Sepinien xa diamu te
Efeses
?Visi iaxa tetis uvei ak?
Pol, eloheoh tei na Iesu Kristo, iaxa tetis uvei ak✡Efes 1:1 e huram 60 AD (huram xil tetutou ni poten na Iesu) e melele xa tete nim te xeih e taon xa mahulong te hal Rom.✡Efes 4:1; 6:20; Pol 28:30-31
?Visi iaxa tevuli uvei ak tetiamu?
Pol tetis sepinien ak teha mi Kristin xil xa lateti e taon te hal Efeses,✡Efes 1:1 e tekila xa Kristin xil te rute sav xil mun ti livuli. Pol teha tepol rohon tetel moletin xil te hal Efeses e 53 AD, e hoxalite te kakaoen nan xa be valu nen.✡Pol 15:36–18:22 Rut moletin xil te hal Efeses latesisi tengan vata vatel xil, e Pol tenamaen ni ti vengan xa di tehusil suse nan tengan vahe Serusalem, e ien ti tenavei tengan vahas melengien vahe holu e rute ak. Di, e kakaoen nan xa tehe vatol nen,✡Pol 18:23–21:16 Pol tetilomun ba tete visal mol‑Efeses xil ak✡Pol 19:1-20 e tepispisi kuhi mi xil huram tehe tol.✡Pol 20:31 Di, Pol teling Timoti tengan vapol vatel Kristin xil te hal Efeses.✡1Tim 1:3 Di, tetutou ni melele nen ak, melele xa Pol teha tengan vasa sanien tei mi hoeo xil e sias te hal Serusalem, vat xil te sias te hal Efeses latemei latesao ni Pol e taon te hal Maelitas xa tave sotin pupu ti ra taon te hal Efeses. E rute ak, latesep kor tetel Pol e latemuis vengan xa Pol tehiteni mi xil xa linapus ti mun.✡Pol 20:17-38 Ma, Pol tenatis uvei ak ti tengan vamal ni neta tei xa tenamal ti. E tetis uvei ak tengan vapispisi mi xil usil polien xati te Sias na Iesu Kristo. E tetisi mun tengan vasel xat xil xi lixulehi ti lisoh ixeih e neketen nae, e lixuxou kuhi xa sexien nae xil imal tevi.
?Pol tetis uvei ak veneh?
Pol ien tehei tengan vapispisi ni xa lingxatien na Hi bos mak mu - Pol tepispisi ni mi xil xa eheien hos na Hi mahulong pupu,✡Efes 1:7; 2:7 longeongen hos di bit usil holesok xil xa bos pupu xa mei be nae nggo naha xa Kristo tepol ni e rin nae,✡Efes 3:8 e minehinen te xeihen na Hi eilep pupu.✡Efes 3:16 Pol tehiteni mun tehit, “Hi tehosei xamim tengan muleh holesok xil xa bos pupu xa xi tehit xati tengan isa ni mi ngenen xil.”✡Efes 1:18 Texo sepinien nan, mei rakila xa Pol tenemi xa holesok xil xa Hi teling xati bos pupu.
Pol ien tehei tengan vapispisi ni xa Iesu Kristo be vatite te holesok xil xa Hi teling xati tengan vapol ni - Pol tepispisi ni xa, texo Iesu Kristo, Hi tehosei xir tengan mei rihe horamue nan xil,✡Efes 1:4-5 e tepisen kila xa iling holesok nan xil vus e he Kristo e he ngan xil mun xa labisti vituei dela.✡Efes 1:10-11 Texo naha xa Kristo kestang tepol ni, Hi teteh meulien e xir e tesak ni xir rameul.✡Efes 2:5-10 Texo Kristo, Siu xil e ngan xil xa latave Siu ti mei labe vanut moletin tei takes.✡Efes 2:16 E Ninin na Kristo de tine Kristin xil e di misak ni xil lapol ni sexien nae xil vus del eheien.✡Efes 3:16-17
Pol ien tehei tengan vapispisi ni xa Kristin xil labe Sias na Iesu Kristo e di lapol vituei nggoni tenben tei takes - Neta sav xa Kristin xil langgo rute savsav xil, di lasepin ni sepinien tesav xil, e sexien nae xil misav, Kristin xil labe vanut moletin tei takes✡Efes 4:3 vengan xa Ninin Eo nae tei takes✡Efes 4:4 e neketen nae tei takes.✡Efes 4:5 E Ninin Eo di misa sanien mi Kristin xil vus te sias tengan vatutou ni Kristin sav xil mei lixeih mu e neketen nae tengan mei lixoni Kristo tang.✡Efes 4:11-13
Pol ien tehei tengan vapispisi ni xa momal xa Kristin xil liling nenemien nae ihe tan tengan lipol ihusil nenemien na Kristin sav xil - Pol tehiteni xa momal xa Kristin xil liling nenemien nae ihe tan. Atou xil itel tiramue nae xil,✡Efes 5:22-33 horamue xil itel tamexil e ninexil,✡Efes 6:1-4 e slev xil itel masta nae xil mun.✡Efes 6:5-9
Pol ien tehei tengan vapispisi ni xa itep iaxa neketen na Kristin xil mikila mei ixeih mu - Pol tepispisi ni xa Kristin xil livue xat xil ve vaeen te neketen ixoni ngan xa labe moletin xil te vaeen. E xil livae itel reitinen, momalen, tomat, nenesien, neketen, kilakilen xa Hi di miteh meulien e xil, e sepinien na Hi.
Vatit nenemien tei te uvei ak de Efeses 4:4-6
Io, xir xa raneket rabe tenben tei takes e Ninin Eo xa di iexir be tei takes. E, del nenemien xa be teviei, ranggur nenesien tei takes xa be reitin xa Hi tekes xir tengan riti vituei itela e ut nesao. Di ranggusil Suv tei takes xa be Kristo, di ranggusil xat pispisien tei takes, e labaptaes ni xir tengan ramos e neketen tei takes. Hi tei takes xa be Tame holesok xil vus. Xi be eilep mili holesok xil vus, di pol e meulien na moletin xil, e di meul e tine moletin xil.
?Naha iaxa di e uvei ak?
1. Pol pispisi ni xa Iesu Kristo iaxa be vatit lingxatien xil na Hi. (1:1–3:21)
2. Pol pispisi ni xa momal tengan Kristin xil mei lipol vituei e lipol vuol ni naha xa Hi ien bei tengan xil lipol ni. (4:1–6:24)
1
Sepkilaen na Pol usil uvei ak
1 Inou Pol, xa Hi tehosei nou mei nabe eloheoh tei na Iesu Kristo, ieok bei tengan nasa sepinien navan vahat mi xamim, moletin xil na Hi xa mudi e taon te hal Efeses. Xamim di mupisen ni xa neketen namim nggeih e mubisti del xat Iesu Kristo. ✡1Kor 1:1; Kol 1:1
2 Di nasis xa eheien hos e tomat na Hi Tamer xal Suv Iesu Kristo iti mi xamim.
Holesok xil xa Iesu tepol ni di misak ni xir rabe moletin xil xati na Hi
3 Ti risa memesien iha mi Hi xa be Tame Iesu Kristo, Suv nar. Ve vitueien nar del Iesu Kristo, Hi duxol xat xir del sanien xil vus xa nggo ut nesao. ✡Efes 2:6 4 Tetiamu tamu nousav, melele xa Hi tenapeas ni ut etan ti mu, eheien na Hi teta ngamu e xir e xi tehosei xir tengan ihistin xir itel xat Kristo. Xi tepol ni temak tengan xir rihe moletin eo xil e meulien nar mun imal tevi pe meten. ✡Sion 15:16; 17:24; 2Tes 2:13; Efes 5:27; Kol 1:22 5 Hi teling xati nousav ngamu xa ileh rerat xir mei rihe horamue nan xil ixo holesok xil xa Iesu Kristo tepol ni. Hi tepol ni temak tehusil xat nenemien nan vengan xa tehesi xi pupu tengan vapol ni. ✡Sion 1:12 6 Reitin, Hi tehosei xir tengan ripet rat hisen ihe nesao ve eheien hos xa di pisen ni mi xir. Tave ti neta xa xir ratapol ni ti neta tengan ravur eheien hos nan, e tepisen ni mi xir ve holesok xil xa Natneli tepol ni, Natneli xa eheien nan di en. ✡Mat 3:17; Kol 1:13
7 Hi di pisen ni xa eheien hos nan mahulong pupu nggo rin xa texal rat xir ra longpangasien ve tesaen nar texo re Natneli. Ve rin ak, xosali, xi di miketeh bos mi xir. ✡Kol 1:14,20; Efes 2:7 8 Reitin, eheien hos nan xa di pisen ni mi xir eilep pupu. Hi be metisou e mikil holesok xil vus. 9 Ve rin ak, besi xi tengan vapisen kil nenemien xuxus nan mi xir xa teling xati tengan ipol ni ixo Iesu Kristo. ✡Rom 16:25; Efes 3:3,9 10 Vengan Hi teling xati ngamu xa melele xa melengien teni ipin, xi ileh viton holesok xil vus xa di ut nesao e ut etan, e iling Kristo vari iaxa ihe vat teni. ✡Kal 4:4; Kol 1:16,20
11 Hi di misak ni holesok xil vus mei mistal nggusil lingxatien e nenemien nan. E nggusil nenemien nan, Hi tehosei xamem, Siu xil, mei mabisti del xat Kristo. E ve rin ak, di bosei xamim tengan mei muve moletin nan xil xati. ✡Rom 8:28-29 12 Ma pol ni mak tengan xamem xa mateneket e Kristo tetiamu, mukila mumeul tengan mupet rat his Hi ihe nesao.
13 E xamim mun, xa mutave Siu ti, mei mutelong longeongen hos te reitinen usil Kristo, e muteke reitin en. Mak, ma Hi teteh meulien e xamim e tesa Ninin Eo mi xamim xa xi tehit xati tengan isa ni. E Ninin Eo ak di pisen reitinen teni xa xamim mube nan. ✡Kol 1:5; Efes 4:30 14 Reitin, melele xa Hi misa Ninin Eo ak mi xamim, di pisen ni xa ti imaen holesok xa di hen mi xir. E di pisen ni mun xa Hi nggal rat xir ngamu, e vatova, ileh xir ha riti vituei itela ixoni moletin nan xati xil. Mak, ma rimeul e riti itela tengan ripet rat hisen ihe nesao. ✡2Kor 1:22; 5:5
Pol misis ve mol‑Efeses xil tengan lipus kil holesok xil xa Hi di pol ni e rin nae
15 Inou natelong usil neketen namim e Suv Iesu e sexien te eheien xa di mupisen ni mi moletin na Hi xil. E ve holesok xil ak xa bos xa Hi di pol ni e rin namim, di nasis ve xamim. ✡Kol 1:4; 1:3; 1Tes 1:2 16 Reitin, e melele xil vus xa di nanem xat xamim e sisen xil navan, vehakut, dit nasa memesien ba mi Hi ve xamim. 17 Di nasis tengan Hi, Tame Iesu Kristo, Suv nar xa eilep pupu, ti isak ni xamim mupolu ni metisouen ixo Ninin Eo nan. E di nasis tengan Ninin Eo nan isak ni xamim mei mukil kuh xi ihe holu mu. ✡Kol 1:9-10; Aes 11:2 18 Ma melele xa Hi isah nenemien namim xil, xamim mei mukil kuh hosien nan e holesok hos xil xa xi tehit xati tengan isa ni mi moletin nan xil e melele xa ti imei, e mukila munesi en vatel nenemien namim xa be teviei. ✡Efes 4:4; Kol 1:12 19 E nasis mun tengan mukil kuh xeihen nan xa eilep pupu xa di pol dela e meulien nar xa di raneket e Kristo. ✡2Kor 13:4; Kol 2:12
20 E texo xeihen ak xa mahulong pupu, xi tepol ni Kristo temea rilomun ra maten, e telingi tetotan e rin metu e ut nesao. ✡Sam 110:1; Mat 22:44; Mak 16:19; Pol 2:34; Hib 1:3; 8:1; 10:12; 12:2 21 Mak, ma Kristo be eilep mak mu mili eilep savsav xil: ngan xil xa labe vat xil e ut nesao, e ngan xil mun xa labe vat xil e ut etan; suv toto xil xa lalaxat ut xa mahulong, e suv xil xa di lalaxat rute xil xa hokorong. Hisen be nesao pupu mili his eilep xil xa di latehur xeihen tetiamu, mu ngan xil mun xa langguri xosali. Hisen di mili his ngan xil mun xa ti lihur xeihen e melengien xil xa ti imei. ✡Kol 1:16; 2:10 22 Hi teling holesok xil vus te ut etan lateti pe he Kristo, e tesak ni mei be eilep te holesok xil e mei be vat na moletin nan xil xa labe Sias nan. ✡Sam 8:6; Rom 12:5; 1Kor 12:27; Efes 4:15; Kol 1:18 23 ✡Efes 4:10; Kol 1:19Sias ak be tenben. E Kristo di mise xat Sias nan del meulien e xeihen nan nggusil vatit sexien xa di mise xat holesok xil vus del meulien e xeihen nan.