2
Pol misel xat Timoti tengan isoh ixeih e neketen nan
1 Timoti, natuxoli, usoh ixeih itel tutouen xa Iesu Kristo di misa ni mi xir. 2 Pispisien xil xa otelong nou natehiteni mi moletin xil, xouk uhuri e ha upispisi ni mi ngan xil xa nenesien nam di e xil. Mak, ma xil mun likila lipispisi ni mi mosav xil.
3 Melele xa sakpisien xil di bemei, xouk usoh ixeih ixoni moletin hos tei te vaeen na Iesu Kristo. 4 Melele xa moletin tei te vaeen di pol, xi di tamaen ni ti holesok xil te ut etan tengan valihi nenemien nan ra polien nan vengan ien bei tengan suv nan vamaal ven. 5 Xouk onggoni moletin te lohen mun. Moletin ak iloh ihusil xat rae xil te lohen. Xosxa xi nahusil xat rae xil vus ti, xi misakras vahur huite teni. 6 Xouk onggoni moletin te naho mun. Vengan moletin xa nggur vetin e naho san, momal tang tengan xi ihur anien en itiamu ni mosav xil. ✡1Kor 9:7,10 7 Bos xa unem xat vole xatel ak xa nabiteni minuk, e Hi Suv isak ni xouk ukil kuh koute te xatel.
8 Unem xat Iesu Kristo: xa temea rilomun ra maten e xa testal texo ra na suv toto Deved. Ngan ak be vatit longeongen hos xa di nabit rati. ✡1Kor 15:4,20; Rom 1:3 9 Ve longeongen hos ak, inou di nanggur longpangasien e labar xat nou ni sen e nim te xeih ak nggoni moletin tei te kanen. E sepinien na Hi, lasakras lavar xati. ✡Efes 3:1; Plp 1:12-14 10 Ve rin ak, namaen nou tengan nihur longpangasien xil ak. Vengan nakila xa melele xa nabit rat longeongen hos mi moletin xil, ngan xil xa Hi tehosei xil, likila lihur meulien hu xa mistal nggo Iesu Kristo. Mak, ma xil likila liti e minehinen te xeihen nan itela vehakut. ✡Kol 1:24 11 Usil nenemien ak, sepinien ak be reitin xa biteni bit:
Xosxa ratemat tetel Iesu Kristo,
ma rimeul itela.
12 Xosxa risoh ixeih ve hisen,
ma xir rikila rilaxat ut xil e ut etan itela.
E xosxa rihiteni rihit ratakil ti xi,
ma xi mun ihiteni ihit takil ti xir.✡Mat 10:33; Luk 12:9
13 E tave ti neta xosxa rimot e neketen nar,
e xi misakras vastokovein xir,
vengan xi misakras vapol vasav
ni sexien nan xati xa momal tevi.✡Rom 3:3-4; Nam 23:19; Taet 1:2
Moletin te polien hos na Iesu Kristo
14 Bos tengan vehakut ti upispisi mi moletin xil ni pispisien xil ak. Usel xat xil e his Hi tengan linangor ti ve koute te mavulut sepinien xil vus. Sexien ak misakras vapol ni ti neta vahos. Sexien xil ak di purun moletin xil xa di lalonge. ✡1Tim 6:4; Taet 3:9 15 Mak, ma Timoti, xouk ti usak pisi tengan upispisi ni sepinien te reitinen na Hi mi moletin xil. Mak, ma ukila usoh ixeih be met Hi ixoni moletin te polien tei xa tave unoun ti ni polien nan. ✡1Tim 4:6; Taet 2:7-8 16 E onamos ti natel ngan xil xa sepinien nae be neta sav tang e tamal ti. Vengan xa hisit sepinien xil ak di midel moletin xil labe sotin mak mu ra Hi del sexien hos xil xa ien bei xil lavusili. ✡1Tim 4:7 17 Ve naha xa di lasep usili mikapis mi moletin xil, e di purun nenemien nae. Sepinien nae nggoni menuk tei xa bo xa mistal e moletin, e ngga purun tenben xil vus. Moletin lu xa lumak lube Haemeneas e Faelitas. ✡1Tim 1:20 18 Xalu di lupispisi ni mi moletin xil lubit mea rilomunen ra maten mistal ngamu. Mak, ma xalu di lupurun neketen na moletin sav xil e di lupisen ni xa lule ras suse te reitinen. 19 E tave ti neta xa di lupol ni mak, sepinien na Hi di tamu misoh nggeih nggoni simen te nim tei xa lakili ni be tan. Vengan xa xi biteni mak bit, “Iahova mikil kuh ngenen xil.” (Nam 16:5) ✡Sion 10:14; 1Kor 8:3 E biteni mun bit, “Ngan xil xa labit lavusil Iahova listokovein sexien tesa nae xil.” (Aes 52:11)
20 Sias na Hi nggoni nim tei xa eilep xa tre xil e pelet xil holu di en. Rut tre ngan xil, lapol kuhi ni ni neta xil xa minehin, nggoni silva e gol; e rute xil mun, lapol ni ni liei e tan xa pili. Ngan xil xa bos pupu, laserevi datil polien hos tei; e ngan xil xa tavos pupu ti, dit lapol ni muis ba en. 21 Usil nenemien ak, xosxa moletin tei pol ni xi mese ra hisit sepinien tesa xil xa nasep usili, Hi ise revi ve polien hos xa tehosei ven. E vengan xa xi misa meulien nan mi Hi e misak xat kuh xi bos ve polien, Hi xa be Suv te Sias ihur xati e ipol ni polien hos xil ixo en. ✡2Tim 3:17 22 Mak, ma Timoti, bos tengan uling sexien tesa xil xa tiram maxoe sav xil di langgusili. !Io! Xouk itel ngan xil xa di mumot mi Hi del nenemien hos, bos xa muloh ve sexien xil xa Hi ien bei nggoni momalen, neketen, eheien, itel tomat. ✡1Tim 6:11 23 Uhe reling ngan xil xa di lasep talang ve holesok xil xa be neta sav tang, vengan hisit sepinien xil xa mak di pol ni ngongoren xil tang. ✡1Tim 4:7 24 E vengan xa xouk obe moletin te polien na Hi, onangor ti natel moletin sav xil. Xouk uhos mi moletin xil vus e upispisi kuhi mi xil. Bos tengan utal xat nenemien nam tengan iem nakat ti namanon. ✡1Tim 3:3; Taet 1:7 25 Ngan xil xa di laseputut ni xouk, xouk upispisi mi xil itel sexien te merouen. Xos Hi isak ni xil lihiles ra tesaen nae xil e mei likil reitinen nan. ✡1Tim 2:4 26 Mak, ma xil mei lihur nenemien xa bos e lilesae ra voh xa Temat di boxol xil ni. Temat di dal xat xil vengan ien bei tengan lapol vahusil nenemien nan.