18
Babilon itap izi imin kaut sorok
1 Murei ra, matag ila le naghita aŋela ee ipul sambam ve izilam. I tapiri tiina kat, ve mbonari isul taan le ighazooŋ kat. *Syg 10:1
2 I iboob aliiŋa tiina kat ighe:
“Nugh tiina Babilon isaghat wa! Itap le isaghat kat! Aazne, nugh balim kat. Tamtamon eta ileep muul mako.
Gabua naol tau tiŋgalaaŋ ila Maaron maata mako na, tighamu imin lezi niazi to lepoogh. Avuvu sasaghati, man sasaghati, ve gabua sasaghati naol tau loloon pa ghitooŋ zi mako na, tilup zi ta sewe. *Is 13:19, 21:9; Yer 50:39+
3 Pasaa, nugh tawe ta ighegherev nughmariŋ pa ghamuuŋ ŋgar saghati ve yesŋa tighurghur boog. Ve ipaghun zi pa vaen tooni ariaaŋa kat le ŋgar toozi ivaghamgham. Yes kinik to taan paam. Yesŋa tighurghur boog.
I ighe igham le taan pabodeeŋa naol, ve ileep poia le poia kat. Tauta zeran to raukoliiŋ tilala tooni, ve tigholia gabua toozi ila tooni, ve timin kuaz tauu.” *Syg 14:8, 17:2
4 Ve nalooŋ saveeŋ ite sambam ve izilam ighe:
“Tamtamon tsiau, apul nugh tana ve aghawaar. Mako pale iyes gham pa ŋgar tooni saghati, ve pataŋani tau pale izaa tooni na izaa tsiam paam. *Gnp 19:12+; Yer 51:6; 2Kor 6:17
5 Pasaa, sosor tooni ivandou ghi izala izala le ikis sambam saamba. Ŋgar tooni sasaghati naol isov tawe, Maaron maata kisin zi. *Gnp 18:20+; Yona 1:2
6 Ŋgar saghati tau i ighamghamu na, apamuule ila pani. Ve atuya tau aghe agham pani na, aghur ite paam izala paavo ve agham pani!
Muuŋ, i itoor yaa ariaaŋa pa tamtamon ve ipaghun zi. Tauvene aazne, yam aat atoor yaa ariaaŋa kat ve aliŋi ila i tauu rubruub tooni le ivon kat. Leso ighunu le isooŋ katini. *Mbo 137:8; Yer 50:29
7 Muuŋ, i ipakur ghi kat, ve igham le taan pabodeeŋa naol, ve lepoogh tooni poia le poia kat. Tauvene i aat iyamaan yavyavuuŋ tiina ve itaŋ, leso iyat ŋgar tooni tawe.
Pasaa, i igham tiini ighe: ‘Yau garwaat tinazi. Nambool pa gabua eta mako. Yau aat naleep ila niag to ghamuuŋ pooz, ve lepoogh tsiau poia mon taghon taghon gha ila. Yau naar gha leso nataŋ? Mako. Pataŋani eta irau ivot payau mako.’ *Is 47:7+
8 Pataŋani naol tau Maaron pale ighuru pani, ene pale tisov tivot pani pa aaz eemon. Saawe tana, taŋiiz, pitool, ve moroghooŋ tomania mateegh pale tivot pani. Ve yav aat ighani le imin avav.
Pasaa, Tiina toit Maaron tau pale ighur atuya pani, i saksaki ve tapiri tiina kat.” *Yer 50:34
9 Yes kinik to taan tau muuŋ yesŋa livaa tana tighur boog ve tigham lepoogh poia kat ila tooni na, isaav ighe tighita yav ighani gha mbuasa imbuŋ, ene pale lolozi isaghat kat ve titaŋ tiina pani. *Yer 50:46; Ezek 26:16+
10 Tighita yavyavuuŋ tiina ighamu le roiŋ tiina igham zi. Tauta tileep soghan ve tiŋuzuuva tighe:
“Oyai, ukaria taum wa! Aa nugh tiina, ukaria taum wa!
Babilon, yo ezam ve tapirim tiina. Eemon aazne, ugham atuya tsio, ve rekia mon saghatiiŋ tiina igham ghom gha umbiriis.” *Is 21:9
11 Ve zeran to raukoliiŋ irau taan isov pale lolozi ipataŋan ve tipanin pani. Pasaa, lezi tamtamon eta to ighol gabua toozi muul mako. *Ezek 27:28-36
12 Muuŋ, yes tigholia gabua maata maata ila tooni: Gol, silva, ŋgool maata, ve maet milmilia siriv tau popoiazi ve atuyazi tintiina. Ve uuli popoiazi tau ŋgeretazi pisosooŋa, aindan, ma siŋsiŋai, ve ai siriv tau vazizi popoia tomania gabua popoia naol tau tigharaat zi pa elepan zooŋa, ve ai popoia tau atuyazi tintiina, ain, baras, ve maet siriv paam tau ŋgeretazi popoia. 13 Ve gabua maata maata siriv tau vazizi popoia ve atuyazi tintiina. Ve vaen, ŋgoreeŋ, aniiŋ, makau, sipsip, ve hos tomania karis. Ve tigholia tamtamon paam gha timin besooŋa sorok. Gabua naol tane, irau tiraukol pazi ta sewe muul mako. 14 Ve yes pale tisaav pa nugh tiina Babilon tighe:
“Gabua naol isov tau lolom ighaar pa ghamuuŋ zi na, eta igharau ghom muul mako. Kuaz tsio tisov tau popoiazi kat ve ughamgham ezam pani na, tisov tilalez wa. Irau ughit zi muul mako.”
15 Zeran to raukoliiŋ tau muuŋ tigholia gabua toozi izi nugh Babilon ve timin kuaz tauu na, pale tiroi pa yavyavuuŋ tiina tau ighamu na. Tauvene yes pale tileep soghan pani, ve tipanin pani tighe:
16 “Oyai, ukaria taum wa! Aa nugh tiina, ukaria taum gha usaghat kat!
Muuŋ, yo unonogh ghom pa nonoghiiŋa popoiazi kat tau ŋgeretazi pisosooŋa, aindan, ve siŋsiŋai. Ve utiik taum pa gabua maata maata tau tigharaat zi pa gol, ŋgool maata, ve maet popoia siriv tau atuyazi tintiina.
17 Eemon saawe tuuku tane, kuaz tsio tawe tisov tisaghat gha tilalez.”
Ve yes daaba to waaŋ tomania uraata toozi, ve yes tau tizaa waaŋ tomani zi na, ve tamtamon tisov tau tiravraav pa raukoliiŋ na paam, pale tisov tiyooz soghan. 18 Ve matazi ila pa mbuas tau izazaa pa nugh tiina Babilon na, ve tipasawal pani tighe: “Oyai, saa nugh tiina ite paam ta irau Babilon?” 19 Tauvene lolozi ipataŋan, titaŋ tiina ve timoŋ pani. Ve tiŋuzuuva tighe:
“Oyai, ukaria taum wa! A nugh tiina, ukaria taum gha usaghat kat!
Aazne, paita umbiriis gha ulalem. Pale nigham mindai?
Kuaz tsio mon, tauta yei tau lemai waaŋ ne, nisov nimin kuaz tauŋa.”
20 “Tauvene yam to nugh sambam, yam mbaŋooŋa to Krisi, yam propet, ve yam tamtamon patabuyaaŋa to Maaron, lolomim poia ve tintinmim! Pa aazne, Maaron igabiiz nugh tiina Babilon, ve ighur atuya pani to iyat sosor tau i igham payam na.”
21 Ra naghita aŋela ee tau tapiri tiina, igham maet tiina ee, ve isiki izila pa te, ve isaav ighe:
“Ŋgar raraate tauvene pale ivot pa nugh tiina Babilon. Pale tireua ilale. Irau tighita muul mako.
22 Tauvene tamtamon eta pale ileep izi nugh Babilon ve ilooŋ mbouŋ, gita, tavuur, pirai, ma gabua ite paam luutu ta sewe muul mako. *Yer 25:10
Ve zeran tau tighagharaat gabua maata maata na paam, eta pale ileep ta sewe muul mako.
Ve maet tintiina to mumuuŋ wit imin palawa paam, irau talooŋ lutuzi ila nugh loolo muul mako.
23 Ve lam eta irau mbonari isul nugh loolo muul mako.
Ve oroor to vaivaiŋa paghpaaghu irau ivot ila nugh loolo muul mako.
Zeran tsio to raukoliiŋ, tirao kat. Tiliiv tamtamon tisov to taan.
Ve mur tsio, ene ikau nughmariŋ ŋgar toozi le tisosor pa eez to Maaron.
24 Yo uliŋliŋ siŋ pa tamtamon patabuyaaŋa to Maaron ve yes propet tooni tomania eval tiina to taan. Tauta lem sosor tiina kat ila Maaron maata.” *Mt 23:35+; Syg 17:6+