Sepinien xa diamu te
Revelesen
?Visi iaxa tetis uvei ak?
Moletin xa tetis uvei ak, hisen tehe Sion✡Rev 1:1,4,9; 22:8 xa tehe eloheoh tei na Iesu Kristo. Xi tehe Sion Sepeti xa tetis “Longeongen hos usil Iesu Kristo xa Sion tetisi,” tetel 1, 2, e 3 Sion mun. E melele nen ak, sangas ni huram 95 AD (huram xil xa tetutou ni poten na Iesu), kavmen te hal Rom teling Sion tete aelan tei xa hokorong xa latekesi ni Patmos. E latehiteni mini xa lihas vini xosxa isak pisi tengan ilesae reling aelan ak.
?Visi iaxa tevuli uvei ak tetiamu?
Sion tetis uvei ak teha mi Kristin xil te sias lu e he sav (7) xa mahulong te provins te hal Esia (xa lakesi ni Turkey xosali), e teha mi Kristin sav xil mun te rute xil vus. Texoni Sion, Kristin xil di latehisu ni melele te xeih xil e rute xil vus xa suv toto tol (3) te hal Rom di lattelaxati: Nero (54-68 AD), Vespasian (69-79 AD), e Domisian (81-96 AD). Misak ni, Iesu tesa metuveen xil mi Sion tengan vahit mesen ni mi Kristin xil xa melele te xeih savsav xil ti imei, tengan vapet rat nenemien nae xa Iesu Kristo ileli Temat e holesok xil xa misa te ut etan, ma ti lisoh ixeih e vaeen te neketen xa lateti en.
?Sion tetis uvei ak veneh?
Iesu Kristo tesemae ni Sion tengan vatis uvei ak ha vatutou ni neketen na moletin nan xil - Iesu Kristo testal mi Sion texo metuveen xil e tesemae ni tengan vatis xat holesok xil xa tehit lelen ni mini tengan, ti, isa ni iha mi Kristin xil tengan likila.✡Rev 1:11,19; 22:6
Sion ien tehei tengan vasel xat Kristin xil te tan xa mahulong te hal Esia xa neketen nae itin tang ita e namerir ti - Vengan huram holu mei tetavi, Kristin xil holu neketen nae temerir.✡Rev 2:4,14,20; 3:2,15 Tesak ni, Sion tetis selxatien xil ak teha mi sias xil kekes xa lateti e tan xa mahulong te hal Esia tengan neketen nae itin tang ita.✡Rev 2:1–3:22
Sion ien tehei tengan Kristin xil lakil kuhi xa Hi be eilep mak mu mili holesok xil - Kristin xil holu di latelong pangas xil ve melele te xeih xil xa di latehisu ni texo he kavmen, texo he moletin sav xil, e texo Siu e rut Kristin xil mun.✡Rev 2:7,9-10,13,19,26; 3:5,21 Tesak ni, Sion tehit lelen ni xa holesok xil vus xa di testal mi xil di tehusil xat naha xa Hi teling xati tetiamu ni melele xa tepeas ni ut etan tengan mei istal.✡Rev 1:8,17; 4:1–22:21
Sion ien tehei tengan Kristin xil likil kuhi xa Iesu imei rilomun e ihas tan ni Temat e holesok xil vus xa lasa - Kristin xil holu di latepusi texoni ngan xa di latetatil mei rilomunen na Iesu huram xil holu ngamu e Kristin xil holu tetel eloheoh xil mun latelel ngamu ve neketen nae.✡Rev 1:9 E Sion tepet rat nenemien nae tehit Iesu imei rilomun reitin e ihas tan ni Temat e holesok xil vus xa lasa, e iling pilei holesok xil vus mei ihos.✡Rev 1:10-20; 19:11-21
Sion ien tehei tengan vasel xat Kristin xil xa lisoh ixeih e neketen nae tengan linave unoun ti e melele xa Iesu imei rilomun en - Rut Kristin xil latepusi xa holesok xil xa di latehisu ni texeih tova tang.✡Rev 6:9-11 Tesak ni, Sion tesel xat xil tengan tit lisoh ixeih vehakut e neketen nae e linamaen nenesien nae ti e Hi namot.✡Rev 2:7,11,17,26; 3:5,12,21; 7:14; 12:11; 15:2 Xi tesel xat xil tengan linapol ni ti neta xil xa nasak ni xil linahe unoun ven e melele xa Iesu imei rilomun e ilepis rin na moletin xil.✡Rev 3:18; 12:11; 16:15
Sion ien tehei tengan vapet rat nenemien na Kristin xil usil naha xa istal e melele xa Hi ipol pilei ni ut etan e tilang hat, e isak ni xalu mei lalihe neta hu - Rut Kristin xil di lanem holu usil holesok xil te ut etan. Ma Sion tesel xat xil tengan nenemien nae iti e Hi kestang e melele xa ipol pilei ni ut etan itel tilang hat mei lalihe neta hu.✡Rev 21:1–22:5
Nenemien tei xa eilep te uvei ak de Revelesen 1:10-11, 19
E Sande xa be melengien eo na Suv Iesu, Ninin na Hi mei mise xat nou e nalong rae tei nggo petouk xa misel nggeih nggoni amaru tei. Xi biteni minou bit, “Utis rat naha xa ti upusi ihe vanuvei tei, e usa ni iha mi sias xil xa labe lu e he sav (7) te taon xil ak: Efeses, Samerna, Pegamam, Taeatira, Sadis, Piladelvia, e Laodisia …
“Utis xat naha xa otepusi ngamu, naha xa di mistal taxeak, itel naha xa istal e melengien xil xa ti imei itutou.”
?Naha iaxa di e sepinien ak?
1. “Naha xa otepusi ngamu …” - Tetep iaxa Iesu Kristo tesepin mi Sion texo metuveen tei. (1:1-20)
2. “… naha xa di mistal taxeak …” - Selxatien xil teha mi sias lu e he sav (7) xa lateti e tan xa mahulong te hal Esia. (2:1–3:22)
3. “… naha xa istal e melengien xil xa ti imei itutou.”
a. Holesok xil te ut etan lames Hi. (4:1-11)
b. Iesu pisen ni xa xi nggoni sulut sipsip te sanien eo xa pipin tengan vavuli sepinien xa Hi di bit lelen ni. (5:1-14)
c. Iesu bul papas siil be tei e he sav (6) xa misak ni longpangasien xil lastal lapangei moletin xil te ut etan. (6:1–7:17)
d. Vatixar lu e he sav (7) na masxaxa xil labui amaru nae xa misak ni longpangasien xil lastal lapangei moletin xil te ut etan. (8:1–16:21)
e. Hi misa pangasien mi ngan xil te hal Babilon. (17:1–19:5)
f. Iesu bemei rilomun tengan vahas tan ni Temat e holesok xil vus xa di langgusili. (19:6-21)
g. Iesu del ngan xil xa langgusili lalaxat ut etan duxoh huram taosen tei. (20:1-6)
h. Hi miso Temat be Von Upang. (20:7-10)
i. Hi dotan e von koten nan e milepis rin na moletin xil vus. (20:11-15)
j. Hi misak ni ut etan e tilang hat mei lube neta hu. (21:1–22:5)
4. Sepinien kor. (22:6-21)
1
Sepkilaen na Sion usil uvei ak
1 Ngan ak be naha xa Hi tesa ni mi Iesu Kristo tengan ipisen ni mi eloheoh nan xil usil naha xa mei istal nave nousav ti. E Iesu Kristo tesil masxaxa nan temei minou, eloheoh nan tei, tengan vahit mesen sepinien ak minou. Hisok Sion. ✡Dan 2:28,29,45; Rev 1:19; 22:6 2 E holesok xil ngasen xa natepusi e nateteong ni usil naha xa Hi tehit kila, xa Iesu tehit mesen ni minou be reitin. Ngan ak vari iaxa di nadis usili xiak. ✡Rev 1:9; 6:9 3 E tuxolxatien na Hi iti mi moletin xa ti ivuli uvei ak, e tuxolxatien iti mi ngan xil mun xa lalong kil sepinien te kilakilen ak e lalong xat naha xa di en. Vengan xa melele tengan holesok xil ak mei istal ihe reitin di bemei sangas. ✡Rev 22:7; 22:10
Selxatien xil xa ba mi sias lu e he sav (7) xa ladi e tan xa mahulong te hal Esia
4 Inou, Sion di nadis sepinien ak bat mi xamim, sias xil xa mube lu e he sav (7) xa mudi e tan xa mahulong te hal Esia.*Xosali lakes rute ak ni Turkey. ✡Eks 3:14; Rev 1:8; 4:8; 11:17; 16:5; Aes 41:4; Rev 3:1; 4:5; 5:6
Hi xa da taxeak, teta tetiamu, e ita tang e melengien xil xa ti imei. E nasis mini tengan eheien hos e tomat nan iti mi xamim. E di misa xalu mi xir nggo Ninin lu e he sav (7) nan xa langgoni laet lu e he sav (7) xa ladi pe meten xa di dotan de von xeihen nan. 5 Eheien hos e tomat ak lunggo Iesu Kristo mun xa rakila raling nenesien nar en. Xi bit kil reitinen usil naha xa Hi tepisen ni mini. Xi be muimol na ngan xil xa ti limea rilomun ra maten e be vat na suv xil vus te ut etan. ✡Rev 3:14; 19:11; Sam 89:27; Kol 1:18; Sam 89:27; Rev 19:16; Sam 130:8; Aes 40:2
Iesu ien bei xir, e ren xa mileh e maten nan misak ni xir rameluv ra pangasien te tesaen nar xil. 6 Xi pol ni xir mei rabe vanut moletin tei xa Hi be suv toto te meulien nar. Reitin, xi pol ni xir mei rabe vanut pris xil xa di rapol mi Hi Tamen. Ve rin ak, di rabithiteni xa Iesu Kristo be eilep pupu e xeihen te lelaxatien nan iti vehakut xa vehakut tang. Reitin. ✡Eks 19:6; Aes 61:6; 1Pit 2:5,9; Rev 5:10; 20:6
7 !Muteong kuhi! Xi imei istal ixo momah xil e moletin xil vus lipusi. Reitin, ngan xil mun xa latesal vini tetiamu ti lipusi. Isak ni moletin xil te ut xil vus te ut etan limeun itel ulikanen. Reitin, xi imei istal imak vari. ✡Dan 7:13; Mat 24:30; Mak 13:26; Luk 21:27; 1Tes 4:17; Sak 12:10; Sion 19:34,37; Sak 12:10,12,14; Mat 24:30
8 Hi Suv te xeihen xa da taxeak, teta tetiamu, e ita e melengien xil xa ti imei, xi di biteni bit, “E holesok xil vus xa di, inou nateta ngamu tetiamu ni xil, e nita mun itutou ni xil.” ✡Rev 21:6; 22:13; Eks 3:14; Rev 1:4; 4:8; 11:17; 16:5,7,14; Aes 41:4; Amos 3:13; 4:13; Rev 15:3; 19:6,15; 21:22
Iesu Kristo bemei visal Sion e pisen holesok xil holu mini
9 Inou nabe Sion, tua namim ve nenesien nar e Iesu Kristo tei takes. Nggoni xamim, inou mun di nanggur longpangasien te sakpurunien xil del nenemien xa teviei e melele xa di nadatil melengien xa lelaxatien na Hi mei istal en. Lateso nou nabe nim te xeih e tutut aelan te hal Patmos vengan xa di nabithiten naha xa Hi di pisen ni minou e reitinen usil Iesu Kristo mi moletin xil. 10 E Sande xa be melengien eo na Suv Iesu, Ninin na Hi mei mise xat nou e nalong rae tei nggo petouk xa misel nggeih nggoni amaru tei. 11 Xi biteni minou bit, “Utis rat naha xa ti upusi ihe vanuvei tei, e usa ni iha mi sias xil xa labe lu e he sav (7) te taon xil ak: Efeses, Samerna, Pegamam, Taeatira, Sadis, Piladelvia, e Laodisia.”
12 Melele xa nabiles tengan napus ti visi iaxa di misepin minou, napus laet lu e he sav (7) xa lasomal ladi e lapol ni pos nen ni gol. 13 E hilaep te xil, napus ngan xa nggoni Nat Moletin xa tenben nggoni moletin tei xa nggo ut nesao.†Nat Moletin be ngan xa Dan 7:13 del Dan 10:5 di misepin usili xa imei e isak ni lelaxatien na Hi mei istal. Xi mising nggoni suv toto tei ni eising xa teviei xa ba duxoh len etan. E lasoxolen kaliko tei xa kala nen nggoni gol da xol valhasen. ✡Dan 7:13; 10:5; Esek 9:2,11 14 Hilin mieh xa mieh e meten minehin pupu nggoni upang. ✡Dan 10:6; Rev 2:18; 19:12; Dut 7:9 15 Kaelen minehin nggoni oei te venu‡Sepinien xati teni bit, “bihili nggoni aean brons xa latelingi e upang.” e raen mirum nggeih nggoni melele xa tahe xa mahulong mei mavul xat vatihat xil. ✡Esek 1:24; 43:2; Rev 14:2; 19:6 16 E hen matu, xi nggur xat hitu lu e he sav (7), e tiei tei xa mikan e rin xalu vus mistal nggo vulongen. E valnaon minehin nggoni eai xa di minggan e piniae. ✡Rev 1:20; 2:1; Aes 49:2; Rev 2:12,16; 19:15
17 Melele xa napusi, namot nabe tan visal len e nasakras napol ni ti neta nggoni ngan xa namat. Di, xi miling hen matu e nou e biteni bit, “!Ulum nakan ti! Inou nateta tetiamu ni holesok xil vus xa ladi, e inou nihe hoxalite teni mun. ✡Aes 44:6; 48:12; Rev 2:8; 22:13 18 Inou nabe ngan xa nameul. Tave ti neta xa natemat, taxeak opusi xa di nameul tang nada, e nitat imak vehakut xa vehakut tang. De heok, naleh xat ki xil te maten e Hedis, rute xa nini moletin xil xa lalel laba ladi en.§King xil ak be vole tei xa bit Iesu nggur xeihen tengan vasak ni moletin xil lakila lameluv ra xeihen te maten, e Hedis be von maten. 19 Utis xat naha xa otepusi ngamu, naha xa di mistal taxeak, itel naha xa istal e melengien xil xa ti imei itutou. ✡Aes 48:6; Dan 2:28,29,45; Rev 1:1; 22:6 20 Koute te nenemien xuxus usil hitu lu e he sav (7) xa di opusi ladi e heok matu be vole usil sias lu e he sav (7) te hal Esia. E laet lu e he sav (7) xil ak xa labe gol, xil labe vole usil masxaxa lu e he sav (7) xa di laketeh xol sias xil ak.”✡Rev 1:16; 2:1; 3:1
✡^ Rev 1:1,4,9; 22:8
✡^ Rev 1:11,19; 22:6
✡^ Rev 2:7,9-10,13,19,26; 3:5,21
✡^ Rev 1:8,17; 4:1–22:21
✡^ Rev 2:7,11,17,26; 3:5,12,21; 7:14; 12:11; 15:2
✡1:1: Dan 2:28,29,45; Rev 1:19; 22:6
*1:4: Xosali lakes rute ak ni Turkey.
✡1:4: Eks 3:14; Rev 1:8; 4:8; 11:17; 16:5; Aes 41:4; Rev 3:1; 4:5; 5:6
✡1:5: Rev 3:14; 19:11; Sam 89:27; Kol 1:18; Sam 89:27; Rev 19:16; Sam 130:8; Aes 40:2
✡1:6: Eks 19:6; Aes 61:6; 1Pit 2:5,9; Rev 5:10; 20:6
✡1:7: Dan 7:13; Mat 24:30; Mak 13:26; Luk 21:27; 1Tes 4:17; Sak 12:10; Sion 19:34,37; Sak 12:10,12,14; Mat 24:30
✡1:8: Rev 21:6; 22:13; Eks 3:14; Rev 1:4; 4:8; 11:17; 16:5,7,14; Aes 41:4; Amos 3:13; 4:13; Rev 15:3; 19:6,15; 21:22
†1:13: Nat Moletin be ngan xa Dan 7:13 del Dan 10:5 di misepin usili xa imei e isak ni lelaxatien na Hi mei istal.
✡1:13: Dan 7:13; 10:5; Esek 9:2,11
✡1:14: Dan 10:6; Rev 2:18; 19:12; Dut 7:9
‡1:15: Sepinien xati teni bit, “bihili nggoni aean brons xa latelingi e upang.”
✡1:15: Esek 1:24; 43:2; Rev 14:2; 19:6
✡1:16: Rev 1:20; 2:1; Aes 49:2; Rev 2:12,16; 19:15
✡1:17: Aes 44:6; 48:12; Rev 2:8; 22:13
§1:18: King xil ak be vole tei xa bit Iesu nggur xeihen tengan vasak ni moletin xil lakila lameluv ra xeihen te maten, e Hedis be von maten.
✡1:19: Aes 48:6; Dan 2:28,29,45; Rev 1:1; 22:6