Ti nʉmʉta Ester Mardoqueore “Cʉ̃ yʉꞌʉ maꞌmi nimi”, nico niwõ. Tojo wee wiogʉ Amán cʉ̃ daꞌrase cʉomiꞌquere Mardoqueore oꞌocʉ niwĩ. Tojo nimicã, judío masãrẽ wẽjẽdutise nicãꞌcaro niwʉ̃ yujupʉ. Tojo weego, beꞌro Ester apaturi wiogʉ tiropʉ waꞌaco niwõ. Co wiogʉ tiropʉ ejacã, cʉ̃ yagʉ tuacjʉ uru meꞌrã daꞌreꞌcʉre sĩ́opuocʉ niwĩ tja. Co wiogʉre “Amán cʉ̃ dutise cũuꞌquere weeticãꞌto. Tojo weecãma, judío masãrẽ wẽjẽpeꞌocãꞌbosama”, ni sẽrĩco niwõ.

Co tojo nicã tʉꞌogʉ, core werecʉ niwĩ:

—Te dutisere yʉꞌʉ omopica tuusãarĩ beꞌto meꞌrã yʉꞌʉ wãmerẽ ñacũunoꞌwʉ̃. Tojo weegʉ tere “Weeticãꞌña”, ni cãꞌmotata basioweꞌe, nicʉ niwĩ. Tojo nimigʉ̃, mʉꞌʉ, Mardoqueo meꞌrã apeye dutise ojaya, nicʉ niwĩ. Na cʉ̃ níꞌcaronojõta weecãrã niwã. Na ojaꞌque judío masãrẽ “Mʉsã quẽꞌrã na ‘Wẽjẽrãti’ cṹṹca nʉmʉrẽ mʉsãrẽ wẽjẽsĩꞌrĩrãnojõrẽ wẽjẽaꞌmeña” nisere ojacãrã niwã. Te dutise nipeꞌtirã na ucũse meꞌrã nipeꞌtiro wiogʉ Asuero cʉ̃ dutise diꞌtapʉre, te macãrĩpʉre oja oꞌónoꞌcaro niwʉ̃. Nipeꞌtise macãrĩpʉ te pũrĩrẽ oꞌócãrã niwã. Nitʉori mujĩpũ trece nicã wiogʉ dutise na judío masãrẽ wẽjẽatje nicaro nimiwʉ̃.