27
Hatahorir leꞌa roo Yesus neni nggubenor Pilatus neu
(Markus 15:1; Lukas 23:1-2; Yohanis 18:28-32)
1 Bei huhua anan seli, basa hatahorir mana parisa dedeꞌa anggama raa, rala harak fo rae tao risa Yesus. 2 Huu naa de ara futu-paꞌa roo Yesus neu nasare nggubenor Pilatus. Ara nau fo nggubenor fee hukun mates neun.*Lelek naa, hatahori Yahudir ta raena haak fo hukun mates hatahori. Huu naa de ara leꞌa roo Lamatuak Yesus neni man-parenda Roma neu.
Yudas londa aon, de maten
(Nedenuk kara Tutuin 1:18-19)
3 Neu Yudas bubuluk nae, Yesus hambu hukun mates, boe ma ana fale dalen, nahuu ana seꞌo heni Yesus. De ana fali neni malangga anggama Yahudi malanggan nara, ma lasi-lasi hadak kara neu fo fee falik doi lilo fulak telu hulu naa. 4 Ana nafada nae, “Au akilu-asala ena, nahuu au loo lima Hatahori ta naena salak hata esa boe na.”
Tehuu ara raselu rae, “Weeh! Ai ta nau tao matak mia o bali! O mesa ngga ndia lemba-masaa kilu-salak naa.” 5 Boe ma Yudas toko falik doik kara raa reni Uma Huhule-haradoi Ina-huuk reu. De ana kalua neu londa aon losa maten.
6 Boe ma malangga anggama Yahudi malanggan nara raduduru rala doik kara fo Yudas nggari henik kara ena naa. Ara rakokola aok rae, “Ita ta bole tao falik doik kara iar reni peti doik neu, nahuu doik kara iar manggenggeok. 7 Dadi malole lenak ita teu hasa tala dae faa numa mana tao ure dae mai. Mete ma hambu hatahori feꞌek mate, ma ta hambu hatahorir ralelan, na, ita bisa tatoin neu naa.” 8 Basa boe ma ara pake doik naa fo reu hasa dae naa. Huu naa de losa hatematak ia, hatahorir seseik dae naa rae, ‘Dae Daak’.✡Nedenuk kara Tutuin 1:18-19
9 No dalak naa, ara tungga hata fo Manetualain mana toꞌu dedeꞌan Yeremia kokolak memak kana ena nae,
“Ara pake doi lilo fulak telu hulu fo hasa dae.
Ara pake doik naa, nahuu doik desi naa, ara rasiꞌe paken fo bae neu hatahori esa belin,
tungga hata fo hatahori Israꞌel asa raketu memak.
10 Dae naa, ara hasan numa mana tao ure dae mai,
tungga Manetualain parendan neu au.”✡Sakaria 11:12-13; Yermia 18:2-4; 19:1-11; 32:6-15
Lamatuak Yesus nasare nggubenor Pilatus
(Markus 15:2-5; Lukas 23:3-5; Yohanis 18:33-38)
11 Neu hatahorir leꞌa roo Yesus losa nggubenor, boe ma ana natane Yesus nae, “Talo bee? O ia, tebe-tebe hatahori Yahudir Manen, do?”
Yesus naselu nae, “Tebe. Papa kokolak ndaa naa ena.”
12 Neu malangga anggama Yahudi malanggan nara ma lasi-lasi hadak kara rakasasaꞌek salak matak noꞌuk ka neu Yesus, tehuu Ana ta naselu hata esa boe na.
13 De nggubenor natanen nae, “O ta mamanene sira kokolan naa? Ara fee salak neu O noꞌun seli ena. Tehuu tao hata de O ta bala sara boe?!”
14 Tehuu Ana ta naselu faa boe na, losa nggubenor naa heran bali-bali.
Nggubenor Pilatus naketu hukun mates neu Lamatuak Yesus
(Markus 15:6-15; Lukas 23:13-25; Yohanis 18:39—19:16)
15 Tungga teuk, mete ma hatahori Yahudir tao feta Paska, hatahori noꞌuk kara rasiꞌe here rala hatahori bui esa fo nggubenor nakamboꞌik kana. 16 Faik naa, hambu hatahori bui esa, nade Barabas.†Susura dedeꞌa Yunani ketuk surak rae, ‘Yesus Barabas’, ma ketuk bali surak rae, kada ‘Barabas’. Basa hatahorir bubuluk ndia naa see, nahuu manggaraun sudi selik kana. 17 Faik naa oo hatahori noꞌuk kara reni nggubenor Pilatus reu boe, fo roke ana nakamboꞌik hatahori bui esa, tungga sira siꞌen. Boe ma Pilatus natane sara nae, “Malole! Tehuu au akamboꞌik see? Nai ia oo, hambu Barabas ma hambu Yesus fo hatahorir raseseik kana rae, Karistus boe. Au akamboꞌik see? Ei here leo.” 18 (Nggubenor kokolak talo naa, huu ana bubuluk malangga anggama Yahudi malanggan nara leꞌa roo Yesus neni ndia neu, nahuu ara mbiri rala Yesus seli.)
19 Neu nggubenor bei parisa dedeꞌak naa, boe te saon haitua harak feen nae, “Papa, ee! Besa-besa, ou, huu Yesus ia Hatahori ta naena salak hata-hata. Huu Ndia ia, de leꞌodaek ka au ala meꞌi ta malole. Losa hatematak ia oo, au bei ameda ta neulauk boe.” 20 Tehuu malangga anggamar ma lasi-lasi hadak kara raa dudunggu hatahori noꞌuk kara raa, fo ara roke nggubenor nakamboꞌik Barabas, ma hukun mates Yesus. 21 De ana natane seluk bali neu sara nae, “Numa hatahori kaduak kara iar, au akamboꞌik see?”
Boe ma basa sara raselu rame-rame rae, “Barabas! Makamboꞌik kada Barabas leo!”
22 Boe ma ana natane sara nae, “Mete ma talo naa, na, au tao hata neu Yesus ia, fo hatahorir raseseik kana rae, Karistus?”
Boe ma basa sara eki rame-rame rae, “Paku tao misan nai ai ngganggek leo!”
23 De nggubenor natane seluk nae, “Ndia salan hata? Au parisan ena, tehuu au ta hambu salak hata esa boe na!”
Tehuu basa sara boe eki rahere bali rae, “Tao misan! Pakun neu ai ngganggek leo!”
24 Doo-doo boe ma Pilatus bubuluk nae, ndia ta bisa tao hata-hata bali, huu hatahori noꞌuk kara raa rae ramue-anggik ena. Huu naa de ana haꞌi nala oe fo safe liman neu hatahorir raa matan nara, ma nafada nae, “Au ta lemba-asaa Hatahori ia mamaten! Naa fo ei ndia lemba-masaa malan!”✡Tui Seluk laꞌe-neu Dala Masodak 21:6-9
25 De hatahori noꞌuk kara raa eki raselu rae, “Hou, neu leo! Naa fo ai mia ai umbu-anan nara ndia lemba-masaa mala Ndia daan naa!”
26 Pilatus namanene nala naa, boe ma ana nae, “Neu leo.” De ana nakamboꞌik Barabas tungga sira hihiin. Basa boe ma ana parenda mana manear, fo poko-femba Yesus pake fifiuk.‡Soldadu Romar pake fifiuk fo neni iꞌik numa tali banda rouk, taruk hida. Boe ma ara paꞌa dui tandek, do engge tandek neu tali suꞌun nara. Mete ma poko-femba laꞌi-laꞌik kana pake fifiuk naa, lofa heni rouk kara. Poko-femba basan, boe ma soldadur leꞌa roo Yesus fo rae reu paku tao risan nai ai ngganggek lain.
Soldadur rakatitiik rakamiminak Lamatuak Yesus
(Markus 15:16-20; Yohanis 19:2-3)
27 Basa naa, soldadur leꞌa roo Yesus neni sira kota batun bebela loan neu. Numa naa, ara roke rala sira nonoon nara batalion esa.§Soldadur mamanan naa, nai dedeꞌa Latin, roken rae, praetorium. Soldadur raa mamana heli-helin nara rai uma dines eko-feon. Susura Malalaok dedeꞌa Yunani nae, ara roke sira nonoon, speira esa. Speira esa naa, sama leo soldadu natun nee. 28 Boe ma ara rabua Yesus badu naru mbila kara-karak esa.*Mateos surak nae, badu naruk ia, ‘mbila kara-karak’. Markus surak nae, ‘mbila maranggeok’. 29 Ma ara haꞌi rala ai kanggouk ndanan fo nanen dadi solangga. Boe ma ara ndeꞌi solangga kanggouk naa neu Yesus langgan, fo rakamiminak kana, sama leo ara rae soꞌuk mane beuk pake solangga manek. De ara rakatotoꞌuk ai esa neu lima konan, nok bali teteꞌe ai man-parenda. Boe ma ara sendek luu-langgan nara mbalin, ma rakatitiik kana rae, “Hada-horomatak neu hatahori Yahudir Manen.” 30 Boe ma ara pura ambe neu Yesus, ma haꞌi rala teteꞌe ai naa numa liman mai, de delu rakamiminak langgan. 31 Ara rakatitiik rakamiminak basa Yesus, boe ma ara buka heni badu naruk naa. De ara feen pake falik bua-loꞌan nara. Basa boe ma ara leꞌa roon neni kota Yerusalem dean neu, fo rae reu pakun nai ai ngganggek lain losa maten.
Ara paku Lamatuak Yesus neu ai ngganggek
(Markus 15:21-32; Lukas 23:26-43; Yohanis 19:17-27)
32 Neu ara bei laꞌok fo leꞌa roo Yesus, ara ratonggo ro hatahori kota Kirene esa, bei fo nae maso neni kota Yerusalem neu. Ndia naden, Simon. Ara rakasetik kana fo lemba-nasaa nala ai ngganggek naa nggati Yesus. 33 Boe ma ara losa mamanak esa, nade Golgotaa. (Nai dedeꞌa Aram, sosoa-ndandaan nae, “Mamana langga duik.”) 34 Numa naa, ara rae fee Yesus ninu anggor neni babalik no modo malik, mita fo Ana nakatataka nala hedis. Yesus ninu nala kada faa, boe ma ana timba henin.✡Sosoda Kokoa-kikiok kara 69:22
35 Basa boe ma ara paku Yesus neu ai ngganggek lain. Ma soldadur leꞌa lot fo sangga bubuluk see ndia hambu Yesus bua-loꞌan.✡Sosoda Kokoa-kikiok kara 22:19 36 Boe ma ara ranggatuuk ranea Yesus numa naa. 37 Ara oo surak neu papak esa boe nae,
“IA YESUS, HATAHORI YAHUDIR MANEN”
De ara paku papak naa neu Yesus langgan ndandaan lain fo rafada huun hata de sira fee hukun mates neun.
38 Numa naa oo ara paku rakanisa hatahori naꞌo manu-meo dua boe. Esa neu Yesus boboa konan; esa neu boboa kiin.
39 Basa hatahorir mana laꞌok resik naa, mete-rita Yesus. Boe ma ara korombiꞌe bafan nara, de rakatitiik kana.†Hatahori Yahudir siꞌen, ndia kakale langgan nara fo dadi tanda nae, sira rakatitiik hatahori. ✡Sosoda Kokoa-kikiok kara 22:8; 109:25 40 Ara eki mbalin rae, “Hoi! O mae O bisa mandefa heni Manetualain Uma Huhule-haradoi Ina-huun, basa de mambadedeik falik kana nai faik telu dalen, hetu? Mete ma O tebe-tebe Manetualain Anan, na, soba O makamboꞌik aom, fo konda numa ai ngganggek naa mai leo.”✡Mateos 26:61; Yohanis 2:19
41 Leo naak oo malangga anggama Yahudi malanggan nara, meser anggamar ma lasi-lasi hadak kara tungga rakatitiik Yesus boe rae, 42 “Ana tao nasoi-nasoda hatahori laen ena, tehuu Ana ta bisa tao nasoi-nasoda Ndia ao heli-helin! Ana nae, Ndia ia hatahori Israꞌel Manen! Mete ma talo naa, na, malole lenak Ana konda memak numa ai ngganggek naa mai. Mete ma ita mete-tita talo naa, dei fo ita tamahere neun. 43 Mete ma tebe-tebe Ndia Manetualain Anan, naa fo
‘Ana namahena neu Manetualain.
De mete ma Manetualain nau Ndia, na,
mita fo Manetualain tao nasoi-nasodan.’ ”✡Sosoda Kokoa-kikiok kara 22:9
44 Naꞌo manu-meo kaduak kara raa oo, tungga rakatitiik kana talo naa boe.
Lamatuak Yesus mamaten
(Markus 15:33-41; Lukas 23:44-49; Yohanis 19:28-30)
45 Basa naa, makiu-makahatuk tatana nala mamanak naa, numa ledo namatetu losa liꞌu telu ledo bobon. 46 Ndaa no liꞌu telu ledo bobon, boe ma Yesus eki pake dedeꞌa Aram nae, “Eli! Eli! Lema sabaktani?” (Sosoa-ndandaan nae, “Au Lamatuang! Au Manetualaing, ee! Tao hata de Amak nasadea laꞌo ela Au talo ia?”)✡Sosoda Kokoa-kikiok kara 22:2
47 Hambu hatahori hida deka-deka ruma naa ramanene Yesus haran naa. Boe ma rae, “Hoi! Ei mamanene dei. Ana nanggou Elia, Manetualain mana toꞌu dedeꞌan lele uluk naa!” 48 Boe ma hatahori esa nalai neu haꞌi lombu fo boron neni anggor makeis neu. De ana nato lombu naa neu teteꞌe ai suꞌun, boe ma soron neni Yesus bifi doon neu, fo Ana musi.✡Sosoda Kokoa-kikiok kara 69:22
49 Tehuu hambu hatahori laen bali kokolak nae, “Tahani dei, fo ita mete sudik kana, Elia nae mai tao nasoi-nasodan, do taa?”
50 Boe ma Yesus eki seluk bali no hara berak, de maten.
51 Nai Uma Huhule-haradoi Ina-huuk dale, hambu tema ririndi loak esa neni londak fo babata Manetualain Kama Malalao Mateꞌen. Ndaa no Yesus ketu ani hahaen, boe ma tema ririndik naa sii baꞌen neu dua, numa lain mai losa dae. Boe ma dae nanggenggo, losa batu moꞌok kara fanggi baꞌes sara.✡Kalua numa Masir mai 26:31-33 52 Rates sara oo ratahuka boe. Ma Manetualain hatahorin mana matek kara ena, Ana tao nasoda falik ketuk ruma mamates mai. 53 Neu Yesus nasoda fali numa mamaten mai ena, boe ma ara kalua ruma rates mai, de maso reni Yerusalem reu. Hatahori noꞌuk ka mete-rita sara ruma naa.
54 Numa Golgotaa, hambu komedan no soldadun nara mana ranea Yesus ai ngganggen. Neu ara mete-rita dae-inak nanggenggo, ma basa hata fo mandadik naa ena, boe ma ara ramataꞌu ralan seli. Ara rakokola aok rae, “Awii! Hatahori ia, memak tebe-tebe Manetualain Anan!”
55 Numa naa oo, hambu inak hida fo ara tungga mete Yesus mamaten numa dook ka mai boe. Ara tunggan numa Galilea mai ena, huu ara ndia raono-lalaun numa bakahulun mai. 56 Numa inak kara raa mai, hambu Maria numa nggoro Magdala mai, Maria esa bali (ndia Yakobis ma Yusuf inan), ma Sabadeus saon (ndia Yakobis no Yohanis inan).✡Lukas 8:2-3
Ara ratoi Lamatuak Yesus
(Markus 15:42-47; Lukas 23:50-56; Yohanis 19:38-42)
57 Numa naa, hambu hatahori kamasuꞌik esa numa nggorok Arimatea mai, nade Yusuf. Ana tungga Yesus nenorin dook ka ena. Yesus mamaten naa, tuda laꞌe-ndaa fai kaliman. Beꞌe-mai tuda laꞌe-ndaa hatahori Yahudir fai huhule-haradoin. Huu naa de, neu ledo sangga tesa, boe ma Yusuf sangga dalak fo nae nakonda memak Yesus ao-mbaa mamaten numa ai ngganggek lain mai. 58 De ana neni nggubenor Pilatus neu, fo noke Yesus ao-mbaa mamaten. Boe ma nggubenor parenda fo ara loo lima mamates naa neu Yusuf. 59 Boe ma Yusuf neni Golgotaa neu. De ana nakonda Yesus ao-mbaa mamaten numa ai ngganggek naa mai. Boe ma ana mbomboti natalolole ao-mbaa mamates naa, no tema beuk mabeli. 60 Faik naa, hatahorir bei fo toꞌi basa bolok esa numa lete batu fo sadia memak rates fee Yusuf no nufanelun nara, mete ma ara mate. De Yusuf asa koꞌo roo Yesus ao-mbaa mamaten fo reu taon neni bolok naa neu. Boe ma ara loli rala batu moꞌok esa, de tatana ratalololen neu bolok naa lelesun. Basa naa, Yusuf asa fali reu sara leo.
61 Faik naa, Maria numa Magdala mai ma Maria laen naa oo tungga losa mamanak naa boe. Ara nggua-nggua mbali bolok naa.
Nggubenor nadenu hatahorir fo ranea mamanak ratoi Lamatuak Yesus ao-mbaa mamaten
62 Neu beꞌe-mai, ndaa no hatahori Yahudir fai hahae tao ue-osan. Boe ma malangga anggama Yahudi malanggan nara ma hatahori Farisir reu rasare nggubenor. 63 Ara rafada rae, “Papa nggubenor, ai masaneda neu mana kedi-irak bei masodak, ana kokolak nita nae talo ia: ‘Memak Au mate, tehuu seli faik telu boe ma Au asoda fali numa mamates mai.’✡Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33 64 Huu naa de papa tulun madenu soldadur fo ranea ratalolole rates naa, losa fai katelun. No dalak naa, Ndia ana nunin nara ta bisa loi rala ao-mbaa mamaten, fo kedi-ira hatahorir rae, Ana nasoda fali numa mamaten mai ena. Mete ma ara kedi-ira talo naa, naa manggaraun lena ara kedi-ira fai bakahulun naa, neu ara rae Ndia ia, ndia Karistus.”
65 Nggubenor namanene nala naa, boe ma naselu nae, “Malole boe! Tehuu ei kahatahori mana manear. Malole lenak pake kada sira leo, fo reu ranea ratalolole mamanak naa.”
66 Boe ma ara reni mamanak naa reu, ma roo sira hatahori mana manean nara. Losa naa, ara segel rakamate batu manai rates lelesu bafan.‡Hatahori malelak rae, ara segel no dalak tao abas dook esa neu batu ma bolok rindin pake lak ndule batu. De ara radenu hatahorir raa ranea rakandoo mamanak naa, mita fo hatahori laen boso mai haꞌi reni mamates naa.
*27:2 Lelek naa, hatahori Yahudir ta raena haak fo hukun mates hatahori. Huu naa de ara leꞌa roo Lamatuak Yesus neni man-parenda Roma neu.
✡27:8 Nedenuk kara Tutuin 1:18-19
✡27:10 Sakaria 11:12-13; Yermia 18:2-4; 19:1-11; 32:6-15
†27:16 Susura dedeꞌa Yunani ketuk surak rae, ‘Yesus Barabas’, ma ketuk bali surak rae, kada ‘Barabas’.
✡27:24 Tui Seluk laꞌe-neu Dala Masodak 21:6-9
‡27:26 Soldadu Romar pake fifiuk fo neni iꞌik numa tali banda rouk, taruk hida. Boe ma ara paꞌa dui tandek, do engge tandek neu tali suꞌun nara. Mete ma poko-femba laꞌi-laꞌik kana pake fifiuk naa, lofa heni rouk kara.
§27:27 Soldadur mamanan naa, nai dedeꞌa Latin, roken rae, praetorium. Soldadur raa mamana heli-helin nara rai uma dines eko-feon. Susura Malalaok dedeꞌa Yunani nae, ara roke sira nonoon, speira esa. Speira esa naa, sama leo soldadu natun nee.
*27:28 Mateos surak nae, badu naruk ia, ‘mbila kara-karak’. Markus surak nae, ‘mbila maranggeok’.
✡27:34 Sosoda Kokoa-kikiok kara 69:22
✡27:35 Sosoda Kokoa-kikiok kara 22:19
†27:39 Hatahori Yahudir siꞌen, ndia kakale langgan nara fo dadi tanda nae, sira rakatitiik hatahori.
✡27:39 Sosoda Kokoa-kikiok kara 22:8; 109:25
✡27:40 Mateos 26:61; Yohanis 2:19
✡27:43 Sosoda Kokoa-kikiok kara 22:9
✡27:46 Sosoda Kokoa-kikiok kara 22:2
✡27:48 Sosoda Kokoa-kikiok kara 69:22
✡27:51 Kalua numa Masir mai 26:31-33
✡27:63 Mateos 16:21; 17:23; 20:19; Markus 8:31; 9:31; 10:33-34; Lukas 9:22; 18:31-33
‡27:66 Hatahori malelak rae, ara segel no dalak tao abas dook esa neu batu ma bolok rindin pake lak ndule batu.