1 Bos tengan nisep usil naha xa mutetisi usil mani xa di muso viton ni tengan vatutou ni moletin na Hi xil e hal Serusalem. Xamim mupol ni ixoni ngan xa natehiteni mi moletin xil e sias xil e provins te hal Kalesia. ✡Pol 11:29; Rom 15:25-26; 2Kor 8:9; Kal 2:10 2 E Sande te wik xil vus, xamim kekes ileh rerat rut mani ihusil naha xa xi mikameti e polien nan e iserev kuhi iti. Imak, ma melele xa nihat, munalang ni ti mun mani xil ak. ✡Pol 20:7 3 Melele xa nihat, nitis uvei te sepkilaen ve ngan xatel xa xamim muhosei xatel tengan ha latileh sanien namim xil ihe hal Serusalem. 4 Xosxa napusi bos tengan inou mun niha, ma xatel ak latihusil xat inou.

5 Be reitin xa inou nihat nisao ni xamim. E itiamu, niha nika pas provins te hal Masedonia. ✡Pol 19:21 6 Xos nihat nite visal xamim ihe vuteili tang, mu xos nita e aveti xil vus te an tesa. Itutou ni, xamim mukila mututou ni nou e suse navan tengan nihe rute xave xa nihit niha en. ✡Rom 15:24; Taet 3:12 7 Ieok ti tavei xa namaat e napus xamim vahe te melengien vahis tang. Xosxa Suv imaen ni, ieok bei tengan nita ihe teviei itel xat xamim. ✡Pol 18:21 8 ✡Dut 16:9-11E nita tak e taon te hal Efeses ituxoh melengien te Pentekos, ✡Pol 19:1,10; Lev 23:15-21; Dut 16:9-11 9 ✡Pol 19:8-10vengan napus kila xa Hi misah puiteh tengan isak ni polien navan e rute ak ihur huite ihe holu, tave ti neta xa elu navan xil labe holu. ✡Pol 19:8-10; 2Kor 2:12; Kol 4:3; Rev 3:8

10 Xosxa Timoti ihat istal mi xamim, muhur pilei tengan xi nanexo ti melele xa ite visal xamim vengan xi mun di pol mi Suv Iesu nggoni nou tang. ✡1Kor 4:17; Plp 2:20 11 Ma, moletin ti nasin ni. Mututou kuhi ni tengan iha mun e kakaoen nan itel tomat, vengan di nasotili del rut tua xil mun e neketen. ✡1Tim 4:12

12 Mutesis nou usil tua nar Apolos. Natesak tengan namiteni mini vahat vasao ni xamim vatel rut tua xil mun e neketen, e xi ien ti tenavei vahat e melele nen ak. Xosxa ipus mesal tova, ma ihat visal xamim sung. ✡Pol 18:24; 1Kor 1:12; 3:5-6

13 E rin te neketen namim, muxuxou kuhi tengan musoh ixeih. Nenemien namim xil ixeih e ulimim nakan ti. ✡Sam 31:24; Efes 6:10 14 E polien xil vus namim, mupol ni itel eheien.

15 ✡1Kor 1:16Tuxoli e hinoxoli xil, xamim mukil Stefanas del ngenen xil xa latehur neketen tetiamu ni moletin sav xil e provins namim te hal Akea. Xil latesa meulien tevi nae tengan latutou ni moletin na Hi xil. ✡1Kor 1:16; Rom 16:5 16 Nasel xat xamim tengan musa sen xamim e mupol itel hisit moletin xil xa lamak itel moletin sav xil vus mun xa di lapol nggeih del xil. 17 Natehesi nou pupu melele xa natepus Stefanas temei tetel Fortunatas e Akaekas xa latexo visal xamim, vengan xatel latteti visal nou e lattetutou ni nou e rin namim. 18 Xatel latepet rat nenemien navan, e nakila xa latipet rat nenemien namim mun. Ma, mumerere ni hisit moletin xil xa lamak. ✡Plp 2:29; 1Tes 5:12

19 ✡Pol 18:2Tua namim xil e sias inggak e provins te hal Esia labit ‘bos makoe’ mi xamim. Akuila xal Prisila mun lubit ‘bos makoe’ mi xamim e his Suv, del xat ngan xil xa lasukul vituei e tim salu. ✡Pol 18:2,18,26; Rom 16:3; 16:5 20 Kristin xil vus te rute ak mun labit ‘bos makoe’ mi xamim. Mupo xat xamim itel eheien na Hi. ✡Rom 16:16; 2Kor 13:12; 1Pit 5:14

21 Mupusi, del xat heok xati nadis sepinien ak, Inou Pol nabit bos makoe mi xamim. ✡Kol 4:18; 2Tes 3:17

22 Moletin xa eheien nan tara ti e Suv Iesu, halesil tei ita xati. ✡Kal 1:8,9

!Suv namem, amei! !Reitin, maranata!

23 Eheien hos na Suv Iesu iti mi xamim.

24 Eheien navan iti mi xamim vus xa rabisti vituei del Iesu Kristo.