18
Hi misak ni holesok xa ladi e taon te hal Babilon*Babilon be sepinien xuxus usil taon xa mahulong te hal Rom xa vatit kavmen xil ladi en. lakiri lel
1 Dutou ni ngan ak, napus masxaxa teimun xa bemei etan nggo ut nesao. Lelaxatien nan mahulong e minehinen te xeihen nan mileluv mikapis e ut xil vus te ut etan. 2 Xi mikei be nesao bit,
“!Hi misak ni taon xa eilep te hal Babilon mikiri lel!✡Aes 21:9; Ser 51:8; Rev 14:8; Aes 13:21; 34:11; Ser 50:39
!Xi mikiri lel vari!
Moletin xil teni lihe tovuol mun.
Vontoen xil teni imei ihe von xusen na temat xil e ninin tesa xil tang.
Tuman tesa xil kestang ha ti lixus en.
3 Taon xa eilep xiak bisu ni ekaten na Hi mak vengan xa sexien nan nggoni atou xa be hoeaso,
xa milihi nenemien na moletin xil te kantri xil vus tengan mei lipol isa itela.
Reitin, taon ak di ihur pangasien vengan xa pol misa del suv toto xil holu te ut etan,
e vengan xa nggal holesok holu xa eheien nan di en ra moletin te posen xil holu te ut etan, ma misak ni mani nae be holu ven.”✡Aes 23:17; Ser 51:7; Rev 14:8; 17:2
4 Di, nalong rae tesav teimun nggo ut nesao bit,
“!Moletin navan xil mumea! !Mumea rani!
!Munavituei ti natel tesaen nan xil!
!Muxuxou kuhi tengan munahur ti longpangasien natela!✡Aes 48:20; 52:11; Ser 50:8; 51:6,9,45; 2Kor 6:17
5 Vengan tesaen nan xil mitihu ba duxoh ut nesao,
e Hi minem xat sexien nan xil xa mikavui.✡Sen 18:20-21; Ser 51:9
6 Mupol ni mini ixoni ngan xa xi tepol ni mi xamim.
Musa xoles longpangasien mini ihe valu ve naha xa xi tepol ni mi xamim.
Kap te longpangasien xa xi tesa ni mi xamim tengan mumu ni,
mutah uaen te longpangasien iha en xa xeihen teni ihe valu tengan xi sung imu ni.✡Sam 137:8; Ser 50:15,29; 2Tes 1:6
7 Musa longpangasien ihe eilep mini e mupol ni ilonge isa ihe holu.
Reitin, mupol ni imak ipin ni his xa eilep xa xi tehuri e holesok xil holu te ut etan xa xi mitihu ni ve xi tasen.
Vengan xi misep koai mi xi tasen bit,
‘Inou nabe Kwin xa eilep xa lelaxatien navan mahulong.
Natave tunau tei ti e nasakras nalonge vasa.’✡Aes 47:7-9
8 Ve sepinien te koaien nan,
longpangasien xil mei ipurun ni e ihu vini e melengien tei takes: ✡Rev 17:16; Ser 50:34
xi ihisu ni mesien, tangen, e mae kekaten.
Upang mei ia len ni,
vengan xa Hi Suv xa di milepis rin nan,
xeihen nan mahulong.”
9 Suv toto xil latepol ni sexien tesa tetela e latepus hosien tetela ve holesok xil te ut etan xa tehuri. E melele xa xil lipus eas te upang xa di ngga len ni, litesi e simetexil ikiri. ✡Esek 26:16; 27:30-35 10 Xil lisoh sotin vengan xa ulixil ikan tengan linahur ti pangasien natela. Xil lihit, “!Aue li, misa xa misa pupu mi taon xa eilep te hal Babilon! Neta sav xa xeihen nan mahulong, e nggur sen longpangasien te lepisien nan e haoa tei takes.” ✡Esek 26:17; Dan 4:30
11 Moletin te posen xil holu te ut etan, xil mun litesi e simetexil ikiri, vengan moletin ti mun naxal holesok ra xil. 12 Reitin, moletin ti mun naxal neta xil xa lapol ni ni gol, silva, hat xa minehin, e valit vatiei xil te tas xa bos xa bos. ?Reitin, visi mun ixal eising hos xil xa mieh, pipili, e pepol del eising xa bos xa lakesi ni silk? Ihe tovuol. E moletin ti mun naxal neta xil xa lapol ni ni liei xil xa bos, ni luh vongoro xil, ni aean xa lakesi ni brons, e ni hat xa lakesi ni marbel. ✡Esek 27:12,13,22 13 Neta xil xa di misak ni anien von mikon bos nggoni sinamon, e vokon xil xa nggoni mir e forangkansen liti nga tang. Anien xil xa langgoni uaen, oel, pulaoa e uit, linapos ni ti mun. Moletin ti mun naxal vongoro sae xil nggoni buluk, sipsip, e hos natel kat teni. Moletin tovuol tengan vaxal rat meulien na moletin xil tengan mei vahe slev nae xil. 14 Moletin xil xa di lapos ni holesok xil lihiteni iha mini lihit, “Holesok xil xa bos xa iem bei tengan uhuri lakesae relinguk. E holesok xil xa otepolu ni tetiamu tetel holesok xil xa tesak ni xouk di otesep koai ven, xil latetasil ranuk xosali, e onakamet ti mun.”
15 Ngan xil ak langgur mani holu nggo holesok xil xa xi texale ra xil, melele xa lapus longpangasien na Babilon, lasoh ladi nga sotin vengan ulixil mikan xa linahur ti longpangasien natela. Xil lamuis e ladang labit, ✡Esek 27:36
16 “!Aue li, ngan ak misa xa misa pupu!
Tetiamu, taon xa eilep te hal Babilon tesing ni eising xil xa tehos xa tehos xa temieh, tepili e tehe pepol.
Tetiamu, xi tesoxolen gol, hat xil xa minehin, e valit vatiei xil xa tehos xa tehos.✡Esek 28:13; Rev 17:4
17 !E mapusi xa holesok nan xil vus lakesae relingi e haoa tei takes!” ✡Esek 27:27-29
Melele xa vatihos xil te tuturil, boskru xil, moletin xil xa ladi en, e moletin sav xil xa lakamet meulien nae e tas lapusi, xil lasoh ladi nga sotin. 18 Melele xa lapus eas te upang xa di ngga len taon ak, lamuis nggeih e labit, “!Aue li, taon sav tovuol mun vaxoni taon xa eilep xiak!” ✡Esek 27:32 19 Ma, xil laso vulmeas be vatixil tengan vapisen ni xa lalonge misa holu, simetexil mikiri e ladesi labit, ✡Esek 27:30-34
“!Aue li, ngan ak misa xa misa pupu!
Tetiamu taon xa eilep te hal Babilon teleh neta holu texo tuturil xil,
e moletin xil te tuturil latehur mani holu texo en.
!E haoa tei takes, langgu len ni vari!”
20 Di, nalong rae tei xa bit, ✡Dut 32:43; Sam 96:11; Aes 44:23; 49:13; Ser 51:48
“!Xamim te ut nesao,
muhesi xamim vengan xa langgu len taon xa eilep xiak!
Xamim moletin xil na Hi, eloheoh xil, e provet xil mun, mulonge ihos,
vengan xa Hi misa pangasien te lepisien nan mini ve sexien tesa xil xa xi tepol ni mi xamim.”
21 Di, napus vatixar tei na masxaxa xil bemei e po rat vatihat tei xa meas pupu e miso ni be tas. Melele xa pol ni biteni bit,
“Usil rin tak, Hi ipo rat taon xa eilep te hal Babilon
e iso ni ihe etan,
e linapus ti mun moletin xil en. ✡Ser 51:63-64; Esek 26:21
22 E taon ak, linalong ti mun
rumen te harp, flut, hon mu rae moletin en.
Ngan xil xa di labol, mu laseh liei, mu lapen ni neta,
linapus ti mun xil en.
Tangalen na ngan xil xa di labas utut uit mei be pulaoa, linalong ti mun.✡Aes 24:8; Esek 26:13
23 Laet napili ti mun en.
E taon ak, rumen te sien e melele xa tiramue miteli del atou tei,
linalong ti mun.✡Ser 7:34; 16:9; 25:10; Aes 23:8; 47:9
Tetiamu, moletin xil xa di latepos ni holesok xil en,
xil mei latehe eilep mak mu e ut xil vus te ut etan.
E del sexien te vongou nan,
xi miluvos moletin xil vus te ut etan.”
24 Hi misa pangasien te lepisien nan mi taon te hal Babilon ak vengan xa mikamet re provet xil e re moletin nan xil en. Reitin, xi pusi xa Babilon tehas vin moletin xil holu xa latexo ut xil vus te ut etan. ✡Ser 51:49; Esek 24:7; Rev 6:10; 17:6; 19:2
*^ Babilon be sepinien xuxus usil taon xa mahulong te hal Rom xa vatit kavmen xil ladi en.
✡18:2: Aes 21:9; Ser 51:8; Rev 14:8; Aes 13:21; 34:11; Ser 50:39
✡18:3: Aes 23:17; Ser 51:7; Rev 14:8; 17:2
✡18:4: Aes 48:20; 52:11; Ser 50:8; 51:6,9,45; 2Kor 6:17
✡18:5: Sen 18:20-21; Ser 51:9
✡18:6: Sam 137:8; Ser 50:15,29; 2Tes 1:6
✡18:7: Aes 47:7-9
✡18:9: Esek 26:16; 27:30-35
✡18:10: Esek 26:17; Dan 4:30
✡18:12: Esek 27:12,13,22
✡18:15: Esek 27:36
✡18:17: Esek 27:27-29
✡18:18: Esek 27:32
✡18:19: Esek 27:30-34
✡18:20: Dut 32:43; Sam 96:11; Aes 44:23; 49:13; Ser 51:48
✡18:21: Ser 51:63-64; Esek 26:21
✡18:22: Aes 24:8; Esek 26:13
✡18:23: Ser 7:34; 16:9; 25:10; Aes 23:8; 47:9
✡18:24: Ser 51:49; Esek 24:7; Rev 6:10; 17:6; 19:2