Sepinien xa diamu te
1 Timoti
?Visi iaxa tetis uvei ak?
Polien 28 biteni xa Pol tete Rom e kavmen te hal Rom teling moletin te vaeen xil lateketeh xol Pol e nim tei.✡Pol 28:30-31 E tisen sav xil xa di e Vanuvei Eo e vanuvei sav xil mun labiteni labit kavmen te hal Rom latemaen Pol teha ven temase.
E kakaoen xil nan xa tetutou ni melele nen ak, Pol tehur Taetas, Timoti e moletin sav xil mun latehusili. E melele xa lateha latesao ni moletin xil e aelan te hal Krit, Pol teling Taetas tengan ilaxat kuh Kristin hu xil ixoni pasta nae.✡Taet 1:5 E melele xa latetuxoh taon te hal Efeses, Pol teling Timoti tengan ilaxat Kristin xil e rute ak.✡1Tim 1:3
Di, Pol tehe reling xalu e teha tesao ni Kristin xil e taon sav xil. Melele xa tetuxoh taon te hal Pilipae e provins te hal Masedonia, telongeong ni xa xalu lutekameti texeih e polien nalu. Tesak ni, tetis sepinien ak tengan vatutou ni Timoti✡1Tim 1:1 e huram 64 AD (huram xil tetutou ni poten na Iesu). Tetisi tevus, Pol tehe Rom. E rute nen ak, moletin xil te vaeen te hal Rom latetal xati e lateso ni tehe nim te xeih vatei mun. Di, Pol tetis uvei tei mun teha mi Timoti.
?Visi iaxa tevuli uvei ak tetiamu?
Pol tetis sepinien ak teha mi Timoti.✡1Tim 1:2 Timoti tehe horam maxoe tei xa testal texo taon te hal Listra.✡Pol 16:1 Ninen tehe ate‑Siu tei e tamen tehe ngan Kris tei.✡Pol 16:1 Timoti tehusil xat Hi e tetutou ni Pol e polien nan.✡Pol 16:3; 17:14; 18:5 Lutepol vituei e taon te hal Efeses.✡Pol 19:22 Pol, eheien nan teti Timoti pupu e tekes xati texoni horamue tei nan xati.✡1Tim 1:2
?Pol tetis uvei ak veneh?
Pol ien tehei tengan vasel xat Timoti usil moletin xil te luvosen - E taon te hal Efeses, rut moletin ngan xil di lateluvos Kristin xil. Latehiteni latehit holesok xil vus te ut etan tesa pupu.✡1Tim 4:4 Tesak ni latepispisi mi moletin xil latehit rut anien xil tenavos ti te anien en✡1Tim 4:3 e Kristin xil linateli ti.✡1Tim 4:3 Ngan xil ak latehiteni mi moletin xil xa xil kestang latekil sepinien xil na Hi xa koute teni di minggus, tesak ni moletin xil latehusil rae nae xil.✡1Tim 1:4-11
Pol ien tehei tengan pispisien xil vus na Timoti imal tevi - Pol tesel xat Timoti tengan ihur xat neketen nan e Iesu, ipispisi ni pispisien xa momal, e isak ni meulien nan mun imal tevi pe met Hi.✡1Tim 3:14-16; 4:9-16; 6:20-21
Pol ien tehei tengan vahit kil sexien hos xil na vat tei te sias mi Timoti - Vat tei te sias ipol ixeih e meulien nan melele xa ihit valaxat kuh moletin xil na Hi.✡1Tim 1:18-19; 4:6; 4:9-12; 6:11-16 Ikil kuh Vanuvei Eo e ihusil xat sepinien xil teni,✡1Tim 4:13-16 e ihe moletin tei te pispisien. Vehakut, nenemien nan ihos mi moletin xil vus✡1Tim 5:1-2 e meulien nan imal tevi.
Pol ien tehei tengan vahit kil sexien hos na vat xil te sias mi Timoti - Xosxa moletin tei mei be elda mu dikon tei te sias, sexien nan imal.✡1Tim 3:1-13; 5:17 Xosxa sexien nan imal, ipet rat his Hi ihe nesao e holesok xil te sias iloh imal.
Pol ien tehei tengan vahit kil polien hos te sias mi Timoti - Vat xil te sias lilaxat kuh moletin nae xil. Lipol ixeih tengan lilaxat ngan xil xa lamesei, ngan xil xa labe hoeo, e tunau xil mun.✡1Tim 5:3-10 Melele xa moletin xil xa latakil ti Hi lapus sexien hos nae xil, lipus kila sung xa eheien na Hi be reitin.✡1Tim 3:7; 4:15
Pol ien tehei mun tengan vahit kil suse te sisen - Melele xa ramei vituei ve sisen, nenemien nar e Hi imal e iexir naxat mosav ti.✡1Tim 2:1-8; 4:4-5
Vatit nenemien tei te uvei ak de 1 Timoti 4:12
Onamaen moletin xil ti linanem male ni xouk vengan xa obe horam maxoe tei tang. !E‑e! Uhe vat tei na ngan xil xa laneket ixo sexien hos xil ak: ixo sepinien nam, kakaoen nam, eheien nam e mosav xil, e ixo neketen nam mun. E holesok xil vus xa di opol ni, meulien nam imese tevi.
?Naha iaxa di e uvei ak?
1. Pispisien xil xa momal tengan rihusili. (1:1-20)
2. Pispisien xil usil polien te sias. (2:1–3:16)
3. Pispisien usil sexien na vat xil te sias. (4:1–6:21)
1
Sepkilaen na Pol usil uvei ak
1 Inou Pol iaxa nadis uvei ak. Nabe eloheoh tei xa di napol e his Iesu Kristo. Hi, xa di miteh meulien e xir, e Iesu Kristo, xa neketen nar di en, xalu iaxa luling nou e polien ak. ✡Kol 1:27
2 Bos makoe minuk Timoti. Ve neketen naralu, nalonge nggoni ngan xa xouk obe horamue navan xati. E nasis tengan eheien hos, esaeen e tomat na Hi Tamer e Iesu Kristo, Suv nar, iti minuk. ✡Taet 1:4
Selxatien tengan Timoti nahusil ti pispisien te luvosen
3 Timoti, ieok bei xa xouk utat e hal Efeses, nggoni ngan xa natehiteni minuk tuei melele xa natelinguk oteta en e inou natehe provins te hal Masedonia. Rut moletin xil xai di lapispisi ni hisit pispisien sav xil xa tamal ti usil suse te neketen, e ieok bei xa uhiteni mi xil tengan linapol ni ti mun namak. ✡Pol 20:1 4 Uhiteni mun mi xil tengan linapispisi mi moletin xil ti mun naxo tumulen te luvosen nae xil mu naxo vanut his avu na Siu xil xa hoxalite teni tovuol. Hisit tumulen xil ak di pol ni ngongoren xil tang, e tahusil ti pispisien xil na Hi xa rakila nggo neketen nar kestang. ✡1Tim 4:7; Taet 1:14 5 Vatit selxatien ak be tengan isak ni eheien iti e xamim xa di mistal nggo nenemien xa memese, nggo neketen xa be reitin, e nggo sexien xil xa mukila mubit momal pe met Hi. ✡Rom 13:10 6 Rut moletin namim xil latehusil hisit sexien hos xil ak tetiamu. E taxeak, xil lakavitou ni sexien xil ak e dit lapurun melengien nae xil e sepinien xil xa be neta sav tang. ✡1Tim 6:4,20; Taet 1:10 7 Xil di labiteni labit labe titsa xil te Rae na Hi. E tave ti neta xa di lamangang vehakut nggoni ngan xa lakilakil kuhi, xil latakil ti vari koute te holesok xil xa di labiteni.
8 Rakila xa rae na Hi bos mak mu xosxa ranggusil kuhi nggo sexien xa momal. ✡Rom 7:12,16 9 Rakila xa rae xil ak, Hi tenapol ni ti tengan ti vamal ni ngan xil xa langgusil sexien xil xa momal ngamu. E‑e. Hi tepol ni xil tengan vamal ni ngan xil xa sexien nae xil misa: ngan xil xa langgur xoteh rae xil e labe vatxeih xil, ngan xil xa lapol misa e latakil ti Hi, ngan xil xa latamerere ni Hi ti e meulien nae di sotin rani, ngan xil xa di labas vin mosav xil e labas vin tamexil e ninexil mun tang, 10 ngan xil xa di lapat vituei e latateli ti mu, e tiramue xil xa di lapat vituei del tiramue mun tang, ngan xil xa di lakan ni moletin xil e di lapos ni xil mei labe slev, ngan xil xa di laluvos vehakut e ngan xil xa di laluvos ni his mosav e koten, e ngan xil xa di lapol ni neta sav xil mun xa misav ni pispisien xil te reitinen na Hi. ✡1Tim 4:6; 6:3; 2Tim 4:3; Taet 1:9; 2:1 11 Pispisien xil na Hi nggusil longeongen hos xa xi misa ni minou tengan nihithiteni mi mosav xil. Longeongen hos ak bos pupu e nggo Hi xa be eilep xa be eilep pupu.
Pol memes Hi ve eheien hos nan
12 Inou nasa memesien mi Iesu Kristo, Suv nar, vengan xa xi miling nenesien nan e nou tengan nipol mini, e misa xeihen minou tengan nikila nipol itela. ✡Pol 9:15; Kal 1:15-16 13 Tetiamu, natesepin tesa teha xati, natepol ni texeih mi ngan xil xa latehusili e natehe vat xaren tei. E neta sav xa temak, Hi ien tesae li e nou vengan xa natnaneket ti mu e Iesu e natnakil ti xa di natepol tesa. ✡Pol 8:3; 9:1-2; 1Kor 15:9; Kal 1:13 14 E Iesu Kristo, Suv nar, tepisen eheien hos nan minou xa eilep pupu, e tesak ni nou nateling neketen e eheien navan teti en. 15 Nisep usil neta tei xa be reitin, ma bos tengan uhur xati: ‘Iesu Kristo temei e ut etan tengan iteh meulien e moletin tesa xil.’ E inou nasa mak mu mili mosav xil. ✡Luk 15:2; 19:10 16 Ve rin ak, Hi tehosei nou tengan ien isae e nou e nasa pangasien ti mun minou. Xi tepol ni minou tengan ngan tesav xil xa mei lineket e Iesu e lihur meulien xa misakras vavus, xil lipus kil nenemien hos nan xa teviei pupu minou. 17 !Reitin mak! !Ripet rat his Hi! !Xi kestang iaxa be Hi e be suv toto vehakut! Metexir misakras vapusi, e xi dat nggoni ngan tang, misakras vamat. !Bos mak mu xa xir rimerere ni e rimesi! !Reitin! ✡Rom 16:27
Pol misel xat Timoti tengan isoh ixeih e neketen nan
18 Timoti, natuxoli, di nasa selxatien ak minuk xa nggusil sepinien xa provet nar xil latekei mese ni usiluk tetiamu. Xosxa unem xat sepinien xil ak e uhusil xati, ma mei uhe moletin te vaeen hos tei na Hi xa ivae ixeih e rin nan. ✡1Tim 6:12; 2Tim 4:7; Siud 1:3 19 E melele xa upol ni, usoh ixeih e neketen nam e uhusil kes ni sexien xil xa okila obit momal pe met Hi. Rut moletin xil latapol ni ti sexien xil xa lakila labit momal, e di lapurun neketen nae. Xil langgoni vatihos te tuturil tei xa mikil suse xa momal e tahusili ti. E misak ni tuturil nan merir e meulien nan mikesae. 20 Moletin lu xa lupol mak, tei hisen Haemeneas, e tei mun xalu, hisen Aleksanda. Mak, ma inou nasil rat xalu ra xir tengan ha lalihur pangasien e he Temat. E suse ak, xalu lalipus kila xa lalnapispisi ti mun ni luvosen usil Hi.✡2Tim 2:17; 4:14; 1Kor 5:5