Sepinien xa diamu te
1 Sion
?Visi iaxa tetis uvei ak?
Sion Sepeti iaxa tetis uvei ak, ngan xa tehe tei e eloheoh xatel xa Iesu tekes rohon ni xatel. Nggoni tuneli xalu, Temis xal Pita, Sion teso net tetiamu tengan vasar meseo xil.✡Mak 4:21 Sion temeul tehe nousav teli eloheoh sav xil. E melele xa Pol e Pita e holu e eloheoh sav xil latemat ngamu, Sion teha tesao ni sias xil xa lateti e rute xil vus tekapis e tan xa mahulong te hal Esia (tan xa lakesi ni Turkey xosali). Teha tepus xil e huram tei xa sangas ni huram 85 mu 90 AD (huram xil tetutou ni poten na Iesu). Di, xi tetis ‘Longeongen hos xa Sion tetisi.’ E tetutou sung, xi tetis uvei ak. Di, sangas ni hoxalite te meulien nan, tetis sepinien xil te ‘Revelesen’ mun.
?Visi iaxa tevuli uvei ak tetiamu?
Sion tetis uvei ak teha mi Kristin xil xa lateti e rute xil vus, e tetisi mi xil texoni ngan xa latehe horamue nan xil.✡1Sion 2:1,12,28 Uvei ak teha tekapis e sias xil vus. Titsa te luvosen xil holu latekapis e latepispisi mi Kristin xil ni holesok xil holu xa tenave reitin ti. Misak ni, Sion tetis uvei ak tengan vatutou ni nenemien na Kristin xil tengan ti lihusil kes ni naha xa lakila labit nggusil reitinen na Hi.
?Sion tetis uvei ak veneh?
Sion tehit kila xa Iesu temei texoni moletin e temat reitin e eivave - Sion ien tehei tengan Kristin xil likila xa Iesu be Hi xa be ‘Vatit Sepinien te Meulien’✡1Sion 1:1 xa temei e ut etan reitin.✡1Sion 1:2-3 Sion tehiteni temak vengan xa titsa te luvosen xil latehiteni mi moletin xil xa Iesu tehe moletin te ut etan tang xa Ninin na Hi mei tese xati tang e melele taxa latebaptaes ni. Ma di, Ninin Eo testokovein ni e melele xa tete eivave.✡1Sion 4:2-3; 5:6-10
Sion tehit kila xa Hi ien bei tengan sexien na moletin nan xil imese tevi - Titsa te luvosen xil latehiteni xa tenbe moletin e nini moletin lutasil ra xalu. E nenemien nae latehiteni latehit moletin tei mikila vapol ni holesok xil vus xa xi ien bei tengan vapol ni vaxo tenben, e tesaen teni misakras vapangei ninin mu vapol ni mei namese ti. E Sion tehit kila xa ngan xil xa labe moletin xil na Hi reitin di langgusil xat rae nan xil.✡1Sion 2:3-6; 3:1-10
Sion tehit kila xa Kristin xil di lapisen eheien mi tua nae xil te neketen - Vengan xa titsa te luvosen xil di latesak ni Kristin xil di latengor mi xil mun tang, Sion tesel xat xil tengan lipisen eheien mi Kristin sav xil.✡1Sion 2:7-11; 3:11-24
Sion tehit kila xa Iesu Kristo kestang iaxa be suse xa moletin xil lakila lavur meulien sal vaxo en - Titsa te luvosen xil latehiteni xa metisouen xa xil kestang langguri mikila vateh meulien na moletin xil.✡1Sion 1:8-10 E Sion tehit kila xa be ngan xil kestang xa labisti del Iesu Kristo xa be Nat Hi iaxa di langgur meulien sal.✡1Sion 3:1-3
Nenemien tei xa eilep te uvei ak de 1 Sion 5:13
Di nadis bat mi xamim xa muke reitin e Nat Hi tengan mukila xa di munggur meulien sal ngamu.
?Naha iaxa di e uvei ak?
1. Hi be miehen e ien bei tengan sexien na moletin nan xil ipisen ni xa labe te miehen. (1:1–2:29)
2. Hi momal tevi e ien bei tengan sexien na moletin nan xil ipisen ni xa lamal tevi. (3:1-10)
3. Hi be vatit eheien e ien bei tengan moletin nan xil lipisen sexien te eheien mi mosav xil. (3:10–4:21)
4. Hi be vatit meulien e di miteh meulien e ngan xil vus xa di laling neketen nae e Natneli xa be Iesu Kristo. (5:1-21)
1
Sepkilaen usil xi xa be Vatit Sepinien te Meulien
1 Inou, Sion, nadis uvei ak bat mi xamim usil xi xa be ‘Vatit Sepinien te Meulien,’ ngan xa teta tetiamu ni holesok xil vus. Xi temei tehe moletin xa xamem matepusi. Reitin, tehe xi vari xa mateteong ni texo vurangemem, matepusi ni metemem, e matetuxoli ni hemem. ✡Sion 1:1,2; 1Sion 2:13,14; Sion 1:1,4,14 2 Tetiamu, Vatit Sepinien te Meulien ak temeul vehakut e tete visal Hi Tata. E tetutou ni, xi mei testal mi xamem. Xi vari iaxa xamem matepusi, ma taxeak di mabithiteni mi xamim. ✡Sion 1:14 3 Naha xa matepusi e mateteong ni, di mabit mesen ni mi xamim tengan mukila muhisti itel xamem xa di mabisti del Hi Tata e Natneli xa be Iesu Kristo. 4 E melele xa muke reitin e naha xa di madis usili, xir vus rimaal pupu. ✡Sion 15:11; 16:24
Riti e miehen vengan xa Hi be miehen
5 Sepinien xa mateteong ni texo Nat Hi, xamem di mabithiteni mun mi xamim. E xi tehiteni mi xir xa Hi memese tevi, tesaen tovuol en. Xi nggoni miehen xa maluxoluken tovuol en. ✡1Tim 6:16; Tem 1:17 6 Xosxa rabiteni rabit rabisti dela e radi tamu e maluxoluken te tesaen, ma di raluvos e sepinien nar e kakaoen te meulien nar tahusil reitinen ti. ✡1Sion 2:4; Sion 3:21 7 E xosxa di rakakao e miehen nggoni ngan xa Hi de miehen, e sexien nar memese tevi, ma xir, Kristin xil, rikila rihisti itel xir mun tang. E melele xa di rakakao e miehen, re Iesu, Nat Hi, di mikas moten xir ra tesaen xil vus tengan mei ramese tevi.
8 E xosxa di rabiteni rabit tesaen nar tovuol, ma dit raluvos xir mun tang e reitinen tovuol e xir. 9 E xosxa di rabit rat tesaen nar xil mi Hi, xi xa, vehakut, di pol sen holesok xil xa biteni e di pol ni holesok xil xa momal, xi naketeh ti mun nasa mi xir ve tesaen nar xil e ikas moten xir rimese ra sexien nar xil xa tamal ti. 10 Hi tehit lelen ni xa xir vus rapol ni tesaen. E xosxa rabiteni rabit ratapol ni ti tesaen, ma di rabiteni xa Hi di miluvos. E xosxa imak, ma sepinien nan tovuol e xir.