137
Taŋiiz to yes Israela izi Babilon
1 Yei mbolemai izi ila yaa to yes Babilona zigezi,
ve niŋuzuuv ila pa nugh Zion, le lolomai isaghat ve nitaŋ.
2 Tauvene nisaron gita tsiei tizala tituuk ila ai bogazi.
Pasaa, lolomai pa ravuuŋ zi muul mako.
3 Koiamaiŋa tau tigham ghei nilam nileep nugh toozi na, tighe nimbou mbouŋ siriv, leso tilooŋa ve igham lolozi poia.
Tisaav payei tighe: “Ou, ambou mbouŋ tsiam eta to nugh Zion gha nilooŋa lak!”
4 Eemon aazne, yei nileep nimin loom pa taan ite.
Pale nimbou mbouŋ pa Yoova izi nugh tane mindai?
5 O Yerusalem, isaav ighe lolog iveegh payo,
Yoova tauu aat ivaghamunia nimag tapir, leso narav gita muul sov.
6 Onoon kat, isaav ighe matag iŋgal Yerusalem muul mako,
ve tintinig pa gabua ite paam iliiv Yerusalem,
Yoova tauu aat ivaghamun avog, leso nambou muul sov.
7 O Yoova, matam iŋgal ŋgar saghati to yes Edoma, ve uyatu.
Pasaa, saawe tau koiamaiŋa tireu Yerusalem, yes Edoma tintinizi ve tisaav tighe:
“Iya, poia kat pa areu Yerusalem. Areu mbirisaini izi!”
8 O nugh Babilon, yo uvaghamunia nugh katini, tauvene yo paam pale usaghat.
Tamtamon tau ighe iyat ŋgar tau yo ugham payei na, ene pale tintini pa poia to Maaron tau izaa tooni!
9 Ve yes tau tikis natumimŋa geegeu ve tilos zi izala maet paavo na, tauvene paam. Poia to Maaron pale izaa toozi ve tintinizi. *Syg 18:1–19:4