Tojo weegʉ wiogʉ, Amán meꞌrã Ester tiropʉ baꞌarã waꞌacãrã niwã. Wiogʉ na sĩꞌrĩ, baꞌari cura wiogore “¿Mʉꞌʉ ñeꞌenojõrẽ sẽrĩsĩꞌrĩmiati? Mʉꞌʉ yʉꞌʉ dutisere deco meꞌrã sẽrĩcã, oꞌogʉti”, nicʉ niwĩ.

Co cʉ̃rẽ aꞌtiro yʉꞌtico niwõ:

—Yʉꞌʉre, yʉꞌʉ acawererã judío masãrẽ wẽjẽticãꞌña, ni sẽrĩgõti. Ʉ̃sãrẽ ĩꞌatuꞌtigʉ nipeꞌtirãrẽ wẽjẽpeꞌogʉtigʉ weemi. Ʉ̃sãrẽ ãpẽrãpʉre daꞌrawãꞌñacoꞌtedutirã duacã́ma, mʉꞌʉrẽ caribotiboapã, nico niwõ.

Tere tʉꞌogʉ, wiogʉ core sẽrĩtiñaꞌcʉ niwĩ:

—¿Noanojõ aꞌte ñaꞌase pacare weebutiabosari?

Wiogo cʉ̃rẽ yʉꞌtico niwõ:

—Aꞌto dujimi. Ãꞌrĩ Amán nimi ʉ̃sãrẽ ĩꞌatuꞌti “Wẽjẽcõꞌagʉ̃ti” nigʉ̃́, nico niwõ.

Co weresãsere tʉꞌogʉ, Amán uiyʉꞌrʉ, bʉꞌagʉ weronojõ tojacʉ niwĩ.

Wiogʉ Asuero peꞌe ʉpʉtʉ uase meꞌrã wijaaropʉ na oꞌori oteꞌcaropʉ wijaa waꞌacʉ niwĩ. Amán peꞌe “Wiogʉ yʉꞌʉre wẽjẽdutigʉsami”, ni wãcũcʉ niwĩ. Tojo weegʉ Estere “Yʉꞌʉre wẽjẽticãꞌto”, ni sẽrĩgʉ̃, co meꞌrã ti tucũpʉ tojacʉ niwĩ.

Cʉ̃ co meꞌrã ucũrĩ cura wiogʉ wijaaropʉ níꞌcʉ apaturi sãjãejacʉ niwĩ tja. Amán co tiropʉ ejaqueꞌacã ĩꞌagʉ̃, wiogʉ aꞌtiro ni caricũcʉ niwĩ:

—¿Ya wiꞌi, yʉꞌʉ ĩꞌorõpʉ wiogo warore ñaꞌarõ weesĩꞌrĩ weeti mʉꞌʉ? nicʉ niwĩ. Wiogʉ cʉ̃ ucṹca beꞌro maata cʉ̃rẽ daꞌracoꞌterã Amán diapoare moꞌacãrã niwã.*7.1-10 Persia diꞌtapʉre buꞌiritirãrẽ na wẽjẽacjʉre na diapoare moꞌacũcãrã niwã. Tojo nicã, wiogʉre apaturi ĩꞌanemosome nírã, tojo weecũcãrã niwã. Maata cʉ̃rẽ daꞌracoꞌterã Amán cʉ̃ “Mardoqueore dʉꞌteyoo wẽjẽgʉ̃ti” ni apoyuꞌquere werecãrã niwã. Na tojo nicã tʉꞌogʉ, “Amán cʉ̃ nʉꞌcõdutiꞌcʉpʉta cʉ̃rẽ dʉteyoo, wẽjẽrã waꞌaya”, nicʉ niwĩ wiogʉ.

Tojo weerã Amárẽ cʉ̃ Mardoqueore dʉꞌteyooboꞌcʉpʉ dʉꞌteyoo wẽjẽcãꞌcãrã niwã. Te meꞌrã wiogʉ cʉ̃ ʉpʉtʉ uaꞌque peꞌtia waꞌacaro niwʉ̃.