5
Õꞌacʉ̃ põꞌrã nírã, ñaꞌasere weeticãꞌrõʉaꞌa nise niꞌi
Nipeꞌtirã “Jesú Õꞌacʉ̃ beseꞌcʉ nimi” ni ẽjõpeorãnojõ Õꞌacʉ̃ põꞌrã nima. Ãpẽrãrẽ maꞌírã, na põꞌrã quẽꞌrãrẽ maꞌirõʉaꞌa. Marĩ Õꞌacʉ̃rẽ maꞌi, cʉ̃ dutiꞌquere wéérã, marĩ cʉ̃ põꞌrãrẽ maꞌiꞌi nisere masĩnoꞌo. Õꞌacʉ̃rẽ maꞌírã, cʉ̃ dutiꞌquere weerã weeꞌe. Cʉ̃ dutise diasaweꞌe, weeta basiopũrĩcãꞌsaꞌa. Marĩ Õꞌacʉ̃ põꞌrã aꞌti turi cjase ñaꞌasere weeweꞌe. Jesucristore ẽjõpeose meꞌrã añurõ weeta basioꞌo. Marĩ Jesucristore “Õꞌacʉ̃ macʉ̃ nimi”, ni ẽjõpeoꞌo. Te meꞌrã diaꞌcʉ̃ aꞌti ʉmʉco cjase ñaꞌasere cãꞌmotaꞌamasĩsaꞌa.
Jesucristore “Õꞌacʉ̃ macʉ̃ nimi” nise niꞌi
Jesucristo Õꞌacʉ̃ macʉ̃ nimi. Cʉ̃ aꞌti turipʉ nicã, Juã wãmeyeri masʉ̃ cʉ̃rẽ wãmeyewĩ. Cʉ̃rẽ wãmeyegʉ, aco meꞌrã wãmeyewĩ. Beꞌro cʉ̃ curusapʉ wẽrĩwĩ. Aꞌtiro weese meꞌrã cʉ̃ Õꞌacʉ̃ macʉ̃ nisere ĩꞌowĩ. Cʉ̃rẽ wãmeyeꞌque meꞌrã diaꞌcʉ̃ ĩꞌotiwĩ. Cʉ̃ wẽrĩse meꞌrã quẽꞌrãrẽ ĩꞌowĩ. Espíritu Santu Jesucristo Õꞌacʉ̃ macʉ̃ nisere ĩꞌomi. Cʉ̃́ta diacjʉ̃ cjasere weregʉ nimi. Aꞌte quetire na basuta ĩꞌoma. Na iꞌtiarã ʉꞌmʉsepʉ nima: pacʉ, macʉ̃, tojo nicã Espíritu Santu. Ãꞌrã iꞌtiarãpʉ dʉcawatimirã, niꞌcʉ̃ta nimi. Aꞌti nucũcãpʉre Espíritu Santu werese meꞌrã Jesú Õꞌacʉ̃ macʉ̃ nimi nisere masĩꞌi. Tojo nicã Jesú cʉ̃ Õꞌacʉ̃ macʉ̃ nisere cʉ̃ wãmeyenoꞌque meꞌrã, cʉ̃ wẽrĩꞌque meꞌrã ĩꞌocʉ niwĩ. Masã na ĩꞌaꞌquere werecãmarĩcãrẽ, marĩ ẽjõpeoꞌo. Õꞌacʉ̃ cʉ̃ macʉ̃ yere werecã pũrĩcãrẽ, nemorõ ẽjõpeoroʉaꞌa. Cʉ̃ masã ucũse nemorõ queoro weremi. 10-12 Õꞌacʉ̃ marĩrẽ cʉ̃ macʉ̃ meꞌrã catinuꞌcũsere oꞌocʉ niwĩ. Tojo weerã cʉ̃ macʉ̃rẽ ẽjõpeorã cʉ̃ meꞌrã catinuꞌcũrãsama. Cʉ̃ macʉ̃rẽ ẽjõpeotirã ne cʉ̃ meꞌrã catinuꞌcũsome. Marĩ Jesucristo ye quetire diacjʉ̃ta niꞌi nírã, cʉ̃rẽ ẽjõpeorã weeꞌe. Ãpẽrã aꞌtere ẽjõpeotirãnojõ “Õꞌacʉ̃ nisoogʉ nimi”, nirã weema.
Juã werecasaꞌque niꞌi
13 Mʉsã Õꞌacʉ̃ macʉ̃rẽ ẽjõpeorãrẽ tere ojapʉ. Mʉsã catinuꞌcũrãsaꞌa nisere masĩato nígʉ̃ tojo ojapʉ.
14 Marĩ masĩꞌi, Õꞌacʉ̃ cʉ̃ ʉaronojõ marĩ sẽrĩcã, marĩ sẽrĩsere tʉꞌosami. “Marĩ sẽrĩsere tʉꞌosami” ni masĩrã, cʉ̃rẽ uise marĩrõ sẽrĩmasĩꞌi. 15 “Õꞌacʉ̃ marĩ sẽrĩsere tʉꞌosami” ni masĩrõnojõta “Cʉ̃ marĩ sẽrĩꞌque quẽꞌrãrẽ oꞌotojami”, ninoꞌo.
16 Apetero Jesucristore ẽjõpeogʉ ñaꞌarõ weesami. Cʉ̃ tojo weecã ĩꞌarã, Õꞌacʉ̃rẽ sẽrĩbosaya. Marĩ sẽrĩbosacã, Õꞌacʉ̃ yʉꞌtigʉsami. Cʉ̃rẽ dʉcayugʉsami tja. Apeye pũrĩcã ñaꞌabutiaro weese niꞌi. Téma “Sẽrĩbosaya” niña marĩꞌi. Tere weerã́ Õꞌacʉ̃ tiropʉ waꞌasome. 17 Nipeꞌtise ñaꞌase Õꞌacʉ̃rẽ yʉꞌrʉnʉꞌcãse niꞌi. Yʉꞌʉ nírõnojõta apeye ñaꞌarõ weesere Õꞌacʉ̃ acobojogʉsami. Apeye ñaꞌabutiaro weesere acobojosome.
18 Marĩ masĩꞌi, Õꞌacʉ̃ põꞌrãrẽ Jesucristo añurõ coꞌtenuꞌcũcãꞌmi. Tojo weerã na ñaꞌarõ weenuꞌcũtisama. Wãtĩ quẽꞌrã Jesucristo coꞌteyucã, narẽ ñaꞌarõ weemasĩtisami.
19 Marĩ Õꞌacʉ̃ põꞌrã nisere, tojo nicã wãtĩ nipeꞌtiro aꞌti turicjãrã wiogʉ nimi nisere masĩꞌi.
20 Apeye quẽꞌrãrẽ, Õꞌacʉ̃ macʉ̃ cʉ̃ aꞌtiꞌquere masĩꞌi. Cʉ̃ marĩrẽ Õꞌacʉ̃ diacjʉ̃ nigʉ̃rẽ masĩdutigʉ tʉꞌomasĩse oꞌocʉ niwĩ. Marĩ Jesucristo meꞌrã nírã, cʉ̃ pacʉ Õꞌacʉ̃pʉreta niꞌi. Jesucristo Õꞌacʉ̃ nimi. Cʉ̃́ta catinuꞌcũgʉ̃ marĩ catinuꞌcũatjere oꞌomi. 21 Apeye, masã na queose yee ẽjõpeoꞌquenojõrẽ ẽjõpeoticãꞌña. Õꞌacʉ̃ seꞌsarore ẽjõpeoya. Nipeꞌtise apeyenojõ yʉꞌrʉoro Õꞌacʉ̃rẽ maꞌiña.
Tojota weeroʉasaꞌa.
Tocãꞌrõta ojaꞌa.
Juã