2
Rihusil sexien na Iesu Kristo xa nenemien nan be tan
1 Vengan xa di mubisti del Iesu Kristo, nakila xa xi di misak ni xamim mei muxeih mu e neketen namim. Vengan xa mukila xa eheien nan di e xamim, ngan ak di pet rat nenemien namim. Vengan xa Ninin Eo de xamim, mupol ni bos mi mosav xil e iemim di misae e xamim mun. 2 Misak ni, nasis xamim tengan mupol ni sexien xil ak xa isak ni nou nipolu ni sien: nenemien namim ihe tei takes, eheien xa de xamim ihe tei takes, tinemim ihe tei takes, e mupol vituei ixoni moletin tei takes. 3 Ti xamim nasep koai mu naling xi nahe nesao mu nali mosav xil. Ihos mak mu xa xi iling nenemien nan ihe tan, ti ipus mosav xil ixoni ngan xa labos mak mu lali xi tasen. ✡Kal 5:26; Rom 12:10 4 Ti xamim nanem tasen ni xi ti, e ihos mak mu xa ti inem usil mosav xil. ✡1Kor 10:24,33
5 Nenemien namim mei ixoni nenemien na Iesu Kristo xa tehe tan.
6 Vengan neta sav xa Kristo be Hi e rin xil vus, ✡Sion 1:1,2; 17:5
xi tenapol ni nenemien nan ti vahit vahur xat xeihen nan tengan vapin ni Hi.
7 E testokovein xeihen nan xa eilep e temei etan, ✡2Kor 8:9; Sion 1:14; Hib 2:14,17
mei tehe slev tei tang e rin xil holu.
Xi tepot e ut etan
e mei be moletin xa tenben da.
8 Tepol ni nenemien nan tehe tan
e telong xat Hi teha vuma … temat.
Reitin, xi temaen ni tengan vaha vamat e eivave vaxoni moletin tesa tei.✡Sion 10:17; Hib 5:8; 12:2
9 Ve rin ak, Hi tepet rat his Kristo tehe nesao, ✡Pol 2:33; Hib 1:3
e tesa his tei xa eilep mini
xa mili his sav xil vus. ✡Efes 1:21; Hib 1:4
10 Mak, ma e his Iesu, holesok xil vus mei limot mini: ✡Aes 45:23; Rom 14:11
ngan xil xa ladi e ut nesao,
ngan xil xa ladi e ut etan,
e ngan xil mun xa ladi e ut te maten.
11 Reitin, xil vus ti lihithiteni lihit,
“Iesu Kristo be Suv te holesok xil vus.”
Imak, ma lipus kila mak mu xa Hi Tata be eilep xa be eilep pupu.
Selxatien xa meulien nar imese tevi pe met moletin sav xil
12 Tuxoli e hinoxoli xil, vengan xa nenemien namim be tan nggoni Iesu, mulong xat inou ixoni ngan xa di mutepol vehakut ni, e melele xa natete visal xamim. E ihos mak mu xa mupol ni taxeak xa natara ti visal xamim. Ti mupol ixeih tengan muketeh kuhi xa sexien namim xil lipisen ni xa mube ngan xil xa Hi miteh meulien nae ra tesaen. Mupol ni imak itel merereen e ulikanen, ✡Sam 2:11; 1Pit 1:17 13 vengan xa be Hi iaxa di pol e meulien namim. E be xi iaxa di misak ni xamim di iemim bei tengan muvusil naha xa xi ien bei xamim tengan mupol ni, e di misa xeihen mun mi xamim tengan mukila mupol ni. ✡Sion 15:5; 1Kor 12:6; 15:10; 2Kor 3:5; 1Tes 2:13
14 E holesok xil vus xa di mupol ni, munaseputut ti e munangor ti natel xamim mun tang. ✡1Kor 10:10; 1Pit 4:9 15 Imak, ma sexien namim xil ipisen ni xa mube nat Hi xil xa mumese tevi, e neta tovuol vasa vate rin namim e melele xa mudi taxeak e ut etan del moletin tesa xil xa sexien nae xil mikavui. Imak, ma meulien namim ileluv e hilaep te xil ixoni ngan xa hitu xil di laleluv e maluxoluken te vongien. ✡Dut 32:5; Mat 10:16; Pol 2:40; Dan 12:3; Mat 5:14; Efes 5:8; 1Tes 2:19; 1Kor 1:8; Plp 1:6,10; Aes 49:4; 65:23; Kal 2:2 16 Muhithiten longeongen hos mi xil xa mikila vasa meulien mi xil. Vengan, xosxa imak, ma nikila nisep koai e melele xa Iesu Kristo itilomun en. Nisep koai vengan xa meulien namim ti ipisen ni xa naduxoh hoxalit lohen navan e natapol votei ti. E polien navan nggur huite.
17 Neta sav xosxa lihas vin inou, nabesi nou tang e di napet rat his Hi ve xamim vus. Vengan xa meulien navan nggoni sanien eo tei xa di nasa ni ba mi Hi ve rin te neketen namim vus. ✡Rom 15:16; 2Tim 4:6 18 Nggo hisit sexien ak, melele xa xamim di munggur longpangasien xil, xamim mun mumes Hi e muhesi xamim itel inou. ✡Plp 3:1; 4:4
Selxatien mi Kristin xil te hal Pilipae tengan lavur pilei Timoti xal Epafrodaetas
19 Xosxa ihusil nenemien na Suv Iesu, nanemi nabit nisil Timoti ihat mi xamim navehi ti. Imak, ma melele xa itilomun visal inou, longeongen usil xamim xa isa ni minou isa sien minou. 20 Moletin tovuol mun vate visal inou xa vaxoni Timoti xa eheien nan di e xamim e ien bei tengan vatutou ni xamim vaxoni inou. 21 Moletin savsav xil di lapol ni neta xa xil kestang iexil bei tengan lapol ni, e latapol ni ti naha xa Iesu Kristo ien bei. ✡2Tim 4:10 22 E Timoti tepisen ni ngamu mi xamim xa xi di pol mi Iesu. Vengan xamel malpol vituei ve longeongen hos na Hi nggoni ngan taxa horamue tei di pol vituei del tamen. 23 Misak ni, e melele xati xa nihe von koten e nilong kil naha xa ti lipol ni minou, nisil Timoti ihat visal xamim. 24 E nanesi xa, navehi ti, Suv imaen inou mun nimeluv nihat vis xamim.
25 E nanemi nabit bos tengan nisil tuxoli Epafrodaetas itilomun visal xamim. Xamim mutesila temei visal nou tengan vahe eloheoh namim minou e mei vatutou ni nou e rin namim. E xamel mapol vituei e di mabae vituei ve polien na Hi. ✡Plp 4:18 26 Xamim mutelonge xa xi temesei pupu e mutenexo ven. E melele xa Epafrodaetas telong usil nenexoen namim ven, xi milonge misa e bit vatilomun vahat vasao ni xamim. 27 E reitin li xa xi temesei pupu e sangas vamat. E Hi ien tesae en, e ien tesae e nou mun. Vengan xosxa imat, ma inou nilonge isa pilei mak mu. 28 Ma, namaal pupu tengan nisil rilomun ni ihat visal xamim tengan muhesi xamim ven melele xa mupusi. E imak, ma nenexoen navan mun ihe etan. 29 Misak ni, muhur pilei kuhi e his Suv Iesu itel sien. E momal tengan musa merereen mi hisit moletin xil xa lamak. ✡1Kor 16:16,18; 1Tim 5:17 30 Vengan xi misa sen meulien nan e sangas vamat ve polien na Kristo. Xi, ulin takan ni melele te xeih xil e di pol sen polien xil xa xamim iemim bei tengan mupol ni.