6
1 Na*inie yakondo 1:8* Pulu Yemo kinie kongono tapu topo tepo molopolie ya nindu ungu kanumunge ungu te pea eno tondolo mundupu nimbo tekero: “Eno Pulu Yemone we kondo kolopalie ⸤eno lipe tapondopa tepa kondorumu ulu kanumu⸥ ‘We naa terimu. Terimu ulumu we manie naa pupili.’ niengi. ⸤Ou eno we kondo kolopalie lipe tapondorumu kinie moloringi mele kinié aku sikula molangi. Konopu alowa teko ulu pulu peangama naa teko molonge kinie kapola naa temba.⸥” nikiru. 2 Aku nikirumunge ungu te Pulu Yemone nimbendo:
“Nane eno we kondo kolombo terindu walemo
wendo orumu kinie
enonga ⸤ungu niringime⸥ pilierindu.
Eno mindili nolemela aulkena wendo lipu
na-kinie pea molko kondonge aulkena
lipu mondombo walemo wendo orumu kinie
eno lipu tapondorundu.”†Aisaya 49:8; bokumunge alsena anjokondo “21. kisim bek”.
nirimu. Nane eno paa nimbu sikiru: Pilieme! ⸤Pulu Yemone nirimu wale akumu paa kinié.⸥ Kinié Pulu Yemone yemboma we kondo kolomba walemo. Kinié Pulu Yemone yemboma lipe tapondopa, mindili nolemela aulkena wendo lipe yu-kinie pea molko kondonge aulkena lipe mondomba walemo.‡ungu pulu te Ipuru 3:12-19.
6:3-13 Pollone Kirasinge Kongono Tenderimumunge
3 ‘Nanga kongonomo manie naa pupili, ungu taka naa tondangi.’ nimbu yembomane na kanoko keri kanoko ungumu naa pilku linge ulu te naa telio. 4 Akumu molo. ‘Yembomane na kanokolie ‘Pulu Yemonga kendemande yemo molio.’ ningu piliengi!’ nimbu aku telio. Na-kinie ulu mare wendo olemo kinie telio mele kanokolie ‘Yu sike Pulu Yemonga kendemandemo.’ ningu pilinge ulume isipe:
⸤Umbunema⸥ na⸤-kinie wendo olemo kinie
‘Siye tekemo.’ naa nimbu⸥ tondolo mundupu molio;
ulu umbune lupe lupema na-kinie wendo omba,
na teko kenjilimele ulume wendo omba,
na mindili sipu molio ulume wendo olemo.
5 ⸤Wale marenga⸥ enone na kopene toko,
⸤wale marenga⸥ ka siku,
⸤wale marenga⸥ yembomane pali na-kinie mumindili kolko
ru ningu lkisiku sukundu sukundu ongo maku toko
na teko mundu-mongo tendelemelela.§Lipe Mundorumu Yema 19:23-41, 21:27-32.
Na kongono mindili sipu tepo,
⸤wale marenga⸥ uru naa pepo,
⸤wale marenga⸥ engelene kolopo moliola;
6 ⸤yembomane na kanokolie ‘Pulu Yemonga kendemande yemo molemo.’ ningu pilinge mele isipela:⸥
Na ulu kake telime tepo,
pilipe konginjeli peangamo ambolopo,
ólo áme topili molopo,
yemboma kondo kolopo tepo kondolio;
na Mini Kake Telimu kinie tapu topo molopo,
yemboma konopu mondolio ulu akumu
kolo naa topo paa sike konopu mondolio;*Gallesia 5:22-23*.
7 sike ungume nimbu,
Pulu Yemonga engemone kongono telio;
yemboma opa tengendo ele tolo melema
ki ekendo ekendo ingi siku ambolemele mele
na aku sipu ulu sumbi nilime ambolio;†Epesasi 6:16-17.
8 yembo marene nanga imbimu liku ola mundunduku,
marene nanga imbimu toko manie munduku;
marene nanga ungu bulkundu nindiku,
marene na kapi nilimele.
Kongono sikema sumbi sipu telio nalo nando
“Kongonomo nu kolo toko tekeno.” nilimele;
9 yembomane na kanoko imbi silimele nalo
“Pea molamili.” naa ningu, bulu silimele.
Wale mare ‘Paa kolkoro.’ konopu lelio nalo
konde pupu we molio.
⸤Na telio mele kanoko keri kanokolie
‘Munduku siye kolko konopu alowa teani.’ ningu⸥
pulsene tolemele nalo na toko naa kondolemele.
10 Na taki-teki konopu keri awisili pelemo nalo
‘Akumu yu tepili.’ nimbu konopu sipu molio;
koropamo molio nalo yembo lupema
‘Kamakoma molangi.’ nimbu aulke te akisindilio;
mele teluri kepe naa nosilio nalo
mele kande kandema pali nosilio.
⸤‘Yembomane na kanokolie ‘Yu sike Pulu Yemonga kendemandemo molemo.’ ningu piliengi!’ nimbu aku sipu tepo molio.⸥
11 Korini yemboma, nane ungu te lopi naa tepo, pali enondo nimbu para sikiru. Nane eno paa lakopo konopu mondolio. 12 Nane eno ‘Kondo naa kolopo siye kolambo.’ paa manda naa nilio nalo enone na ‘Kondo naa kolopo siye kolamili.’ nilimele⸤monga konopu telune naa pupili molemolo⸥. 13 Lapalini enonga ambolangomando nilimele mele kinié nane ‘Eno nanga ambolangoma.’ nimbulie enondo isipu nikiru: ‘Nane eno konopu awili tepo mondolio mele enone na aku siku konopu awili teko mondangi.’ nimbu nikiru. Mindili Norumu Mele Ungu Te‡Pollo-kinie umbunema wendo orumu ungu mare 11:16-33; ungu pulu 11:16-33*.
6:14-7:1 Kirasinge Yemboma Pulu Yemonga Ulke Kake Telimu Molemelemonga Ulsukundu Molemele Yemboma Kinie Telune Tapu Toko Naa Molangi Ungu Te
14 Kirasinge yemboma ‘Kirasi sike’ ningu naa pilimele yemboma-kinie telune tapu toko naa andoko, tapu toko kongono naa teko, bisinete tapu toko naa teangi.§Ungu Manema 22:10, Ou Pulu Pulu 24:3. Ulu pulu kerime kinie ulu sumbi nilime kinie liku tere leko manda kongono tengeleye? Pa telimu kinie sumbulu tolimu kinie elo*Jono 1:5, 3:19-21, Epesasi 5:8-11, Jono Kumbi Lepamo 1:5-7. nambeko tapu toko molongeleye? ⸤Akumu paa kapola molo⸥ kene ⸤telune tapu toko naa molangi.⸥ 15 Kirasi kinie kurumenga nomi tepa kenjeli ⸤Setene⸥†Giriki ungune imbi “Setene” nimbe naa molemo. “Belliele” nimbe molemo, aku imbimunge pulumu torumulu. kinie konopu telune pupili molembeleye?‡Mateyu 12:24-28. Kirasinge ungumu pilimele yemboma kinie Kirasinge ungumu naa pilimele yemboma kinie konopu telu sipe pelemoye? 16 Pulu Yemo molemo ulke tembelemonga ulke suluminia kake teline kuru koyonge melema manda mengo puku popo tongeye?§Ou Korini 10:21. Olio, konde molopa mindi puli Pulu Yemonga suluminia kake telimu molemolo,*Yunge ulkemo molemolomonga ungu mare Ou Korini 3:16-17*. yu olio-kinie molemo kanumu. ⸤Yu-kinie aku sipu molemolo⸥ monga ungu te Pulu Yemone ou nirimu kanumu. Yuni nimbendo:
“Na nanga yemboma kinie telune tapu topo molopo,
enonga suku-singine molopo eno pea andomolo.
Na enonga Pulu Yemo molombo;
eno nanga yemboma molonge.ӠLLipai 26:12, Isikiele 37:27; ekendo akilipemo mele Jeremaya 32:38.
nirimu. 17 ⸤Ya nikiru⸥ akumunge
‘Awilimuni nimbendo:
“⸤Ulsukundu yemboma kinie, we melema anjiku
kapi ningu popo tolemele yemboma kinie,⸥
eno-kinie telune naa molko, munduku siye kolko
puku kolea tenga lupe molo-pangi.”‡Isikiele 20:34,41.
“Kalaro mololi melema ⸤ulsukundu yembomane
anjiku popo tolemele melema⸥ kinie
ulu pulu keri pelemo melema kinie kanume
naa ambolko,
aku melema kinie ulu te naa teaa.ӤAisaya 52:11.
“Naa ambolonge kinie nane
“Molamili waa.” nimbu eno yando limbo.”*Jeremaya 32:38.
18 “Na enonga Lapamo molombo,
eno nanga ambolangoma molonge.†bokumunge alsena anjokondo “31.3. pikinini bilong God”.
Na Pulu Yemo, melemanga pali engemo
pelemo yemone‡bokumunge alsena anjokondo “13. God”. aku sipu nikiru.”§Pe Samuele 7:14,8. nirimu.’
kanumu.
*6:1: inie yakondo 1:8*
†6:2: Aisaya 49:8; bokumunge alsena anjokondo “21. kisim bek”.
‡6:2: ungu pulu te Ipuru 3:12-19.
§6:5: Lipe Mundorumu Yema 19:23-41, 21:27-32.
‡6:13: Pollo-kinie umbunema wendo orumu ungu mare 11:16-33; ungu pulu 11:16-33*.
§6:14: Ungu Manema 22:10, Ou Pulu Pulu 24:3.
*6:14: Jono 1:5, 3:19-21, Epesasi 5:8-11, Jono Kumbi Lepamo 1:5-7.
†6:15: Giriki ungune imbi “Setene” nimbe naa molemo. “Belliele” nimbe molemo, aku imbimunge pulumu torumulu.
§6:16: Ou Korini 10:21.
*6:16: Yunge ulkemo molemolomonga ungu mare Ou Korini 3:16-17*.
†6:16: LLipai 26:12, Isikiele 37:27; ekendo akilipemo mele Jeremaya 32:38.
‡6:17: Isikiele 20:34,41.
§6:17: Aisaya 52:11.
*6:17: Jeremaya 32:38.
†6:18: bokumunge alsena anjokondo “31.3. pikinini bilong God”.
‡6:18: bokumunge alsena anjokondo “13. God”.
§6:18: Pe Samuele 7:14,8.