JONO YEPOKO-SIPEMO
JONOne Wale YEPOKO SIPE Pepá Topa Sirimu Bokumu
Jonone I Pepá Topa Sirimumunge Ungu Pulu Mare
Ungu pulu mare inie yakondo gomo 1239 molemo, aku ungumu kanani.
Jonone ye mare “Kirasinge ungume andoko mane siengi pangi.” nimbe lipe mundorumu yema Esia poropinji kolea tenga Kirasinge yembo talapemonga ye tene “Ya naa wangi. Anjo paa.” nimbe topa makororumu. Kanu yemonga imbimu Diyorepasi. Yembo marene Jonone lipe mundorumu-ne oringi yemando “Pea peamili wangi.” niringi kinie Diyorepasini kano yembomando “Kirasinge yembo talapena ulsu paa.” nimbe topa makororumula. Jonone i pepámo ye Gayasi molorumune topa mundupelie nimbendo: “Ye mare “Koleamanga andoko mane siengi.” nimbu lipu mundulio yema “Pea peamili wangi. Enonga ungume piliemili.” ningu telenomo paa teko kondoleno.” nimbe pepámo topa, “Diyorepasini tepa kenjilimomonga yu ombo kanopolie yu tondolo mundupu mane simbo.” nimbe pepámo torumula.
Ya ungu pulumu pora nikimu.
1
1-15 pali “SIKE.’ NIMBU TONDOLO MUNDUPU PILIMOLO MELE MINDI PILIPU LIPU MOLAMILI.’ NINGU KANOKO KONDOKO MOLKO, TEMANE PEANGAMONGA OPA-PULUEMANE NILIMELE UNGUME NAA PILKU BULU SIENGI UNGU TE
1 Pep mo Tombando Pulu Polopa Torumu Ungumu
1 Na ⸤Kirasinge yembomanga⸥ tapu ye andamone*Jono Talo Sipemo 1-2*. nanga angenu peangamo, sike paa konopu mondolio ye Gayasi nu ⸤ipepámo topo sikiru⸥.
2-4 Ye Gayasi Sumbi Sipe Molorumu Mele Pilipelie Jono Konopu Sirimu Temanemo
2 Nanga angenu peangamo, nane ‘nunge minimu pepa kondolemo aku sipe nuni kongonoma tenindu umbune te wendo naa opili teko kondoko, nu kuru te naa topili molko kondani.’ konopu lekero. 3 Angenupili ye mare ongo nando temane tokolie ningendo: “Nu sike ungumu paa ambolko kondoko, nuni ungu sikema paa pilku liku teko moleno.” niringi pilipulie na paa konopu sirindu. 4 Nanga ambolangomane ungu sikema pilku liku teko molemele mele pilipulie konopu silio mele paa olandopa.
5-8 Ye Gayasini Tepa Kondorumu Temanemo
5 Nanga angenu peangamo, angenupili nunge koleana olemelema sike paa ponenge lemele nalo eno paa liku tapondoko nokoko molenomonga paa teko kondoleno. 6 Nuni eno konopu mondoko nokoleno mele enone Kirasinge talape yemboma†bokumunge alsena anjokondo “43. sios”. ningu siringi. Nuni ‘Pulu Yemonga kongonomo tekero.’ konopu leko ‘Aulkena langi noliku pangi.’ ningu liku tapondonu liemo papu. 7 ‘We ulsu molemele yembomane‡bokumunge alsena anjokondo “2. arapela lain”. naa liku tapondangi.’ ningu kanu yema eno ‘Yemboma Yesusinge imbi paa piliengi!’ ningu ⸤enonga pulu koleama munduku siye kolko⸥ andolemele. 8 Akumunge olione kanu yema lipu tapondopo langi sipu ‘Ulkemanga peangi.’ nilimolo kinie papu. Enone ‘Ungu sikemonga kongono telemelemonga lipu tapondamili.’ nimbu aku teamili.
9-11 Ye Dayoterepisini Tepa Kenjerimu Temanemo
9 Kirasinge yembo talapemo pepá te topo sirindu nalo Dayoterepisini yu ‘enonga ye awilimu molombo.’ konopu lepa molemo yemone olionga ungume naa pilipe limo. 10 Akumunge na eno molemelena ondu liemo yuni olionga ungu bulkundu nindilimo mele nimbu para simbo. Akumu mindi molo. Yuni angenupili ponenge leko olemele kinie ‘Okomeleye?’ nimbe ki naa lipe “Pea molamili.” naa nimbe, yembo ponenge olemelema “Pea pe-pamili waa.” nilimele kinie yuni “Naa mengo pangi. Molo!” nimbe, Kirasinge yembo talape molemele ulkena makoropa pena pena telemo.
11-12 Ye Demitiriasini Ulu Peangama Terimu Temanemo
11 Nanga angenu peangamo, ulu kerime kanoko manda manjiku naa teyo. Ulu peangama mindi kanoko manda manjiku teani. Yembo te ulu peangama telemo yembomo Pulu Yemonga yembomo molemo. Yembo te ulu kerime telemo yembomone ‘Pulu Yemo kinie tapu topo molambili.’ ou naa nimbe yu molemo mele tondolo mundupe naa pilierimu.
12 Yembomane ye Demitiriasi ‘yu ye peangamo’ nilimele. Yuni tepa kondolemo mele ungu sikemone lipe ora silimola. Nane kepe ungu sikema mindi nilio nu pilino yemo molio kanumu nane ‘Yu molopa kondolemo.’ niliola.
13-15 Pep Topa Pora Sipelie Ungu Wallo-Kolte Torumu Ungume
13-14 Na ungu awisili pepá topo silke nalo ‘olto paa kamu konopu awili tepo sipulu molambili kene nu molenona ombo mongone kanopo nu-kinie ungu nimbu sipu molambo.’ nimbu pilipulie pepá naa toli siye kolkoro.§Jono Talo Sipemo 12.
15 Nu konopu pe nipili molani. Nunge yembo pulu lemomane “Nu molou.” nilimele. Nuni olionga yembo pulu lemo nu-kinie molemelema yu-mele-mele imbi leko “Olione ‘Eno molaa.’ nikimulu.” nieni.
⸤Aku pea nikiru.⸥