1 Israe curuacjãrã Etãpʉ nirĩ cura Õꞌacʉ̃ Moisére aꞌtiro nicʉ niwĩ:

2 “Israe curuacjãrãrẽ majãmitojatidutiya. Narẽ Pi-hahirot wãmetiri macã põtẽorõ, Baal-zefón pʉꞌtopʉ tojaqueꞌadutiya. To Migdol, Maa Sõꞌarĩ maa waꞌtero tojaꞌa. Na topʉ maa sumutopʉ na ye wiꞌseriacãrẽ bʉa, tojaqueꞌato. 3 Na tojo weecã, faraṍ aꞌtiro wãcũgʉ̃sami: ‘Ãꞌrã Israe curuacjãrã noꞌo apero waꞌamasĩtima. Na masã marĩrõ, yucʉ marĩrõpʉ wisinuꞌcũbajaqueꞌatima’, nigʉ̃sami. 4 Faraṍrẽ yʉꞌʉre yʉꞌrʉnʉꞌcãcã weegʉti. Tojo weegʉ Israe curuacjãrãrẽ ñeꞌesĩꞌrĩgʉ̃, sirutugʉsami. Cʉ̃ tojo weecã, yʉꞌʉ peꞌe cʉ̃rẽ, cʉ̃ yarã surarare docaqueꞌacã weegʉ, yʉꞌʉ tutuasere ĩꞌogʉ̃ti. Nipeꞌtirã Egiptocjãrã tojo waꞌacã ĩꞌarã, ‘Yʉꞌʉ wiogʉ niꞌi’ nisere masĩrãsama”, nicʉ niwĩ Õꞌacʉ̃. Israe curuacjãrã cʉ̃ tojo dutiꞌcaronojõta weecãrã niwã.

5 Egiptocjʉ̃ wiogʉ na duꞌtiwijaꞌque quetire tʉꞌogʉ, cʉ̃, cʉ̃ docacjãrã wiorã meꞌrã na wãcũꞌquere mejẽcã dʉcayu, aꞌtiro nicãrã niwã: “¿Marĩ deꞌro weerã Israe curuacjãrãrẽ duꞌuoꞌomiapari? Na marĩrẽ daꞌracoꞌterã nimiama”, nicãrã niwã. 6 Maata faraṍ cʉ̃ aꞌmewẽjẽse cabayua wejesepawʉ tũrũsepawʉre apoduticʉ niwĩ. Cʉ̃ yarã surara pãjãrã meꞌrã Israe curuacjãrãrẽ sirutucʉ niwĩ. 7 To waꞌagʉ, seiscientopawʉ, tũrũse añusepawʉre miacʉ niwĩ. Tojo nicã, nipeꞌtise Egipto cjase surara yepawʉre miacʉ niwĩ. Tepawʉnʉcʉ̃ niꞌcʉ̃ surara wiogʉ waꞌacʉ niwĩ. 8 Õꞌacʉ̃ faraṍrẽ cʉ̃rẽ yʉꞌrʉnʉꞌcãcã weecʉ niwĩ. Tojo weegʉ faraṍ Israe curuacjãrãrẽ sirutucʉ niwĩ. Na peꞌe wijarãpʉta uiro marĩrõ wijatojacãrã niwã.

9 Egiptocjãrã yarã surara dʉꞌpocã meꞌrã waꞌarã, cabayua pesarã meꞌrã, na ye aꞌmewẽjẽsepawʉ meꞌrã Israe curuacjãrãrẽ siruturã waꞌacãrã niwã. Narẽ Maa Sõꞌarĩ maa sumutopʉ tojaqueꞌarãrẽ ẽmʉjácãrã niwã. To Pi-hahirot pʉꞌtopʉ Baal-zefón põtẽorõpʉ tojacãrã niwã.

10 Israe curuacjãrã faraṍ, tojo nicã Egiptocjãrã na pʉꞌto aꞌticã ĩꞌarã, ʉcʉacãrã niwã. Tojo weerã Õꞌacʉ̃rẽ weetamuse ʉpʉtʉ sẽrĩcãrã niwã. 11 Moisére aꞌtiro nicãrã niwã:

—¿Egiptopʉre masã wẽrĩcã yaase peri marĩrĩ? ¿Ʉ̃sãrẽ topʉ níꞌcãrãrẽ aꞌto masã marĩrõ, yucʉ marĩrõpʉ wẽrĩdutigʉ miitiri? ¿Deꞌro weeacjʉ Egiptopʉ níꞌcãrãrẽ aꞌtopʉ miitiri? 12 Ʉ̃sã Egiptopʉ nírã quẽꞌrã mʉꞌʉrẽ aꞌtereta ucũmiwʉ̃: “Ʉ̃sãrẽ cariboticãꞌña. Ʉ̃sã Egiptocjãrãrẽ daꞌrawãꞌñacoꞌtecã, tojo ĩꞌacãꞌña,” nimiwʉ̃. Niꞌcãrõacãma masã marĩrõ, yucʉ marĩrõpʉ ʉ̃sã wẽrĩcã ñaꞌa niꞌi. Narẽ daꞌracoꞌterã ninuꞌcũcã nemorõ añubopã, nicãrã niwã.

13 Na tojo nicã, Moisé narẽ yʉꞌticʉ niwĩ:

—Mʉsã uiticãꞌña. Totá tojaqueꞌaya. Õꞌacʉ̃ niꞌcãcã mʉsãrẽ yʉꞌrʉoatjere ĩꞌarãsaꞌa. Egiptocjãrã mʉsã niꞌcãcã ĩꞌarãrẽ ne apaturi ĩꞌanemosome. 14 Õꞌacʉ̃ cʉ̃ basu mʉsãrẽ aꞌmewẽjẽbosagʉsami. Tojo weerã ne wãcũqueꞌtiticãꞌña, nicʉ niwĩ.

15 Beꞌro Õꞌacʉ̃ Moisére nicʉ niwĩ:

—¿Deꞌro weegʉ yʉꞌʉre weetamuse sẽrĩgʉ̃ caricũti? Israe curuacjãrãrẽ pijio, waꞌadutiya. 16 Mʉꞌʉ tuacjʉre maajopʉre sĩ́oña. Mʉꞌʉ tojo weecã, maa deco meꞌrã dʉcawatirosaꞌa. Israe curuacjãrã aco marĩ, bopori maꞌapʉ pẽꞌarãsama. 17 Yʉꞌʉ peꞌe Egiptocjãrãrẽ mʉsãrẽ ñaꞌarõ wãcũcã weegʉti. Tojo weerã mʉsãrẽ wẽjẽsĩꞌrĩrã siruturãsama. Na tojo weecã, faraṍrẽ, cʉ̃ yarã surarare, cʉ̃ ye tũrũsepawʉre, surara cabayua pesarãrẽ yʉꞌʉ tutuayʉꞌrʉasere ĩꞌogʉ̃saꞌa. 18 Yʉꞌʉ faraṍrẽ, cʉ̃ ye tũrũsepawʉre, surara cabayua pesarãrẽ docaqueꞌacã wééca beꞌro Egiptocjãrã yʉꞌʉre “Diacjʉ̃ta Õꞌacʉ̃ wiogʉ nimi”, ni masĩrãsama, nicʉ niwĩ Õꞌacʉ̃.

19 Cʉ̃ tojo ni ucũrĩ curata Õꞌacʉ̃ cʉ̃ basuta nimigʉ̃, cʉ̃rẽ werecoꞌtegʉ weronojõ upʉsãjãnʉꞌcã*14.19 Ĩꞌaña Gn 16.7 docapʉ ojaꞌquere. na siro peꞌe sirutunʉꞌcãcʉ niwĩ. Tojo nicã oꞌmepõꞌrã na dʉporo ʉꞌmʉtãmiꞌcaro quẽꞌrã na siro peꞌe tja sirutunʉꞌcãcaro niwʉ̃. 20 Tojo wee ti põꞌrã Egiptocjãrã surara, Israe curuacjãrã decore ejanʉꞌcãcaro niwʉ̃. Ñamipʉ ti oꞌmepõꞌrã Egiptocjãrãrẽ naꞌiatĩꞌacã weecaro niwʉ̃. Israe curuacjãrã peꞌema boꞌreyucaro niwʉ̃. Tojo weerã Egiptocjãrã ti ñamirẽ Israe curuacjãrãrẽ ne ẽmʉticãrã niwã.

21 Moisé cʉ̃ ya omocãrẽ maajopʉre sĩ́onuꞌcũcʉ niwĩ. Cʉ̃ tojo weeri cura Õꞌacʉ̃ mujĩpũ mʉjãtiro peꞌe cjase wĩꞌrõrẽ ʉpʉtʉ wẽetuucã weecʉ niwĩ. Te wĩꞌrõ nipeꞌtiro ti ñamirẽ wẽetuuboꞌreacaro niwʉ̃. Tojo weero ti maajore pʉaperi dʉcawaticaro niwʉ̃. Aꞌtiro wee Õꞌacʉ̃ ti maajore bopori maꞌa waꞌacã weecʉ niwĩ. 22 Diꞌta boposãjãrõpʉ Israe curuacjãrã pẽꞌacãrã niwã. Topʉre pʉa taꞌtiajo aco dʉcawaanoꞌcaro niwʉ̃. Buꞌi peꞌe ape tʉꞌrʉjo, siro peꞌe ape tʉꞌrʉjo nicaro niwʉ̃.

23 Faraṍ yarã surara, cʉ̃ ye tũrũsepawʉ meꞌrã Israe curuacjãrã beꞌro ti maajo decopʉ narẽ sirututʉocãrã niwã. 24 Boꞌreati dʉporo Õꞌacʉ̃ ʉ̃jʉ̃rĩ põꞌrã, oꞌmecuruapʉ nígʉ̃, Egiptocjãrã surarare ĩꞌadijocʉ niwĩ. Tojo ĩꞌadijotjĩagʉ̃, narẽ noꞌo ʉaro waꞌamaꞌacã weecʉ niwĩ. 25 Tojo nicã na ye tũrũsepawʉre tũrũsepa wetiwijacã weecʉ niwĩ. Tojo weerã ʉmʉñarõ waꞌamasĩticãrã niwã. Tere ĩꞌarã, Egiptocjãrã aꞌtiro nicãrã niwã:

—¡Teꞌa, Israe curuacjãrãrẽ tocãꞌrõta sirutuduꞌurã marĩ! Õꞌacʉ̃ marĩrẽ ĩꞌatuꞌtigʉ, narẽ aꞌmewẽjẽbosagʉ weemi, nicãrã niwã.

26 Beꞌro Õꞌacʉ̃ Moisére nicʉ niwĩ:

—Mʉꞌʉ ya omocãrẽ ti maajopʉre sĩ́oña tja. Mʉꞌʉ tojo weecã, aco dʉcawaanʉꞌcõmiꞌque Egiptocjãrã buꞌipʉ paamio, na ye tũrũsepawʉ, na surara cabayua buꞌipʉ níꞌcãrãrẽ miopeꞌorosaꞌa, nicʉ niwĩ.

27 Tojo weegʉ Moisé cʉ̃ ya omocãrẽ ti maajo buꞌipʉ sĩ́ocʉ niwĩ. Boꞌreari cura mejãrõta ti maajo níꞌcaronojõta tojacaro niwʉ̃. Na Egiptocjãrã duꞌtisĩꞌrĩmirã, aco paamionoꞌcãrã niwã. Tojo wee Õꞌacʉ̃ narẽ ti maapʉ miodijocʉ niwĩ. 28 Tojo waꞌacã, tũrũsepawʉ, surara cabayua pesaꞌcãrã, nipeꞌtirã surara, ti maajopʉ Israe curuacjãrãrẽ siruturã waꞌamiꞌcãrã mirĩpeꞌtia waꞌacãrã niwã. Ne niꞌcʉ̃ faraṍ yarã yʉꞌrʉwetiticãrã niwã. 29 Tojo waꞌamicã, Israe curuacjãrã peꞌe ti maajore diꞌta boposãjãrõpʉ pẽꞌacãrã niwã. Aco pʉa taꞌtiajo dʉcawaanoꞌcaropʉ, niꞌcãrõ buꞌi peꞌe, apero siro peꞌe nirõrẽ pẽꞌacãrã niwã.

30 Ti nʉmʉ nicã, Õꞌacʉ̃ Israe curuacjãrã Egiptocjãrã dutise doca níꞌcãrãrẽ yʉꞌrʉweticã weecʉ niwĩ. Israe curuacjãrã Egiptocjãrã wẽrĩꞌcãrã mejãrãrẽ ti maa sumutopʉ cũñacã ĩꞌacãrã niwã. 31 Israe curuacjãrã Õꞌacʉ̃ cʉ̃ tutuayʉꞌrʉase meꞌrã Egiptocjãrãrẽ tojo docaqueꞌacã weecã ĩꞌarã, Õꞌacʉ̃rẽ wiopesase meꞌrã ĩꞌa, cʉ̃rẽ ẽjõpeocãrã niwã. Moisé, Õꞌacʉ̃ dutisere daꞌracoꞌtegʉ quẽꞌrãrẽ ẽjõpeocãrã niwã.