1 Pʉa nʉmʉ Pascua bosenʉmʉ, pã́ bʉcʉase meꞌrã na morẽtiꞌquere baꞌari bosenʉmʉ dʉꞌsacaro niwʉ̃. Ti bosenʉmʉ judío masã na ñecʉ̃sʉmʉa Egiptopʉ níꞌcãrã wijawãꞌcãꞌquere wãcũrĩ bosenʉmʉ nicaro niwʉ̃. Paꞌia wiorã, Moisé ojaꞌquere buꞌeri masã ¿deꞌro wee Jesure ñeꞌe wẽjẽrãsari? nírã, weesoomeꞌrĩse meꞌrã na weeatjere apoyucãrã niwã. 2 Tojo nírã, aꞌtiro nicãrã niwã:

—Bosenʉmʉ nicã weeticãꞌrã. Masã cʉ̃rẽ maꞌírã, noꞌo ʉaro caricũmaꞌa, marĩ tojo weesere dojorẽbosama, nicãrã niwã.

3 Na “Jesure wẽjẽrãti” ni apocaterore Jesú Betaniapʉ nicʉ niwĩ. Simó cãmi boa, yʉꞌrʉꞌcʉ ya wiꞌipʉ nicʉ niwĩ. Jesú cʉ̃ baꞌadujiri cura niꞌcõ numio ʉꞌmʉticja cʉogo ejaco niwõ. Tiga acosticja ʉꞌmʉtise nardo wãmetise wapabʉjʉsere poseticaro niwʉ̃. Ti ñacõrẽ peꞌequejo, Jesú dʉpoa buꞌipʉ ʉꞌmʉtisere piopeoco niwõ. 4 Ãpẽrã topʉ nirã́ co tojo weecã ĩꞌarã, uayʉꞌrʉacãrã niwã. Tojo weerã aꞌtiro aꞌmerĩ ucũcãrã niwã:

—¿Deꞌro weego co aꞌte ʉꞌmʉtise wapabʉjʉsere mejõ waro tojo weecõꞌati? 5 Aꞌte niꞌcã cʉ̃ꞌma daꞌrase wapa wapataꞌaro weronojõ duago, bocanoꞌboapã. Te meꞌrã pajasecʉorãrẽ weetamuboapõ, nicãrã niwã. Co tojo weesere tʉꞌsatirã, pũrõ tuꞌticãrã niwã.

6 Jesú peꞌe narẽ nicʉ niwĩ:

—Cariboticãꞌña. ¿Deꞌro weerã core cariboti? Aꞌtere yʉꞌʉre tojo wéégo, añurõ weego weemo. 7 Pajasecʉorã mʉsã waꞌteropʉ ninuꞌcũcãꞌrãsama. Mʉsã noꞌo ʉaritero narẽ añurõ weetamumasĩꞌi. Yʉꞌʉma mʉsã waꞌteropʉ ninuꞌcũcã ĩꞌasome. 8 Aꞌtigo yʉꞌʉre co weesĩꞌrĩrõ põtẽorõ añurõ weemo. Co yʉꞌʉre piopeogo ʉꞌmʉtisere apoyu, na yaarã ʉꞌmʉtise waꞌreatjo weronojõ yʉꞌʉre weeyumo. 9 Diacjʉ̃ mʉsãrẽ weregʉti. Aꞌti diꞌtapʉre noꞌo nirṍ yʉꞌʉ masãrẽ yʉꞌrʉose quetire werecusiarã, aꞌtigo co yʉꞌʉre weeꞌquere wãcũdutirã wererãsama, nicʉ niwĩ.

10 Jesú numiorẽ tojo níca beꞌro Jesú buꞌerã doce meꞌrãcjʉ̃ níꞌcʉ Juda Iscariote aꞌtiro weecʉ niwĩ. Paꞌia wiorã tiropʉ waꞌa, Jesure cʉ̃ oꞌoatje cjasere na meꞌrã ucũgʉ̃ waꞌacʉ niwĩ. 11 Cʉ̃ tojo nisere tʉꞌorã, ʉpʉtʉ eꞌcatirã, “Mʉꞌʉrẽ niyeru wapayerãti”, nicãrã niwã Judare. “¿Deꞌro nicã yʉꞌʉre Jesure wiorãpʉre oꞌoroʉamitito?” ni wãcũcʉ niwĩ Juda.

12 Masã pã́ bʉcʉase meꞌrã morẽtiꞌquere baꞌari bosenʉmʉ ninʉꞌcãcaro niwʉ̃. Ti nʉmʉ nicã, niꞌcʉ̃ oveja wĩꞌmagʉ̃ na Pascua bosenʉmʉ baꞌacjʉre wẽjẽsama. Titare Jesú buꞌerã cʉ̃rẽ sẽrĩtiñaꞌcãrã niwã:

—¿Noꞌopʉ marĩ Pascua bosenʉmʉ baꞌatjore apoyucã ʉasari? nicãrã niwã.

13 Tojo nicã tʉꞌogʉ, pʉarã cʉ̃ buꞌerãrẽ oꞌócʉ niwĩ. Aꞌtiro narẽ werecʉ niwĩ:

—Jerusalẽ́pʉ waꞌaya. Topʉ niꞌcʉ̃ masʉ̃ acoga tuupeogʉre bocaejapejarãsaꞌa. Cʉ̃ noꞌo waꞌaro sirutuya. 14 Cʉ̃ sãjãarõ ti wiꞌi wiogʉre niña: “Ʉ̃sãrẽ buꞌegʉ aꞌtiro niami: ‘¿Noꞌopʉ nisari yʉꞌʉ buꞌerã meꞌrã Pascua bosenʉmʉ baꞌatji tucũ?’ niami”, niña. 15 Mʉsã tojo nicã, ʉꞌmʉarõca tucũ apoyúca tucũjopʉ mʉsãrẽ ĩꞌogʉ̃sami. Topʉ marĩ baꞌatjere apoyuya, níoꞌocʉ niwĩ Jesú.

16 Beꞌro cʉ̃ buꞌerã waꞌa, Jerusalẽ́pʉ etacãrã niwã. Topʉ etarã, Jesú cʉ̃ níꞌcaronojõta nipeꞌtisere bocacãrã niwã. Topʉ na baꞌatjere apoyucãrã niwã.

17 Naꞌiqueꞌaca beꞌro Jesú cʉ̃ buꞌerã doce meꞌrã ti wiꞌipʉre etacʉ niwĩ. 18 Na baꞌari cura Jesú cʉ̃ buꞌerãrẽ nicʉ niwĩ:

—Diacjʉ̃ mʉsãrẽ weregʉti. Mʉsã meꞌrãcjʉ̃ niꞌcʉ̃ marĩ meꞌrã baꞌadujigʉ wiorãpʉre yʉꞌʉre wẽjẽdutigʉ oꞌogʉsami, nicʉ niwĩ.

19 Cʉ̃ tojo nicã tʉꞌorã, ʉpʉtʉ bʉjaweticãrã niwã. Nánʉcʉ̃ aꞌmerĩ sẽrĩtiñaꞌcãrã niwã:

—Yʉꞌʉta nicãꞌsaꞌaba, nicãrã niwã.

20 Jesú narẽ yʉꞌticʉ niwĩ:

—Niꞌcʉ̃ mʉsã doce meꞌrãcjʉ̃ yʉꞌʉ meꞌrã aꞌti papʉ yosobaꞌagʉ nimi. 21 Yʉꞌʉ Õꞌacʉ̃ macʉ̃ masʉ̃ weronojõ upʉtigʉre Õꞌacʉ̃ ye queti ojáca pũrĩ níꞌcaronojõta waꞌarosaꞌa. Tojo waꞌacã, yʉꞌʉre wiorãpʉre oꞌogʉma ñaꞌabutiaro waꞌarosaꞌa. Cʉ̃ diacjʉ̃ta bajuatiyʉꞌrʉocã, nemorõ añubopã, nicʉ niwĩ.

22 Jesú cʉ̃ buꞌerã meꞌrã baꞌari cura pãgãrẽ mii, cʉ̃ pacʉ Õꞌacʉ̃rẽ eꞌcatise oꞌocʉ niwĩ. Tuꞌajanʉꞌcõ, tigare dʉcawaa, narẽ oꞌogʉ, aꞌtiro nicʉ niwĩ:

—Baꞌaya. Aꞌte yʉꞌʉ upʉ niꞌi, nicʉ niwĩ.

23 Beꞌro sĩꞌrĩrĩ pare mii, Õꞌacʉ̃rẽ eꞌcatise oꞌocʉ niwĩ tja. Tuꞌajanʉꞌcõ, cʉ̃ buꞌerãrẽ tĩacʉ niwĩ. Nipeꞌtirã ti pa cjasere sĩꞌrĩpeꞌticãꞌcãrã niwã. 24 Narẽ tĩagʉ̃, nicʉ niwĩ:

—Aꞌte yé dí niꞌi. Masã ñaꞌarõ weeꞌquere wẽrĩ wapayebosagʉsaꞌa. Õꞌacʉ̃ masãrẽ apeye maꞌma “Aꞌtiro weegʉti” níꞌquere cũugʉ̃sami. Yʉꞌʉ wẽrĩgʉ̃, dí oꞌmabʉrose meꞌrã pãjãrã añurõ weenoꞌrãsama. 25 Diacjʉ̃ mʉsãrẽ weregʉti. Aꞌte ʉꞌsedʉcaco vino marĩ niꞌcãrõacã sĩꞌrĩrõ weronojõ weenemosome. Beꞌro yʉꞌʉ pacʉ yʉꞌʉre wiogʉ sõrõcãpʉ, mʉsã meꞌrã apaturi maꞌma vino sĩꞌrĩnemogʉ̃saꞌa tja, nicʉ niwĩ Jesú.

26 Jesú cʉ̃ buꞌerã meꞌrã baꞌáca beꞌro Õꞌacʉ̃rẽ basapeotoja, ti wiꞌire wijaa waꞌacãrã niwã. Wijaa, ʉ̃rʉ̃gʉ̃ Olivo wãmeticjʉpʉ waꞌacãrã niwã. 27 Topʉ waꞌagʉ, Jesú narẽ nicʉ niwĩ:

—Mʉsã nipeꞌtirã aꞌti ñami uirã, yʉꞌʉre cõꞌawãꞌcãpeꞌtia waꞌarãsaꞌa. Mʉsã tojo weeatje Õꞌacʉ̃ ye queti ojáca pũrĩpʉ nírõnojõta waꞌarosaꞌa. Aꞌtiro ojanoꞌwʉ̃: “Yʉꞌʉ oveja coꞌtegʉre wẽjẽnoꞌcã weegʉsaꞌa. Tojo weecã, cʉ̃ yarã oveja noꞌo ʉaro omastearãsama”, niwʉ̃. 28 Beꞌro yʉꞌʉ wẽrĩꞌcʉpʉ masã́ca beꞌro mʉsã dʉporo Galilea diꞌtapʉ waꞌayutojagʉsaꞌa, nicʉ niwĩ.

29 Cʉ̃ tojo nicã tʉꞌogʉ, Pedro yʉꞌticʉ niwĩ:

—Ãpẽrã mʉꞌʉrẽ cõꞌawãꞌcãcã, yʉꞌʉ pũrĩcã ne waꞌasome, nicʉ niwĩ.

30 Tojo nisere tʉꞌogʉ, Jesú nicʉ niwĩ:

—Diacjʉ̃ mʉꞌʉrẽ weregʉti. Niꞌcãcã ñami pʉati cãrẽꞌquẽ uuati dʉporo yʉꞌʉre iꞌtiati “Cʉ̃rẽ masĩweꞌe”, nigʉ̃saꞌa, nicʉ niwĩ.

31 Tojo nicã tʉꞌomigʉ̃, Pedro ninemocʉ niwĩ:

—Yʉꞌʉ pũrĩcã na yʉꞌʉre wẽjẽsĩꞌrĩcãma, “Cʉ̃ meꞌrã boagʉti”, nigʉ̃saꞌa. “Cʉ̃rẽ masĩweꞌe” nisome, nicʉ niwĩ. Beꞌro nipeꞌtirã cʉ̃ buꞌerã Pedro níꞌcaronojõta nibʉrocãrã niwã.

32 Olivo wãmeticjʉ ʉ̃rʉ̃gʉ̃pʉ waꞌarã, tigʉ dʉꞌpocã́ Getsemaní wãmetiropʉ etacãrã niwã. Topʉ Jesú cʉ̃ buꞌerãrẽ aꞌtiro nicʉ niwĩ:

—Yʉꞌʉ ñubuegʉ waꞌari cura aꞌtopʉ dujíniña yujupʉ, nicʉ niwĩ.

33 Topʉ ñubuegʉ waꞌagʉ, Pedro, Santiago, Juãrẽ miacʉ niwĩ. Cʉ̃ ʉpʉtʉ waro ejeripõꞌrãpʉ wãcũqueꞌti, bʉjaweticʉ niwĩ. 34 Narẽ nicʉ niwĩ:

—Yʉꞌʉre wẽrĩtawioro, bʉjawetise yʉꞌrʉmajãsaꞌa. Mʉsã aꞌto tojayá. Ne cãrĩticãꞌña, nicʉ niwĩ narẽ.

35-36 Tojo níca beꞌro yoacurero na yʉꞌrʉro waꞌa, diꞌtapʉ paamuꞌrĩqueꞌagʉ, cʉ̃ pacʉre sẽrĩgʉ̃, aꞌtiro nicʉ niwĩ:

—Pacʉ, mʉꞌʉrẽ nipeꞌtise basioꞌo. Mʉꞌʉ ʉacã, yʉꞌʉre aꞌte ñaꞌarõ yʉꞌrʉatje waꞌaticãꞌto. Yʉꞌʉ tojo nimicã, yʉꞌʉ ʉaro weeticãꞌña. Mʉꞌʉ ʉaro peꞌe waꞌato, nicʉ niwĩ.

37 Beꞌro cʉ̃ buꞌerã tiropʉ majãmitojacʉ niwĩ. Narẽ cãrĩꞌcãrãpʉre bocaejacʉ niwĩ. Pedrore nicʉ niwĩ:

—Simó, ¿mʉꞌʉ cãrĩgʉ̃ weeti? ¿Ne cãꞌrõacã cãrĩtimigʉ̃, tʉꞌsʉmasĩtisari? 38 Cãrĩticãꞌña. Wãtĩ mʉsãrẽ niquesãticãꞌto nírã, Õꞌacʉ̃rẽ sẽrĩña. Mʉsã wãcũsepʉ meꞌrãma yʉꞌʉre ẽjõpeonuꞌcũsĩꞌrĩmisaꞌa. Mʉsã seꞌsaro tojo weesĩꞌrĩmirã, wãcũtutuamasĩtisaꞌa. Tojo weerã Õꞌacʉ̃rẽ sẽrĩña, nicʉ niwĩ.

39 Tojo níca beꞌro majãmitojagʉ, cʉ̃ pacʉre sẽrĩꞌcaronojõta sẽrĩcʉ niwĩ tja. 40 Sẽrĩ́ca beꞌro cʉ̃ buꞌerã tiropʉ majãmitojagʉ, cãrĩꞌcãrãpʉre bocaejacʉ niwĩ tja. Narẽ wʉja pũrĩyʉꞌrʉacaro niwʉ̃. Tojo weerã cʉ̃rẽ deꞌro wee yʉꞌtimasiticãrã niwã. 41 Beꞌro apaturi Jesú cʉ̃ pacʉre sẽrĩtʉogʉ waꞌacʉ niwĩ. Tojatagʉ, cʉ̃ buꞌerãrẽ nicʉ niwĩ:

—Niꞌcãrõacãma sooya, cãrĩña majã. Tocãꞌrõta niꞌi. Niꞌcãrõacãrẽ yʉꞌʉ Õꞌacʉ̃ macʉ̃ masʉ̃ weronojõ upʉtigʉre masã ñaꞌarãpʉre oꞌoatje etatojaꞌa. 42 Wãꞌcãnʉꞌcãña. Teꞌa, na tiropʉ waꞌarã. Yʉꞌʉre oꞌoacjʉ aꞌtitojami, nicʉ niwĩ Jesú.

43 Jesú cʉ̃ buꞌerãrẽ ucũrĩ cura na meꞌrãcjʉ̃ níꞌcʉ Juda etacʉ niwĩ. Cʉ̃ meꞌrã pãjãrã masã diꞌpjĩrĩ cʉorã yucʉpagʉ meꞌrã aꞌticãrã niwã. Na paꞌia wiorã, Moisé ojaꞌquere buꞌeri masã, judío masã bʉcʉrã oꞌónoꞌcãrã nicãrã niwã. 44 Juda Jesure wiari masʉ̃ narẽ aꞌtiro niyutojacʉ niwĩ:

—Yʉꞌʉ waꞌsuporopʉ miꞌmiacjʉ cʉ̃́ta nigʉ̃sami. Cʉ̃rẽ ñeꞌe, añurõ dʉꞌte miapa, nicʉ niwĩ.

45 Juda Jesú tiropʉ etagʉ, aꞌtiro nicʉ niwĩ:

—Yʉꞌʉre buꞌegʉ. Tojo nígʉ̃ta, cʉ̃rẽ miꞌmicʉ niwĩ. 46 Tojo weecã ĩꞌarã, Jesure ñeꞌewãꞌcã waꞌacãrã niwã.

47 Cʉ̃rẽ ñeꞌerĩ cura niꞌcʉ̃ topʉ nuꞌcũgʉ̃ cʉ̃ ya diꞌpjĩrẽ wejewee, paꞌia wiogʉre daꞌracoꞌtegʉre oꞌmepero dʉtepãꞌrẽcãꞌcʉ niwĩ. 48 Jesú masãrẽ nicʉ niwĩ:

—¿Yajari masʉ̃rẽ ñeꞌerã aꞌtirã weronojõ yʉꞌʉre diꞌpjĩrĩ, yucʉpagʉ meꞌrã ñeꞌerã aꞌtiati? 49 Nipeꞌtise nʉmʉrĩ yʉꞌʉ Õꞌacʉ̃ wiꞌi mʉsã waꞌteropʉ buꞌedujiwʉ. Titare mʉsã yʉꞌʉre ñeꞌetiwʉ. Aꞌte mʉsã niꞌcãrõacã weese todʉporopʉ Õꞌacʉ̃ ye queti ojáca pũrĩpʉ nírõnojõta waꞌaꞌa, nicʉ niwĩ.

50 Jesure ñeꞌecã ĩꞌarã, cʉ̃ buꞌerã niꞌcʉ̃rẽta cõꞌanʉꞌcõ, duꞌtiwaꞌcãpeꞌtia waꞌacãrã niwã.

51 Jesure ñeꞌewãꞌcãcã, niꞌcʉ̃ maꞌmʉ cʉ̃ cãrĩgʉ̃ omáca casero meꞌrã omatjĩagʉ̃ sirutucʉ niwĩ. Beꞌro ãpẽrã cʉ̃rẽ ñeꞌecãrã niwã. 52 Tojo weecã, cʉ̃ omaꞌcarore cõꞌacãꞌcʉ niwĩ. Cõꞌa, suꞌti marĩgʉ̃ omawãꞌcã waꞌacʉ niwĩ.

53 Jesure ñeꞌe, paꞌia wiogʉ tiropʉ miacãrã niwã. Topʉ nipeꞌtirã paꞌia wiorã, judío masã bʉcʉrã, Moisé ojaꞌquere buꞌeri masã nerẽcãrã niwã. 54 Pedro peꞌe Jesure yoacurero paꞌia wiogʉ ya wiꞌi sope pʉꞌtopʉ sirututʉocʉ niwĩ. Topʉ surara pʉꞌto ejanujã, na meꞌrã pecameꞌe sõꞌmadujicʉ niwĩ.

55 Paꞌia wiorã, tojo nicã nipeꞌtirã wiorã “¿Deꞌro wee Jesure weresãrõʉamitito?” nicãrã niwã. Cʉ̃rẽ wẽjẽsĩꞌrĩrã, tojo nicãrã niwã. Cʉ̃rẽ wẽjẽsĩꞌrĩmirã, buꞌiri ne bocaticãrã niwã. 56 Pãjãrã cʉ̃rẽ weresã, nisoocãrã niwã. Niꞌcãrõnojõ weresãtiyucã, basioticaro niwʉ̃. 57 Ãpẽrã wãꞌcãnʉꞌcã, nisoose meꞌrã weresãcãrã niwã. Aꞌtiro nicãrã niwã:

58 —Ãꞌrĩrẽ aꞌtiro nicã tʉꞌowʉ: “Yʉꞌʉ aꞌti wiꞌi Õꞌacʉ̃ wiꞌire masã wééca wiꞌire cõꞌadijopeꞌogʉti. Beꞌro iꞌtia nʉmʉ beꞌro ape wiꞌi tuꞌajanʉꞌcõgʉ̃ti. Ti wiꞌi masã wééca wiꞌi mejẽta nirõsaꞌa”, niwĩ, nicãrã niwã.

59 Tojo nimirã, na nisere niꞌcãrõnojõ wãcũticãrã niwã.

60 Na tojo nicã tʉꞌogʉ, paꞌia wiogʉ na waꞌteropʉ wãꞌcãnʉꞌcã, Jesure sẽrĩtiñaꞌcʉ niwĩ:

—¿Mʉꞌʉrẽ tojo nisere yʉꞌtiweti? ¿Deꞌro ni yʉꞌtigʉsari na weresãsere? nicʉ niwĩ.

61 Jesú yʉꞌtitiyʉꞌrʉocãꞌcʉ niwĩ. Cʉ̃ yʉꞌtiticã ĩꞌagʉ̃, paꞌia wiogʉ apaturi sẽrĩtiñaꞌnemocʉ niwĩ:

—¿Mʉꞌʉta niti Õꞌacʉ̃ beseꞌcʉ Cristo, Õꞌacʉ̃ añugʉ̃ macʉ̃ na nigʉ̃́? ni sẽrĩtiñaꞌcʉ niwĩ.

62 Jesú cʉ̃rẽ yʉꞌticʉ niwĩ:

—Cʉ̃́ta niꞌi. Mʉsã yʉꞌʉ Õꞌacʉ̃ macʉ̃ masʉ̃ weronojõ upʉtigʉ Õꞌacʉ̃ pʉꞌtopʉ dujicã ĩꞌarãsaꞌa. Cʉ̃ ʉꞌmʉsepʉ nigʉ̃́ tutuayʉꞌrʉami. Yʉꞌʉ oꞌmecururipʉ dijaticã ĩꞌarãsaꞌa, nicʉ niwĩ.

63 Tojo nicã tʉꞌogʉ, paꞌia wiogʉ uasere ĩꞌogʉ̃, cʉ̃ basu cʉ̃ ye suꞌtire wejetʉ̃ꞌrẽcʉ niwĩ. Aꞌtiro nicʉ niwĩ:

—Ãpẽrã cʉ̃rẽ weresãrã ʉanemoweꞌe. 64 Mʉsã Õꞌacʉ̃rẽ ñaꞌarõ cʉ̃ níꞌquere tʉꞌoapʉ. ¿Deꞌro tʉꞌoñaꞌti mʉsã? nicʉ niwĩ.

Nipeꞌtirã topʉ nirã́ “Cʉ̃rẽ wẽjẽrõʉaꞌa”, nicãrã niwã.

65 Na tojo nicã tʉꞌorã, ãpẽrã aꞌtiro weecãrã niwã. Cʉ̃rẽ ʉꞌseco eꞌopeocãrã niwã. Cʉ̃ caperire biꞌapecãrã niwã. Cʉ̃rẽ paamʉjãrã, aꞌtiro nicãrã niwã:

—Níbocaya. ¿Noa mʉꞌʉrẽ paati? nicãrã niwã.

Surara quẽꞌrã diapoapʉ Jesure paacãrã niwã.

66 Jesure wiꞌi poꞌpeapʉ ñeꞌesãjãca beꞌro Pedro sope pʉꞌtopʉ tojacʉ niwĩ. Cʉ̃ tojo weeri cura niꞌcõ paꞌia wiogʉre daꞌracoꞌtego etaco niwõ. 67 Cʉ̃ pecameꞌe sõꞌmadujigʉre ĩꞌagõta ĩꞌa, cʉ̃rẽ nico niwõ:

—Mʉꞌʉ Jesú Nazarecjʉ̃ meꞌrã sijaꞌcʉta niꞌiba, nico niwõ.

68 Pedro core nisoogʉ, aꞌtiro ni yʉꞌticʉ niwĩ:

—Cʉ̃rẽ masĩtisaꞌa. Ñeꞌenojõrẽ ucũgõ ucũsaꞌa. Tʉꞌomasĩtisaꞌa, nicʉ niwĩ.

Cʉ̃ sãꞌrĩrõ sope pʉꞌtopʉ topʉ wijaanʉꞌcãcã, cãrẽꞌquẽ uucʉ niwĩ. 69 Paꞌia wiogʉre daꞌracoꞌtego apaturi cʉ̃rẽ ĩꞌagõ, topʉ nirãrẽ aꞌtiro nico niwõ:

—Ãꞌrĩ quẽꞌrã na meꞌrã sijaꞌcʉta nimi, nico niwõ.

70 Cʉ̃ apaturi nisoocʉ niwĩ tja. Beꞌroacãta topʉ nirã́ Pedrore aꞌtiro nicãrã niwã:

—Mʉꞌʉ quẽꞌrã Jesú buꞌerã meꞌrã sijaꞌcʉta niꞌi. Mʉꞌʉ Galileacjʉ̃ niꞌi. Mʉꞌʉ ucũse quẽꞌrã na ucũwʉaronojõ bʉsʉsaꞌa, nicãrã niwã.

71 Na tojo nicã tʉꞌogʉ, Pedro nisoonemocʉ niwĩ tja:

—Yʉꞌʉ diacjʉ̃ta ucũticã, Õꞌacʉ̃ yʉꞌʉre buꞌiri daꞌreato. Yʉꞌʉ mʉsã ucũgʉ̃rẽ ne masĩtisaꞌa, nicʉ niwĩ.

72 Cʉ̃ tojo nicũñarĩ cura cãrẽꞌquẽ apaturi uucʉ niwĩ tja. Tojo weecã, Pedro Jesú todʉporopʉ níꞌquere wãcũbocacʉ niwĩ. Jesú aꞌtiro nicʉ niwĩ: “Cãrẽꞌquẽ pʉati uuse dʉporo mʉꞌʉ yʉꞌʉre iꞌtiati ‘Cʉ̃rẽ masĩweꞌe’, nigʉ̃saꞌa”, nicʉ niwĩ. Tere wãcũgʉ̃, ʉpʉtʉ uticʉ niwĩ.