taghoniiŋ zi.
6 Pa ighe matag iŋgalŋgal tutuuŋ tsio tisov,
ene irau mayag ila eval tiina matazi mako.
7 Eez tsio to gabizooŋ gabua, ene iduduuŋ mon. Isaav ighe upaghazoŋai ghau pani,
ene aat lolog poia payo, ve napait ghom toman lolog ŋgalaaŋa.
8 Tutuuŋ tsio naol tau tigheen pataghaaŋ na, yau aat matag kisin zi ve nataghon zi irau saawe.
Tauvene ughur murim payau sov.
Tagham ŋgar poia ila to Maaron
9 Isaav ighe ŋeer paaghu eta maata iŋgal tauu ve ighe laghooŋ tooni iŋgalaaŋ mon ila yo matam, ene pale igham saa?
I aat maata iŋgal aliŋam ve itaghoni.
10 Yau naghur lolog isov iŋarui ghom, ve nazuari ghau naghe le nawatagh katin ghom.
Tauvene upul ghau nasapir pa tutuuŋ tsio sov.
11 Yau naghita aliŋam imin gabua tauu. Tauvene naghur poghania ila lolog.
Leso ipalot ghau, ve nagham sosor payo sov.
12 O Yoova, yau napait ghom pa poia tsio.
Upaghazoŋai ghau pa tutuuŋ tsio naol tau tigheen pataghaaŋ na.
13 Tutuuŋ tsio naol tau yo uvoti zi na, avog pale isavi zi le tisov.
14 Eez tau yo ughuru payei na, saawe tau nataghoni, ene igham lolog poia kat, imin yes tau tipakur zi pa kuaz to taan.
15 Matag itaghon tutuuŋ tsio eŋaeŋa ŋgara naghe le naghazooŋ pazi.
Ve matag iŋgalŋgal eez tsio irau saawe.
16 Tutuuŋ tsio naol tau tigheen pataghaaŋ na, tigham lolog poia le poia kat.
Irau lolog iveegh pa aliŋam mako.
Maaron aliiŋa ipalot ghiit, leso tayooz ariaaŋ pa badooŋ pataŋani
17 O Yoova, yau besooŋa tsio. Utotoi poia tsio payau.
Leso naleep poia, ve nataghon aliŋam irau saawe.
18 Upaghazoŋai ŋgar tsiau, leso naghilaal ŋgar popoia naol tau tighenaar ila saveeŋ tsio loolo na.
19 Taan tane, ene nugh tsiau duduuŋ mako. Yau naleep namin loom pani mon.
Tauvene ugham ghau naghazooŋ pa tutuuŋ tsio naol ŋgara. *Pil 3:20; 1Pe 2:11; Hib 11:13
20 Saawe isov, yau napasawal naghe le utotoi ghau pa eez tsio to gabizooŋ gabua, o poi!
21 Yes tau tivelegh ghom ve tipapait tauzi na, yo uyaonyaon zi, ve aatyavyav tsio izazaa toozi.
Pasaa, tisasapir pa tutuuŋ tsio.
22 Ve yau, o matag kisin eez tau yo ughuru payei na, ve nataghoni irau saawe.
Tauvene saveeŋ veleghiiŋ ve mayaŋa tau tisiksik zi payau ne, upaghau zi payau.
23 Yes daaba tau tighamgham pooz na paam, tilup zi ve tiliil eez tighe tivaghamun ghau.
Eemon yau besooŋa tsio. Tauvene yau aat matag itaghon tutuuŋ tsio naol tau tigheen pataghaaŋ na, ve nagham ŋgar pazi poi.
24 Eez tau yo ughuru payei, ene igham ghau lolog poia le poia kat.
Ve ipaduduuŋ ghau, leso nawatagh saa ŋgar tau pale nataghoni.
Taghur loloon pa saveeŋ onoon ve tataghoni
25 Yau tapirig isov, ve rigmon kanaŋ namaat ve nagheen ila ŋgaupup.
Upaburigin ghau, ve ugham tapirig ivot muul itaghon saveeŋ tsio.
26 Ŋgar isov tau naghamgham zi, ene yau navoti zi payo. Tauta ulooŋ suŋuuŋ tsiau ve uul ghau.
Upaghazoŋai ghau pa tutuuŋ tsio naol tau tigheen pataghaaŋ na.
27 Tutuuŋ naol tau yo ughur zi na, upaghazoŋai ghau pa eez to taghoniiŋ zi.
Ve yau aat matag itaghon uraat tsio ŋgeretazi, ve nagham ŋgar pazi poi.
28 Yau lolog ipataŋan le tapirig isov.
Upalot ghau itaghon saveeŋ mbuaaŋ tsio.
29 Uul ghau to naleep soghan pa ŋgar karom.
Saveeŋ tsio, ene imin eez to poia tsio izaa tsiau.
30 Yau lolog ighur naghe yau aat nataghon eez to saveeŋ onoon.
Ve matag iŋgalŋgal eez tsio to gabizooŋ gabua.
31 O Yoova, eez tau yo ughuru payei na, yau nakisi igheen tuŋia ila lolog.
Tauvene upul ghau sov! Pale mayag.
32 Yo upaghazoŋai ghau pa gabua katini.
Tauta tinig izaa pa taghoniiŋ eez to tutuuŋ tsio.
Taghason Maaron to ipaghazoŋai ghiit pa tutuuŋ tooni
33 O Yoova, tutuuŋ tsio naol tau tigheen pataghaaŋ na, upaghazoŋai ghau pa eez to taghoniiŋ zi.
Leso matag kisin zi, ve nataghon zi ila ila le saawe tsiau isov.
34 Upaghazoŋai ghau pa saveeŋ tsio ŋgara.
Leso matag kisini, ve nataghoni toman lolog irau saawe.
35 Umuuŋ ve utotoi eez payau, leso nataghon tutuuŋ tsio.
Pa eez tana, ta igham lolog poia le poia kat.
36 Upaburigin lolog, leso nataghon eez tau yo ughuru payei na, ve nagham ŋgar pa ndouŋ leg kuaz to taan sov. *Lu 12:13+; 1Tim 6:9+
37 Upaghau matag pa gabua soroksorok to taan tau anoŋazi mako na,
ve upalot ghau to nataghon eez tsio. Leso naleep poi.
38 Yau besooŋa tsio. Tauvene matam iŋgal saveeŋ mbuaaŋ tsio, ve ugham anooŋa ivot payau.
Saveeŋ tsio tana iŋarui tamtamon tisov tau tiroi payo ve titaghon ŋgar tsio.
39 Saveeŋ saghati tau koiagŋa tisiksiki payau na, ene igham ghau naroi. Pa isaav ighe tamtamon tighur ila saveeŋ toozi tawe, ene pale mayag.
Tauvene utatan saveeŋ toozi, leso tamtamon tighur ila sov.
Pasaa, eez tsio to gabizooŋ tamtamon, ene iduduuŋ mon.
40 O Yoova, yau naghe nataghon tutuuŋ tisov tau yo ughur zi na.
Tauvene utaghon ŋgar tsio duduuŋa, ve ugham ghau naleep poia muul.
Maaron aliiŋa ipariaaŋ ghiit to taghur ila tooni
41 O Yoova, yau nawatagh: Yo lolom isaghav tamtamon tsio ve uluul zi. Utotoi ŋgar tana payau paam, o poi.
Tauvene ugham mulin ghau pa pataŋani tsiau itaghon saveeŋ mbuaaŋ tsio.
42 Leso yau irau nayol saveeŋ veleghiiŋ tau tisiksiki payau na.
Pasaa, yau naghur ila saveeŋ tsio.
43 Yau naghurghur matag pa gabizooŋ tsio.
Tauvene uul ghau lak! Leso avog ivotia gabuam tau avom onoon ve utataghon saveeŋ tsio irau saawe.
44 Yau aat nataghon saveeŋ tsio irau saawe.
Ta aazne, ve taghon taghon gha ila.
45 Tutuuŋ naol tau yo ughur zi na, yau nazuari ghau pa taghoniiŋ zi.
Tauvene gabua eta irau ipoon eez payau mako.
46 Eez tau yo ughuru payei na, yau aat navotia ila yes kinik naghozi paam.
Pa yau naroi, ma mayag pa tamtamon eta mako. *Mt 10:18+; Mk 13:9; 1Pe 3:15
47 Tutuuŋ tsio ta naol ne, tigham lolog poia le poia kat.
Tauta lolog pazi kat.
48 Yau lolog pa tutuuŋ tsio ta naol ne, ve napatab pazi. Tauvene nait nimag izaa, ve napait ghom pa tutuuŋ tsio.
Tutuuŋ tsio naol tau tigheen pataghaaŋ na, matag itaghon zi naghe nagham ŋgar pazi poi.
Isaav ighe tabaad pataŋani, Maaron aliiŋa pale irav ateen
49 Yau besooŋa tsio. Matam iŋgalŋgal saveeŋ tau umbua tomani ghau na.
Pa saveeŋ tsio tawe ipapalot ghau to naghur matag payo, ve nasaŋan uleeŋ tsio.
50 Isaav ighe pataŋani igham ghau, ene pale saveeŋ tsio iuul ghau to naleep poia.
Ŋgar tane, ta irav ateg le ateg izi.
51 Yes tau tipapait tauzi ve tivelegh ghom na, monmon tivevelegh ghau paam.
Eemon yau naghur murig pa saveeŋ tsio mako.
52 O Yoova, yau matag iŋgalŋgal saawe naol tau muuŋ ugabiiz tamtamon ve ughur atuya pazi.
Tauta ipalot ghau, ve igham ateg izi.
53 Isaav ighe naghita zeran sasaghati tighur murizi pa saveeŋ tsio,
ene igham ghau ateg yavyav kat.
54 Taan tane, yau naleep pani namin loom mon,
ve natoor mbouŋ katini pa tutuuŋ tsio naol tau tigheen pataghaaŋ na.
55 Yoova, matag iŋgalŋgal ghom pa mboŋ paam, ve nataghon saveeŋ tsio.
56 Yau gabuag tauvene:
Tutuuŋ naol tau yo ughur zi na, matag kisin zi ve nataghon zi irau saawe.
Loloon poia pa Maaron ve tataghon saveeŋ tooni
57 Yoova, yau naghit ghom naghe yo gabua tauu. Yau naleep ilat tsio imin taan poia ee tau tipuli payau to naleep ila.
Yau nambu saveeŋ payo naghe yau aat nataghon aliŋam.
58 Taŋiiz tsiau iŋarui ghom toman lolog:
Lolom isaghatin ghau, ve ughur poia tsio izaa tsiau itaghon saveeŋ mbuaaŋ tsio.
59 Yau nagabiiz laghooŋ tsiau naghe ene iduduuŋ mako.
Tauta natoor ŋgar tsiau, ve naghe nataghon eez tau yo ughuru payei.
60 Ve irau nasaŋan mako.
Yau aat rekia mon ve nataghon tutuuŋ tsio.
61 Zeran sasaghati tighur liis naol to tikis ghau.
Eemon irau lolog iveegh pa tutuuŋ tsio mako.
62 Yau naburig pa mboŋ anooŋa,
ve napait ghom. Pasaa, eez tsio to gabizooŋ gabua, ene iduduuŋ mon.
63 Yes tau tiroi payo ve titaghon ŋgar tsio na,
yau lolog pazi ve nagham zi timin zetagŋa.
64 O Yoova, yo lolom isaghav tamtamon tsio ve uluul zi. Ŋgar tsio tana, yo utotoia irau taan isov.
Upaghazoŋai ghau pa tutuuŋ tsio naol tau tigheen pataghaaŋ na, leso nawatagh zi kat.
Maaron, i poia kat
65 O Yoova, yau besooŋa tsio. Yo ughamgham poghani ghau kat itaghon saveeŋ mbuaaŋ tsio.
66 Yau naghur ila naghe tutuuŋ tsio ta naol ne, ene popoia mon.
Tauvene upaghazoŋai ghau pa ŋgar poia ve eez to gabizooŋ poghania gabua.
67 Muuŋ, yau nasosor pa eez tsio.
Eemon yo ulos ghau ve upaduduuŋ ghau, tauta aazne matag kisin aliŋam ve nataghoni.
68 Yo poiam kat. Ve ŋgar tau ughamgham zi na paam, ene popoia mon.
Upaghazoŋai ghau pa tutuuŋ tsio naol tau tigheen pataghaaŋ na.
69 Yes tau tipapait tauzi ve tivelegh ghom na, tiŋgalŋgal saveeŋ karom payau ve tivaghamunia ezag.
Eemon matag kisin tutuuŋ naol tau yo ughur zi na, ve nataghon zi toman lolog.
70 Zeran tawe lezi ghilalooŋ rigta mako.
Eemon yau, saveeŋ tsio igham lolog poia le poia kat.
71 Pataŋani tau muuŋ igham ghau, ene poia.
Pasaa, ipaduduuŋ ghau, ve ipaburigin ŋgar tsiau pa tutuuŋ tsio naol tau tigheen pataghaaŋ na.
72 Saveeŋ tau ivot ila avom na, yau naghita imin gabua tauu.
Iliiv maet silva ma gol ndiŋndiŋ ndiŋndiŋ.
Tutuuŋ to Maaron, ene iduduuŋ mon
73 Taum nimam igharaat ghau, ta navot.
Tauvene upaghazoŋai ghau pa tutuuŋ tsio ta naol ne, leso nagham ŋgar pazi poi.
74 Yes tau tiroi payo ve titaghon ŋgar tsio, isaav ighe tighit ghau, ene pale lolozi poia.
Pasaa, yau naghur ila saveeŋ mbuaaŋ tsio, ve naghurghur matag naghe naghita anooŋa ivot.
75 O Yoova, yau nawatagh: Eez tsio to gabizooŋ tamtamon, ene iduduuŋ mon.
Ve yo utaghon saveeŋ mbuaaŋ tsio irau saawe.
Tauta ulos ghau to upaduduuŋ ghau.
76 Yo lolom isaghav tamtamon tsio ve uluul zi.
Utotoi ŋgar tauvene payau paam itaghon saveeŋ tau yo umbua payau na.
Leso urav ateg, ve upalot ghau.
Pa yau besooŋa tsio.
77 Lolom isaghatin ghau, ve uul ghau to naleep poi.
Pasaa, saveeŋ tsio, tauta igham lolog poia le poia kat.
78 Yes tau tipapait tauzi ve tivelegh ghom na, tinoknok ŋgaliiŋ saveeŋ karom payau. Utatan zi ve ugham zi mayazi.
Eemon yau, o matag itaghon tutuuŋ naol tau yo ughur zi na naghe nagham ŋgar pazi poi.
79 Yes tau tiroi payo ve titaghon ŋgar tsio, o tilam payau ve yeŋa nilup ghei.
Pa zeran tauvene tiwatagh eez tau yo ughuru pa tamtamon tsio.
80 Yau naghe ŋgar tau igheen ila lolog ne, eta isosor sov, ve nataghon duduŋai tutuuŋ tsio naol tau tigheen pataghaaŋ na. Leso mayag sov.
Taŋiiz to ŋeer tau izuari ghi pa taghoniiŋ tutuuŋ to Maaron
81 O Yoova, yau nakaria saŋaniiŋ pa uleeŋ tsio, le tapirig isov kat.
Eemon yau naghur ila naghe aliŋam pale ighur anooŋa.
82 Yau naghurghur matag naghe naghita saveeŋ mbuaaŋ tsio ighur anooŋa. Eemon nasaŋan le mako.
Pale ŋeez o uul ghau ve ateg izi?
83 Yau nasaghat ve tamtamon lolozi iveghai ghau wa. Tighit ghau namin pen.
Eemon tutuuŋ tsio naol tau tigheen pataghaaŋ na, lolog iveegh pazi mako.
84 Yau besooŋa tsio. Puughu mindai ta yo umamarar koiagŋa, ve tighamgham pataŋani payau?
Pale ŋeez o ugabiiz zi, ve ughur atuya pazi?
85 Ughita. Yes tau tipapait tauzi ve tivelegh ghom na, titai puura payau tighe natap nazila.
Zeran tawe titaghon saveeŋ tsio mako.
86 Tutuuŋ tsio tisov, ene popoiazi mon. Tauvene yei irau ninumeer zi to tipaduduuŋ ghei.
Aazne, tamtamon tighur pataŋani payau sorok. Tauvene uul ghau lak!
87 Pasaa, malau mako pale tipasov lepoogh tsiau to taan.
Eemon tutuuŋ naol tau yo ughur zi na, yau naghur murig pazi mako.
88 Yo lolom isaghav tamtamon tsio ve uluul zi. Tauvene uŋgin ghau naleep poi.
Leso matag kisin eez tau yo ughuru payei na, ve nataghoni irau saawe. Eez tana, taum avom isavia.
Maaron aliiŋa pale ighengheen tauvene taghon taghon gha ila
89 O Yoova, saveeŋ tsio pale iyaryaaŋ izi sambam, ve ighengheen tauvene taghon taghon gha ila. *Mt 5:18; Lu 16:17, 21:33; 1Pe 1:25
90 Tamtamon tipopoop, ve paaghu toozi tivotvot taghon taghon gha ila.
Ve gabuam tau avom onoon ve utataghon saveeŋ tsio na paam. Ighengheen tauvene taghon taghon gha ila.
Yo ta ughur taan igheen tuŋia ila niia. Irau izuur mako.
91 Muuŋ le ilam aazne, gabua naol isov tigheen tuŋia ila niazi niazi itaghon saveeŋ tau yo usavia na.
Ve gabua naol isov, ene timin besooŋa tsio.
92 Saveeŋ tsio igham lolog poia le poia kat.
Imin ta mako, kanaŋ pataŋani tsiau igham ghau nalaleg.
93 Tutuuŋ naol tau yo ughur zi na, irau lolog iveegh pa eta mako. Mako le mako kat.
Pasaa saveeŋ tsio, tauta igham ghau vuvuŋag ila ve naleep poia muul.
94 Yau namin lem wa. Tauvene ugham mulin ghau lak!
Pasaa, yau nazuari ghau pa taghoniiŋ tutuuŋ naol tau yo ughur zi na.
95 Aazne, zeran sasaghati tighamgham lilin ghau tighe tirav ghau namaat.
Eemon matag iŋgalŋgal eez tau yo ughuru payei.
96 Yau naghita gabua eta tau ivot geeg ne mako. Gabua ta naol ne, tisov timuul mon.
Eemon tutuuŋ tsio, o irao kat. Ene puughu tiina, ve poia le poia kat.
Saveeŋ to Maaron imin puughu pa ŋgar poia
97 Yau lolog pa saveeŋ tsio kat!
Tauvene saawe ta naol ne, mboŋoozo ila le ravrav izi, matag itaghoni ve naghamgham ŋgar pani.
98 Tutuuŋ tsio igheen ila ŋgar tsiau irau saawe.
Tauta ŋgar tsiau iliiv koiagŋa ŋgar toozi.
99 Ŋgar tsiau iliiv yes ŋgara tau tipaduduuŋ ghau ne paam.
Pasaa, matag itaghon eez tau yo ughuru payei na, ve naghamgham ŋgar pani.
100 Ve ŋgar tsiau iliiv zolmana ŋgar toozi paam.
Pasaa, tutuuŋ naol tau yo ughur zi na, matag kisin zi, ve nataghon zi irau saawe.
101 Yau napaghau taug pa eez sasaghati ta naol ne,
leso nataghon aliŋam.
102 Yau naghur murig pa tutuuŋ tsio duduŋazi mako.
Pasaa, yo taum ta upaghazoŋai ghau pa tutuuŋ tana.
103 Tok suuru, ene poia pa ghunuuŋ. Eemon saveeŋ tsio, ene poia le poia kat. Iliiv tok suuru.
104 Tutuuŋ naol tau yo ughur zi na, ene tiuul ghau pa ghilalooŋ ŋgar poia.
Tauta naghur koi pa ŋgar karom naol isov. Mako pale igherev ghau to napul eez tsio.
Saveeŋ to Maaron ighur ghazooŋa pait
105 Saveeŋ tsio, ene imin lam tau isul ghau.
Ve imin ghazooŋa payau, leso nalaagh taghon eez tsio. *Mbo 119:130; 2Pe 1:19
106 Gabizooŋ tsio, ene iduduuŋ mon. Tauta nambu saveeŋ payo ve napariaaŋa le iyaryaaŋ kat naghe yau aat nataghon eez tsio to gabizooŋ gabua.
107 O Yoova, pataŋani tiina kat igham ghau le naleep saghat.
Uul ghau to naleep poi itaghon saveeŋ mbuaaŋ tsio.
108 Yau lolog poia payo ve napait ghom pa poia tsio.
Naghe paitooŋ tsiau tane imin watooŋrau poia ila matam.
Upaghazoŋai ghau pa eez tsio to gabizooŋ gabua.
109 Monmon yau nalepleep ila naal aavo.
Eemon lolog iveegh pa saveeŋ tsio mako.
110 Onoon, zeran sasaghati tighur liis payau.
Eemon tutuuŋ naol tau yo ughur zi na, yau nasapir pazi mako.
111 Eez tau yo ughuru payei, ene gabua poia tau yo ugham payau. Yau aat nakiskisi tauvene taghon taghon gha ila.
Pasaa, igham ghau lolog poia le poia kat.
112 Tutuuŋ tsio naol tau tigheen pataghaaŋ na, ŋgar tsiau iyaryaaŋ naghe yau aat nataghon zi le irau saawe tsiau isov.
Taghur loloon pa Maaron ve saveeŋ tooni
113 Yes tau tibees payo toman lolozi eemon mako ve ŋgar toozi ru na, yau lolog pazi mako.
Eemon saveeŋ tsio, yau lolog pani kat. *Yems 1:7-8, 4:8
114 Yo umin niag to yoŋgaaŋ, ve umin sigheu payau.
Tauvene naghur ila saveeŋ tsio, ve naghurghur matag naghe naghita anooŋa ivot.
115 Yam zeran tau aghamgham ŋgar saghati na, aghau payau!
Pasaa, yau naghe nataghon tutuuŋ to Maaron tsiau.
116 O Yoova, upalot ghau itaghon saveeŋ mbuaaŋ tsio. Leso nayooz ariaaŋ ve naleep poia.
Isaav ighe naghur matag payo sorok, ene pale mayag. *Ro 5:4+
117 Ukis ghau tuŋia.
Leso naleep poi, ve matag kisin tutuuŋ tsio naol tau tigheen pataghaaŋ na, ve nataghon zi irau saawe.
118 Tamtamon tisov tau tisapir pa tutuuŋ tsio na, yo ughur murim pazi.
Ŋgar toozi karom, ene itotoi zi ighe yes tipul eez tsio wa.
119 Zeran sasaghati tau tileep izi taan na, yo ughit zi timin pen ve usik zi tilalez.
Tauta lolog isaghav eez tau yo ughuru payei.
120 Yau nagham ŋgar payo, le roiŋ tiina igham ghau ve tinig irur.
Ve ŋgar tsio tau monmon ugagabiiz tamtamon ve ughur atuya pazi, ene paam igham ghau naroi.
Suŋuuŋ to ŋeer tau ibesbees pa Maaron
121 Yau nagham ŋgar popoia ve ŋgar duduuŋa mon.
Tauvene upul ghau nala koiagŋa nimazi sov.
122 Yau besooŋa tsio. Tauvene uyooz payau ve uul ghau. Leso naleep poi.
Yes tau tipapait tauzi ve tivelegh ghom na, upul zi tigham saghatin ghau sov.
123 Yau naghurghur matag pa uleeŋ tsio. Ve nakaria saŋaniiŋ wa.
Pale ŋeez o uul ghau itaghon saveeŋ mbuaaŋ tsio?
124 Yo lolom isaghav tamtamon tsio ve uluul zi. Utotoi ŋgar tana payau paam. Pa yau besooŋa tsio.
Ve upaghazoŋai ghau pa tutuuŋ tsio naol tau tigheen pataghaaŋ na.
125 Yau besooŋa tsio. Tauvene upaghazoŋai ghau, leso naghilaal ŋgar poia, ve nawatagh katin eez tau yo ughuru payei na.
126 O Yoova, aazne tamtamon tizorzoor saveeŋ tsio.
Uburig ve ugham ŋgar eta pazi lak!
127 Onoon kat, yau lolog pa tutuuŋ tsio ta naol ne iliiv gol.
Gol tau ŋgalaaŋa ve poia kat na paam, naghita naghe tutuuŋ tsio iliivo.
128 Tauvene tutuuŋ naol tau yo ughur zi, tauta ipaduduuŋ ghau pa laghooŋ tsiau.
Ve naghur koi pa eez naol tau tigherev ghau to naghur murig payo.
Taghur loloon pa Maaron aliiŋa
129 Eez tau yo ughuru payei, ene poia le poia kat.
Tauvene matag kisini ve nataghoni irau saawe.
130 Isaav ighe tipaghazoŋai saveeŋ tsio puughu pa tamtamon, ene imin ghazooŋa pazi.
Ve yes tau ŋgar toozi tiina mako na, saveeŋ tsio igham ŋgar toozi ivot, leso tighilaal ŋgar poia. *Mbo 19:7; 2Tim 3:15+
131 Yau lolog pa tutuuŋ tsio kat,
imin tamtamon tau murunu le isaghat kat.
132 Matam ilam payau, ve ugham poghani ghau.
Pasaa, yes tau lolozi igheen tsio ve tipapait ezam na, yo ughamgham tauvene pazi.
133 Upaduduuŋ ghau, leso laghooŋ tsiau iduduuŋ itaghon saveeŋ tsio.
Ve upul ŋgar saghati eta iliiv ghau sov.
134 Yes tau tighamgham pataŋani payau to titatan ghau na, ugham mulin ghau ila nimazi.
Leso nataghon tutuuŋ naol tau yo ughur zi na.
135 O Yoova, yau besooŋa tsio. Naghe lolom poia payau ve ugham poghani ghau.
Ve upaghazoŋai ghau pa tutuuŋ tsio naol tau tigheen pataghaaŋ na.
136 Yau nataŋtaŋ, ve matag suuru irereer izizi imin yaa.
Pasaa, tamtamon titaghon saveeŋ tsio irao soone.
Ŋgar duduuŋa to Maaron
137 Yoova, yo duduŋam kat.
Ve gabizooŋ tsio paam, ene iduduuŋ mon.
138 Eez tau yo ughuru payei, ene iduduuŋ mon.
Tauvene yei irau ninumeera to ipaduduuŋ ghei.
139 Ŋgar tsiau iyaryaaŋ kat naghe tamtamon tisov titaghon aliŋam.
Eemon koiagŋa lolozi iveghaini. Tauta tigham ghau ateg yavyav kat.
140 Yau besooŋa tsio. Lolog isaghav saveeŋ tsio, ve nanumeera kat. Pasaa, natoova le naghita naghe ene onoon.
141 Onoon, yau ŋeer sorok ve tamtamon matazi izi payau.
Eemon tutuuŋ naol tau yo ughur zi na, lolog iveegh pazi mako.
142 Ŋgar tsio duduuŋa pale ighengheen tauvene taghon taghon gha ila.
Ve saveeŋ tsio, ene onoon mon. Tauvene irau naghur ila, ve nanumeera kat.
143 Onoon, pataŋani naol itatan ghau, ve igham ghau lolog ipataŋan kat.
Eemon tutuuŋ tsio, ene igham lolog poia le poia kat.
144 Eez tau yo ughuru payei, ene iduduuŋ mon, ve ighengheen tauvene irau saawe.
Upaghazoŋai ghau pani, leso naleep poi.
Isaav ighe loloon ipataŋan, mataan iŋgal Maaron aliiŋa
145 O Yoova, yau nataŋ rarai ghom toman lolog. Ulooŋ suŋuuŋ tsiau ve uul ghau.
Leso matag kisin tutuuŋ tsio naol tau tigheen pataghaaŋ na, ve nataghon zi.
146 Taŋiiz tsiau iŋarui ghom. Upas ghau navot pa pataŋani tsiau tane.
Leso matag kisin eez tau yo ughuru payei na, ve nataghoni irau saawe.
147 Yau naghur ila saveeŋ mbuaaŋ tsio, ve naghurghur matag naghe naghita anooŋa ivot.
Tauvene aaz izaa soone, ve yau naburig nataŋ rarai ghom to uul ghau.
148 Ve mboŋ ta naol ne paam, yau namamaat.
Leso matag itaghon saveeŋ tsio, ve nagham ŋgar pani poi.
149 O Yoova, yo lolom isaghav tamtamon tsio ve uluul zi. Tauvene ulooŋ suŋuuŋ tsiau tane, ve uul ghau naleep poi. Pasaa, gabizooŋ tsio, ene iduduuŋ mon.
150 Aazne, zeran sasaghati tilam tigharau ghau tighe tivaghamun ghau.
Ŋgar toozi igheen malau kat pa saveeŋ tsio.
151 Eemon Yoova, yo uleep zigeg.
Ve tutuuŋ tsio ta naol ne, ene irau nanumeer zi to tipaduduuŋ ghau.
152 Ta muuŋ ve ilam, yau naghilaal naghe eez tau yo ughuru payei, yo ughe igheen tauvene irau saawe.
Ŋeer ee itaŋ rarai Maaron to igham mulini ila koiŋa nimazi
153 Yoova, ughita pataŋani tsiau tane, ve upaghau ghau pani.
Pasaa, lolog iveghai saveeŋ tsio mako.
154 Aazne, tamtamon tipayooz ghau sorok pa savsaveeŋ. Tauvene uyooz payau ve uul ghau naleep poi itaghon saveeŋ mbuaaŋ tsio.
155 Zeran sasaghati, yo uluul zi mako.
Pasaa, tutuuŋ tsio naol tau tigheen pataghaaŋ na, yes tigham ŋgar pa taghoniiŋ zi mako.
156 O Yoova, yes tau tileep ila pataŋani loolo na, lolom isaghatin zi kat.
Tauvene uul ghau naleep poi itaghon ŋgar tsio duduuŋa.
157 Pasaa, koiagŋa tau tighamgham pataŋani payau ne, yes eval kat.
Eemon eez tau yo ughuru payei na, yau nasapir pani mako.
158 Yau naghita yes tau tighur murizi payo na, le irau lolog mako kat.
Pasaa, yes titaghon tutuuŋ tsio mako.
159 O Yoova, ughita. Tutuuŋ naol tau yo ughur zi na, yau lolog isaghav zi kat.
Uul ghau naleep poi. Pasaa, yo lolom isaghav tamtamon tsio ve uluul zi.
160 Saveeŋ tsio puughu ene vene: Yo avom onoon ve utaghon saveeŋ mbuaaŋ tsio irau saawe.
Ve tutuuŋ tsio ta naol ne, ene tiduduuŋ mon, ve tigheen tauvene taghon taghon gha ila.
Poia to Maaron pale izaa to yes tau titaghon eez tooni
161 Yes daaba to taan tighurghur pataŋani payau sorok. Eemon yau naroi pazi mako.
Saveeŋ tsio mon ta naroi pani.
162 Saveeŋ tsio igham ghau lolog poia le poia kat,
imin tamtamon tau ilaagh ila le indeeŋ le gabua poia eez.
163 Ŋgar karom naol isov, ene lolog pazi mako kat ve naghur koi pazi.
Eemon saveeŋ tsio, o lolog isaghavu kat.
164 Mataaz ta naol ne, napapait ghom pai liim ve ru.
Pasaa, gabizooŋ tsio, ene iduduuŋ mon.
165 Yes tau lolozi isaghav saveeŋ tsio, ene pale tileep poia kat.
Ve gabua eta irau igham zi titap ne mako.
166 O Yoova, yau nataghon tutuuŋ tsio ta naol ne,
ve naghurghur matag pa uleeŋ tsio.
167 Eez tau yo ughuru payei na, yau lolog isaghavu kat.
Tauta matag kisini, ve nataghoni irau saawe.
168 Yau nataghon eez tana tomania tutuuŋ naol tau yo ughur zi na.
Pasaa, ŋgar isov tau yau naghamgham zi ne, yo ughitoor zi isov.
Mataan iŋgal saveeŋ to Maaron ve tapakuru
169 O Yoova, ulooŋ taŋiiz tsiau tane.
Ugham ghau naghilaal ŋgar poia itaghon saveeŋ tsio.
170 Ughur taliŋam pa suŋuuŋ tsiau, ve upas ghau navot pa pataŋani tsiau itaghon saveeŋ mbuaaŋ tsio.
171 Yo upaghazoŋai ghau pa tutuuŋ tsio naol tau tigheen pataghaaŋ na.
Tauvene avog aat ipait ghom kat.
172 Yau aat nambou mbouŋ tau iŋarui saveeŋ tsio.
Pasaa, tutuuŋ tsio ta naol ne, ene iduduuŋ mon.
173 Nimam isaŋan pa uleeŋ ghau.
Pasaa, ŋgar tsiau iyaryaaŋ naghe nataghon tutuuŋ naol tau yo ughur zi na.
174 O Yoova, yau napasawal pa uleeŋ tsio.
Ve saveeŋ tsio, ta igham lolog poia le poia kat.
175 Upul ghau naleep matag iyaryaar, leso napait ghom.
Tutuuŋ tsio aat iuul ghau to naleep poia.
176 Yau besooŋa tsio. Eemon aazne nasosor pa eez tsio ve navalaghlaagh imin sipsip tau ighau ila ve ilale.
Tauvene uil ghau, ve ugham ghau namuul nalam. Pasaa, yau lolog iveegh pa tutuuŋ tsio mako. *Lu 15:4