15
Moisé Õꞌacʉ̃rẽ basapeoꞌque niꞌi
1 Õꞌacʉ̃ Egiptocjãrãrẽ maajopʉ miopeꞌocã ĩꞌarã, Moisé, tojo nicã Israe curuacjãrã aꞌte basasere cʉ̃rẽ basapeocãrã niwã:
“Õꞌacʉ̃ añubutiaro cʉ̃ waparãrẽ docaqueꞌacã weewĩ.
Cabayua pesaꞌcãrãrẽ pajiri maajopʉ doqueñojã, mirĩdijacã weewĩ.
Tere wãcũgʉ̃, cʉ̃rẽ basapeogʉti.
2 Õꞌacʉ̃ yʉꞌʉ wiogʉ yʉꞌʉre tutuacã weemi.
Cʉ̃rẽ wãcũgʉ̃, basapeoꞌo.
Cʉ̃ta yʉꞌʉre ĩꞌatuꞌtiꞌcãrãrẽ yʉꞌʉre yʉꞌrʉweticã weemi.
Cʉ̃, yʉꞌʉ ẽjõpeogʉ Õꞌacʉ̃ nimi.
Cʉ̃rẽ basapeogʉti.
Cʉ̃ yʉꞌʉ pacʉ ẽjõpeoꞌcʉ nimi.
Cʉ̃rẽ eꞌcatipeogʉti.
3 Õꞌacʉ̃ aꞌmewẽjẽrĩ masʉ̃ tutuagʉ weronojõ nimi.
Cʉ̃rẽ ‘Mʉꞌʉ wiogʉta niꞌi’, ninoꞌo.
4 Õꞌacʉ̃, faraṍ ye tũrũsepawʉ, tojo nicã cʉ̃ yarã surarare Maa Sõꞌarĩ maajopʉ mirĩdijacã weewĩ.
Cʉ̃ yarã wiorã aꞌmewẽjẽtutuayʉꞌrʉrã, Maa Sõꞌarĩ maajopʉ mirĩ boawã.
5 Na dia poꞌpeapʉ ʉ̃tãperi nʉcʉ̃rõ weronojõ diꞌadijawã.
Ti maa ʉ̃ꞌcʉ̃arĩ maajo miidijawʉ.
6 Õꞌacʉ̃, yʉꞌʉ wiogʉ, mʉꞌʉ ya omocã diacjʉ̃camocã meꞌrã mʉꞌʉrẽ ĩꞌatuꞌtigʉre wẽjẽpeꞌowʉ.
Ti omocã meꞌrãta mʉꞌʉ tutuasere ĩꞌanoꞌo.
7 Mʉꞌʉ tutuayʉꞌrʉase meꞌrã, mʉꞌʉ meꞌrã aꞌmewẽjẽrãrẽ mejõ nirã tojacã weewʉ.
Mʉꞌʉ uase pecameꞌe ʉ̃jʉ̃rĩ põꞌrã tá boposãjãsere ʉ̃jʉ̃arõ weronojõ narẽ peꞌowʉ.
8 Mʉꞌʉ ẽꞌquẽa meꞌrã ejerimiquejo, acore dʉcawaa, pʉaperi tuuneocũuwʉ̃.
Te pãꞌcõrĩ paca pʉaperi nʉꞌcãejawʉ.
Maa decopʉ bʉꞌaro weronojõ ne aꞌmeñaꞌmaꞌatiwʉ.
9 Mʉꞌʉrẽ ĩꞌatuꞌtigʉ peꞌe aꞌtiro wãcũcʉ nimiwĩ:
‘Narẽ sirutu, ẽmʉgʉ̃ti.
Yʉꞌʉ na cʉosere ẽꞌma, dʉcawaagʉti.
Yʉꞌʉ noꞌo miisĩꞌrĩrõ miigʉ̃ti.
Ya diꞌpjĩjore mii, narẽ wẽjẽcõꞌagʉ̃ti’, nicʉ nimiwĩ.
10 Mʉꞌʉ peꞌe putistegʉ weronojõ weewʉ.
Tojo weecã, ti maajo narẽ miocõꞌawʉ̃.
Na ti maajo ʉpʉtʉ wĩꞌrõ wẽetuuri cura cõme nʉcʉ̃rõ weronojõ diꞌadijawã.
11 Wiogʉ, ne niꞌcʉ̃ ãpẽrã ẽjõpeogʉnojõ mʉꞌʉrẽ niꞌcãrõwijimasĩtimi.
Nipeꞌtirã yʉꞌrʉoro tutuayʉꞌrʉnʉꞌcãꞌa.
Ne niꞌcʉ̃ mʉꞌʉ weronojõ ñaꞌase moogʉ̃ marĩmi.
Añuse, wiopesase weeĩꞌogʉ̃ niꞌi.
Tojo weerã nipeꞌtirã masã mʉꞌʉrẽ ‘Añuyʉꞌrʉami’, ni basapeoato.
12 Mʉꞌʉ ya diacjʉ̃camocãrẽ sĩ́ocã, dia mʉꞌʉrẽ ĩꞌatuꞌtirãrẽ miimádija waꞌawʉ.
*****
18 Õꞌacʉ̃, ʉ̃sã wiogʉ, mʉꞌʉ dutise ninuꞌcũcãꞌrõsaꞌa”, ni basapeocãrã niwã.
María basaꞌque niꞌi
19 Faraṍ ye aꞌmewẽjẽse tũrũsepawʉ, cʉ̃ yarã cabayuapʉ pesarã, tojo nicã surara, ti maajopʉre na sãjãnʉꞌcãwãꞌcãrĩ cura Õꞌacʉ̃ na buꞌipʉ aco bʉrʉpeja, mirĩcã weecʉ niwĩ. Israe curuacjãrã peꞌe diꞌta boporopʉ pẽꞌa waꞌacãrã niwã. 20 Beꞌro Aarṍ maꞌmio María, Õꞌacʉ̃ yere weremʉꞌtãgõ, niꞌcãrõ na basarã omocã meꞌrã paawʉarore miico niwõ. Nipeꞌtirã ãpẽrã numia co beꞌro siruturã quẽꞌrã tonojõ meꞌrã paarãta basacãrã niwã. 21 Co peꞌe narẽ sʉꞌori basaco niwõ:
“Õꞌacʉ̃rẽ basapeoya.
Cʉ̃rẽ ĩꞌatuꞌtiꞌcãrãrẽ docaqueꞌacã weewĩ.
Dia pajiri maajopʉ, cabayuare, surara na buꞌipʉ pesaꞌcãrãrẽ mirĩdijacã weewĩ”, ni basaco niwõ.
Aco sʉ̃ꞌese cjase queti niꞌi
22 Moisé Israe curuacjãrãrẽ Maa Sõꞌarĩ maajopʉ níꞌcãrãrẽ miiwijáca beꞌro aperopʉ sʉꞌori miacʉ niwĩ. Na masã marĩrõ, yucʉ marĩrõ Shur wãmetiropʉ waꞌacãrã niwã. Topʉre iꞌtia nʉmʉ sijacãrã niwã. Ne aco bocaticãrã niwã. 23 Na Mara wãmetiropʉ etarã, to cjase acore ne sĩꞌrĩmasĩticãrã niwã. Te aco sʉ̃ꞌese niyucã, tojo weecãrã niwã. Tojo weerã tore Mara*15.23 Hebreo ye meꞌrã Mara “sʉ̃ꞌese” nisĩꞌrĩrõ weeꞌe. wãmeyecãrã niwã.
24 Aco añusenojõ marĩcã ĩꞌarã, masã Moisére ñaꞌarõ ucũnʉꞌcãcãrã niwã. Cʉ̃rẽ aꞌtiro ni sẽrĩtiñaꞌcãrã niwã: “¿Marĩ ñeꞌenojõrẽ sĩꞌrĩrãsari?” nicãrã niwã.
25 Tere tʉꞌogʉ, Moisé Õꞌacʉ̃rẽ weetamuse ʉpʉtʉ sẽrĩcʉ niwĩ. Cʉ̃ peꞌe niꞌcã yucʉdʉpʉ ĩꞌocʉ niwĩ. Moisé ti dʉpʉre acopʉ doqueñocʉ niwĩ. Cʉ̃ tojo weecãta, aco iꞌpitise waꞌacaro niwʉ̃.
Õꞌacʉ̃ narẽ “¿Yʉꞌʉ dutiro weerãsari?” nígʉ̃, tojo weecʉ niwĩ. Topʉta niꞌcã dutiro na añurõ weesetiatjere cũucʉ niwĩ. 26 Aꞌtiro nicʉ niwĩ: “Yʉꞌʉ Õꞌacʉ̃, mʉsã wiogʉ niꞌi. Mʉsãrẽ dutire yʉꞌrʉogʉ niꞌi. Mʉsã diacjʉ̃ta yʉꞌʉ dutisere yʉꞌticã, yʉꞌʉ tʉꞌsasenojõrẽ, yʉꞌʉ dutise cũuꞌquere queoro weecã, yʉꞌʉ Egiptocjãrãrẽ buꞌiri daꞌreꞌquenojõrẽ mʉsãrẽ ne cãꞌrõ weesome”, nicʉ niwĩ Õꞌacʉ̃.
27 Beꞌro na yʉꞌrʉa, Elim wãmetiropʉ etacãrã niwã. Topʉre doce aco wijase peri nicaro niwʉ̃. Tojo nicã setenta ñorĩ nicaro niwʉ̃. Topʉre aco pʉꞌtoacã tojaqueꞌacãrã niwã.