Sepinien xa diamu te
2 Tesalonaeka
?Visi iaxa tetis uvei ak?
Pol, eloheoh tei na Iesu Kristo, iaxa tetis uvei ak✡2Tes 1:1 sangas ni huram hanutap lu e lu e le tei mun AD (huram 52 tetutou ni poten na Iesu Kristo) e melele xa di tamu tepispisi mi Kristin xil e taon te hal Korin.
?Visi iaxa tevuli uvei ak tetiamu?
Pol tetis sepinien ak teha mi Kristin xil xa lateti e taon te hal Tesalonaeka. Moletin xil holu latenemi latehit melele xa Timoti tesa uvei te 1 Tesalonaeka mi xil e tetilomun tehe visal Pol, Pol tetis uvei ak sung mi xil xa tesep usil holesok xil xa texoni ngan taxa tete uvei nan tetiamu.
?Pol tetis uvei ak veneh?
Pol ien tehei tengan vasel xat xil tengan lisoh ixeih e sakpurunien xil xa di bemei e xil - Kristin xil te hal Tesalonaeka di tamu latehur sakpurunien xil ve neketen nae.✡2Tes 2:4 E Pol tehiteni mi xil xa melele xa sakpurunien xil ak di bemei e xil di pisen ni xa labe na Hi reitin.✡2Tes 1:5-12
Pol ien tehei tengan vamal ni nenemien nae usil naha xa istal e Melengien Kor xil - Kristin xil te hal Tesalonaeka latnakil kuh ti naha xa istal e Melengien Kor xil, e e melele xa Iesu imei rilomun en. Ma Pol tehit lelen ni mi xil xa, e Melengien Kor xil, moletin xil mei liluvos lihit xil labe Kristo na Hi.✡2Tes 2:3-12 Pol tehit lelen ni mun xa melele xa Iesu imei rilomun, isa pangasien mi ngan xil xa di lasin Hi e mi ngan xil xa latalong xat Kristo ti, e ihur xat koten tei xa mahulong tengan ilepis rin na moletin xil vus en.✡2Tes 1:5-10
Nenemien tei xa eilep te uvei ak de 2 Tesalonaeka 2:1-2
Tuxoli e hinoxoli nametel xil, iemetel bei tengan matsepin mi xamim usil melele xa Iesu Kristo, Suv nar, imei rilomun en e ileh viton xir tengan ha riti visali. Matdakes xamim li, tengan munanexo ti e munatemanin ni ti sepinien te luvosen xa bit Suv Iesu temei rilomun ngamu. Tave ti neta xosxa moletin tei bit nggur longeongen ak nggo Ninin Eo, mu nggo moletin tova, mu nggo uvei tei nametel, munake reitin ti en.
Nenemien teimun xa eilep te uvei ak de 2 Tesalonaeka 3:5
Matsis tengan Suv Iesu itel xat xamim ha ituxoh melele xa mukil kuh eheien na Hi e isak ni xamim mei musoh ixeih e neketen namim ixoni ngan xa Iesu Kristo mun tepol ni.
?Naha iaxa di e uvei ak?
1. Pol pet rat nenemien na Kristin xil te hal Tesalonaeka ve sakpurunien xil xa di langguri. (1:1-12)
2. Pol pispisi mi xil usil melele xa Iesu imei rilomun en. (2:1-17)
3. Pol misel xat xil usil sexien hos xil xa momal tengan ti lihusili. (3:1-18)
1
Sepkilaen na Pol usil uvei ak
1 Inou Pol, del Saelas*Saelas, hisen tei mun be Silvanus. xal Timoti, matdis uvei ak mi xamim, moletin xil na Hi Tamer e na Suv Iesu Kristo xa mudi e sias te hal Tesalonaeka. ✡1Tes 1:1 2 Matsis mi Hi Tamer e mi Suv Iesu Kristo tengan lalisa eheien hos e tomat nalu mei iti e meulien namim. ✡Rom 1:7
Pol bit kila xa melele xa Iesu imei rilomun en, ilepis rin na moletin xil vus
3 Tuxoli e hinoxoli nametel xil, vehakut di matomes Hi ve xamim. E momal tengan matopol ni vamak vengan xa neketen namim di bemei nggeih mu e xamim kekes di mupisen eheien mak mu mi xamim mun tang. ✡1Tes 1:2; 2Tes 2:13 4 Mak, ma xametel di matsep koai usil xamim mi Kristin xil e sias xil vus na Hi. Mattumul mi xil usil rin xa di musoh nggeih e neketen namim, tave ti neta xa di munggur sakpurunien e pangasien xil holu. ✡2Kor 7:4; 1Tes 2:19; Rev 1:9
5 Melele xa di musoh nggeih e neketen namim mak, di mupisen ni xa nenemien xil na Hi momal tevi melele xa di maen xamim mubisu ni holesok xil ak tengan vasak ni xamim mupin tengan muve moletin xil xa mudi pe lelaxatien nan. E di mubisu ni longpangasien xil ak vengan xa mube nan. ✡Plp 1:28; Luk 20:35; 1Tes 2:12 6 Hi momal, e isa rilomun ni pangasien mi ngan xil xa di lasa pangasien mi xamim. ✡Rom 12:19; Rev 18:6,7 7 E isa ngengelen mi xamim xa di munggur pangasien e mi xamem mun. Ipol ni e melele xa Suv Iesu istal ixo ut nesao imei itel masxaxa te xeih nan xil. ✡Sak 14:5; Mat 25:31; 1Tes 3:13; 4:16 8 Xil limei etan itel upang te xeih tengan lisa pangasien mi ngan xil xa labit linakil ti Hi e mi ngan xil xa labit linalong xat ti longeongen hos usil Suv Iesu. ✡Sam 79:6; Aes 66:15; Ser 10:25; Rom 2:8; 1Pit 4:17 9 Melele xa Hi ilepis rin nae ivus, isa pangasien xa misakras vavus mi xil. Imak, ma xil liti sotin ra minehinen te xeihen na Suv Iesu vehakut xa vehakut tang. ✡Aes 2:10,19,21 10 Holesok xil ak mei listal e melele xa Iesu imei rilomun en tengan moletin nan xil lipet rat hisen ihe nesao. Reitin, ngan xil xa lateling neketen nae en lipusi e limesep ve minehinen nan. E xamim mun muti vituei itel moletin nan xil ak vengan xa muteke reitin e sepinien xa mattehiteni mi xamim. ✡Sam 88:8; Aes 49:3; Kol 3:4; 1Tes 3:13; Sam 67:3-6
11 E vengan xa iemetel bei pupu tengan xamim muti vituei itel moletin xil ak, di matsis mi Hi nar ve rin namim tengan ipol ni xamim mupin tengan muhur meulien xa tekes xamim tengan muhuri. Matsis mun xa, ixo xeihen nan, xi isak ni xamim mukila mupol sen holesok xil xa bos xa ien bei tengan mupol ni vengan xa muteling neketen namim e Iesu Kristo. ✡Kol 1:9 12 Di matsis ve holesok xil ak tengan ngan xil xa di lapus naha xa Suv Iesu di pol ni e meulien namim lipetrat hisen ven. E xi sung ipet rat hisemim. Matkila xa holesok xil ak istal ihusil eheien hos na Hi nar e na Suv Iesu Kristo.✡Aes 24:15; 66:5; Mal 1:11
*1:1: Saelas, hisen tei mun be Silvanus.
✡1:4: 2Kor 7:4; 1Tes 2:19; Rev 1:9
✡1:5: Plp 1:28; Luk 20:35; 1Tes 2:12
✡1:7: Sak 14:5; Mat 25:31; 1Tes 3:13; 4:16
✡1:8: Sam 79:6; Aes 66:15; Ser 10:25; Rom 2:8; 1Pit 4:17
✡1:9: Aes 2:10,19,21
✡1:10: Sam 88:8; Aes 49:3; Kol 3:4; 1Tes 3:13; Sam 67:3-6
✡1:12: Aes 24:15; 66:5; Mal 1:11