Sepinien xa diamu te
Kolose
?Visi iaxa tetis uvei ak?
Pol, xa tehe eloheoh tei na Iesu Kristo tetis uvei ak✡Kol 1:1 e huram 60 AD (huram xil xa dutou ni poten na Iesu Kristo), melele xa tete nim te xeih e taon xa mahulong te hal Rom.✡Kol 1:24; 4:10,18; Pol 28:30-31
?Visi iaxa tevuli uvei ak tetiamu?
Pol tetis uvei ak teha mi Kristin xil xa lateti e taon te hal Kolose. Melele xa Pol di tepol e taon te hal Efeses,✡Pol 19:1-41 moletin tei mei tehur neketen, hisen Epafras. Di, xi tehur longeongen hos teha mi ngan xil te hal Kolose.✡Kol 1:7-8 Dutou ni sung, xi tehe visal Pol e nim te xeih e taon xa mahulong te hal Rom✡Kol 4:12; Flm 1:23 e tetumul usil polien nan tetel mol‑Kolose xil. Ve rin ak, Pol tetis uvei ak teha mi mol‑Kolose xil vengan xa titsa te luvosen xil latehe visal xil e di latesa pispisien mi xil xa tenave reitin ti.✡Kol 2:8 Misak ni, Pol ien tehei tengan vamal ni nenemien nae usil holesok xil ak.✡Kol 2:7
?Pol tetis uvei ak veneh?
Pol ien tehei tengan vamal ni nenemien nae usil anien eah xa bos tengan lia ni e melengien eah e wik iaxa momal tengan limot mi Hi en - Titsa te luvosen xil di latepispisi ni xa Kristin xil vus lihusil xat rae xi xa Hi tesa ni mi Siu xil tetiamu usil anien eah xa bos tengan lia ni e melengien eah e wik iaxa momal tengan limot mi Hi en.✡Kol 2:16 E Pol tehiteni mi xil xa hisit rae xil ak be neta sav tang, e imal mak mu tengan xil ti liling nenesien nae e Iesu Kristo kestang.✡Kol 2:17
Pol ien tehei tengan vamal ni nenemien nae usil sexien te vexahu - Titsa te luvosen xil di latepispisi ni xa Hi ien bei tengan Kristin xil ti lipol ni ixoni ngan xa labe Siu e lisa tiramue e horamue nae xil vus ha lihe vexahu.✡Kol 2:11 E Pol tehiteni mi xil xa Hi tapus ti vahit ngan xil xa labe vexahu lasav ni ngan xil xa latave vexahu ti.✡Kol 3:11
Pol ien tehei tengan vamal ni nenemien nae usil sexien xa di lamot mi masxaxa xil en - Titsa te luvosen xil di latepispisi ni xa momal tengan Kristin xil ti limot mi masxaxa xil.✡Kol 2:18 E Pol tehiteni mi xil xa Hi ien bei tengan xil ti limot mi Kristo kestang.✡Kol 2:19; 3:1-4
Pol ien bei tengan vamal ni nenemien nae usil Iesu Kristo - Titsa te luvosen xil di lapispisi xa Kristin xil mei lamal pe met Hi xosxa lihusil rae xil e sexien holu na Siu xil kestang, e latasepin ti vahe holu usil Iesu Kristo.✡Kol 2:18-19 E Pol pet rat his Iesu Kristo be nesao✡Kol 2:15-20 bit ngan xil xa labisti dela mei limal pe met Hi.✡Kol 1:2; 2:6,10
Pol ien tehei tengan vamal ni nenemien nae usil sexien xa likila lihur nenemien xuxus na Hi ixo en - Titsa te luvosen xil di latehiteni xa xil kestang di langgur nenemien xuxus na Hi e likila lihit lelen ni mi ngan xil kestang xa di langgusil kuh pispisien nae xil.✡Kol 2:8,18 E Pol tehiteni mi xil xa Iesu Kristo vari be nenemien xuxus na Hi.✡Kol 2:2-3
Vatit nenemien tei te uvei ak de Kolose 2:9-10
E xamim muhusil xat Kristo xa mei tehe moletin xa tenben teta, neta sav xa holesok xil xa di Hi di en. E vengan xa di mubisti del Kristo xa be vat na vat xil e eilep savsav xil vus, di misak ni xamim mei mupolu ni holesok xil te neketen.
?Naha iaxa di e uvei ak?
1. Iesu Kristo be eilep mak mu mili holesok xil vus. (1:1-23)
2. Ngan xil xa labisti del Iesu Kristo lamal pe met Hi, tave ti vengan xa di langgusil xat rae xil na Mosis. (1:24–2:23)
3. Ngan xil xa labisti del Iesu Kristo, momal xa meulien nae ipolu ni sexien te eheien, memesien, e tomat. (3:1–4:18)
1
Sepkilaen na Pol usil uvei ak
1 Inou Pol xa nabe eloheoh tei na Iesu Kristo nggusil nenemien na Hi di nadis uvei ak del Timoti xa be tua nar e neketen. ✡1Kor 1:1; Efes 1:1
2 Di nadis uvei ak bat mi xamim, moletin xil na Hi xa mudi e taon te hal Kolose. Xamim mube tuxoli e hinoxoli xil e neketen vengan xa rabisti vituei del Iesu Kristo.
Malsis tengan eheien hos e tomat na Hi Tamer iti mi xamim.
Pol memes Hi ve neketen na Kristin xil te hal Kolose
3 Melele xa xamel di masis ve xamim, vehakut di mames Hi, Tame Iesu Kristo, Suv nar. ✡Efes 1:16; 1Tes 1:2 4 Mames Hi vengan xa malong usil neketen namim e Iesu Kristo, e eheien namim e moletin xil vus na Hi. ✡Efes 1:15 5 Xamim mupol ni mak vengan xa di muling nenesien namim e Hi xa di misa xat kuh holesok hos xil ve xamim e ut nesao. E muling nenesien namim xa ngan ak be reitin e melele xa mulong sepinien te reitinen xa be longeongen hos usil Iesu Kristo. ✡1Pit 1:4; Efes 1:13 6 Melele xa longeongen hos temei rohon mi xamim e mei mukil kuh eheien hos na Hi, miso huite e meulien namim. Reitin, miso huite e xamim nggoni ngan xa di miso huite e meulien na moletin xil holu e ut etan. ✡1Tim 3:16; Rom 1:13 7 Xamim mutehur longeongen hos ak texo Epafras, moletin te polien hos na Iesu Kristo xa di pol vituei del xamem. Xi tasin polien nan ti e di pol e rin namim vehakut. ✡Kol 4:12 8 E xi mitumul mi xamel usil eheien xa Ninin Eo di misa ni mi xamim.
9 Ve rin ak, melele xa matelong usil sexien namim mei duxoh xosali ak, xamel matangel ti e sisen namel ve xamim. Di masis mi Hi tengan mukil kuh naha xa xi ien bei xamim tengan mupol ni, e mei mupolu kuhi ni metisouen e kilakilen xa nggo Ninin Eo nan. ✡Efes 1:15-17; Plp 1:9; Efes 1:9; 5:17 10 Imak, ma kakaoen namim imal ni ngan xil xa di langgusil xat Hi Suv e di misa sien mini. Reitin, Hi ihesi xi ve xamim melele xa meulien namim ti iso huite xil ihe holu e polien hos xil vus xa di mupol ni, e melele xa kilakilen namim usil xi mei ihe eilep mak mu. ✡Efes 4:1; Plp 1:27; Efes 2:10 11 Xamel di masis mi Hi tengan ipol ni neketen namim mei ixeih mak mu itel xeihen nan xil vus xa tellep pupu. Masis mini tengan isak xat xamim tengan mukila musoh ixeih e melele te xeih xil xa ti limei e ti muhisu ni xil itel sien e nenemien xa ihe teviei. ✡Efes 1:19; 3:16 12 Masis tengan isak ni xamim mukila mumes Hi Tamer xa di misak ni xamim mupin tengan muvur holesok xil xa teling xati ngamu teti xa ihe na moletin nan xil xa ladi e miehen. ✡Efes 1:18 13 Xi teteh meulien e xir ra xeihen te maluxoluken, e teling kuh xir radi e xeihen na Natneli tengan ilaxat kuh xir ixoni suv toto nar, Natneli xa eheien nan di en. ✡Luk 22:53; Efes 1:6; 2:2; 6:12; Mat 3:17 14 Nggo naha xa Iesu tepol ni, Hi tepol ni suse tengan rameluv ra xeihen te tesaen nar xil, e Hi di miketeh bos rilomun mi xir. ✡Efes 1:7
Iesu Kristo be eilep mak mu mili holesok xil vus
15 Moletin xil lasakras lapus Hi. ✡2Kor 4:4; Hib 1:3; Sion 1:18; 1Tim 6:16
E melele xa lapus Iesu Kristo, di lapus Hi vari.
Iesu teta tetiamu ni holesok xil vus xa ladi,
e nggoni muimol tei, xi be eilep mak mu mili holesok xil vus.
16 Vengan xa, nggo xi,
Hi tepeas ni holesok xil vus te ut nesao e te ut etan,
ngan xa rakila rapusi e ngan xil mun xa rasakras rapusi.✡Sion 1:3,10
Texo Natneli,
Hi tepol ni suv toto xil e kavmen xil,
tetel masxaxa xil e ninin tesa xil mun xa di langgur xeihen.
Reitin, Hi tepeas ni holesok xil vus texo Natneli,
tengan ti limerere ni.
17 Iesu Kristo teta ngamu tetiamu ni holesok xil vus,
e di misak ni holesok xil vus di langgusil xat naha xa Hi teling xati. ✡Sion 1:1; 8:58
18 Iesu iaxa be vat te Sias e vatit meulien teni,
e Sias be tenben.✡Efes 1:22-23; 4:15; 5:23; Pol 4:2; 26:23; Rev 1:5
Xi be muimol na Hi e rin xa tesak ni temea rilomun ra maten tetiamu ni moletin sav xil.
Misak ni, xi mei diamu mak mu mili holesok sav xil.
19 Nggo Kristo, xir di rapus kuh Hi,
vengan xa Hi vari besi xi tengan vate e Natneli. ✡Sion 1:16; Efes 1:23; Kol 2:9
20 Nggo xi, Hi miserev rin te holesok xil vus xa tepeas ni del xi mun;
ngan xil xa ladi e ut etan e ut nesao mun.
Reitin, nggo maten na Natneli e eivave,
Hi misak ni holesok xil xa xi tepeas ni mei ladi e tomat dela. ✡Efes 1:7; 2:16; 1Sion 2:2; Rom 5:1; Efes 2:13; 1:10
21 Tetiamu, xamim muteti sotin ra Hi e mutehe elu tetela, vengan xa holesok xil xa mutepol ni e mutenemi latesa tang. ✡Rom 5:10; Efes 2:12; 4:18 22 E xosali, Iesu Kristo miserev rin namim e melele xa temaen tenben teha temat ve xamim. E ve rin ak, xamim mukila ha musoh pe met Hi ixoni moletin eo nan xil xa mumese tevi, e neta tovuol mun xa iha xat rin namim. ✡Efes 2:14,16; 5:27 23 Ngan ak be reitin xosxa xamim mutit ni ngan xa ti musoh ixeih e neketen namim e munaviles ti rani. Munastokovein neketen namim ti e Iesu Kristo xa mutehuri melele xa mutelong longeongen hos usili. Hisit longeongen hos ak, di labithiteni mi moletin xil vus te ut etan, e inou, Pol, mei nabe moletin te polien tei teni. ✡Hib 3:14; Efes 3:17; Mak 16:15; 1Tim 3:16
Pol misepin usil polien nan nggoni moletin te polien tei te Sias
24 Xosali, nabesi nou xa nakila namur longpangasien xa xiak tengan vatutou ni rin namim. Vengan xa, del tenbeok, di nanggur sen longpangasien xil xa Kristo teling xati ngamu tengan namuri vatutou ni Sias nan, Sias xa be tenben. ✡Efes 3:13 25 Hi vari iaxa teling inou nabe moletin te polien tei te Sias. E xi tesa polien ak minou tengan ha nihit kil vuol ni sepinien nan iha mi xamim xa mutave Siu ti. ✡Efes 3:2,7-8 26 E tetiamu duxoh xosali, koute te sepinien ak texus ra moletin xil. E xosali, Hi di misak ni moletin nan xil mei lakila. ✡Rom 16:25-26; Efes 3:3,5,9-10 27 Reitin, Hi tehosei xil tengan likil lingxatien xuxus nan ak, xa Kristo di meul e tinemim xa mutave Siu ti. E ve rin ak, xamim mun mukila muling nenesien namim en, tengan mumos e ngan xil xa liti e hosien nan e ut nesao. ✡Rom 16:25; Efes 3:9; 1:18; 1Tim 1:1 28 Misak ni, xamel ba di mabithiten Iesu Kristo mi moletin xil vus. Del metisouen e kilakilen, di masel xat moletin xil e di mapispisi kuhi mi xil usili. Di mapol ni mak tengan makila maleh viton moletin xil vus mei lavisti vatel Kristo tengan ha lisoh pe met Hi ixoni moletin xil xa neketen nae matu ngamu. ✡Efes 4:13 29 E ve rin ak vari, di napol nggeih del xeihen xa eilep xa Iesu Kristo di misa ni minou e di pol dela e meulien navan mun.✡Efes 3:7,20; Plp 4:13
✡^ Kol 1:24; 4:10,18; Pol 28:30-31
✡1:9: Efes 1:15-17; Plp 1:9; Efes 1:9; 5:17
✡1:10: Efes 4:1; Plp 1:27; Efes 2:10
✡1:13: Luk 22:53; Efes 1:6; 2:2; 6:12; Mat 3:17
✡1:15: 2Kor 4:4; Hib 1:3; Sion 1:18; 1Tim 6:16
✡1:18: Efes 1:22-23; 4:15; 5:23; Pol 4:2; 26:23; Rev 1:5
✡1:19: Sion 1:16; Efes 1:23; Kol 2:9
✡1:20: Efes 1:7; 2:16; 1Sion 2:2; Rom 5:1; Efes 2:13; 1:10
✡1:21: Rom 5:10; Efes 2:12; 4:18
✡1:23: Hib 3:14; Efes 3:17; Mak 16:15; 1Tim 3:16
✡1:26: Rom 16:25-26; Efes 3:3,5,9-10
✡1:27: Rom 16:25; Efes 3:9; 1:18; 1Tim 1:1