1 Niꞌcã nʉmʉ Sansón Gaza wãmetiri macãpʉ waꞌacʉ niwĩ. Topʉ ejagʉ, niꞌcõ numio ʉmʉarẽ aꞌmetãrãwapataꞌari masõrẽ ĩꞌacʉ niwĩ. Beꞌro co ya wiꞌipʉ co meꞌrã cãrĩgʉ̃ sãjãacʉ niwĩ. 2 Gazacjãrã “Sansón ti macãpʉ niapʉ” nicã tʉꞌocãrã niwã. Tojo weerã ti macã sãjãrĩ sope pʉꞌto cãꞌmotaꞌanʉꞌcãeja, coꞌteboꞌreacãrã niwã. “Boꞌreacã cʉ̃rẽ wẽjẽrãti” nírã, ti ñamirẽ ne cʉ̃rẽ cariboticãrã niwã.

3 Sansón peꞌe ñami deco wãꞌcã, ti macã cja sopere te botari meꞌrãta duꞌuamí, tere wʉa, ʉ̃rʉ̃gʉ̃ Hebrṍ wãmetiri macã põtẽorõ nicjʉ buꞌipʉ miacʉ niwĩ.

4 Beꞌropʉ cʉ̃ niꞌcõ numio Dalila wãmetigore ʉacʉ niwĩ. Co eꞌsari pa ʉ̃rʉ̃pagʉ deco nirĩ pa Sorec wãmetiri paꞌtirocjõ nico niwõ. 5 Tere masĩrã, filisteo masã wiorã co tiropʉ waꞌacãrã niwã. Core aꞌtiro nicãrã niwã:

—Sansṍrẽ “¿Deꞌro wee tocãꞌrõ tutuati?” nígõ, weesoose meꞌrã cʉ̃rẽ weredutiya. Tojo wee ʉ̃sã cʉ̃rẽ dʉꞌte, tutuaticã weemasĩrãsaꞌa. Mʉꞌʉ tojo weecã, ʉ̃sãnʉcʉ̃ mʉꞌʉrẽ niyeru pajiro oꞌorãti, nicãrã niwã.

6 Tojo weego Dalila Sansṍrẽ aꞌtiro nico niwõ:

—Wereya yʉꞌʉre. ¿Deꞌro weegʉ mʉꞌʉ tocãꞌrõ tutuase cʉoti? Mʉꞌʉ tutuase moogʉ̃ waꞌacã, ¿ñeꞌe meꞌrã mʉꞌʉrẽ dʉꞌtebosari? ni sẽrĩtiñaꞌco niwõ.

7 Sansón core yʉꞌticʉ niwĩ:

—Siete dari bʉacatjẽ nise dari, bopotise dari meꞌrã yʉꞌʉre dʉꞌtecã, yʉꞌʉ tutuase peꞌtirosaꞌa. Mejõ nigʉ̃́ weronojõ tojagʉsaꞌa, nicʉ niwĩ.

8 Cʉ̃ tojo nicã tʉꞌorã, filisteo masã wiorã siete dari bopotise darire core miiticãrã niwã. Te dari meꞌrã Dalila Sansṍrẽ dʉꞌteco niwõ. 9 Filisteo masã wiorã ti tucũ bajutiropʉ nicãrã niwã. Sansṍrẽ dʉꞌtetoja, cʉ̃rẽ aꞌtiro caricũco niwõ:

—¡Sansón, filisteo masã mʉꞌʉrẽ ñeꞌerã aꞌtitojama! nico niwõ.

Co tojo nicã tʉꞌogʉ, Sansón te darire yuta dare ʉ̃jʉ̃asurero weronojõ surecãꞌcʉ niwĩ. Tojo weerã filisteo masã deꞌro wee cʉ̃ tutuati nisere masĩticãrã niwã.

10 Tojo waꞌacã, Dalila Sansṍrẽ aꞌtiro nico niwõ:

—Yʉꞌʉre bujicãꞌpã. Tojo nicã, yʉꞌʉre nisooapʉ. Wereya. ¿Ñeꞌenojõ da meꞌrã mʉꞌʉrẽ dʉꞌtebosari, mʉꞌʉ sureticã? nico niwõ.

11 Sansón core yʉꞌticʉ niwĩ:

—Pũnʉꞌmo dari maꞌma dari, dʉꞌtenoꞌña marĩse dari meꞌrã yʉꞌʉre añurõ dʉꞌtecã, mejõ nigʉ̃ weronojõ tutuatigʉ tojagʉsaꞌa, nicʉ niwĩ.

12 Cʉ̃ tojo nicã tʉꞌogo, Dalila maꞌma darire mii, cʉ̃rẽ dʉꞌteco niwõ. Dʉꞌtetoja, cʉ̃rẽ caricũco niwõ:

—¡Sansón, filisteo masã mʉꞌʉrẽ ñeꞌerã aꞌtitojama!

Filisteo masã ti tucũ bajutiropʉ nicoꞌtecãrã niwã. Co tojo nicã tʉꞌogʉ, Sansón yuta darire weronojõ te darire wejesurecʉ niwĩ.

13 Beꞌro Dalila Sansṍrẽ aꞌtiro nico niwõ:

—Mʉꞌʉ yʉꞌʉre bujicãꞌa, nisoodecotiꞌi yujupʉ. ¿Deꞌro weecã mʉꞌʉ tutuatigʉ tojagʉsari? Wereya, nico niwõ.

Cʉ̃ yʉꞌticʉ niwĩ:

—Suꞌti suꞌawʉaropʉ yuta paasuꞌaro weronojõ ye poarire seepaꞌtaꞌque siete darire paasuꞌatjĩagõ, dʉꞌtecũuña. Mʉꞌʉ tojo weecã, yʉꞌʉ tutuatigʉ, mejõ nigʉ̃ weronojõ tojagʉsaꞌa, nicʉ niwĩ. 14 Tojo weego cʉ̃ cãrĩrĩ cura Dalila cʉ̃ poarire siete dari seepaꞌtaꞌquere suꞌti suꞌaropʉ suꞌa aꞌmesʉꞌocũuco niwõ. Tojo weetuꞌaja, tuturire diꞌtapʉ paabiꞌanʉꞌcõ, co suꞌaꞌque darire dʉꞌteñeꞌecũuco niwõ.

Beꞌro apaturi Sansṍrẽ caricũco niwõ:

—¡Sansón, filisteo masã mʉꞌʉrẽ ñeꞌerã aꞌtitojama! nico niwõ. Cʉ̃ cãrĩꞌcʉ nimigʉ̃, wãꞌcã, cʉ̃rẽ seepaꞌtaꞌque dari dʉꞌtecũuꞌque tuturire wejeduꞌacʉ niwĩ.

15 Cʉ̃ tojo weecã, co nico niwõ:

—Mʉꞌʉ yʉꞌʉre ẽjõpeotigʉ, ¿deꞌro weegʉ “Mʉꞌʉrẽ maꞌiꞌi”, nimiti? Iꞌtiati yʉꞌʉre bujicãꞌgʉ̃ weeapʉ. Aꞌtiro wee tutuaꞌa nisere ne wereweꞌe, nico niwõ.

16 Peje nʉmʉrĩ cʉ̃rẽ tojo cariboco niwõ. 17 Tojo weegʉ caributicũmí, core queoro werepeꞌocãꞌcʉ niwĩ:

—Yʉꞌʉ bajuase dʉporo “Õꞌacʉ̃ yagʉ nazareo cũunoꞌyutojagʉsami” ninoꞌcʉ niꞌi. Nazareo nitjĩagʉ̃, ye poari ne niꞌcãti seenoꞌña marĩꞌi. Ye poarire seecõꞌacãma, yʉꞌʉ tutuase peꞌtirosaꞌa. Mejõ nigʉ̃́ weronojõ tutuatigʉ tojagʉsaꞌa, nicʉ niwĩ.

18 Dalila “Queoro werepeꞌocãꞌmi” ni masĩgõ, filisteo masã wiorãrẽ queti oꞌóco niwõ. Tere tʉꞌorã, filisteo masã wiorã na “Mʉꞌʉrẽ oꞌorãti” níꞌque niyeru meꞌrã co ya wiꞌipʉ ejacãrã niwã. 19 Sansón cʉ̃ nʉmo ya ʉsó buꞌipʉ dʉpoa peo, cãrĩyʉꞌrʉacʉ niwĩ. Cʉ̃ cãrĩyʉꞌrʉcã ĩꞌagõ, niꞌcʉ̃rẽ cʉ̃ poarire siete seepaꞌtaꞌque darire seedutigo pijico niwõ. 20 Cʉ̃ seetojaca beꞌro caricũco niwõ:

—¡Sansón, filisteo masã mʉꞌʉrẽ ñeꞌerã aꞌtitojama! nico niwõ.

Sansón wãꞌcã, “Todʉporo weeꞌcaronojõ waꞌarosaꞌa”, ni wãcũcʉ nimiwĩ. Õꞌacʉ̃ cʉ̃rẽ wijaacã, ne masĩticʉ niwĩ.

21 Beꞌro filisteo masã cʉ̃rẽ ñeꞌe, cʉ̃ caperire oreweecãꞌcãrã niwã. Tojo weetoja, Gaza wãmetiri macãpʉ cʉ̃rẽ miibuꞌacãrã niwã. Cõme dari meꞌrã dʉꞌtetjĩarã, buꞌiri daꞌreri wiꞌipʉ trigore ãrʉ̃aduticãrã niwã. 22 Siapeꞌe meꞌrã cʉ̃ poari pĩꞌrĩwijanʉꞌcãcaro niwʉ̃ tja.

23 Beꞌro filisteo masã wiorã na ẽjõpeogʉ Dagṍrẽ ẽjõpeori wiꞌipʉ nerẽcãrã niwã. Na cʉ̃rẽ waꞌicʉrãrẽ wẽjẽ ʉ̃jʉ̃amorõpeorãtirã, tojo nicã bosenʉmʉ weepeorãtĩrã, tojo weecãrã niwã. Aꞌtiro basacãrã niwã:

24 Masã ti wiꞌipʉ nirã́ quẽꞌrã na ẽjõpeogʉ Dagṍrẽ aꞌtiro ni basapeocãrã niwã:

25 Na pũrõ eꞌcatitjĩarã, aꞌtiro caricũcãrã niwã: “Sansṍrẽ marĩ waꞌteropʉ miitia, cʉ̃rẽ bujicãꞌrã”, nicãrã niwã. Tojo weerã cʉ̃ buꞌiri daꞌreri wiꞌipʉ níꞌcʉre na nerẽrõpʉ miiejacãrã niwã. Na tojo weecã ĩꞌarã, masã cʉ̃rẽ bujicãꞌcãrã niwã. Ti wiꞌi na ẽjõpeogʉ Dagṍrẽ ẽjõpeori wiꞌi cjase tuuñeꞌese tuturi deco cʉ̃rẽ nuꞌcũduticãrã niwã. 26 Tojo wééca beꞌro Sansón maꞌmʉ cʉ̃rẽ tʉ̃awãꞌcãgʉ̃rẽ aꞌtiro nicʉ niwĩ:

—Yʉꞌʉre aꞌti wiꞌi tuuñeꞌese tuturi waꞌtero nʉꞌcõña, te tuturipʉ ñatuuwãꞌcãcã, nicʉ niwĩ.

27 Ti wiꞌipʉre ʉmʉa, numia muꞌmuyʉꞌrʉacãrã niwã. Nipeꞌtirã filisteo masã wiorã topʉ nicãrã niwã. Tojo nicã ti wiꞌi buꞌi opa sira nirõpʉ iꞌtiati mil masã Sansṍrẽ bujicãꞌcã ĩꞌadijocãrã niwã. 28 Tojo waꞌari cura Sansón Õꞌacʉ̃rẽ aꞌtiro sẽrĩcʉ niwĩ: “Yʉꞌʉre wãcũña. Niꞌcãti yʉꞌʉre tutuase oꞌonemoña tja. Ye caperire filisteo masã oreweeꞌque wapa aꞌmegʉ̃tigʉ weeꞌe”, nicʉ niwĩ. 29 Sansón tojo sẽrĩtoja, ti wiꞌi deco tuuñeꞌese tuturi pʉa tuturo waꞌteropʉ diacjʉ̃camocã meꞌrã niꞌcã tuturopʉ, cũpecamocã meꞌrã ape tuturopʉ ñatuunʉꞌcãejacʉ niwĩ. 30 Tojo weetoja, aꞌtiro caricũcʉ niwĩ: “¡Filisteo masã meꞌrã yʉꞌʉre wẽrĩcã weeya!” nicʉ niwĩ.

Beꞌro nipeꞌtise cʉ̃ tutuase meꞌrã te tuturire tuunuadijocʉ niwĩ. Cʉ̃ tojo weecã, ti wiꞌi wiorã, tojo nicã nipeꞌtirã ti wiꞌipʉ níꞌcãrã buꞌipʉ doquepejacaro niwʉ̃. Tojo weerã wẽrĩpeꞌtia waꞌacãrã niwã. Tojo wee Sansón cʉ̃ wẽrĩrĩ nʉmʉrẽ cʉ̃ catiri ʉmʉcore wẽjẽꞌcaro yʉꞌrʉoro filisteo masãrẽ wẽjẽnemocʉ niwĩ.

31 Beꞌro cʉ̃ acabijirã, nipeꞌtirã cʉ̃ pacʉ acawererã cʉ̃ upʉre miirã waꞌacãrã niwã. Cʉ̃ pacʉ Manoarẽ yááca tutipʉ Zora Estaol decopʉ cʉ̃rẽ yaacãrã niwã. Sansón veinte cʉ̃ꞌmarĩ Israe curuacjãrãrẽ sʉꞌori niseticʉ niwĩ.