1 Moisé Õꞌacʉ̃rẽ yʉꞌticʉ niwĩ:

—Na yʉꞌʉ tojo nisere ẽjõpeosome. Tojo nicã yʉꞌʉ dutisere yʉꞌtisome. Yʉꞌtironojõ oꞌorã, aꞌtiro peꞌe nirãsama: “Õꞌacʉ̃ mʉꞌʉrẽ bajuatiapĩ”, nirãsama, nicʉ niwĩ Moisé.

2 Õꞌacʉ̃, “¿Mʉꞌʉ omocãpʉre ñeꞌenojõrẽ cʉoti?” ni sẽrĩtiñaꞌcʉ niwĩ.

“Yʉꞌʉ tuacjʉ niꞌi”, ni yʉꞌticʉ niwĩ.

3 —Tigʉre nucũcãpʉ doquecũuña, nicʉ niwĩ Õꞌacʉ̃.

Moisé tere tʉꞌogʉ, nucũcãpʉ doquecũucʉ niwĩ. Cʉ̃ tojo weecãta, tigʉ tuacjʉ aña dojocaro niwʉ̃. Tojo waꞌacã ĩꞌagʉ̃, Moisé ui dustimajãcʉ niwĩ. 4 Õꞌacʉ̃ peꞌe cʉ̃rẽ nicʉ niwĩ:

—Omocãrẽ sĩ́oo, cʉ̃ pĩcõrõrẽ ñeꞌeña.

Moisé cʉ̃ omocãrẽ sĩ́oo, aña pĩcõrõrẽ ñeꞌecʉ niwĩ. Cʉ̃ tojo ñeꞌecãta, aña nimiꞌcʉ tuacjʉ dojocaro niwʉ̃ tja.

5 —Aꞌtere ĩꞌarã, “Õꞌacʉ̃ na ñecʉ̃sʉmʉa Abrahã, Isaa, Jacob wiogʉ cʉ̃rẽ bajuapĩ”, nirãsama, nicʉ niwĩ Õꞌacʉ̃.

6 Beꞌro Õꞌacʉ̃ ninemocʉ niwĩ:

—Niꞌcãrõacãrẽ mʉꞌʉ ya omocãrẽ mʉꞌʉ ya suꞌtiro doca cutiro tiropʉ sĩosõrõña, nicʉ niwĩ.

Cʉ̃ tojo nicã, Moisé cʉ̃ ya omocãrẽ sĩosõrõcʉ niwĩ. Beꞌro cʉ̃ ya omocãrẽ miiwĩrõ, ti omocãrẽ cãmi boari omocã ĩꞌacʉ niwĩ. 7 Tere ĩꞌagʉ̃, Õꞌacʉ̃ nicʉ niwĩ:

—Apaturi mʉꞌʉ ya omocãrẽ mʉꞌʉ ya suꞌtiro doca cutiro tiropʉ sĩosõrõña tja.

Õꞌacʉ̃ dutironojõta Moisé weecʉ niwĩ. Cʉ̃ ya omocãrẽ miiwĩrõcãta, nipeꞌtiro cʉ̃ upʉ weronojõ añurĩ omocã tojacaro niwʉ̃. 8 Beꞌro Õꞌacʉ̃ ninemocʉ niwĩ:

—Mʉꞌʉ nimʉꞌtãse weeĩꞌose meꞌrã ẽjõpeotirã, mʉꞌʉ dutisere weetirã, apetero weerã beꞌro apaturi weeĩꞌose meꞌrã ẽjõpeobosama. 9 Mʉꞌʉrẽ aꞌte pʉaro mʉꞌʉ weeĩꞌose meꞌrã ẽjõpeoti, mʉꞌʉ dutisere weeticãma, aꞌtiro weeya. Diapʉ acore waamíí, nucũcãpʉ piocũoña. Mʉꞌʉ topʉ waamíí piocũse nucũcãpʉ dí dojorosaꞌa, nicʉ niwĩ.

10 —Acoe, yʉꞌʉ wiogʉ. Yʉꞌʉ ucũmeꞌrĩgʉ̃ niweꞌe. Todʉporopʉ, tojo nicã mʉꞌʉ niꞌcãrõacã yʉꞌʉ mʉꞌʉ meꞌrã ucũcã quẽꞌrãrẽ añurõ ucũmasĩtisaꞌa. Nipeꞌtisetiri ucũgʉ̃, cuꞌcu nisaꞌa, nicʉ niwĩ Moisé.

11 Õꞌacʉ̃ cʉ̃rẽ nicʉ niwĩ:

—¿Noa masãrẽ ucũmasĩcã weeri? ¿Noa narẽ tʉꞌoticã, ucũticã weeri? ¿Noa narẽ ĩꞌamasĩcã, o caperi bajuticã weeri? Yʉꞌʉta tojo weewʉ. 12 Tojo weegʉ mʉꞌʉ na masã tiropʉ waꞌaya. Mʉꞌʉ narẽ ucũcã weetamugʉ̃ti. Mʉꞌʉ narẽ ucũatjere yʉꞌʉ mʉꞌʉrẽ weregʉti.

13 Moisé ne waꞌasĩꞌrĩticʉ niwĩ. Tojo weegʉ aꞌtiro nicʉ niwĩ:

—Acoe, yʉꞌʉ wiogʉ. Apĩrẽ waꞌaduticureya, nicʉ niwĩ.

14 Tere tʉꞌogʉ, Õꞌacʉ̃ Moisé meꞌrã ua waꞌacʉ niwĩ. Tojo weegʉ cʉ̃rẽ nicʉ niwĩ:

—Mʉꞌʉ maꞌmi Aarṍ peꞌe añurõ ucũmeꞌrĩgʉ̃ nimi. Mʉꞌʉ weronojõ Leví ya curuacjʉ̃ nimi. Cʉ̃ mʉꞌʉrẽ põtẽrĩgʉ̃ aꞌtisami. Mʉꞌʉrẽ ĩꞌagʉ̃, ʉpʉtʉ eꞌcatigʉsami. 15 Cʉ̃ meꞌrã ucũña. Cʉ̃ masãrẽ ucũatjere añurõ wereya. Yʉꞌʉ mʉsã pʉarãrẽ ucũcã weegʉti. Mʉsãrẽ, mʉsã weeatjere queoro weregʉti. 16 Mʉꞌʉ Aarṍrẽ ucũgʉ̃, yʉꞌʉ Õꞌacʉ̃ cʉ̃rẽ ucũgʉ̃ weronojõ ucũgʉ̃saꞌa. Aarṍ peꞌe mʉꞌʉ weresere masãrẽ wereturiagʉsami. 17 Aꞌtigʉ tuacjʉre miaña. Tigʉ meꞌrã peje ĩꞌa ʉcʉase weeĩꞌogʉ̃saꞌa, nicʉ niwĩ Õꞌacʉ̃.

18 Moisé cʉ̃ mañecʉ̃ Jetro ya wiꞌipʉ dajagʉ, cʉ̃rẽ nicʉ niwĩ:

—Yʉꞌʉ apaturi Egipto diꞌtapʉ waꞌacã yʉꞌʉre duꞌuoꞌoya. Topʉ yʉꞌʉ acawererã waro nisama. Na catimiti nígʉ̃, narẽ ĩꞌasĩꞌrĩgʉ̃coro, nicʉ niwĩ.

—Jaʉ, añurõ waꞌaya, ni yʉꞌticʉ niwĩ Jetro.

19 Moisé cʉ̃ Madiã́ wãmetiropʉ nícaterore Õꞌacʉ̃ cʉ̃rẽ aꞌtiro nicʉ niwĩ:

—Egiptopʉ dajatojaaya. Mʉꞌʉrẽ wẽjẽsĩꞌrĩmiꞌcãrã wẽrĩpeꞌtiatojama.

20 Cʉ̃ tojo nicã tʉꞌogʉ, Moisé cʉ̃ nʉmorẽ, cʉ̃ põꞌrãrẽ “Teꞌa” nígʉ̃, niꞌcʉ̃ wĩꞌmagʉ̃ burro buꞌipʉ narẽ miipeo, Egiptopʉ sʉꞌori dajatojaacʉ niwĩ. Tojo nicã tuacjʉ, Õꞌacʉ̃ cʉ̃rẽ miadutiꞌcʉre miacʉ niwĩ.

21 Beꞌro Õꞌacʉ̃ Moisére aꞌtiro nicʉ niwĩ:

—Yʉꞌʉ mʉꞌʉrẽ peje ĩꞌa ʉcʉasere weeĩꞌomasĩcã weeapʉ. Tojo weegʉ mʉꞌʉ Egiptopʉre etagʉ, faraṍ ĩꞌorõpʉ te pejere weeĩꞌoña. Yʉꞌʉ peꞌe faraṍrẽ mʉsãrẽ yʉꞌrʉnʉꞌcãcã weegʉti. Tojo weegʉ Israe curuacjãrãrẽ duꞌuwĩrõsome. 22 Cʉ̃ tojo weecã, mʉꞌʉ cʉ̃rẽ nigʉ̃saꞌa: “Ʉ̃sã wiogʉ Õꞌacʉ̃ aꞌtiro niami: ‘Israe curuacjãrã yʉꞌʉ macʉ̃, masã maꞌmi weronojõ nima. 23 Yʉꞌʉre eꞌcatipeorã waꞌacã, narẽ duꞌuwĩrõña’, mʉꞌʉrẽ nitojamiapʉ. Mʉꞌʉ peꞌe narẽ duꞌuwĩrõtiapʉ. Tojo weegʉ mʉꞌʉ macʉ̃ masã maꞌmirẽ wẽjẽgʉ̃saꞌa”, ni werecʉ niwĩ Õꞌacʉ̃.

27 Moisé maꞌapʉ waꞌari curare Õꞌacʉ̃ peꞌe Aarṍrẽ aꞌtiro nicʉ niwĩ: “Masã marĩrõ, yucʉ marĩrõpʉ waꞌa, mʉꞌʉ acabiji Moisére põtẽrĩgʉ̃ waꞌaya.” Tere tʉꞌogʉ, Aarṍ waꞌa, Moisére Õꞌacʉ̃ yagʉ ʉ̃rʉ̃gʉ̃pʉ✡4.27 Ex 3.1 põtẽrĩgʉ̃ waꞌacʉ niwĩ. Topʉ cʉ̃rẽ bocaejagʉ, põtẽrĩ, añudutigʉ miꞌmicʉ niwĩ. 28 Beꞌro Moisé, Aarṍrẽ Õꞌacʉ̃ cʉ̃rẽ weredutiꞌquere, tojo nicã peje cʉ̃ ĩꞌa ʉcʉase ĩꞌorãsaꞌa níꞌquere werecʉ niwĩ. 29 Tuꞌajanʉꞌcõ, na pʉarãpʉta Israe curuacjãrã wiorãrẽ neocũurã waꞌacãrã niwã. 30 Na tiropʉ ejacã, Aarṍ nipeꞌtise Õꞌacʉ̃ Moisére níꞌquere werepeꞌocãꞌcʉ niwĩ. Tojo nicã, masã ĩꞌorõpʉre, ĩꞌa ʉcʉase Õꞌacʉ̃ narẽ weeĩꞌodutiꞌquere weeĩꞌocʉ niwĩ.

31 Masã tere ĩꞌarã, cʉ̃ níꞌquere ẽjõpeocãrã niwã. Õꞌacʉ̃ na piꞌetisere ĩꞌa, narẽ pajañaꞌcã tʉꞌorã, cʉ̃rẽ eꞌcatipeorã, ejaqueꞌacãrã niwã.