Mukaana A Poole wu a nsomo kundaa basi
Korente
OSOMO
Me Poole áasono mukaana wu kunda banga-a-kana baba mu bvulu lili Korente. Nde áli agyene oko mu midzye mi nde mimi myele ya nde áluhu mvulu mumõ ya bangoono basemene oko. Me mu matala mamo nde áluo baala ka bali ba-Dzwife o tee mu matala ma bánama bo nzili a Kriste.
Mu matala mamo, bvulu lilo líli li libwe: Mabwara ma manene mákafa mankolo mwohono ya mákagye oko. Minta-nkaala míli milagha. Baara banga a esighi báli si balagha, ti bwunu a bu ookakala mu mabvulu ma manene. Bo básuo bipfu bibye kundaa banga-a-kana baba ku Korente. Poole átsimi ku olagha mu mandagha mamo, me mu obo nde ásono bo mukaana wu a nsomo (5.9), mu olyele bo banyaã obvuŋunu ya baara babo.
Okughu okala si ti basi Korente báasono nde mukaana. Baara babake báyalyele Poole mandagha mu mi mitala basi Korente, ya mandagha mamo ka mali mabwe o. Mu obo, nde ágwolo munkaana wu ogwa bo mvuru mu mukaana wu básono bo nde ya ágwi bo maluo.
Poole áluo bo mandagha malagha, ti anga munkaghaba a bakriste, esighi, mabala, odza tuo li bágwi banzaami baba mpya, Bi-odza bi Mfumu, bikaba bi ookagwa Mufulu a Ngili, ya osighili o ba bákpi mu lipfu.
Poole áli a nzya-nzyara yi a okughulu ŋa kara li bo mu olyele bo mandagha ma áli a nde nzala a olyele bo. Nde ályele bo ti mandagha mamo mu ofa, bo ali báfaana okwara Yiisu mu mpini. Nde áluo bo si ti odzyi nganda-mbwuru obvulu mandagha mwohono.
Bu me bu baakakaba mukaana wu:
- Mamboro (1.1-9).
- Bakriste ka bafaana odzwana ya ka bafaana si okaghaba o (1.10–4.21).
- Bakriste ka bafaana okasa banganda bubi bo-a-bo o (5.1–6.20).
- Babaghala ya bakala babo (7.1-40).
- Baara bafaana okala a bintamana mu Nzaami, lo ka mu banzaami baba bityeghe o (8.1–11.1).
- Bunu banga-a-kana bafaana osa munsa mabwunu ma Nzaami (11.2–14.40).
- Bunu Kriste aalughulu ŋa yulu a lipfu (15.1-58).
- Libaha kundaa bawele (16.1-4).
- Poole gwolo munkaana wu ogye midzye (16.5-12).
- Mikele ya mamboro (16.13-24).
1
Mamboro
1 Me Poole, ntumu a Yiisu-Kriste wu óti Nzaami mbili mu waa li nde, ya Sosetene ndughu mu kana, 2 lisono mukaana wu kundaa Libwunu li Nzaami li lili mu bvulu lili Korente, bo ba ótwulu Nzaami mu libee mu osalala nde bu bali emõ mu Yiisu-Kriste. Bo bali baba tse-tse mu mbili yi báti bo emõ ya babo bwohono ba baakasamana mu bibini byehene mu nkwumu a Mfumu a bihi Yiisu-Kriste, Mfumu a bo ya bihi bwohono. 3 Nyaã bwehe ya edzuunu bi bifi kundaa Nzaami Taara a bihi ya kundaa Mfumu Yiisu-Kriste bikala ya be!
Bikaba bi liikabagha mu Kriste
4 Nswe matala, me aakambvurulu matuono kundaa Nzaami a me mu be mu bwehe bu ógwi be Nzaami mu Kriste Yiisu. 5 Mu kuulu mu Nde, be lili bisini mu bikaba byehene, emvulu ngughu bikaba bibi Ndagha ya bibi ligyahaba. 6 Mu kuulu bumpughulu bu bihi mu Kriste buumoŋono nkara a bubwe kundaa be. 7 Me mu obo, be ka ligweene a ekaba kii bwehe si emõ o, bu lili mu okakebe omoŋono o Mfumu a bihi Yiisu-Kriste. 8 Me Nde akala aagwa be mpini tee ku masini, mpaala be likala baara ba bagwene a ndagha yi baasyeme bo mu etsughu ki oogya Mfumu a bihi Yiisu-Kriste. 9 Nzaami wu aati be mbili mu okala bumõ ya Mwana a Nde Yiisu-Kriste, Mfumu a bihi, Nde li wu bakughu osa kana.
Munkaghaba munsa libwunu lili mu bvulu lili Korente
10 Bandughu ba me mu kana, me ngwi be mpama mu nkwumu a Mfumu a bihi Yiisu-Kriste, mu okala a mbiili mõ: Onyaã okala a munkaghaba ŋa kara li be. Ligyighili okala emõ, mu mufulu ya mu bitsimi bi be. 11 Mu kuulu, bandughu ba me mu kana, baara ba nzo a Kolowe baalyele me ti be lili mu okabaŋana be a be. 12 Me bu ndzyi olyele: Nswe mbwuru mu be li mu okalyele ti: «Me, me ndi mbwuru a Poole», wu muke ti: «Me, me ndi mbwuru a Apolose», mukimi ti: «Me, me ndi mbwuru a Piere», ya wunu ti: «Lo me, me ndi mbwuru a Kriste.» 13 Bunu, Kriste wu aakaghaba ali? Ngu Poole bákomo ŋa kuruwa mu be? Bwunu we me mu nkwumu a Poole báboghoro be? 14 Me aakambvurulu matuono kundaa Nzaami mu kuulu me ka ámboghoro mbwuru si mumõ ŋa kara li be o, kala ti ka yini a Kirisipuse ya Ngayuse o. 15 Mu obo, mbwuru si mumõ ka kughu olyele o ti mu nkwumu a me báboghoro be. 16 Aa ngaŋma! Me áamboghoro si baara ba nzo a Esetefanase. Kala ti bamaha baara babo, me bu nsoolo ti me ka ámboghoro mbwuru mukimi o. 17 Mu kuulu Kriste ka ágweghe me mu oboghoro baara o, lo mu otsala Nsia yi Mbwe, ka mu bunsughu bubu obili o, mpaala lipfu li Kriste ŋa kuruwa likala lili bwunu.
Yiisu-Kriste li lileene ya bunsughu bu Nzaami
18 Mu kuulu maluo ma kuruwa mali lala kundaa baara ba bali mu okagye ku odzimini, lo kundaa bihi ba liibvwughu, mo mali lileene li Nzaami. 19 Mu kuulu básono ti:
«Me sa mbyihi bunsughu bu bansughu,
ya me sa mana mayele ma banga-a-mayele*1.19 Edz 29.14.»
20 Nsughu kunu ali? Muluo-mikyene kunu ali? Nga a munsohobo wu matala ma kunu ali? Nzaami ka aakirili bunsughu bu nsie yi lala o? 21 Mu kuulu, mu nzili a bunsughu bubo, baara ba nsie ka baasoolo Nzaami munsa bunsughu bu Nde o, me mu nzili a lala li maluo Nzaami aamono bubwe mu obvwuhu ba baakasa kana. 22 Ba-Dzwife bali mu okaluomo bilyimi bii okiŋimi, ya ba-Ngereke bali mu okasagha bunsughu. 23 Lo bihi, bihi lili mu okaluo Kriste wu bákomo ŋa kuruwa, Nde wu li kya kundaa ba-Dzwife ya wu li lala kundaa baara baala ka bali ba-Dzwife o. 24 Lo kundaa baara ba óti Nzaami mbili, ngu okala ba-Dzwife, ngu okala ba-Ngereke, nde li Kriste, lileene ya bunsughu bu Nzaami. 25 Mu kuulu lala li Nzaami libvulu bunsughu bu baara, ya okolo o Nzaami oluru mpini a baara mu makpa.
Bi-ósuolo Nzaami
26 Bandughu ba me mu kana, limagyighili otsimi bunu be lili, be ba ooti Nzaami mbili: Mu otala mu embwuru, ka oli a bansughu balagha ŋa kara li be o, ngu okala banga-a-lileene ba balagha, ngu okala baara balagha baba madzumu mama budziri. 27 Lo Nzaami aasuolo ŋa nsie mandagha mama lala mu otwuhu bansughu bupfiri, Nde aasuolo ŋa nsie bilogho bi bikolo mu otwuhu bilogho bi bili a mpini bupfiri. 28 Nzaami aasuolo ŋa nsie bilogho bi bigwene a mupfunu, bilogho bi baakatsaala, bilogho bibi bwunu, mu osa ti bilogho bi bili a mupfunu ŋa nsie bikala bibi bwunu. 29 Mpaala mbwuru si mumõ anyaã okala a mutwunu ŋa mihi mi Nzaami. 30 Ankoho, me mu nkooro a Nzaami be lili mu Yiisu-Kriste. Kriste wuulu mu waa li Nzaami ayi bunsughu bu bihi, bunsumu bu bihi, bungili ya okwulu o bihi. 31 Me mu obo básono ti: «Nyaã ti mbwuru nga a mutwunu asa mutwunu a nde mu Mfumu†1.31 Dze 9.23.»