15
Ladel Iesu ba misoh pe met suv Paelet tengan imaen ni ha imat
Mat 27:1-2,11-26; Luk 23:1-25; Sion 18:28-40
1 E makoe roroh, vat xil na pris xil latemanon lamei vituei del elda xil na Siu xil, titsa xil te rae na Mosis, e ngan xil vus xa ladi e kaonsel na Siu xil. Lasep usil rin na Iesu e lamei e nenemien tei takes tengan ha imat. Ma, labar xati e ladela be visal Paelet xa be vat te kavmen te rute ak tengan lasa rati vaha mini.*Ngan ak misak ni naha xa Aes 53:8 tehiteni mei mistal be reitin. ✡Luk 22:66; Mat 16:21; 27:41; Mak 8:31; 11:27; 14:43,53; Luk 9:22; 20:1
2 Melele xa suv Paelet pusi, misisi bit, “?Midep? ?Be reitin xa xouk obe suv toto na Siu xil?”
Iesu bit rilomun ni mini bit, “Nggoni ngan taxa xouk di obiteni.”
3 Di, vat xil na pris xil lamei e labit rat holesok holu xa misa xa labit Iesu di tepol ni. 4 Ma Paelet misis Iesu bit, “?Otalong ti sepinien xil xa di labiteni ba xatuk xiak? ?Sepinien nam tovuol tengan ovit rilomun ni mi xil?”✡Aes 53:7; Mak 14:60-61; Luk 23:9 5 E Iesu dat votei tang.†Ngan ak misak ni naha xa Aes 53:7 tehiteni mei mistal be reitin. Melele xa Paelet pus sexien nan, mesep pupu ven.
6 Be sexien matu tei na suv Paelet xa, e melengien xati te Anien te Tavien, xi di maen moletin tei xa moletin xil labosei tengan ha ven imase ra nim te xeih. 7 E melele nen ak, vatxeih tei de nim te xeih del vat vaeen sav xil, hisen Barabas. Xil latehas vin moletin tei e melele xa latevae tetel kavmen te hal Rom. 8 Ma melele xa Paelet pusi xa vanut moletin xil ak di lamei visali tengan lasisi vamaen moletin tova ha ven vamase vahusil sexien matu nan, 9 misis xil bit, “?Midep, iemim bei tengan nimaen suv toto na Siu xil ha ven imase?” 10 Paelet misis xil mak vengan xa pus kila xa vat xil na pris xil di lasa rat Iesu mini vengan xa di lanem misa ni tang.
11 E vat xil na pris xil lasi petine vanut moletin xil ak tengan lisis Paelet imaen Barabas ha ven imase, e nave Iesu ti.✡Pol 3:14
12 Ma, Paelet misis xil vatei mun bit, “?Xosxa imaxai, ma nipol ni naha mi Iesu xa xamim mukesi ni suv toto na Siu xil?”✡Pol 3:13; 13:28
13 E lakei be nesao labit, “!Ti xati e eivave!”
14 Paelet misis xil bit, “?Veneh? ?Xi pol ni naha xa misa?”
E lakei nggeih pilei sung labit, “!Ti xati e eivave!”
15 Paelet ien bei tengan vasak ni nenemien na vanut moletin xil ak vahe tan, ma nggusil eheien nae, xi maen Barabas ba ven mase. E mi Iesu, xi misemae ni tengan moletin te vaeen nan xil ha limeas pangasi ni ao te xeih xa sanute xil di en, ti, litela iha tengan liti xati e eivave tei.
Moletin te vaeen xil lapol pepamen ni Iesu
Mat 27:27-31; Sion 19:2-3
16 Melele xa lameas pangas Iesu bus, moletin te vaeen xil ladela labe vangit vioh te nim xa eilep ma Paelet xa be vat te kavmen te rute ak. Di, lakes viton moletin te vaeen sav xil vus xa ladi en‡Vanut moletin te vaeen xil ak sangas latehe handred tei e he sav (600). tengan lamei vituei. 17 Xil lasing xol Iesu ni kaliko tei xa pili nggoni ngan na suv toto xil. Di, langgil xat vatluvoluv tei ni ao tei xa sanute xil tepiei di en, e lasili xol vatin.✡Luk 23:11 18 Di, lapol pepamen ni nggoni ngan xa xi be suv toto tei e labiteni mini labit, “!O suv toto na Siu xil, xamem di mamerere ni xouk!” 19 Di, labasi ni liei tei di vatin e lakusah ba xati. Di, latingeiril pepamen pe meten nggoni ngan xa di lasa merereen nae mini.
20 Melele xa lapol pepamen ni bus, langgur rat kaliko te pili ak be relingi, e lasing xole ni eising nan mun. Di, ladela ba tengan ha liti xati e eivave tei.
Ladi xat Iesu e eivave tei
Mat 27:32-44; Luk 23:26-43; Sion 19:17-27
21 Melele xa moletin te vaeen xil di ladel Iesu laba, xil labisu ni moletin tei e suse xa nggo rute sav e di bemei be Serusalem, hisen Saemon te hal Saerin, tame Aleksanda xal Rufas. Ma moletin te vaeen xil lamei visali e langgeih xati tengan vapo eivave na Iesu. 22 Di, ladel Iesu ba labe nesao e Vathu Kolkota, xa koute teni be ‘Von Valvat Moletin.’ 23 E rute ak, lasa uaen mi Iesu xa labilesi del ut mir xil tengan vahas tan ni pangasien nan. E xi misin ni.✡Sam 69:21
24 Di, moletin te vaeen xil ak ladi xati e eivave. E melele xa murur da en, xil di laso daes tengan vapisen hisit eising eah na Iesu ihuri.§Ngan ak misak ni naha xa Sam 22:14-18 tehiteni mei mistal be reitin. ✡Sam 22:18 25 Melele xa lateti xati e eivave tehe naen klok makoe. 26 E lateling tisen tei xa bit mesen rin xa ladi xati ven bit, “Ngan ak suv toto na Siu xil.” 27 E melele nen ak, lateti xat moletin lu xa lutepol tesa luteti e eivave lu mun. Tei tete rin metu, e tei tete rin meil.✡Mat 20:21; Mak 10:37 28 *Rut vanuvei matu xil te Mak laling sepinien ak xa bit, “Ngan ak misak ni sepinien na Hi mei be reitin xa bit,‘E lasak purun ni nggoni moletin tesa xil.’ ” (Aes 53:12)
29 Melele xa Iesu di murur de eivave, moletin xil xa di lakakao langgo visali lakuvun vatixil e di langue xati labit, “Ei, xouk iaxa otehiteni otehit uhu len Nim Eo na Hi, ti, ukili ni mun e melengien tol tang.✡Sam 22:7; 109:25; Tang 2:15; Mak 14:58; Sion 2:19 30 !Bos mak mu tengan uteh meulien e xouk mun tang, e umei etan reling eivave xai!”†Ngan ak misak ni naha xa Sam 22:7-8 tehiteni mei mistal be reitin.
31 Usil sexien nen xil tak, vat xil na pris xil del titsa xil te rae na Mosis mun lasep pepamen ni Iesu mi xil mun tang labit, “!Mupus ti mu! Xi di teteh meulien e moletin sav xil, e misakras vateh meulien e xi mun tang. 32 !Xosxa be reitin xa xi be Mesaea, suv toto na mol‑Isrel xil, bos xa, taxeak tang, imei etan ra eivave ak! Xosxa xamem mupusi imak, ma muke reitin en sung.” E moletin tesa xalu xa lateti xat xalu luteti rin, xalu mun lusep pepamen ni.
Maten na Iesu
Mat 27:45-56; Luk 23:44-49; Sion 19:28-30
33 E piniae xati, maluxoluken mei da xol ut xil ngasen e dat mak duxoh haoa tol (3).✡Amos 8:9 34 E melele xa haoa xatel ak mei latavi, Iesu mikei nggeih nggo sepinien xati nan xa be Arameak bit, “!Ilae! !Ilae! ?Lama sabaktani?” (Sam 22:1) Koute te sepinien ak be, ‘!Hi navan! !Hi navan! ?Veneh ma ostokovein nou?’
35 Melele xa rut moletin xil xa lasoh ladi lalonge, xil labit, “?Mulonge? Xi di mikes provet Ilaetsa iaxai.”
36 Ma, tei e xil miloh ba, nggur neta tei xa nggoni mavulut kaliko tei, e miterir ni be uaen xa mikon.✡Sam 69:21; Mat 27:34; Mak 15:23; Luk 23:36 Di, milingi de kusut liei tei e mei misa ni be nesao tengan Iesu vavisi. Di, biteni bit, “Veter mu e ti ripus pisi. ?Ilaetsa imei etan e ihur rati tamak ra eivave?”
37 Di, Iesu mikei nggeih, milihi kor ni votiang, di, mat. 38 E melele nen tak vari, kaliko xa mettel xa lalihi dakoe xol ut eo te Nim Eo mesel be rin lu, nggo kusute nesao bemei duxoh kusute etan.✡Hib 10:19-20
39 Vat tei na moletin te vaeen xil tesoh temal ni Iesu e xi pusi midep iaxa Iesu telihi kor ni votiang nan e mat. Ma, biteni bit, “!Reitin li, ngan ak tehe Nat Hi vari tang!”
40-41 E tatit atou vutei xil mun lasoh ladi nga sotin vuteili ra eivave, e di lapus holesok xil xa di mistal. Tatit atou xil ak di latehusil Iesu e latetutou ni e Kaleli e latehusili mun melele xa Iesu tehe Serusalem. E xatel tol xa latemos e atou xil ak tehe Meri te hal Makdela; Meri, nine Sioses xal Temis; del Salome.✡Luk 8:2-3
Laling tiei na Iesu de vangihat te tehinen tei
Mat 27:57-61; Luk 23:50-56; Sion 19:38-42
42 Sangas ut ba tengan vamaluxoluk. Ma moletin xil di labue xat kuh xil vengan xa Sabat mun da bemei sangas. 43 E moletin tei be visal suv Paelet, hisen Siosep te hal Aramatea. Xi tehe vat tei na Siu xil xa di tetotan e kot na Siu xil, e Siu xil lamerere ni. E xi mun di datil melengien xa Hi imei istal ihe suv toto na moletin xil. E melele xa ba misoh pe met Paelet, ulin takan ti e misisi tengan vamaen tiei na Iesu mini.
44 Paelet mitemanin melele xa milonge xa Iesu mat ngamu. Ma mikes vat na moletin te vaeen nan xil tengan vamei. Misisi tengan vakil ti xa Iesu mat reitin mu tamat ti mu. 45 E melele xa vat ak bit mesen ni xa Iesu mat reitin, Paelet maen tiei nan mi Siosep.
46 Ma Siosep ba, minggal kaliko tei xa mieh. Di, ba po rat tiei na Iesu ra eivave. Xi pis xole ni kaliko te mieh tei. Di, poe ba, milingi de vangihat te tehinen tei xa lateseh moten rohon ni tang.‡Ngan ak misak ni naha xa Aes 53:9 tehiteni mei mistal be reitin. Di, midivin hat tei xa eilep mei dakoe xol puiteh te vangihat ak e be relingi ba.✡Pol 13:29
47 E Meri te hal Makdela del Meri, nine Sioses xal Temes, lunggusili e lupus rute xa miling tiei na Iesu da en.
*15:1: Ngan ak misak ni naha xa Aes 53:8 tehiteni mei mistal be reitin.
✡15:1: Luk 22:66; Mat 16:21; 27:41; Mak 8:31; 11:27; 14:43,53; Luk 9:22; 20:1
✡15:4: Aes 53:7; Mak 14:60-61; Luk 23:9
†15:5: Ngan ak misak ni naha xa Aes 53:7 tehiteni mei mistal be reitin.
‡15:16: Vanut moletin te vaeen xil ak sangas latehe handred tei e he sav (600).
✡15:23: Sam 69:21
§15:24: Ngan ak misak ni naha xa Sam 22:14-18 tehiteni mei mistal be reitin.
✡15:24: Sam 22:18
*15:28: Rut vanuvei matu xil te Mak laling sepinien ak xa bit, “Ngan ak misak ni sepinien na Hi mei be reitin xa bit,‘E lasak purun ni nggoni moletin tesa xil.’ ” (Aes 53:12)
✡15:29: Sam 22:7; 109:25; Tang 2:15; Mak 14:58; Sion 2:19
†15:30: Ngan ak misak ni naha xa Sam 22:7-8 tehiteni mei mistal be reitin.
✡15:33: Amos 8:9
✡15:36: Sam 69:21; Mat 27:34; Mak 15:23; Luk 23:36
‡15:46: Ngan ak misak ni naha xa Aes 53:9 tehiteni mei mistal be reitin.