2
Otsala nsia a Kriste wu bákomo ŋa kuruwa
1 Bandughu ba me mu kana, mu matala ma áyantsala me be nsia yi a mansweghe ma Nzaami, me ka ánsalala mbiili yi a mankumu o, lo me ánsalala mbiili yi a ŋa taa-taa. 2 Mu kuulu me áangwolo munkaana wu onyaã osoolo ndagha nkimi ŋa kara li be kala ti ka yini a Yiisu-Kriste, Yiisu-Kriste wu bákomo ŋa kuruwa. 3 Me mu obo, mu matala ma ándi me ŋa kara li be, me áandi wu a kolo, me áandi a enkwughu mu nzalamweẽ. 4 Maluo ma me ya Nsia yi Mbwe yi ákantsala me, ka bíli bibi mbiili yi a opeene yi a bunsughu o, lo Mufulu ya lileene bíikasuo mi ákandyele me, 5 mpaala kana li be linyaã okala mu bunsughu bu baara, lo mu lileene li Nzaami.
Bunsughu bu Nzaami
6 Lo bihi me bunsughu lili mu okabululuo ŋa kara li baara ba bákughu mu kana. Bunsughu bu ka buli bubu nsie yi o, bwunu we bubu bamfumu ba nsie yi ba bágyighili mu opfighili. 7 Bihi lili mu okabululuo bunsughu bu Nzaami, bunsughu bu básweghe ŋa mihi mi baara ba nsie, bunsughu bu ótswama ogyighili Nzaami mu nkooro a nsia a bihi, nsomo nde agyighili nsie. 8 Ka oli a mfumu si mumõ mu bamfumu ba nsie yi wu áasoolo bo o, mu kuulu, kala ti bo áli basoolo bunsughu bubo, nkini bo áli ka bakaakomo Mfumu wu a nsia ŋa kuruwa o. 9 Lo bwunu a bu básono ti:
«Mandagha maala mihi nkini mímaamono o, maala matswi nkini mámaagyughu o,»
«ya maala mbwuru nkini ámaatsimi mu mukolo o,»
«Nzaami aagyighili mo mu nkooro a babo ba baakadzyi nde.»
10 Lo me kundaa bihi Nzaami aasuo mandagha mamo mu Mufulu a Ngili. Mu kuulu Mufulu aakakeene mandagha mwohono, ngu okala muyighi a bitsimi bi Nzaami. 11 Mu obo, na munde ŋa kara li baara soolo bitsimi bi bili munsa mbwuru, kala ka oli yini a mufulu wu li munsa nde o? Bwunu obo si, ka oli a mbwuru wu soolo bitsimi bi Nzaami o, kala ka yini a Mufulu a Nzaami o. 12 Ankoho bihi ka liigyagha mufulu wu a nsie yi o, lo Mufulu wu aafi kundaa Nzaami, mpaala bihi libaghala bikaba bi oogwi bihi Nzaami mu bwehe bu nde. 13 Ya bihi ka lili mu okabili mu mandagha mamo mu mbiili yi ookaluo bunsughu bu baara o, lo mu mbiili yi ookaluo Mufulu a Nzaami. Obo me bu liikasuo bihi engaŋma e Mufulu mu mbiili yi ookagwa Mufulu. 14 Lo mu embwuru, mbwuru ka kughu okihi mandagha ma Mufulu a Nzaami o. Mu kuulu mo mali lala kundaa nde. Nde ka kughu obaghala mo o, mu kuulu yini a mu Mufulu bakughu obaghala mo. 15 Lo mbwuru wuli mu mufulu aakabaghala mandagha mwohono, lo ndeme, mbwuru ka kughu obaghala nde o. 16 Mu kuulu, «nande aasoolo etsimi e Mfumu mu ogwa nde luo?» Ankoho bihi, bihi lili a etsimi e Kriste.